"საწყალმა გოგომ ისეთი ცბიერება და ეშმაკობა გამოავლინა, გაოცებული დავრჩი"

ალბათ ყველას შეხვედრია სანაცნობო წრეში ერთი "კონკია" მაინც – ჩუმი, თავჩახრილი, უამბიციო, უფერული და მარტოსული გოგო, რომელიც ყველას ცხოვრებისგან დაჩაგრული ჰგონია და ყველა თავს მოვალედ მიიჩნევს, მას ხელი წაუკრას, თანადგომა აგრძნობინოს... გაივლის ხანი და შეიძლება ეს კონკია უცებ მოგევლინოთ მედიდურ "დედოფლად", რომელიც ბრენდებში გამოწყობილა, მოდური საუბრის მანერით ალაპარაკებულა, გვერდით ნამდვილი "ლომი" მოჰყვება, რომელიც აქამდე დამალული, საიდანღაც ამოხეთქილი "ქალური სიბრძნის" მეშვეობით მოკრუტუნე კატად უქცევია... გაითვალისწინეთ, ყოფილ "კონკიასთან" ურთიერთობა უკვე სახიფათოა, რადგან მას სძულს ყველა, ვინც წარსულში მისი საცოდაობის მომსწრე და მოწმე იყო.
დაახლოებით ასეთ სიტუაციაში აღმოჩნდა ჩვენი რესპონდენტი ნათია, რომელმაც, "საწყალი გოგოს" დახმარების სურვილით შეპყრობილმა, უნებურად საკუთარი სანათესაო დააზარალა.
ნათია:
– ჩემი დაქალისგან საშინლად იმედგაცრუებული ვარ. ბავშვობიდან ერთად ვიზრდებოდით, მრავალი განსაცდელი, ჭირი თუ ლხინი გადაგვიტანია, მაგრამ ბოლო წლებია ისე იქცევა, საერთოდ ვერ ვცნობ – ვფიქრობ, ნუთუ ეს ის ლენკაა, ურომლისოდაც ვერ ვძლებდი და ვისთვისაც ამდენი ენერგია დამიხარჯავს? იქნებ ჯობდა, მასთან საერთოდ არ დავმეგობრებულიყავი?!
– თქვენს მეგობარში კონკრეტულად რა შეიცვალა?
– წყნარი, წესიერი, გულჩვილი და თავჩაღუნული გოგო იყო, სულ ფარად ვედექი, ვინმეს რომ არ დაეჩაგრა. ერთმანეთს საიდუმლოებებს ვუმხელდით, ვანუგეშებდით. ახლა კი ცხვირაწეული დადის, თავი "კრასავიცა" ჰგონია, ცა ქუდად არ მიაჩნია და დედამიწა ქალამნად. პრესტიჟული სამსახური იშოვა, შეძლებული კაციც დაითრია... რაც მთავარია, ეს ყველაფერი ჩემი შემწეობით და უკვე აღარ ვჭირდები. არის კიდევ ერთი, მნიშვნელოვანი მომენტი – ის კაცი, ვინც ასე პატრონობს და ელაციცება, ბიძაჩემია. რომ მცოდნოდა, ასე თავდაყირა დააყენებდა ჩემი ოჯახის ცხოვრებას, ბიძაჩემს საერთოდ არ გავაცნობდი.
– ბიძათქვენი რას საქმიანობს?
– ბიძაჩემი, დავითი, ერთი კომპანიის ხელმძღვანელია, 50 წლის გავლენიანი და შეძლებული მამაკაცი. ცოლი ადრეულ ასაკში მოიყვანა და ოჯახი ამიტომაც ვერ შეინარჩუნა. ახალგაზრდებმა ვერ გაუძლეს ცხოვრების გამოცდას და გაიყარნენ. ჩემი ბიძაშვილი ანა, რომელიც დედასთან დარჩა, მშობლების გაშორებას მთელი ბავშვობა ძალიან მტკივნეულად განიცდიდა, მამა განსაკუთრებით უყვარდა, რომ იტყვიან, მასზე აბოდებდა. ბიძაჩემი მას მამობრივ მზრუნველობას არ აკლებდა. მისი ყოფილი ცოლი, ნანა, არაჩვეულებრივი ადამიანია. მასთან ჩემმა ოჯახმა ახლო ურთიერთობა შეინარჩუნა. როგორც ვიცი, მას დღემდე უყვარს ყოფილი მეუღლე და ქმართან შერიგების სურვილიც ჰქონდა, მაგრამ ბიძაჩემი შეეჩვია მარტო ცხოვრებას და ხელახლა ოჯახურ უღელში თავის შეყოფა არ მოისურვა. მით უფრო, რომ ქალები არასდროს აკლდა.
– თქვენი დაქალი გასათხოვარია?
– ლენკა 18 წლის გათხოვდა, ძალიან კარგ ბიჭს, ნიჭიერ ხელოვანს, ვატოს გაჰყვა ცოლად. მის გვერდით ლენკა საერთოდ დაიკარგა, გაიცრიცა და გაუფასურდა. ყველას უკვირდა – ვატოს ცოლად რამ მოაყვანინაო. ამას რომ ამბობდნენ, ვცოფდებოდი, ხმალამოღებული ვიდექი ლენკას ინტერესების სადარაჯოზე, თქვენ რა იცით, რა გოგოა, რა სულიერების მატარებელი–მეთქი.
– ოჯახი ვერ შეინარჩუნეს?
– ვატოსთვის ლენკას გვერდით ცხოვრება მოსაწყენი აღმოჩნდა. სხვა ქალი გაიცნო, ბევრად ლამაზი, საინტერესო და ინტელექტუალური იყო. ლენკას და ვატოს შვილი, იკა, მაშინ ძალიან პატარა იყო. ლენკასთან გაყრის შემდეგ ვატო შვილს ზედ ყვებოდა, ლენკას კი არაფრად აგდებდა. ის წლები ლენკამ მძიმედ გადაიტანა. მისი დარდის მოზიარე ვიყავი. შეიძლება ითქვას, ჩემი თანადგომით მდგომარეობა შევუმსუბუქე.
– ლენკამ და ბიძათქვენმა ერთმანეთი სად გაიცნეს?
– ბიძაჩემს ვთხოვე, სამუშაოდ მოაწყვე–მეთქი. დავითს ძალიან ვუყვარდი და უარი არ მითხრა, მომიყვანე და გავესაუბრებიო. ვაკანსია ჰქონდა ერთ კარგ ადგილზე. რომ მივუყვანე, არ დამავიწყდება ბიძაჩემის გაოცებული სახე – ალბათ ეგონა, ჩემი დაქალი ჩემსავით ენერგიული იქნებოდა და ეს გასაცოდავებული წიწილასავით გოგო შერჩა ხელში. მაინც გაესაუბრა, მერე დაემშვიდობა და უთხრა, თუ რამე გამოჩნდა საშენო, დაგირეკავთო. ლენკა რომ წავიდა, ბიძაჩემს ვკითხე, არ მოგეწონა–მეთქი. ამან ოფისში რა უნდა გამიკეთოს, მე ენერგიული, პოზიტიური, საქმიანი ადამიანები მჭირდება და არა მოჩვენებებიო. თან გამიღიმა და ლოყაზე ხელი მომითათუნა, რომ არ მწყენოდა. ასე რატომ აფასებ, კარგი გოგოა–მეთქი. მაშინ შენი ხათრით რამეს მოვუხერხებო. მერე ერთ ნაკლებად საპასუხისმგებლო ადგილზე მიიღო, ხელფასიც ნორმალური დაუნიშნა. ვფიქრობ, ჩემი ხათრით გამოუნახა ის ადგილიც, თორემ ოფისისთვის არც კი სჭირდებოდა. ლენკა სიხარულისაგან ცაში დაფრინავდა, შენს ამაგს ვერასდროს გადავიხდიო.

– მათი რომანი იქ გაჩაღდა?
– ბიძაჩემი ლენკაზე ჩემი ხათრით მშობელივით მზრუნველობდა, ლენკამ კი მისი მონადირება დაიწყო.
– შეუყვარდა?
– არა, ლენკას თავისი ქმარი უყვარდა, ვერ მოინელა მისი ღალატი და გადაწყვიტა, შური ეძია. ბიძაჩემი კი მისი სამიზნე გახდა.
– არცთუ უსუსური გოგო ყოფილა...
– ისეთი ცბიერება და ეშმაკობა გამოავლინა, გაოცებული დავრჩი. ბიძაჩემს ლოგინში ჩაუგორდა. მიზნის მისაღწევად მეც დამივიწყა და ოჯახის ღირსებაც. თავიდან მიმალავდა, მაგრამ მერე თანამშრომლები რომ ალაპარაკდნენ და ეს ამბავი სხვა წყაროდან გავიგე, კეთილი ინება და გამომიტყდა. თან ყველაფერი ბიძაჩემს დააბრალა, თვალი დამადგა, მეპრანჭებოდა და მეც ქალურმა სისუსტემ მძლია, ასეთ მამაკაცს ვერ გავუმკლავდიო. რა თქმა უნდა, დაუჯერებელი იყო, რომ დავითისნაირი შემდგარი და სიმპათიური მამაკაცი, რომელსაც ყოველთვის გამორჩეულ ქალებთან ჰქონდა ურთიერთობა, ლენკასნაირ უფერულ გოგოს დაადგამდა თვალს, მაგრამ მაშინ დაქალის სიტყვები მაინც დავიჯერე, "ავვარდი" და ბიძაჩემს ვეძგერე, ეგ როგორ იკადრე, რა გამიკეთე–მეთქი.
– საინტერესოა, რა გიპასუხათ.
– დამიწყო ზოგადი და დემაგოგიური საუბრები ცხოვრებაზე, ფილოსოფიაზე, აბა, იმას ხომ არ მეტყოდა, შენი გარყვნილი დაქალი ლოგინში ჩამიხტაო... მერე შეეცადა, ხუმრობაში გადაეტანა. ამან მთლად გამაგიჟა, ვუთხარი, ლენას თავს თუ არ დაანებებ, დაგკარგავ–მეთქი.
– შეასრულეთ მუქარა?
– ბიძაჩემს აღარ ველაპარაკები, მასთან ურთიერთობა გავწყვიტე. მეუბნებიან, რა ქაჯივით იქცევი, ისეთი რა მოხდაო. ყველა ამ ადამიანს მინდა ვუთხრა: სწორედაც რომ მოხდა! მათ ეს არ უნდა ჩაედინათ!
– არ უშვებთ აზრს, რომ შეიძლება მათი ურთიერთობა უფრო ღრმად და სერიოზულად განვითარდეს? ასეთი კატეგორიული პოზიცია რატომ გაქვთ?
– არა მგონია, ვინმეს ეჭვი შეეპაროს, რომ მათი ურთიერთობა უზნეობაა. 22 წლის გოგოს 50 წლის კაცთან სექსი არ უნდა ჰქონდეს. გარდა ამისა, ეს ჩემი შეურაცხყოფაცაა, ყველაფერთან ერთად ჩემს სახელსაც სვრიან. ბიძაჩემი მაგის ცოლად მომყვანი არ არის.
– და მაინც, რომ მოიყვანოს, მაგ ფაქტსაც უარყოფითად შეხვდებით?
– არაფრით შევურიგდები. ბიძაჩემმა ცოლად რომ შეირთოს, ბრიყვი იქნება – გოგო, რომელსაც კაცთან ანგარება ამოძრავებს და ამ მიზნით ნადირობს მასზე, ოჯახში როგორ უნდა შემოუშვას?! არ იფიქროთ, რომ ჩემი დაქალის მშურს, ვეჭვიანობ ან მისი ბედნიერება მწყინს, უბრალოდ მათი საქციელი ამორალური, არასწორია.
– ანუ გამორიცხავთ, რომ ყველაფრის მიუხედავად, ერთად ყოფნით შეიძლება ბედნიერება მართლა მოიპოვონ?
– ნამდვილად გამოვრიცხავ, რომ ბიძაჩემმა ლენკასთან ბედნიერად იგრძნოს თავი. ყველას თავისი შესაფერისი უნდა ჰყავდეს გვერდით. სამწუხაროდ, ლენკასთვის პრიორიტეტი ფული გახდა და, ვინც ფულს გადაუხდის, მასთან იგრძნობს თავს ბედნიერად.
– მისმა ქმარმა გაიგო ყოფილი ცოლის რომანის შესახებ?
– რომ გეკითხათ, ლენკა ვითომ მალავდა და სინამდვილეში კი იმდენი ქნა, სანამ ქმარს არ გააგებინა. ვატოს შეხვედრას სთხოვდა სალაპარაკოდ და სწორედ იმ დროს დაიბარა იმავე რესტორანში, სადაც ბიძაჩემთან ერთად სადილობდა. დაანახა, მდიდარი კაცი მყავსო.
– ყოფილ ქმარს ამაზე რა რეაქცია ჰქონდა?
– ვატო შეგნებული ბიჭია, დანახვისთანავე უკან გაბრუნდა... ეს ყველაფერი ლენკამ ჩვენს საერთო დაქალებთან მოყვა, იტრაბახა. ჩემთან კი ამის თქმა ვერ გაბედა. იცოდა, რა პასუხსაც მივართმევდი.

– ლენკა მეგობრების მიმართაც შეიცვალა?
– ყველაფერთან ერთად ხასიათიც შეეცვალა. კარგ ცხოვრებას გემო რომ გაუგო, სხვებს უკვე ცინიკურად, ზემოდან დაუწყო ყურება... გულცივი გახდა, სხვისი გაჭირვება არაფრად მიაჩნია. იმდენი ტანსაცმელი დაუგროვდა, კარადაში აღარ ეტევა და ერთი დღით რომ სთხოვო რამე, იმაზე წუწუნებს, არადა დახეული სამოსით რომ დადიოდა, დაქალები ტყავში ვძვრებოდით – მისთვის რამე ახალი გვეყიდა. გამონაცვალს არ ვაძლევდით, გული რომ არ დასწყვეტოდა, სტიპენდიას ვკრეფდით და მისთვის ახალს ვყიდულობდით. ახლა წამხედურობაც დაიწყო: თუ ვინმეს რამე ახალი დაუნახა, გულზე სკდება. ბიძაჩემს ათასნაირად მიუდგება ხოლმე, ფული რომ დასცინცლოს და თავის დაქალებზე უკეთესი იყიდოს, მერე კი ამით თავი მოიწონოს. მასზე წინ არავინ უნდა იდგეს, მაშინ, როცა ყოველთვის თავჩაღუნული დადიოდა და დაქალები ვქაჩავდით. ისე ყელყელაობს, გეგონება, დაბადებიდან ვინმეზე მეტი იყო.
არის კიდევ ერთი მნიშვნელოვანი მომენტი, რაც მათი ურთიერთობისადმი ნეგატიურად განმაწყობს. სანამ ლენკა გამოჩნდებოდა, ბიძაჩემი და მისი ყოფილი ცოლი ლამის შერიგების პირას იყვნენ მისული. ამაში ჩემი ბიძაშვილი, ანა, ძალიან აქტიურობდა. ლენკამ სოციალურ ქსელში სპეციალურად შეაგდო ბიძაჩემთან ერთად გადაღებული ინტიმური ფოტოები, რომ გაევრცელებინა და მის ყოფილ ცოლამდე მისულიყო. ამის შემდეგ საქმე შეფერხდა და მერე საერთოდაც აღარ შედგა. ბიძაშვილმა მე დამადანაშაულა, შენ რომ ხელი არ შეგეწყო, ასე არ მოხდებოდაო. ვერაფრით დავარწმუნე, რომ ჩემი "დანაშაული" მხოლოდ ის იყო, ლენკას სამსახურის შოვნაში დავეხმარე. ანას დედასთან ვეღარც მივდივარ სირცხვილით, ჩემი დაქალის უზნეო საქციელისთვის მე გავილანძღე. ჩემი მშობლებიც ჩემ მიმართ ეჭვიანები გახდნენ, ყოველ ნაბიჯს მიკონტროლებენ, ალბათ ეშინიათ, მეც ლენკასნაირად არ მოვიქცე.
ოჯახში თუ ოჯახს გარეთ – ყველგან დამეძაბა ურთიერთობა. ჩემს დაქალს კი სულ ფეხებზე ჰკიდია, მის გამო თუ ვინმე დაზარალდება, გინდ ბავშვობის მეგობარი იყოს. უფრო მეტიც, ბიძაჩემთან პირი მოაღო და მთელი ჩემი საიდუმლოებები ჩაუკაკლა. განა ასეთ ადამიანთან მეგობრობის გაგრძელება ღირს?! ის ძველი მეგობრობა მენანება, მაგრამ რა ვქნა, ალბათ მასთან საბოლოოდ გავწყვეტ ურთიერთობას, თუნდაც იმიტომ, რომ შერცხვენილი სახელი აღვიდგინო.
ნანა კობახიძე