გია სურამელაშვილს ექიმებმა ფრენა და სექსი აუკრძალეს

რესტორნულ, ეგრეთ წოდებულ "დიმპიტაურა" სიმღერებს ბოლო დროს არაერთი კრიტიკოსი გამოუჩნდა. მუსიკალური გემოვნების ჩამოყალიბებაზე წერენ, უძღვნიან გადაცემებს, მაგრამ ვერ იქნა და ვერ ჩამოგვიყალიბეს ეს გემოვნება. ყანწიანი და ღიპიანი ბიძები, საღამოს კაბებში გამოწყობილი დეიდები არ იქნა და არ ითხოვენ კლასიკას რესტორნებში. დღეს ასეთ ადგილებში "პაჩები და პუჩების", "შავთვალება გოგონას", "მაყვალას", "გაპატიებ" და მსგავსი სიმღერების ბუმია. ვიღაცას მოსწონს ეს, ვიღაცას - არა, ვიღაცას მოსწონს, მაგრამ რცხვენია და მალავს. სწორედ ამ თემაზე საუბრით დავიწყეთ ინტერვიუ ერთ-ერთ ყველაზე მოთხოვნად და მაღალანაზღაურებად მომღერალ გია სურამელაშვილთან.

- გია, ბოლოს ნოდარ მელაძის ტელეგადაცემაში გნახეთ, შოუბიზნესს ეხებოდა. შენი და თაკოს სიმღერით გაიხსნა გადაცემა, თუმცა მერე კრიტიკის ქარცეცხლში გაახვიეს ე.წ. რესტორნული სიმღერები.
- რას ეძახით რესტორნულ სიმღერებს, ვერ გამიგია. იმ დღეს მესამე გადაღებაზე გახლდით და ისეთი გათიშული ვიყავი, ენა ვერ მოვატრიალე, ურეაქციოდ ვიჯექი. რას ლაპარაკობდნენ, ვერ გავიგე. თვითონ მოახდინონ საკუთარი თავის რეალიზაცია, სხვებს რატომ ეხებიან, ვერ გამიგია. 22 წელია სცენაზე ვდგავარ და არავის შევხებივარ. ჩემთვის მივდივარ ჩემს გზაზე და ჩემს საქმეს ვაკეთებ.

- იმ გადაცემის შემდეგ ბედინამ ასეთი ფრაზა თქვა ჩემთან ინტერვიუში: "სურამელაშვილის დრო წავიდა, ბედინა მოვიდა!"
- ღმერთმა გაუმარჯოს. პატივს ვცემ ნებისმიერი მიმართულების მუსიკას. მე ის ადამიანი ვარ, ვინც სხვის მუსიკაზე არ იბოღმება, კარგად გაკეთებული იქნება თუ ცუდად. მე ყველას პატივს ვცემ, ვინც თავის საქმეს აკეთებს. შეიძლება არ ვგიჟდებოდე ამა თუ იმ მომღერალზე, ყოველდღე არ ვუსმენდე, მაგრამ პატივს ვცემ. თუმცა ფავორიტები მყავს, ვის სიმღერებსაც ვუსმენ, ვისთან ერთადაც დავლევ კიდეც და შეიძლება, ცრემლიც წამომივიდეს.

- მაგალითად?
- ნინო ჩხეიძე, ანრი ჯოხაძე, ლელა წურწუმია, ეკა კვალიაშვილი.

- რომელიც მოსკოვში გაიქცა...
- არ ვიცი, ვინ სად გაიქცა, სიამოვნებით ვუსმენ ყველა ჩემს კოლეგას. მათ შორის რეპერებსაც. ძალიან დაკავებული ვარ საიმისოდ, რომ ჩემს კოლეგებზე ვიჭორაო, თუნდაც ეკრანზე, თუნდაც ჩაწერაზე და გინდაც კულისებში. ასეთი ბიჭი ვარ, რა ვქნა... დაკავებული ვარ საქმით და პირადი ცხოვრებით. შოუში იმიტომ მივედი, რომ საჭირო იყო.

- წინ გვეღობებიანო, ბედინა წერს, არ გვატარებენო.
- თუ ასეთი ძლიერი ვარ, რომ ვინმეს ვბლოკავ, არ ვიცი. სხვათა შორის, დიდ პატივს ვცემ ბედინას. გადავხედე მაგ ინტერვიუს. ბედინა მოვიდა!.. მოვიდეს, იმღეროს, რა პრობლემაა. მას თავისი ხელწერა აქვს, ყველას არ ჰგავს. მისი ფანი ვარ-მეთქი, ვერ ვიტყვი, მაგრამ სიამოვნებით მოვუსმინე რამდენჯერმე. ვისი დრო წავიდა და ვინ დარჩა, ეს ხალხმა გადაწყვიტოს. 22 წელია ჩემი დრო არ წასულა და იმ გადაცემის მერე წავიდა?!

- გია, ძალიან პოპულარული ხარ, ხშირად გიწვევენ გადაცემებში...
- (მაწყვეტინებს) სადაც არ მივდივარ, ეგ კიდევ სხვაა. ხან პახმელიაზე ვარ, ხან ქალაქგარეთ. თანაც, არ არის საჭირო, ყოველდღე მიყურონ, პოპულარობისთვის გადაცემები არ მჭირდება.

- ბოლოს "კომედი შოუში" ახალი სკეტჩი მოგიძღვნეს, სადაც გია სურამელაშვილმა თავისი რესტორანი გახსნა.
- არაჩვეულებრივ რეკლამას

მიკეთებენ, ვენაცვალე მაგ ბიჭებს. მართალი გითხრა, არ ვუყურებ ტელევიზორს, იმ გადაცემებსაც კი, სადაც მე ვარ. ინტერვიუებსაც ჩემი მეგობრები მიკითხავენ. ეს სკეტჩიც მოყოლით ვიცი. ვენაცვალე ვასო ფხაკაძეს, კარგი ბიჭია. ეგ რომ არ დაბადებულიყო, ვინ გამიკეთებდა რეკლამას?

- მართლა გახსენი რესტორანი?
- კი, სადაც ახლა ჩვენ ინტერვიუს ვწერთ, გიას რესტორანია. სულ ათიოდე დღის გახსნილია, "ვიქოქებით". ჩემი მეგობრები იყვნენ ამას წინათ, ნინო ჩხეიძე, ია ფარულავა, ზალიკო ბერგერი. კარგი დრო გავატარეთ.

- გია, დასასვენებლადაც დაცვის თანხლებით დადიხარ?
- არა, მხოლოდ პირადი თანაშემწე მიმყავს, ლექსო, რომლის გარეშეც ვერ ვძლებ. ის ყველაფერს აკონტროლებს. სიგარეტი მინდა, ლექსომ უნდა მომაწოდოს, პიჯაკის ჩაცმა მინდა, ლექსომ უნდა ჩამაცვას, სათვალეს მოვიხსნი, ლექსომ უნდა დაიკავოს. დაცვას იმ ქვეყანაში მახვედრებენ, სადაც მივდივარ. აქედან წაყვანა დიდ ხარჯებთან არის დაკავშირებული. წელს ისრაელში წავალთ მე და ლექსო. კონცერტი მაქვს. მე ხომ დასვენებასა და მუშაობას მშვენივრად ვუთავსებ ერთმანეთს. დიდი ხნით თბილისი არ მიშვებს. ახალი გახსნილი მაქვს ეს რესტორანი, უნდა ვიმუშაო.

- ზღვა გირჩევნია დასასვენებლად თუ მთა?
- ზღვა არა, ბევრი მაყურებელი მყავს და ვერ ვისვენებ.

- ცურვა იცი?
- არა, ზურგზე ცურვა ვიცი მარტო. წყალში იქამდე შევდივარ, სადამდეც მიწას ვწვდები ფეხით.

- გარუჯვაც არ გიყვარს? არ მინახავხარ გარუჯული...
- საშინელება ვარ, არ მიხდება. თან სამი წელი ზამთარ-ზაფხულ იმდენი რუჯი მივიღე, მომბეზრდა. წელს თეთრი მინდა ვიყო.

- ბოლო დროს შენზე ახალი ჭორი არ გამიგია. ახალი არაფერი ხდება, თუ ჯერ ვერ იგებენ?
- ყველა ჟურნალისტი გადმოვიბირე (იცინის).

- მე ვერ გადამიბირე ჯერ. მითხარი, რა ხდება შენს პირად ცხოვრებაში?
- სათქმელი მართლა დამიგროვდა, მაგრამ ჯერ ვერ გეტყვი. არ მინდა, წინ გავუსწრო მოვლენებს. დრო მოვა და ყველაფერს ვიტყვი.

- საკურორტო რომანი თუ გქონია?
- კი, შორეულ ახალგაზრდობაში. უახლოეს წარსულშიც მქონდა, ბათუმში კონცერტზე გავიცანი, რამდენიმე თვე გაგრძელდა ჩვენი ურთიერთობა. ქუთაისელი იყო, ბათუმში ისვენებდა. მერე მანძილმა და დრომ დაგვაშორა. თან გიასთან ურთიერთობას სხვანაირი "გაქაჩვა" სჭირდება, უჭირს ხალხს.

- გაქაჩვაზე გამახსენდა, "ცეკვავენ ვარსკვლავებში" მონაწილეობა არ შემოგთავაზეს?
- კი, მითხრა მამულიჩამ, რომ იწყებოდა პროექტი, მაგრამ სად შემიძლია... მიყვარს სმა, ჭამა, ხუთ ადგილზე ვმღერი, ღამეს ვათენებ, მაგას ვეღარ გავქაჩავ. რეჟიმში ყოფნა ჩემი ცხოვრების სტილი არ არის.

- გადაცემებში ნასვამი მიდიხარ, კონცერტებზე ნასვამი მღერი, პირადი ექიმი თუ გყავს?
- კი, საკმაოდ სოლიდურ და ცნობილ კლინიკაში დავდივარ და ვაკონტროლებ ჩემი ჯანმრთელობის მდგომარეობას.

- არ გეუბნება ექიმი, რომ ალკოჰოლი მავნებელია შენი ჯანმრთელობისთვის?
- ჩემთან აკრძალვები არ გადის. დიეტებსაც ვერ ვიცავ, ურჩი ვარ. რასაც მიკრძალავენ, სწორედ ის მინდა.

- ბოლოს რა აგიკრძალეს?
- ჟიმაობა (ხარხარებს).

- მართლა?
- ჰო, გულზე პრობლემები შემექმნა, ფრენა და სექსი ამიკრძალეს.

- მერე ემორჩილები?
- არა, მაგ აკრძალვას როგორ დავემორჩილო. ამერიკაში ვიზიტი გადავდე იმის გამო, რომ ფრენა არ შეიძლება, მაგრამ სექსს ვერ ავკრძალავ.

ნინო მჭედლიშვილი
ჟურნალი "რეიტინგი"