როსტომ კაზინოში ირაკლი კოდუას კუთვნილი ფული წააგო?
რამდენიმე კვირაა გავრცელდა ხმა ნანუკა ჟორჟოლიანის შოუდან ლევან როსტოშვილის, იმავე როსტოს წასვლასთან დაკავშირებით. ცნობილია, რომ როსტო ნანუკა ჟორჟოლიანის მეგობარი და ამავე დროს მის ოჯახთან დაახლოებული პირია. იგი ნანუკას მეუღლესთან, ირაკლი კოდუასთანაც მეგობრობს.
როგორც ამბობენ, ირაკლი კოდუამ საქართველო არჩევნების შემდეგ მალევე დატოვა და ამჟამად ჩეხეთის დედაქალაქ პრაღაში იმყოფება. იმასაც ამბობენ, რომ მასთან პერიოდულად ჩადიან როსტო, ნანუკა და ნანუკას ძმა მიშა ჟორჟოლიანი.
ქალაქში ბოლო დროს გავრცელებული ჭორის თანახმად, ერთ-ერთი ასეთი ვიზიტისას, როდესაც როსტო ნანუკას ძმასთან ერთად სტუმრობდა ირაკლის, როსტომ კოდუას ბინიდან მისი კუთვნილი 2 ათასი ევრო ნებართვის გარეშე აიღო და კაზინოში წააგო. ირაკლის "ზარალი" უნახავს, მაგრამ არ შეუმჩნევია. აზარტში შესულ როსტოს კი, როგორც ჩვენი წყარო გვატყობინებს, ისევ დაუკითხავად, ამჯერად უკვე 20 ათასი ევრო აუღია და ისიც წაუგია. როგორც კოდუა-ჟორჟოლიანთან დააახლოებული პირი გვიყვება, ირაკლი კოდუას ეს უკვე აღარ უპატიებია და როსტოს ფიზიკურადაც გასწორებია. კოდუას როსტოს მიერ ფულის დაუკითხავად აღება სწყენია, თორემ ამ თანხის დაკარგვით მას განსაკუთრებული ზარალი არ მისდგომია. ,,ნანუკას და ირაკლის როსტო ყველგან დაჰყავდათ, სადაც დადიოდნენ, საზღვარგარეთაც კი, ოჯახის წევრივით ჰყავდათ და ეს არ უნდა გაეკეთებინა მათთვის", - გვითხრა ოჯახის ახლო მეგობარმა.
ამ ჭორის გადასამოწმებლად ნანუკა ჟორჟოლიანს დავურეკეთ.
- ნანუკა, როსტოსთან დაკავშირებით გვაქვს რამდენიმე შეკითხვა...
- როსტოო? (გაკვირვება ვერ დამალა).
- დიახ, თქვენს გადაცემაში ხომ აღარ არის?
- პრინციპში არ ვიცი, აღარ არის თუ არა, ახლა ირკვევა. მე მგონი, აღარ მიდის მოსკოვში. ის ხომ ადრე იყო მოსკოვში. ახლაც მიდიოდა თავის დასთან, ნატოსთან. მისი და ხომ იქ მუშაობს ტელევიზიაში, სოფო შევარდნაძის პროდიუსერია. როსტო მასთან წასვლას აპირებდა. მერე გადაიფიქრა. თუ წავიდოდა, სამი თვე არ იქნებოდა. ეს სეზონი სექტემბრამდეა და ხომ ხვდებით, თუ სამი თვე არ იქნებოდა, გამოდიოდა, რომ ამ სეზონზე თითქმის არ იქნებოდა. გუშინ ველაპარაკე და მითხრა, ვეღარ მივდივარო და ამიტომ ვერ ვიტყვი, რომ აღარ არის ჩემს შოუში.
- ამბობენ, რომ თქვენ გაუშვით...
- ბატონოო???
- გავიგეთ, რომ რაღაც უთანხმოება მოუვიდა თქვენს ოჯახთან, საკმაოდ დიდი თანხა წააგო კაზინოში, რომელიც თქვენს მეუღლეს ეკუთვნოდა.
- აუ, აბსურდია, ხალხო, რას მელაპარაკებით!
- თქვენთან დაახლოებული პირებისგან შევიტყვეთ ეს ინფორმაცია...
- ძალიან ცუდია, თუ ასეთი დაახლოებული პირები მყავს, რომლებსაც მეტი საქმე არ აქვთ, რამე თუ შემიძლია დავიფიცო, ყველაფერს დავიფიცებ, რომ აბსურდია. ყველაფრის მოგონება შეიძლება, მათ შორის იმის, რომ ჩემმა მეუღლემ 21 წლის გოგო მოიყვანა ცოლად, მაგრამ ასეთი რაღაცების მოფიქრება აღარ შეიძლება. თქვენ რა შუაში ხართ, თქვენ ვიღაცამ გითხრათ, მაგრამ უსაქმურები არიან რა... 
- ვიღაცამ არა, არ შეგაწუხებდით, ვიღაცისგან რომ გაგვეგო და არა თქვენს ოჯახთან ძალიან ახლო მყოფისგან.
- მესმის, ჩემო კარგო, ჟურნალისტი ხარ, ამოწმებ... ხომ გეუბნებით, იმდენი ჭორი გამიგია, მათ შორის ირაკლის 21 წლის გოგოსთან ქორწინებაზე. ხომ ხვდებით, ყველა ჭორს ვპასუხობ, გამორიცხულია, მე ჟურნალისტს რაიმე კითხვაზე არ ვუპასუხო, მაგრამ ასეთი რაღაცის დაბრალება ადამიანისთვის ბოროტებაა... არა, მართლა, ახლა გამორიცხულია, ან ჩემთან ერთად თბილისში არ უნახავთ?.. ყველგან ერთად ვართ, რა არის ეს? მართლა გავბრაზდი, მაპატიეთ, თქვენ არაფერ შუაში ხართ. სულ ერთად ვართ, რაღაციდან
ხომ უნდა მოდიოდეს ჭორი, ან კონტაქტი არ უნდა გვქონდეს, ან ერთმანეთს არ უნდა ვნახულობდეთ. თან გამიგია ჭორის ინტრიგა, ყველაფერი გამიგია, მაგრამ ეს ბოროტება არ არის?
- როგორ გითხრათ, ისეთი არაფერია ალბათ, რომ განსაკუთრებული ბოროტება იყოს...
- რა თქვეს ჭორი, სწორად გავიგე? გამიმეორეთ...
- თქვენ არც მოგვისმინეთ და ისე გააკეთეთ კომენტარი?!. თქვეს, რომ თქვენს მეუღლესთან იყო პრაღაში წასული, სადაც მისი კუთვნილი თანხა კაზინოში წააგო და შემდეგ უთანხმობა მოუვიდათ.
- და ეს ბოროტება არ არის? სწორად გავიგე, ჩემი მეუღლე ვერ გავიგე, თორემ ფული წააგოო, გავიგე. ადამიანს რომ ამას დააბრალებ, ბოროტება არ არის? მაშინ ბოროტება რა არის, ამიხსენით?
- დაბრალება ბოროტებაა ნამდვილად.
- გარანტიას გაძლევთ, რომ დააბრალეს ბიჭს ეს. როცა ამბობენ, რომ კოდუამ ცოლი მოიყვანა, ბოროტება არ არის და ვერთობი. პირდაპირ გეუბნებით, ორი შვილი მომიკვდეს, ძალიან ვერთობი ამაზე. როსტომ ფული მოიპარაო, ეს ბოროტებაა. მაპატიეთ, თქვენ არაფერ შუაში ხართ ამ შემთხვევაში, თქვენ გადაამოწმეთ, სამწუხაროდ, ეს ჭორი პირველმა.
როსტო ნანუკას სამხატვრო ხელმძღვანელის, თათა სახელაშვილის გარდაცვლილი ძმის, წყალბურთელ ზუკა სახელაშვილის ძმაკაცი იყო. სწორედ ზუკა სახელაშვილის ხსოვნას ეძღვნება ტურნირი "ზუკას თასი", რომლის სულის ჩამდგმელი და ორგანიზატორიც როსტო გახლავთ. როგორც გავიგეთ, თათას იდეა ყოფილა ნანუკას გადაცემაში როსტოს მიყვანაც. როგორც ამბობენ, თათას აზრს ქართული საზოგადოების გარკვეული ფენა დიდ პატივს სცემს და ითვალისწინებს.
გიორგი მაისურაძე
ჟურნალი "რეიტინგი"
