როგორ აღვნიშნავთ ქალთა დღესასწაულს
გაზაფხულის პირველ დღესასწაულებს - 3 მარტსა (დედის დღე) და 8 მარტს (ქალთა საერთაშორისო დღე) ზოგიერთი არ აღიარებს, ზოგი კი დიდი სიამოვნებით აღნიშნავს... მაგრამ როგორც უნდა იყოს საქმე, ალბათ დამეთანხმებით, მამაკაცისგან ქალბატონის მიმართ გამოხატული სითბო, ყურადღება, თუნდაც ყვავილის თაიგულისა თუ საჩუქრის მირთმევა ყოველთვის სასიამოვნო ფაქტია... ამბობენ, ცოლქმრული ცხოვრება, ყოფითი პრობლემები მამაკაცების აქტიურობას ოდნავ ასუსტებსო, მაგრამ პირიქითაც ხდება... არის ასეთი გამოთქმა: "არ არსებობს ბედნიერი ცხოვრება, არსებობს მხოლოდ ბედნიერი დღეები" ან კიდევ: "მიყვარხარ იმისთვის, რომ შენ გვერდით თავს ქალად ვგრძნობ"... ასე რომ, მამაკაცი უნდა შეეცადოს, გვერდით მყოფ ქალბატონს პერიოდულად მაინც, მცირე დღესასწაული მოუწყოს... ჰოდა, მეც ვეცადე, გამერკვია, როგორ აღნიშნავენ საქართველოში ქალთა დღესასწაულებს და რამდენად განებივრებულები არიან სუსტი სქესის წარმომადგენლები მამაკაცებისგან.
ეკო ფანგანი, მოდელი:
- 8 მარტს ბავშვობიდან მოყოლებული, ყოველთვის აღვნიშნავ და საჩუქრებს ოჯახის წევრებისგანაც ვიღებ, მაგალითად, მამისგან, ძმისგან და სხვებისგანაც. სკოლაში სწავლისას, თანაკლასელი ბიჭები ყვავილებს გვჩუქნიდნენ ხოლმე, ასევე, თაყვანისმცემლებიც. ამ დღეს წელს განსაკუთრებულად აღვნიშნავთ, მე და დიჯეი რემბო ქალბატონებისთვის წვეულებას ვმართავთ, სადაც ყველას გეპატიჟებით. ასეთი სლოგანი გვაქვს - "ქალები გაუშვით წინ" (ინგლისური გამოთქმაა).
- 8 მარტს რაიმე გამორჩეული საჩუქარი თუ მიგიღიათ?
- კარგად ვერ ვიხსენებ... თინეიჯერობისას ფუმფულა სათამაშოებსაც მჩუქნიდნენ ხოლმე. ბოლო პერიოდში კი ბექამ (შეყვარებული) 8 მარტს, უკვე ორჯერ ბეჭედი მაჩუქა. ისე, ძირითადად, ყვავილებს მჩუქნიან. ვნახოთ, როგორ ჩაივლის წლევანდელი ქალთა დღე... პირადად მე, მეგობრებს, დედაჩემს აუცილებლად ვულოცავ ხოლმე 8 მარტსაც და დედის დღესაც. საერთოდ, ყველანაირი დღესასწაული მიყვარს, მსოფლიოს ნებისმიერ დღესასწაულს ვაღიარებ, აღვნიშნავ და ვისთვისაც მისალოცია, ვულოცავ.
თამუნა, 30 წლის:
- 6 წელია, რაც გათხოვილი ვარ, - უკვე მესამე შვილს ველოდები და თამამად შემიძლია ვთქვა, რომ მე და ჩემს მეუღლეს ახლაც ისეთივე ლამაზი ურთიერთობა გვაქვს, როგორიც შეყვარებულობისას. ადრეც მანებივრებდა საჩუქრებით. ვერ ვიტყვი, რომ რომელიმე მათგანი ძალიან ძვირფასი იყო, მაგრამ მისი ყურადღება, რომანტიკული განწყობილება ნამდვილად მახარებდა. ჩვენი ურთიერთობა მეგობრებისთვის სამაგალითო იყო. მახსოვს, როცა პირველი პაემანი დამითქვა, რესტორანში სპეციალური მაგიდა შეუკვეთა, საიდანაც ღამის თბილისის ხედები ჩანდა, ჩვენ კი სანთლის შუქზე საყვარელ კერძებს მივირთმევდით და სხვადასხვა რომანტიკულ ფილმსა თუ ნაწარმოებს განვიხილავდით... მისი ნაჩუქარი ფუმფულა სათამაშოები, გულები, სამკაულები და სხვა ნივთები დღესაც შენახული მაქვს. მართალია, ჩვენი ოჯახი დიდი მატერიალური შესაძლებლობებით არ გამოირჩევა, მაგრამ გიგი სპეციალურ დღეებს არ ელოდება, ჩემდამი ყურადღება რომ გამოიჩინოს. ის არც ერთ დღესასწაულს არ გამოტოვებს, საჩუქარი რომ არ მომიძღვნას. ხან კინოში, თეატრში ან კონცერტზე მპატიჟებს. ბედნიერი ვარ, რომ ზუსტად იცის, როგორ უნდა დააფასოს მეუღლეც, შვილიც და დედაც. როცა მამაკაცს ასეთი ხასიათი აქვს, ოჯახი უფრო ბედნიერია.
თინიკო, 43 წლ
ის:
- აღარც კი მახსოვს, ჩემმა მეუღლემ ბოლოს რა მაჩუქა. თუკი რამეს შოულობს, გადასახადებზე, საკვებსა და ყოველდღიურ ხარჯებზე მიდის. როცა შვილები გყავს, საკუთარ სიამოვნებაზე აღარც ფიქრობ და ცდილობ, ის ორი თეთრიც მათ მოახმარო. კინოსა და თეატრში წასვლა, რომანტიკული საღამო ჩემთვის დიდი ხანია, წარსულს ჩაჰბარდა. ხანდახან მეგობრებს თუ ვესტუმრებით წვეულებებზე, ისიც იშვიათად, რადგან ამის დრო და საშუალება ხშირად არც ჩვენ გვაქვს და არც მათ... მართალია, ჩემი შვილებით ვხარობ, ისინი დედის დღეს ყოველთვის მილოცავენ, მაგრამ ურიგო არ იქნებოდა, ზოგჯერ ჩემს მეუღლესაც გავახსენდე. "გზაში" ამ სტატიას რომ წაიკითხავს, იქნებ მაშინ მაინც შეაწუხოს ნამუსმა და 8 მარტს ერთი კონა ყოჩივარდა მომიტანოს (იცინის). მამაკაცებს მოვუწოდებ, მათ გვერდით მყოფი მანდილოსნები მეტად დააფასონ და მათ მიმართ მეტი ყურადღება გამოხატონ. ქართველი მამაკაცის ნაკლი ის არის, რომ ხელში ყვავილის დაჭერა, რატომღაც ეთაკილება, არადა, ეს რომანტიკული ჟესტი ერთი-ორად გააბედნიერებდა ქალბატონს.
ანრი ჯოხაძე, მომღერალი:
- ვისაც ეკუთვნის, ყოველთვის ვულოცავ. პირველ რიგში დედაჩემს, ჩემს დას, დის შვილს, მეგობრებს და ზოგადად, ვისაც მივიჩნევ ჩემი ნაცნობებიდან, რომ კარგი ქალია. მათ შორის გამორჩეულებიც მყავს...
- რას ჩუქნით ხოლმე მათ?
- იმას, რაც იმ დღეს და იმ მომენტში მომაფიქრდება, წინასწარ არასდროს ვგეგმავ. ყვავილების მირთმევა არ მიყვარს, რაიმე საჩუქარს ვარჩევ ხოლმე, ორიგინალურს, შეიძლება, ძვირფასიც იყოს, გააჩნია, არჩევანს ვისზე შევაჩერებ.
- ყვავილის ჩუქება რატომ არ მოგწონთ?
- სხვათა შორის, ყვავილის ჩუქება არასდროს მსიამოვნებდა, ბავშვობაშიც კი. შესაძლოა, რაღაც კონკრეტულ სიტუაციაში მივართვა, მაგრამ "ბუკეტიან" ბიჭს არ ვგავარ (იცინის).
ნათია, 19 წლის:
- განსაკუთრებული გარეგნობით არ გამოვირჩევი, მაგრამ სხვა გოგონებს რომ ვაკვირდები, მათთან შედარებით, ბევრი თაყვანისმცემელი მყავს, მაგრამ გული იმაზე მწყდება, რომ არც ერთ მათგანს აზრად არ მოსდის, ოდესმე ყვავილი მაჩუქოს. ვგიჟდები ფუმფულა სათამაშოებზე, სუნამოზეც... რომანტიკული ადამიანი ვარ და ისიც გამახარებდა, ჩემს სახლთან ვინმეს ცეცხლით გული დაენთო ან თუნდაც ემღერა (იცინის). ბარსა და კინოში დაპატიჟება მათი ყველაზე ბანალური ჟესტია. მსაყვედურობენ, გულცივი ხარო, მაგრამ ქალს თუ სწორად მიუდგები, მისი გულის მოგება არც ისე რთულია. დღევანდელი ბიჭების უმეტესობას რომანტიკულობა, სიგიჟე, სილაღე აკლია. ზოგი საერთოდ გაგაოცებს, - გოგოსგან ითხოვს ყურადღებას... ზოგი აზარტულ თამაშებსა და სხვადასხვა სისულელეში ხარჯავს ფულს, ეს ცალკე პრობლემაა... წელს 8 მარტისთვის უკვე მივიღე რამდენიმე მიპატიჟება და მოვიფიქრებ, სად წავიდე. თუ არა და დაქალები მაინც აუცილებლად აღვნიშნავთ ერთად.
გიორგი ვარდოსანიძე, მსახიობი:
- ყოველთვის ვცდილობ, ჩემ ირგვლივ მყოფ მდედრობითი სქესის წარმომადგენლებს 8 მარტი მივულოცო და გავახარო პატარა იებით, სასიამოვნო საჩუქრით ან უბრალოდ მოკითხვით, თბილი მილოცვით და ღიმილით. პირველ რიგში, დედას, შემდეგ, ახლობელ გოგონებს და ა.შ. ასევე, 3 მარტსაც.
- წელს თუ აპირებთ, თქვენთვის სასურველი გოგონა დაპატიჟოთ სადმე და ეს დღე ისე აღნიშნოთ?
- აბა, სად არის გოგონა, რომელიც მომწონს? არის? (იცინის) არავინაა. ამიტომ, წელს ამ დღეს ჩვეულებრივ მილოცვებში გავატარებ, ვინმესთან ერთად - არა.
გიორგი, 19 წლის:
- ბევრი შეყვარებული მყოლია, მაგრამ თან არავის გადავყოლივარ, სად მაქვს იმდენი ფული, გოგოს დავახარჯო? თუ ფულიანია, აქეთ დამპატიჟოს, თუ არა და ათასნაირი ბაღი და სკვერია, სადაც დასხდომა და საუბარი შეიძლება.
- კი, მაგრამ ზამთარსა და სიცივეში შეყვარებულს ბაღში ხომ არ გაყინავ?
- რა მოხდა მერე? თბილად ჩაიცვას (იცინის). როცა ფული მაქვს, ბარშიც ვპატიჟებ ხოლმე, მაგრამ სტუდენტისთვის ყოველდღე გასართობად სიარული, თუ შეძლებული მშობლები არ ჰყავს, ძნელია. მით უმეტეს, დღევანდელ საქართველოში, ეს ხომ ევროპა და ამერიკა არ არის, ყველამ დამოუკიდებლად ირჩინოს თავი.
- 8 მარტს ან სიყვარულის დღეს შეყვარებულს საჩუქარს არ უძღვნი?
- სპეციალურად ამ დღეს, ნამდვილად არასდროს არაფერი მიჩუქებია. გაურკვეველი ხალხის მიერ დაწესებულ სიყვარულის დღეებს კი საერთოდ არ აღვნიშნავ. როცა შეყვარებული ხარ, სიყვარულის დღე სულ არის. რატომ არის 8 მარტი ქალთა დღე, ვერ ვხვდები, სხვა დღეს აღარ ქალობენ, თუ როგორ არის (იცინის)?
- რას ფიქრობ, შენი ხასიათი გოგონებს მოსწონთ?
- რომ არ მოსწონდეთ, ჩემ გვერდით არც გამოივლიდნენ. სხვათა შორის, 15 წლისა, მეც ვიყავი სერიოზულად შეყვარებული, მაგრამ ოჯახმა იმ გოგოს ცოლად მოყვანის ნებართვა არ მომცა და კიდევ კარგი, თორემ მაგ ასაკში შექმნილი ოჯახი დღემდე არ მომყვებოდა. მის გამო მართლაც ბევრი სიგიჟე ჩამიდენია, მიჩხუბია კიდეც, დიდი წითელი გულიც მიჩუქებია, რომანტიკული საღამოც მომიწყვია; ერთხელ, ახალი წლის ღამეს, სახლიდან გავიპარე და მეგობრებთან ერთად, მისი კორპუსის წინ, დიდი ცეცხლის გული დავანთე. გოგო ლამის შოკში ჩავარდა (იცინის). მას შემდეგ სიგიჟეები აღარ ჩამიდენია, ახლა უფრო სხვანაირი დამოკიდებულება მაქვს ამ ყველაფრის მიმართ, მაგრამ ეს იმას არ ნიშნავს, რომ ის ადამიანი არ მიყვარს, უბრალოდ ჩემში რაღაცები გადაფასდა. ესეც ცხოვრებამ მოიტანა. ამიტომ, ქალბატონებო, თუ მამაკაცი ყვავილს ან საჩუქარს არ მოგართმევთ, ნუ ჩათვლით, რომ მის გულში თქვენი ადგილი აღარ არის ან თქვენ მიმართ სიყვარული გაუნელდა. თუმცა, ფულიან მამაკაცებს მაინც მოვუწოდებდი, რომ საყვარელი ქალბატონები არ დაივიწყონ და თუ მათ ასე ძალიან უხარიათ, ფეიერვერკებიც მოუწყონ (იცინის). რაც მეტი გაღიმებული მანდილოსანი ივლის ქუჩაში, მით უფრო გაფერადდება თბილისი (იცინის).
ნინუცა მაყაშვილი, მსახიობი, ტელეწამყვანი:
- სხვათა შორის, 8 მარტს ბევრი საჩუქარი არასდროს მიმიღია, ძირითადად, თაიგულებს მჩუქნიან ხოლმე, განსაკუთრებული არაფერი. საერთოდ, მნიშვნელობა არა აქვს, ცნობილი ან პოპულარული ხარ თუ - არა, ქალს საჩუქრებს ამის მიხედვით არ უძღვნიან. ზოგადად, როცა 8 მარტი ან დედის დღეა, დედაჩემს აუცილებლად ვულოცავთ ხოლმე - ყვავილები მიმაქვს და შეიძლება საჩუქარიც ვუყიდო, თუ დაახლოებით ვიცი, რა სურს. თუმცა, რომ გითხრა, განსაკუთრებული ტრადიციით აღვნიშნავთ-მეთქი, მოგატყუებ. უბრალოდ, ეს ის დღეა, როცა იმაზე მეტ ყვავილს იღებ, ვიდრე სხვა დროს.
- რუსკას თუ უკეთებენ ხოლმე საჩუქრებს თაყვანისმცემლები?
- სიმართლე გითხრა, ზუსტად არ ვიცი, მაგრამ ძვირფასი საჩუქრებით მგონი, რუსკაც არ არის განებივრებული, ყოველ შემთხვევაში, თვალში არასდროს მომხვედრია.
თამთა დადეშელი
ჟურნალი ”გზა”
