სოფო ჩაკვეტაძე: "სუნამოს განწყობისა და სეზონის მიხედვით ვირჩევ"
რუბრიკის სტუმარია სამოდელო სააგენტო "ნატალის" მოდელი სოფო ჩაკვეტაძე.
- სოფო, მოდელები განსაკუთრებით ზრუნავენ გარეგნობაზე, თქვენ ჩაცმის როგორ სტილს ამჯობინებთ?
- გარეგნობაზე არა მარტო მოდელმა, ყველა ქალმა უნდა იზრუნოს. ჩემი ჩაცმის სტილი გარემოების შესაბამისად იცვლება. უმთავრესად დაბალძირიან ფეხსაცმელს ვიცვამ, მიყვარს შარვლები, ვცდილობ კლასიკური და სპორტული სტილის შეხამებას. კაბით მხოლოდ განსაკუთრებულ შემთხვევაში ვიმოსები. ძალიან მომწონს ცნობილი დიზაინერების შექმნილი სამოსი, მაგრამ ჩემი გარდერობი მხოლოდ სახელობითი სამოსისგან არ შედგება. მოდის წლევანდელი ტენდენციებიდან კი ძალიან მომწონს მონაცრისფრო, თავისუფალი სტილის ქურთუკები და ლაბადები. შევიძინე კიდეც ასეთი ლაბადა. საზოგადოდ, ნაცრისფერი მიყვარს, მომწონს ტყავით გაწყობილი სამოსიც.
- ქართველი დიზაინერებიდან ვის გამოარჩევთ?
- კაბებს ავთანდილთან ვყიდულობ... ძალიან მომწონს ანუკა ქებურია, თამუნა ინგოროყვა და გიორგი შაღაშვილი, რომელიც შესანიშნავ სამოსსა და ფეხსაცმელს ქმნის.
- შინიდან გასვლის წინ დიდხანს ტრიალებთ სარკესთან?
- თუ წინა დღეს არ შევარჩიე სამოსი მეორე დღისთვის, შეიძლება იმდენ ხანს ვიტრიალო სარკესთან, რომ ვერც საუზმე მოვასწრო, ვერც თმის დავარცხნა და სამსახურშიც დავიგვიანო. ასე ვარ საყიდლებზე სიარულის დროსაც. ვინც ეს ამბავი იცის, ცდილობს, საყიდლებზე არ წამომყვეს. შეიძლება რამე მომეწონოს, მაგრამ არ ვიყიდო, მერე კი გზიდან მივბრუნდე და შევიძინო...
- თქვენს ცხოვრებაში თუ არსებობს ადამიანი, ვისთვისაც განსაკუთრებულად იპრანჭებით?
- ასეთი ადამიანი ყველას ჰყავს. ის საუკეთესოა, მის რჩევებსაც ვითვალისწინებ. რჩევას დედასაც ვეკითხები და მეგობრებსაც, მაგრამ უმეტესად მაინც ჩემი გემოვნებით ვიცვამ.
- როგორ უნდა გამოიყურებოდეს მამაკაცი, რომ მოგხიბლოთ?
- ასეთი მამაკაცი უკვე გამოჩნდა (იცინის). ისე კი, არ მომწონს, მამაკაცს მოტკეცილი შარვალი და დიდი პულოვერი რომ აცვია. მომწონს, როცა მამაკაცი ზომიერად შეხამებული კლასიკური ან სპორტული სტილით არის შემოსილი. გარდა ამისა, უნდა ჰქონდეს კარგი საათი და იყოს მოვლილი. 
- ვის მიიჩნევთ გემოვნებიან ადამიანად?
- ძალიან მომწონს თეონა თავართქილაძის სტილი - დახვეწილი და ქალურია. ელეგანტური მამაკაცი კი არ მახსენდება, სამწუხაროდ.
- პოლიტიკოსი მამაკაცებიდან ვერ გამოარჩევთ რომელიმეს?
- პოლიტიკოსების ჩაცმულობას არ ვაკვირდები, უმთავრესად, მათ საუბარს ვუსმენ (იცინის).
- რომელი პარფიუმერიული ბრენდი მოგწონთ?
- ტონალურს არ ვხმარობ, მხოლოდ რუჟს ვისვამ. ამჯერად "პუპას" რუჟი მაქვს. გადაღებებისთვის კი ტონალური აუცილებელია, კარგ და პროფესიონალურ კოსმეტიკას თვითონ ვიზაჟისტები მისვამენ. არ მიყვარს ტუჩის პრიალა საცხი, ე.წ. ბლესკი. ჩემი მაკიაჟი რუჟი და თვალის ლაინერია.
- როგორი არომატები მოგწონთ?
- ჩემი საყვარელი სუნამოა შანელის ვარდისფერი "შანსი". ახლა მაქვს გოტიეს "მადამ". აგრეთვე, ძალიან
მომწონს დიორის "მის დიორი". სუნამოს განწყობისა და სეზონის მიხედვით ვირჩევ.
- გარეგნობის შეცვლის სურვილი ხშირად გიჩნდებათ?
- ეს ბავშვობაში ხდებოდა, როცა სარკესთან ვდგებოდი (იცინის).
- რას ურჩევთ ქართველ ქალებს?
- იყვნენ კარგ განწყობაზე, ხშირად გაიღიმონ და ჭარბი წონა თუ აწუხებთ, ზომიერად იკვებონ.
სახის მოვლის რეცეპტი სოფო ჩაკვეტაძისგან: ერთმანეთში აურიეთ თაფლი და მჭადის ფქვილი. ეს მასა წაისვით სახეზე და ჩამოიბანეთ თბილი წყლით. კანი იწმინდება და რბილდება.
ესაუბრა თამარ ბოჭორიშვილი
