რატომ დაუპირისპირდა ვანიკო თარხნიშვილი გიორგი ქორქიას

რა ხდება გიორგი ქორქიასა და ვანიკო თარხნიშვილს შორის? რატომ დაუპირისპირდნენ ძველი მეგობრები ერთმანეთს, ეს კითხვა მაყურებლებს მაშინ გაუჩნდათ, როცა გასულ კვირას "იღბლიან ბორბალს" უყურეს. შოუს წამყვანმა ვანიკო თარხნიშვილმა გიორგი ქორქიას მისამართით საკმაოდ უცნაური მონოლოგი წაიკითხა. გადაცემები გადათვალა, რომელიც მას და ქორქიას მიჰყავდათ და აღნიშნა, რომ სულაც არ არის დუტა, რადგან ქორქიას მასზე ოთხით მეტი გადაცემა წაუყვანია.

ვანიკოს მოულოდნელმა განცხადებამ გიორგი დააბნია, თუმცა წამყვანს არ ჩამორჩა და მეორე დღეს დილის ეთერში თარხნიშვილს კომპრომატების კასკადი გამოუქვეყნა - შიშველი, აბაზანაში მომღერალი ვანიკო, ასევე ტყეში, ბუნებრივი მოთხოვნილების დაკმაყოფილებისას. რა ხდება წამყვანებს შორის, ამის გარკვევა თავდაპირველად გიორგისთან ვცადეთ, თუმცა ცნობილია, რომ ის ინტერვიუების დიდი სიყვარულით არ გამოირჩევა და თემას რომ არ დაეფრთხო, ვუთხარით, რომ მხოლოდ დილის გადაცემის შესახებ ვისაუბრებდით...

- თქვენ წარმოიდგინეთ, ადრე გაღვიძება არ მიჭირს. დილის გადაცემამდეც ადრე ვდგებოდი, მაგრამ არა ოთხ საათზე. შვიდ საათზე ვიღვიძებდი, ძაღლს ვასეირნებდი, ხან იპოდრომზე დავდიოდი. ახლა შემიძლია ვთქვა, რომ ადრე კი არა, გვიან ღამე ვიღვიძებ. ხუთ საათზე სამსახურში უნდა ვიყო, რომ გადაცემა ავაწყოთ. მართალია, ჟურნალისტებს ტექსტები უკვე გამზადებული აქვთ, მაგრამ წამყვანებმა უნდა მოვირგოთ. თან მირჩევნია, დავჯდე, ყავა დავისხა, სიგარეტი მოვწიო და სიწყნარეში ვიმუშაო.

- გარდა ადრე გაღვიძებისა, წამყვანისთვის კიდევ რა განსხვავებაა დილის გადაცემასა და სხვა გადაცემებს შორის?
- ადრე უფრო აქტიურ ჟურნალისტიკაში ვიყავი და აქეთ-იქით დავრბოდი. ორივეს თავისი ხიბლი აქვს. ახლა უკვე მომენატრა რეპორტაჟების კეთება, მაგრამ ზუსტად ვიცი, რომ ორივეს ერთად ვერ მოვახერხებ, გადავიწვები. ვერასოდეს ვახერხებ დასვენებას, რომ არ მოგატყუოთ, რამდენიმე წელია, შვებულება არ მქონია, მაგრამ ამის კომპენსირებას ზაფხულში გადაცემა "ჯეო-მეგზურით" ვახდენ. თბილისიდან გავდივარ და საკმაოდ საინტერესო ადგილებში დავდივარ.

- დილის გადაცემამ ალბათ თქვენი ცხოვრების რიტმი რადიკალურად შეცვალა...
- რა თქმა უნდა, ამ დროს ცხოვრების რიტმი რადიკალურად იცვლება. მუშაობ მაშინ, როდესაც სხვები ჯერ კიდევ სახლიდან არც გამოსულან და როდესაც ისინი მუშაობას იწყებენ, შენ ისვენებ. კვირასაც ვმუშაობ, მხოლოდ შაბათს ვისვენებ. ამ დღეს ძილისთვის ვერ ვიმეტებ, ძირითადად მეგობრებთან ვერთობი ან ვსვამ.

- ის თემები რამდენად გაინტერესებთ, რომლებიც დილის გადაცემაში შუქდება?
- რა თქმა უნდა, მაინტერესებს, იმიტომ, რომ აბსოლუტურად აპოლიტიკური გადაცემაა. უბრალოდ, ჩართვები აქვს "კურიერის" სახით. კულტურული მოვლენების ანალიზი და ანონსი რატომ არ უნდა მომწონდეს.

- დღეს პოლიტიკა არანაკლებ აქტუალურია, არასოდეს გქონიათ სურვილი, პოლიტიკურ ჟურნალისტიკაში გემუშავათ?
- არა, პოლიტიკა არ მესმის. მირჩევნია მუსიკოსს, მხატვარს, სპორტსმენს ვეკონტაქტო, ვიდრე პოლიტიკოსს (იღიმება).

- ძალიან მხიარული გუნდი მუშაობთ დილის გადაცემაში. ხშირად ხუმრობთ წამყვანები ერთმანეთში. რამდენიმე თვის წინ თქვენი და პაატა გულიაშვილის დუეტი იყო აქტუალური...
- არ შემზღუდეს და მეც ცენზურა მოვუხსენი საკუთარ თავს. არ ვიგინები, თუმცა ვცდილობ, ზღვარს არ გადავაბიჯო და ისე ვიხუმრო. არ მიყვარს ჩარჩოში ჩასმული წამყვანები.

- თქვენს ხუმრობებს შავ იუმორს უფრო დავარქმევდი...
- (იღიმება) ხან შავია, ხან - თეთრი. ხშირად მინახავს სხვადასხვა არხზე, როდესაც წამყვანები მხოლოდ მათი წრისთვის გასაგები იუმორით ხუმრობენ, რაც არ მომწონს. პაატა ჩვენთან დილის გადაცემაში გავიცანი და ორ დღეში უკვე ღია ეთერში გვქონდა გადაძახილ-გადმოძახილი. ისე ვეხუმრე, როგორც ჩემს დიდი ხნის ნაცნობს და მანაც ადეკვატური პასუხი გამცა. იმიტომ მიყვარს პაატა, რომ გახსნილი ადამიანია და არ სწყინს ხუმრობა.

- პოპულარული ადამიანების მიმართ მაყურებელი ქუჩაში სხვადასხვანაირად გამოხატავს სიმპათიებს, თქვენ როგორ გხვდებიან?
- სულ ვხვდები, რომ ვიღაც თვალს მაყოლებს. მანქანით არ დავდივარ, ძირითადად ფეხით ვმოძრაობ, მაგრამ ვერ ვიტყვი, რომ ხალხის ყურადღება დისკომფორტს მიქმნის. ბოლო პერიოდში გარკვეული აგრესია იყო "რუსთავი 2"-ში მომუშავე ადამიანების მიმართ. ყველას ერთ ქვაბში ხარშავდნენ. არ მიკვირს, ასე იციან, ხან ერთს აითვალწუნებენ, ხან - მეორეს, მაგრამ ჩემ მიმართ ასეთი აგრესია არ ყოფილა.

- როგორც ყველა ცნობილი ადამიანი, თქვენი ცხოვრებაც საჯაროა.
- ვცდილობ, პირად ცხოვრებაზე არასოდეს ვილაპარაკო. ბევრჯერ შემოუთავაზებიათ ჟურნალისტებს ინტერვიუ პირად თემებზე. პირველი კითხვა რაც მიჩნდება, რატომ? მეუბნებიან, რომ ხალხს აინტერესებს. გაცილებით ბევრი საინტერესო რამ არსებობს, ვიდრე ჩემი პირადი ცხოვრებაა. ვისაც აინტერესებს, ჯერ საკუთარი ცხოვრება დაალაგოს და მერე დაინტერესდეს სხვისი პირადით. ათასში ერთხელ თუ ვთანხმდებოდი მსგავს ინტერვიუებს, რადგან ვიცოდი, ინტერვიუ რომ არ მიმეცა, მაინც დაწერდნენ და თან სხვანაირად.

- თუმცა ერთხელ მაინც გახდა თქვენი პირადი ცხოვრება საჯარო განხილვის საგანი.
- პროექტ "კოდის" პერიოდს გულისხმობთ? რეალური შოუ იყო და მეტი არაფერი. სკანდალურად არ ვცხოვრობ, დილის ოთხი საათიდან ტელევიზიაში ვარ და რა უნდა მოხდეს?!.

- გიორგი, რამდენიმე დღის წინ თქვენი და ვანიკო თარხნიშვილის დაპირისპირების მომსწრე გახდა მაყურებელი...
- მე და ვანიკო დიდი ხნის მეგობრები ვართ. საერთო სამეგობრო წრე გვყავს, თუმცა ბოლო დროს ორივე დაკავებული ვართ და ხშირად ვეღარ ვხვდებით ერთმანეთს. იმ დღეს ტელევიზორი შემთხვევით მქონდა ჩართული და უცებ მომესმა, რომ ვანიკომ "იღბლიანი ბორბლის" ანონსში ჩემი სახელი და გვარი ახსენა. ანონსის შემდეგ გასვლას დაველოდე და ვნახე, რომ ჩემზე რაღაცებს ამბობდა. გამოვშტერდი, ტელევიზიაში არავინ არაფერს მეუბნებოდა. მერე დავინტერესდი, გადაცემას ვუყურე და მივხვდი, რაღაც ხდებოდა. მეორე დღეს მეც შესაბამისად ვუპასუხე.

- გადაცემები დაუთვალეთ ერთამანეთს, ვის რამდენი გადაცემა წაგიყვანიათ კარიერის განმავლობაში.
- იმან დამითვალა და ძალიან კარგი, რომ შემახსენა, იმიტომ, რომ რამდენიმე საერთოდ აღარ მახსოვდა. რატომ დამითვალა, არ ვიცი. ალბათ შეშფოთდა, გაბრაზდა.

- დუტასთან შედარება ახსენა...
- ბედნიერი ვარ, რომ დუტასთვის არასოდეს არავის შევუდარებივარ. ვანიკოს რომ ადარებენ, ეგ მაგის პრობლემაა. ვანო ჯავახიშვილმაც უთხრა, დუტასავით ხარო.

- მართალია, თქვენგან დაჩაგრულად წარმოადგინა თავი, მაგრამ მგონი, მასაც გაუმართლა, გადაცემაში შორენა ბეგაშვილი ჰყავს.
- იმას ერთი შორენა ჰყავს პარ­ტნიორად და მე დილის გადაცემაში ყოველდღე სხვადასხვა მყავს პარტნიორად, მანდაც ვუგებ. ვანიკოს ჩემზე მეტი მხოლოდ თმა აქვს, დანარჩენი ყველაფერი - ნაკლები (იცინის).

- გადაცემის შემდეგ არ სცადე, გაგერკვიათ, რატომ მოიქცა ასე?
- არა, შემდეგ გადაცემას ველოდები, ვიცი, რომ რაღაც ოხრობას გამიკეთებს და მართლა არ ვიცი, რატომ იქცევა ასე, ან როდემდე გაგრძელდება ეს. მე ერთი პლუსი მაქვს, რომ ღია ეთერში ვარ და რასაც მინდა, ვიტყვი, კაციშვილი ვერაფერს ამომიჭრის, მაგის გადაცემა კი ჩანაწერის სახით გადის ეთერში.

- კომპრომატების ომი დაიწყეთ...
- კომპრომატებს ეგ ეძებს ჩემს სიუჟეტებში და კომპრომატს თუ იმას ეძახის, რასაც რეპორტაჟებში ვაკეთებდი, ბლომად არის, მაგრამ მე უფრო მეტი კომპრომატი მაქვს ფოტოების სახით. თხუთმეტი წელია ერთად ვსვამთ და უამრავი მაქვს მთვრალი ვანოს ფოტოები.

- ვიდეოც გამოაქვეყნეთ, სადაც აბაზანაში შიშველი ვანიკო ბანაობს და მღერის...
- შარშანწინდელ გადაცემა "ჯეო-მეგზურში" კინტრიშის ნაკრძალში წავიყვანე. სასტუმროში ბანაობის დროს მღეროდა და კამერით შევუვარდით. მაშინ მთლიანად არ ვაჩვენეთ ტიტველი ვანო, რადგან ბევრად უფრო ლამაზი სანახაობა იყო ბუნებაში. ადრე გადაცემაშიც მქონდა ეს ვიდეო ჩართული, მაგრამ დილის გადაცემაში უფრო ვრცლად გავუშვით.

- არ გეშინიათ, თქვენზეც რომ ჰქონდეს მსგავსი კომპრომატი გადანახული?
- კიდევ კარგი, შიშველი არასოდეს გადავუღივარ, მაგრამ ვნახოთ, რას იზამს, თუ რამეს გამოაქვეყნებს, იცოდეთ, რომ "ფოტოშოპი" იქნება.

- მგონი, ასეთ უცნაურ სიტუაციაში პირველად აღმოჩნდით...
- დიახ, თან ჩემი ძმაკაცი აკეთებს ამას, რომელიც ძალიან მიყვარდა, ორშაბათამდე... გარშემო ყველას გაუკვირდა. თავიდან გავერთე, მაგრამ ვნახოთ, შეიძლება ეს ყველაფერი სერიოზულ საეთერო კინკლაობაში გადაიზარდოს.

- "რუსთავი 2"-მა ერთმანეთი არ დაგაკარგვინოთ.
- წინასწარ არ ვგეგმავ ასეთ რაღაცებს. ტექსტი, რომელიც ვანიკოს შესახებ ვთქვი ღია ეთერში, "იღბლიანი ბორბალის" გასვლიდან მეორე დილას დავწერე და კადრებიც მოვამზადე.

- ხალხმა თქვენ შორის წამოწყებული კინკლაობა სერიოზულ დაპირისპირებად აღიქვა, მართლა ასეა თუ ხუმრობთ?
- ეს ხუმრობა აღარ არის, ეს დაპირისპირებაა და კიდევ ერთს გეტყვით, რით ვარ ვანოზე მაგარი, პირველად ინტერვიუზე ჩემთან მოხვედით და არა ვანოსთან, მაგაშიც ვაჯობე (იცინის).

- ანუ, ვანიკოს წინააღმდეგ ომი დაწყებულია...
- ომი დაწყებულია და პირველი ბრძოლა მოგებული მაქვს, იმიტომ, რომ ბოლო სიტყვა მე ვთქვი. დაველოდები, ახლა ის რას იზამს.

ნინო გიგიშვილი
ჟურნალი "რეიტინგი"