ფრთხილად! უცხოელს თქვენს ბინაში ჩაწერისთვის თქვენი ნებართვა აღარ სჭირდება
თუ ერთ დილას გაიღვიძებთ და ბალიშზე თქვენ გვერდით რამდენიმე ჩალმიან, ან "კასაგლაზ" კაცს აღმოაჩენთ დაგორებულს, არ გაგიკვირდეთ, რადგან მოქმედი კანონმდებლობის მიხედვით, უცხოეთის მოქალაქეს საქართველოს მოქალაქის საკუთრებაში არსებულ ბინაში მისი ნებართვის გარეშე შეუძლია ჩაეწეროს და რაც ყველაზე ტრაგიკომიკურია, კანონმდებლობის მიხედვით, საცხოვრებელ ფართზე უცხოელის დარეგისტრირების შესახებ საქართველოს მოქალაქეს ინფორმაცია არ მიეწოდება, რადგანაც რეგისტრაციისთვის აუცილებელ პროცედურებში არ შედის ინფორმაციის გადამოწმება, რეალურად ცხოვრობს თუ არა განმცხადებელი მის მიერ მითითებულ მისამართზე. კანონმდებლობის შესაბამისად, დროებითი ბინადრობის მოწმობის გასაცემად სამოქალაქო რეესტრის სააგენტო არ ითხოვს არც საცხოვრებლის მესაკუთრის ნებართვას და მოწმობის გაცემის შემთხვევაშიც, არ ატყობინებს მას მის კუთვნილ ფართზე უცხოელის დარეგისტრირების შესახებ.
დროებითი რეგისტრაციის აუცილებლობა გამოწვეულია იმით, რომ ხშირ შემთხვევაში გამქირავებლები უარს აცხადებენ იმ ხალხის დროებით რეგისტრაციაზე, რომლებიც, ფაქტობრივად, ცხოვრობენ მათ კუთვნილ ბინებში. სამაგიეროდ, მიაქციეთ ყურადღება: უცხოეთის მოქალაქისგან განსხვავებით, ბინადრობის მოწმობის მისაღებად საქართველოს მოქალაქეს მოეთხოვება ორი პირის წერილობითი დასაბუთება, რომ ნამდვილად ცხოვრობს მითითებულ მისამართზე, ან თავად ბინის მესაკუთრის დასტური.
მე, პირადად, გამიჩნდა შეგრძნება, რომ ჩვენს ქვეყანაში კანონმდებლობის მიხედვით უფლებების დაცვის მხრივ ემიგრანტები ჩვენ ვართ და არა ჩამოსულები.
"ალია" კომენტარისთვის რეესტრის სამოქალაქო აქტებისა და მოსახლეობის რეგისტრაციის სამსახურის უფროსის მოადგილეს მირანდა არაბიძეს დაუკავშირდა:
- დროებითი რეგისტრაციის აუცილებლობა გამოწვეულია იმით, რომ ხშირ შემთხვევაში, გამქირავებლები უარს აცხადებენ იმ ხალხის დროებით რეგისტრაციაზე, რომლებიც, ფაქტობრივად ცხოვრობენ მათ კუთვნილ ბინებში, ეს გასაგებია, მაგრამ ეს იძლევა კი იმის უფლებას, კანონმდებლობა დამქირავებლის ყაიდაზე მოეწყოს? მე რა დავაშავე, თუ ჩემს მისამართზე ჩინელს ან ირანელს ვიპოვი?
- აგიხსნით. დროებითი რეგისტრაციის მქონე უცხოელისთვის არ არის სავალდებულო, წარმოადგინოს მესაკუთრის თანხმობა და საკუთრების დამადასტურებელი დოკუმენტი და მისი ცხოვრების ფაქტი დადასტურებული იქნეს ორი სრულწლოვანი მოწმის მიერ. შესაბამისად, აღნიშნული პირის რეგისტრაცია ხორციელდება მისი განცხადების საფუძველზე. ანუ, ჩვენთან ეს ადამიანი მოვა და მიუთითებს მხოლოდ მისამართს და იქ დარეგისტრირდება.
- ანუ, მიდასტურებთ, რომ მოვა თქვენთან უცხოელი, გეტყვით, რომ თამარ ოქრუაშვილის მისამართზე ცხოვრობს და მე ჩამიწერთ, არა?
- ახლა აგიხსნით, რა მოხდება იმ შემთხვევაში, თუ ასეთი შემთხვევა გამოვლინდება.
- გინდათ მე აგიხსნათ? ვიღაც შემომაკვდება, ალბათ.
- თქვენ უნდა მოგვაწოდოთ ინფორმაცია, რომ, თუ გამოვლინდება ის, რომ რომელიმე ასეთმა პირმა არასწორი ინფორმაცია მოგვაწოდა და რეგისტრაცია განხორციელდა იმ ადგილზე, სადაც ის ცხოვრობს, მაშინ ეს რეგისტრაცია ბათილად იქნება ცნობილი.
- ბათილად კი არა, ეს პიროვნება არ ისჯება? ის ცრუობს და კანონმდებლობა მას ამ სიცრუეს პატიობს?
- ჩვენი ვიწრო კანონმდებლობით ცალსახა მითითება იმის შესახებ, რომ პიროვნებამ არასწორი ინფორმაცია გასცა, არ ითვალისწინებს დასჯას. დასჯა არ არის ჩვენი კომპეტენცია. ჩვენი კანონდმებლობით ეს ქმედება არ ისჯება. ანუ, ასეთი მითითება უცხოელის მიმართ, ჩვენს კანონმდებლობაში ჩადებული არ არის.
- ძალიან ცუდი. სამაგიეროდ, უცხოეთის მოქალაქისგან განსხვავებით, ბინადრობის მოწმობის მისაღებად საქართველოს მოქალაქეს მოეთხოვება ორი პირის წერილობითი დასაბუთება, რომ ნამდვილად ცხოვრობს მითითებულ მისამართზე, ან თავად ბინის მესაკუთრის დასტური.
- აგიხსნით. უცხოელს ჩაწერისთვის არ სჭირდება მოწმე. საქართველოს მოქალაქეზე გაიცემა პირადობის მოწმობა. იმისთვის, რომ საქართველოს მოქალაქე დარეგისტრირდეს, მას სჭირდება საკუთრების დამადასტურებელი მოწმობა და მესაკუთრის დასტური, დიახ. თქვენი რეგისტრაცია არის მუდმივი რეგისტრაცია, მათი კი - ვადიანი.
- მაინტერესებს, თუ გაქვთ მონაცემები, რამდენად ხშირია ის ფაქტები, რომ საქართველოს მოქალაქეების ბინებში მოულოდნელად უცხოელები აღმოჩნდნენ ჩაწერილები? თუ ფიქსირდება მსგავსი შემთხვევები და რამდენად ხშირად?
- იცით რა? მე ნამდვილად არ შემიძლია ზუსტი სტატისტიკა მოგაწოდოთ, რადგან ეს უფრო ტერიტორიულ სამსახურებს ეხება და პირველი ინსტაცია ის არის. მესაკუთრეს რა პრობლემაც აწუხებს, ამ სამსახურში სწორდება. ამდენად, მე პირადად, ამ წუთისათვის ამ სტატისტიკას არ ვფლობ.
თამარ ოქრუაშვილი
გაზეთი "ალია"
