ნანა მელქაძე: "ადამიანის ხასიათს მისი ფეხსაცმელი ზუსტად წარმოაჩენს"
რუბრიკა "სტილის" სტუმარია დიზაინერი ნანა მელქაძე, რომელიც სამოდელო სფეროში ათი წლის წინ გამოჩნდა და არაერთი წარმატებული პროექტიც განახორციელა. დეფილე "ცნობილი ქალები პოდიუმზე" პირველად სწორედ მან ჩაატარა თუმანიშვილის სახელობის თეატრში, ბოლოს კი ენგურის ხიდზე გამართა საკუთარი კოლექციის ჩვენება.
- ნანა, როგორი სამოსია 2013 წლის გაზაფხულზე მოდური?
- წელს მოდურია ნათელი ფერები, ასევე - ლურჯის გრადაციები, როგორც წინა წლებში. სამოსის სტილი კი უფრო სპორტულ-კლასიკურის ნაზავია - მაღალწელიანი და თავისუფალი სტილის შარვლები, დახვეწილი კაბები და ცოტა გრძელი პიჯაკები.
- თქვენ თუ ითვალისწინებთ მოდის ტენდენციებს?
- რა თქმა უნდა, ვითვალისწინებ, მაგრამ ყოველთვის იმას ვიცვამ, რაც მიხდება. ზამთარში უფრო შარვალი მაცვია, გაზაფხულზე კი - კაბა. თუ წვეულებაზე მივდივარ, ერთი დღით ადრე ვიკერავ კაბას. სულ ჩემი შექმნილი სამოსი მაცვია. ცნობილი ბრენდებიდან კი მომწონს "არმანი", მისი სამოსი ყოველთვის დახვეწილია.
- რომელი აქსესუარი მოგწონთ განსაკუთრებით?
- სწორად შერჩეული აქსესუარების, ფეხსაცმლისა და ჩანთის გარეშე სამოსი არ არის ეფექტური. უპირატესობას ვანიჭებ ისეთ აქსესუარებს, რომლებიც ჩემს სახეს უხდება. განსაკუთრებით მიყვარს საყურეები და ბეჭდები. ადამიანის ხასიათს კი ზუსტად წარმოაჩენს ფეხსაცმელი, ამიტომ ყველამ თავისი ხასიათის შესატყვისი ფეხსაცმელი უნდა ჩაიცვას. მე ყოველთვის მაღალქუსლიან ფეხსაცმელსა და საშუალო ზომის ჩანთებს ვატარებ.
- ბოლო წლების განმავლობაში თუ შეიცვალა ქართველების ჩაცმის კულტურა?
- ქართველები ყოველთვის გემოვნებით იმოსებოდნენ, მაგრამ, როგორც ჩანს, უცხოეთმა მოახდინა გავლენა და ახლა უფრო მეტი პასუხისმგებლობით ეკიდებიან თავიანთ გარეგნობას. წვეულებაზე ჯინსით აღარ დადიან, უფრო კლასიკურად იმოსებიან, რაც მისასალმებელია. ისევ აქტუალურია შავი, მაგრამ თანდათან უფრო ფერად სამოსს ამჯობინებენ.
- ვის მიიჩნევთ გემოვნებიან მანდილოსნად?
- ბევრი გემოვნებიანი ქალია საქართველოში. ძალიან მომწონს რუსეთში მოღვაწე ქართველი პროდიუსერის, მაია ყიფიანის ჩაცმულობა, აგრეთვე, კრისტი ყიფშიძის სტილიც, ძალიან დახვეწილია და ყველაფერი უხდება. მომწონს "მაესტროს" ახალი ამბების წამყვანის, ნინო თოლორდავას ჩაცმულობა. მას გემოვნებით შერჩეული პიჯაკები აცვია ეთერში და ინდივიდუალურ სტილსაც არ კარგავს.
გამოვარჩევ პრემიერ-მინისტრის მეუღლეს, ქალბატონ ეკატერინე ხვედელიძეს - მას ყოველთვის სათანადოდ აცვია.
- პირველი ლედის შემოსვის სტილზე რას იტყვით?
- სანდრა რულოვსს, ალბათ, მოსწონს ის სტილი და ფერები, როგორსაც ირჩევს, მაგრამ პირველ ლედის უფრო კლასიკურად ჩაცმას ვურჩევდი. ვურჩევ, ასევე, მყვირალა ფერის სამოსს მოერიდოს.
- როგორ მაკიაჟს ამჯობინებთ?
- სისადავის მოყვარული ვარ, ამიტომ, გამომწვევი მაკიაჟი და ჩაცმულობა ჩემთვის მიუღებელია.
- პლასტიკურ ქირურგიაზე რა აზრის ხართ?
- გარეგნობას წარმატებისთვის დიდი მნიშვნელობა აქვს, მაგრამ თუ ფიზიკური დეფექტი არ გაქვს, უმჯობესია, ისეთი გარეგნობა შეინარჩუნო, როგორიც უფალს მოუცია. არ მომწონს ერთნაირი ნაკვთები და გადატკეცილი სახეები.
- როგორ ახერხებთ ერთდროულად ფორმაში ყოფნას და საქმის კეთებას?
- დილაობით მოკლე ხანში ვიწესრიგებ თავს, თავისუფლად ვახერხებ შვილების მოვლასაც და საქმის კეთებასაც. არ დავდივარ სპორტულ დარბაზებში, დღის განმავლობაში უამრავი საქმე მაქვს და დამატებით ვარჯიში აღარ მჭირდება. ქალი ლამაზად რომ გამოიყურებოდეს, ამისთვის ძვირად ღირებული პროდუქცია არ არის აუცილებელი. უკრაინელი ბებია მყავდა, რომელიც საერთოდ არ დადიოდა სალონში, მაგრამ ყოველთვის შესანიშნავად გამოიყურებოდა, შინაური საშუალებებით უვლიდა თმასაც და სახის კანსაც.
თმის ცვენის საწინააღმდეგო რეცეპტი დიზაინერ ნანა მელქაძისგან: ერთი კვერცხის გულში ავურიოთ 1 ს/კ თაფლი და 1 ს/კ სუფთა კონიაკი, ეს ნაზავი უნდა შევიზილოთ თმის ძირებში და ერთ საათში ჩამოვიბანოთ წყალში ჩაწურული ერთი ლიმონის წვენით. აჩერებს ცვენას და თმას უფრო ბზინვარეს ხდის.
ესაუბრა თამარ ბოჭორიშვილი
ყოველკვირეული გაზეთი "ყველა სიახლე"
