ნანიკო ხაზარაძე: "ჩემგან და ნიკასგან ექსცენტრული წყვილი აღარ შედგება"
12 წლიანი განშორების შემდეგ ნანიკო ხაზარაძე და ნიკა ლომიძე "მაესტროს" ეთერში კვლავ ერთად ბრუნდებიან. ისინი წაიყვანენ შუადღის გადაცემას "თავისუფალი დრო". წყვილი მაყურებელმა პირველად დილის გადაცემით გაიცნო, რომელსაც "ტოროლა" ერქვა. ენერგიული, მხიარული და არასტანდარტული წამყვანები მაშინ ხშირად იყვნენ საზოგადოების განხილვის ობიექტები. ლაპარაკობდნენ მათ რომანზე, განშორება–შერიგებაზე. დღეს ნანიკო ამბობს, რომ მაყურებელი მათგან ასეთ წყვილს ვეღარ იხილავს, რადგან ამ ხნის განმავლობაში სხვა ღირებულებები, შეხედულებები ჩამოუყალიბდათ.
– ნანიკო, როცა "მაესტროს" ხელმძღვანელ მამუკა ღლონტისგან ამ არხზე დაბრუნების შემოთავაზება მიიღეთ, რა რეაქცია გქონდათ?
– ძალიან გამიხარდა. იმ წუთში ნიკას და ყველას დავურეკე, ვაიმე, რა მაგარია, ვბრუნდებით–მეთქი. აქ ძალიან კარგია.
– არადა, წლების წინ ეს არხი დატოვეთ.
– გავთხოვდი, ცხოვრების სხვა ეტაპზე გადავედი. მერე ისევ დავბრუნდი, შემდეგ ისევ წავედი. ერთი სიტყვით, ბევრჯერ წავედ–წამოვედი. ეს ყველაფერი ისე კარგად ხდებოდა, რომ დიდი განცდა და რაღაცაზე დარდი არ მქონია. საერთოდ, როცა წინ მიიწევ, უკეთეს შემოთავაზებას იღებ და თანხმდები. "იმედზე" სამი წელი ვიყავი, არ ვთვლი, რომ ეს ცოტა დროა. ვფიქრობ, დროული იყო იმ გადაცემის დახურვაც, რადგან ალბათ თავისი რესურსი ყველანაირად ამოწურა. ახალი ეტაპი და ცვლილებები ყოველთვის კარგია.
– რადიკალური ცვლილებები არ გაშინებთ?
– არა, ეს ძალიან კარგი საშუალებაა იმისთვის, რომ გაიზარდო, ახალი ემოციები მიიღო. რადიკალური ნაბიჯები აქამდე ყოველთვის ამართლებდა, მგონია, რომ შემდეგშიც ასე იქნება.
– ეთერში კვლავ ნიკასთან ერთად ბრუნდებით. ალბათ ეს განსაკუთრებული განცდაა.
– კი, მე და ნიკა ეთერში ერთად 12 წლის წინ ვისხედით. მაშინ სხვა ინტერესები, ხასიათი, ღირებულებები გვქონდა და ახლა არ ვიცი, ამდენი ხნის შემდეგ ეთერში როგორები ვიქნებით. მე, პირადად, ყველას "ტოროლადან" ვახსოვარ. ქუჩაში რომ მხვდებიან, დღემდე "მაესტროს" პერიოდს მახსენებენ.
– როგორ ფიქრობთ, თქვენგან ისევ შედგება რეიტინგული წყვილი?
– არ ვიცი. მე უფრო იმაზე ვნერვიულობ, ჩვენი ეთერში გასვლა ამდენ ხანს რომ გაიწელა. მოუთმენლად ველოდები იმ დროს, როცა ყურში მეტყვიან, 30 წამში ეთერში ხართო. რეპეტიცია არ გაგვივლია, პირდაპირ ეთერში გავალთ. მხოლოდ თემები, სტუმრების სია და სტუდია გვაქვს მომზადებული. დანარჩენი ყველაფერი ეთერში მოხდება, ასე რომ, დადგმული და ყალბი არაფერი იქნება.
– "ტოროლას" ეთერში ბევრ ექსპერიმენტს ატარებდით, ხმაურიანი წყვილი იყავით. ახლა როგორი იმიჯით წარდგებით მაყურებლის წინაშე?
– მაშინ სამი საათი ვიყავით ეთერში. წინასწარ არ ვემზადებოდით და არც სტუმრები გვყავდა. მთელი ეს დრო თავიდან ბოლომდე ჩვენს ურთიერთობაზე იყო აგებული. როგორც ჩანს, ამ ყველაფერს თავი კარგად გავართვით. მახსოვს, სკოლებიდან, ინსტიტუტებიდან წერილები მოდიოდა, ან ეთერი გადადეთ, ან დრო შეამოკლეთ, ან საერთოდ წადითო, რადგან ხალხი ყველგან აგვიანებდა. ვთვლი, რომ ძალიან კარგი პერიოდი იყო.
– თქვენ და ნიკა "მაესტროში" დამეგობრდით თუ მანამდეც იცნობდით ერთმანეთს?
– ჩემი მეწყვილე სოსო თოლორაია უნდა ყოფილიყო. მახსოვს, ეთერში გასვლის წინა ღამეს მამუკამ დამირეკა და მითხრა, ხვალ ეთერში შენ და ნიკა დასხდებითო. მე და ნიკამ ერთმანეთი დილის 8 საათზე "მაესტროს" ეთერში გავიცანით.
– თქვენ მაშინ ქორწილის სცენაც კი დადგით და ხალხს დიდხანს ცოლ–ქმარი ეგონეთ. ისევ ისეთი ექსცენტრული წყვილი იქნებით?
– არა, ასეთები აღარ ვიქნებით. ისე, ამ ხუმრობის შემდეგ საჩუქრებს მიგზავნიდნენ, სახლში მირეკავდნენ, ნიკას სთხოვეთო. ეს წლების განმავლობაში გრძელდებოდა და ხალხს ვერ ვაჯერებდით, რომ ხუმრობა იყო. ყოველდღე ბოდიშს ვიხდიდი, მაგრამ მაინც მირეკავდნენ, ნიკას სთხოვეთო.
ის დრო ყველაზე კარგად მახსენდება. მე და ნიკა "მაესტროში" რომ მივედით, "კერასინკა" გვედგა და ეთერში იმით ვთბებოდით, დეკორაცია ძლივს გვქონდა დამაგრებული, პირდაპირ ეთერში ხშირად იქცეოდა და ვილეწებოდით. თანაც, მამუკა ღლონტმა გვითხრა, რომ ენთუზიაზმზე უნდა გვემუშავა და ხელფასი არ გვექნებოდა. მიუხედავად ამისა, მალე ბევრი სპონსორი გამოგვიჩნდა, ხელფასიც მოგვცეს, გათბობაც დაგვიყენეს და ფეხზე დავდექით.
"ფეისბუქზე" ჩვენი ფანების გვერდი გავხსენით, იქ ბევრი კონკრეტულ ფრაზებს იხსენებს, ზოგი – თემებსაც. მეც რაღაცეები გამახსენდა. ალბათ ჩვენი ეთერი ისეთი აღარ იქნება.
– რატომ?
– ის სრულიად დაუგეგმავი, თავიდან ბოლომდე ექსპრომტი იყო და ჩვენი ხასიათიდან გამომდინარეობდა. ახლა ბევრი რამ დაგეგმილი გვაქვს – სტუმრების ვინაობა, თემები და ა.შ. არა მგონია, 12 წლის შემდეგ მე და ნიკამ იგივე შევძლოთ. ეს რომ გავაკეთოთ, უნდა ვითამაშოთ. გავიზარდეთ, შვილები გვყავს და სხვანაირები გავხდით. ჩვენი გადაცემის ჩანაწერი რომ დაგვიდონ და გვითხრან, ასე ითამაშეთო, არ გამოგვივა, რადგან ძალიან ხელოვნურები ვიქნებით.
– "მაესტროდან" წასვლის შემდეგ მამუკა ღლონტთან მეგობრული ურთიერთობა შეინარჩუნეთ?
– მასთან ურთიერთობა სულ მქონდა.
– ამ ხნის განმავლობაში ნიკასთან თქვენი დამოკიდებულება ხომ არ შეიცვალა?
– ჩვენს ურთიერთობას რა შეცვლის! მე და ნიკამ ერთდროულად შევქმენით ოჯახები და ჩვენს შვილებს შორისაც მხოლოდ ერთი თვეა განსხვავება.
– ახლო მეგობრები ხართ?
– ასეც ვერ ვიტყვი. საერთოდ, მეგობარი ბიჭები არ მყავს.
– რატომ?
– არ ვიცი, ბიჭებთან მეგობრობა არ გამომდის. ნიკასთან ძალიან კარგი ურთიერთობა მაქვს და ეს არც ერთ ეტაპზე გამჭირვებია.
– როგორია ნიკა ეკრანს მიღმა?
– ძალიან კარგი და კომფორტული ადამიანია.
– თქვენი სურვილი იყო, შუადღის გადაცემას გაძღოლოდით და არა, ვთქვათ, ისევ დილის გადაცემას?
– ჩვენ აქ სხვა სურვილებით მოვედით, მაგრამ ერთ მშვენიერ დღეს მამუკამ მითხრა, რომ ეთერი ისევ მე და ნიკამ უნდა შევავსოთ და თან შუადღის გადაცემაში. ამის გარდა, ჩვენ სხვა პროექტებიც გვექნება. ნიკა გასართობ შოუს წაიყვანს, მე კი ტოქ შოუ მექნება, ოღონდ – მარტიდან.
– პოლიტიკური ტოქ შოუ ხომ არ იქნება?
– მე და პოლიტიკა როგორ წარმოგიდგენიათ? ამიტომ ჩემი ტოქ შოუ სოციალურ საკითხებზე იქნება. ყოველთვის ვეცდები, მაყურებლის პრობლემებზე ვისაუბრო.
– ტელეკომპანია "იმედში" შუადღის გადაცემა მიგყავდათ. როგორ ფიქრობთ, შეძლებთ, განსხვავებული იყოთ?
– ველოსიპედს თავიდან არავინ იგონებს. ჩვენი გადაცემაც ჩვეულებრივი შუადღის შოუ იქნება, შედარებით მსუბუქი თემებით, დანარჩენს ეთერში ნახავთ.
– მოკლედ, თქვენს კარიერასა და პირად ცხოვრებაში სიახლეებია.
– პირადში?!
– კი. "სარკისთვის" მიცემულ ინტერვიუში ეროვნული ბიბლიოთეკის დირექტორმა გიორგი კეკელიძემ თქვა, რომ ერთად ხართ.
– კი, მასთან ურთიერთობა გრძელდება, მაგრამ ახალი არაფერია. ყველაფერი სტაბილურად და კარგად მიდის.
– ოჯახის შექმნას ხომ არ გეგმავთ?
– არაფერს ვგეგმავ, გარდა იმისა, რომ ეთერში უნდა გავიდე.
– ერთ–ერთ ინტერვიუში ამბობდით, რომ შვილი გინდოდათ.
– ბევრჯერ მითქვამს, რომ რამდენიმე შვილის ყოლა მინდა, მაგრამ ამას ვერ დაგეგმავ. ეს ბედნიერება მაშინ მოდის, როცა არ ელოდები.
– ანუ საქმის და პირადი ცხოვრების ერთმანეთთან შეთავსებას მშვენივრად ახერხებთ.
– როცა სურვილი მაქვს, ყველაფერს ვახერხებ. უყურადღებოდ არავინ მრჩება.
ეკა ლემონჯავა
