ვარსკვლავების საუკეთესო ვარცხნილობა და მაკიაჟი ოსკარი 2013 წლის ცერემონიაზე
ამერიკის კინოაკადემიის პრემია ოსკარის დაჯილდოების ცერემონიაზე ვარსკვლავებმა არჩევანი გააკეთეს უკვე გამოცდილ ვარცხნილობას და მაკიაჟზე.
ჰოლივუდის მთავარ და მნიშვნელოვან წვეულებაზე ყველას სურდა იდეალური გარეგნობა ჰქონოდა და ვარსკვლავების უმრავლესობას ეს პრაქტიკულად გამოუვიდათ.
ოსკაროსანმა ჯენიფერ ლოურენსმა აირჩია ტრადიციული smoky eyes და მაღალი ვარცხნილობა, ჯესიკა ჩესტეინმა არ უღალატა წითელ პომადას და დატალღულ თმას, ადელმა ხელოვნური წამწამები და ისრები დაიხატა თვალებზე.
ოსკარის დაჯილდოებაზე დიდებულად გამოიყურებოდა შარლიზ ტერონი, მისი გარეგნობა და კაბა მეტად შთამბეჭდავი იყო.
მსახიობმა მოკლე თმას, რომელიც ფილმის "Mad Max"-ის გადაღებისთვის გადაიპარსა ზაფხულში, ცვილის მეშვეობით გარკვეული ტექსტურა მიანიჭა, მაკიაჟი კი მინიმალისტური გახლდათ, მისი კანი შიგნიდან ანათებდა, თვალები ხაზგასმული იყო ნათელი ბრწყინავი ჩრდილებით და ისრით, ტუჩებს კი ნაზი ვარდისფერ-კანისფერი პომადა ამშვენებდა.
მსახიობმა ენ ჰეტევეიმ, რომელმაც ოსკარი ქალის მეორეხარისხოვანი როლის შესრულებისთვის მიიღო ფილმში "საბრალონი", უკვე წამოზრდილი მოკლე თმა გვერდზე გადაივარცხნა და "ჩოლკის" ფორმა მისცა, მაკიაჟში კი აქცენტი ტუჩებზე გაკეთდა, რომელსაც ვარდისფერი პომადა ამშვენებდა.
ოსკაროსანი ჯენიფერ ლოურენსი ყოველთვის საუკეთესო მაკიაჟს ირჩევდა. დაჯილდოების ცერემონიაც არ იყო გამონაკლისი. ნაზი ნაცრისფერი smoky eyes და ხელოვნური წამწამების მეშვეობით მსახიობის თვალები მეტად გამოკვეთილი გახლდათ, ხოლო ტუჩებზე ღია ფერის ვარდისფერი საცხი მაკიაჟს სრულყოფილად ასრულებდა.
ნიკოლ კიდმანი უკვე დიდი ხანია უპირატესობას ბუნებრივ მაკიაჟს ანიჭებს გამოკვეთილი ხაზების და კაშკაშა ფერების გარეშე. ამგვარად 45 წლის მსახიობი შესანიშნავად ფარავს სიბერის კვალს სახეზე.
წლები მიდის, მაგრამ 44 წლის ჯენიფერ ენისტონის ვარცხნილობა და მაკიაჟი უცვლელი რჩება, ის კვლავინდებურად აქცენტს აკეთებს მოციმციმე გარუჯულ კანზე.
ნაომი უოტსმა მოახერხა მაყურებლების გაოცება, მსახიობის გარეგნობა უკანასკნელ ხანებში მეტად ბანალური იყო, მაგრამ "ოსკარის" ცერემონიისთვის ნაომიმ აირჩია მარტივი და ამავდროულად დასამახსოვრებელი მაკიაჟი და ვარცხნილობა. მოკრძალებულმა მაკიაჟმა ხაზი გაუსვა მის საუკეთესო ნაკვთებს, მაღლად აწეულმა თმამ უფრო მიმზიდველი გახადა Giorgio Armani-ის კაბის ჭრილი.
ჯესიკა ჩესტეინი აგრძელებს წითელ ხალიჩაზე ჰოლივუდის ლამაზმანის იერსახით გამოჩენას. მისი წითელი პომადა და ტალღისებურად დალაგებული, გვერდზე გადავარცხნილი თმები საკმაოდ წარმატებულია 2013 წელსაც.
კრისტენ სტიუარტმა არ უღალატა თავის ჩვეულ სტილს და წითელ ხალიჩაზე აირჩია მოცულობითი, გვერდზე გადაწეული თმა და მსუბუქი ბრინჯაოსფერი smoky eyes. ტუჩებისთვის კი მსახიობმა ვარდისფერი პომადა აირჩია.
ოსკაროსანი მსახიობის ბენ აფლეკის მეუღლემ ჯენიფერ გარნერმა მაღლა აწეული თმები და მაქსიმალურად ნეიტრალური ფერის მაკიაჟი აირჩია: ნათელი ჩრდილები, გამახალისებელი ვარდისფერი ფერ-უმარილი და ტუჩებისფერი პომადა.
ადელი, - რომელმაც ოსკარი მიიღო სიმღერისთვის Skyfall, ჯეიმს ბონდის ბოლო ფილმიდან, -იერსახეს პრაქტიკულად არ იცვლის: მოცულობითი ვარცხნილობა, შავი ისრები თვალზე და ხელოვნური წამწამები ქმნის მომღერლის გარეგნობას.
