რამდენიმე წესი იმისათვის, რომ პარტნიორს თავი არ მოაბეზროთ

მამაკაცმა თქვენ მიმართ ინტერესი რომ არ დაკარგოს, სასურველია, მასთან გარკვეული დისტანცია შეინარჩუნოთ და თავი არ მოაბეზროთ. ეს, რა თქმა უნდა, არ ნიშნავს, რომ საიდუმლოებები გქონდეთ და ყველაზე ახლობელ ადამიანს გული არ გადაუშალოთ; უბრალოდ, შეეცადეთ, ზომიერების გრძნობამ არ გიღალატოთ.

დაიცავით დისტანცია

რა თქმა უნდა, ძნელია თავი შეიკავოთ და არაფერი ჰკითხოთ, როცა ქმარი შინ გვიან და შეფიქრიანებული ბრუნდება, მაგრამ ყოველთვის სურს, რომ მიზეზი გაიგოთ? თუ გაღიზიანებული გიპასუხებთ, ეს საკმარისი ნიშანია, რომ უკან დაიხიოთ. ბევრი ქალი, განსაკუთრებით ის, ვისაც შვილი არ ჰყავს, უბრალოდ, როლებს ურევს - დედობრივი ინსტინქტებით ხელმძღვანელობს და მამაკაცს ბავშვივით ექცევა. ზოგს ეს მოსწონს, ზოგს აღიზიანებს. სამსახურზე, წარსულსა და ნათესავებზე კითხვებით ნუ შეაღონებთ, ფრთხილად იყავით, არ გადაამეტოთ.

ნაკლები იწუწუნეთ

სიყვარულის ერთ-ერთი მთავარი მტერი ყოფით პრობლემებზე წუწუნია. მართალია, მათ გვერდს ვერ აუვლით, მაგრამ მუდმივად წუწუნი პრობლემების გადაჭრაში ვერ დაგეხმარებათ. ყველაფერი ეს გრძნობებს ღუპავს. თუ ყოფითი პრობლემები გულს გიმძიმებთ და გტანჯავთ, მათზე სასაუბროდ შესაფერისი დრო შეარჩიეთ და არ გადაამლაშოთ.

ცოტა ხნით ერთმანეთს დაშორდით

რაც უნდა ძლიერ უყვარდეთ მამაკაცს, ყოველთვის გახსოვდეთ, რომ მისი ფსიქიკის შესაძლებლობები უსაზღვრო არ არის. მას თქვენგან დასვენება ესაჭიროება. ქალის მიმართ რომანტიკულმა დამოკიდებულებამ ყოველდღიურ საყოფაცხოვრებო პროცესში, შესაძლოა, უკანა პლანზე გადაიწიოს. მის შესანარჩუნებლად დროებითი განშორება, უბრალოდ, აუცილებელია. გავრცელებული აზრის თანახმად, განშორება სიყვარულს ამძაფრებს და აწრთობს.

თუ გაწყენინებთ, გაებუტეთ

ნუ გაგიკვირდებათ, წვრილმანი უთანხმოება დამადასტურებელია იმისა, რომ თქვენ ისევ სხვადასხვა ხართ, ე.ი. თქვენ შორის ჯერ კიდევ დისტანციაა. ამ დისტანციაში კი ერთმანეთს რომანტიკული შარავანდედით მოსილს ხედავთ. თუ ვინმე გიყვართ, შეყვარებული საკუთარი თავიც გიყვართ. თუ მეგობარი მამაკაცი გაწყენინებთ (საუბარია ისეთ წყენაზე, რომლის მიტევებაც შესაძლებელია), რამდენიმე ხნით გაებუტეთ - ეს მას თქვენს მონატრებას გაუძლიერებს.

ყურადღება მიაქციეთ გარეგნობას

საგნები თავისთავად გრძნობას არ ბადებს, მაგრამ არც მხოლოდ შიშველი სული უყვართ. რაც უნდა ამაღლებული შეხედულებების იყოს, მამაკაცზე ზემოქმედებას სამოსი და წუნდაუდებელი ფორმებიც ახდენს. ალბათ ხშირად გსმენიათ ქალებისაგან: "მამაკაცს მე ვუყვარვარ და არა ჩემი ჩვრები", ან კიდევ: "ისეთ მამაკაცს დაველოდები, რომელსაც მე თვითონ დავჭირდები". ასეთ ქალებს არ ესმით სიყვარულის ფსიქოლოგია - მამაკაცში გრძნობების აღმოსაცენებლად გარეგნობა გადამწყვეტ როლს ასრულებს. ყველაფერი სწორედ აქედან იწყება. ქალი გათხოვების შემდეგ თუ თავის გარეგნობაზე არ იზრუნებს, მამაკაცის თვალში თანდათან დაკარგავს იმ მიმზიდველობას, რითაც ის მოხიბლა.


ჟურნალი "რეიტინგი"