სამსახურში რომ არ ჩაგვეძინოს

მხიარული ღამის წვეულების შემდეგ, სამსახურში ძილმა თავი რომ არ წაგართვათ, მარტივი რჩევები გაითვალისწინეთ:

ადექით და გაიარ-გამოიარეთ

სპეციალისტებმა გამოიკვლიეს, რა უფრო მეტ ენერგიას მატებს ორგანიზმს - ერთი ფილა შოკოლადი თუ ათწუთიანი გასეირნება. აღმოჩნდა, რომ შოკოლადი მართლა ამაღლებს ენერგიას, მაგრამ ერთი საათის შემდეგ ადამიანი კვლავ გრძნობს მოთენთილობას. ათწუთიანი გასეირნების შემდეგ კი ექსპერიმენტის მონაწილეებს ენერგია ორ საათზე მეტხანს ჰყოფნიდათ.

თუ სამსახურში დიდხანს გიწევთ მაგიდასთან ჯდომა, ხშირ-ხშირად ადექით და გაიარ-გამოიარეთ. არა აქვს მნიშვნელობა, შენობიდან გახვალთ თუ არა, ენერგიის მატებას მაინც იგრძნობთ.

ჩათვლიმეთ

სამსახურში თვლემა მაინცდამაინც მოსახერხებელი არ უნდა იყოს, მაგრამ თუ მაინც მოგერიათ ძილი, შეეცადეთ, ამისთვის შესვენება გამოიყენოთ. თუ ამის საშუალება არ არის, შეგიძლიათ, თავი მაგიდაზე დადოთ და ათი წუთის განმავლობაში, უბრალოდ, თვალები დახუჭოთ.

დაასვენეთ თვალები. მუდმივად კომპიუტერის ეკრანის ცქერამ შეიძლება თვალები გაგიღიზიანოთ და დაღლილობა და მოთენთილობა იგრძნოთ. პერიოდულად რამდენიმე წუთით მოშორდით ეკრანს და თვალები დაასვენეთ.

ჯანსაღი საკვები ენერგიას შეგმატებთ. სიმხნევისთვის სამსახურში შეგიძლიათ მიირთვათ არაქისის კარაქი და კრეკერები, იოგურტი და თხილეული ან ხილი, ნედლი სტაფილო და დაბალკალორიული ყველი.

ჩართეთ დამატებითი განათება. თუ თქვენს სამუშაო ადგილზე მქრქალი განათებაა, ადვილი შესაძლებელია, ძილი მოგერიოთ. ამიტომ, თუ მოთენთილობას იგრძნობთ, დამატებითი განათება ჩართეთ. მკვეთრი სინათლე ყურადღების კონცენტრირებას უწყობს ხელს.

ღრმად ისუნთქეთ

ღრმად სუნ­თქვა ხელს უწყობს სისხლის ჟანგბადით მომარაგებას. ის ანელებს გულის რიტმს, ამცირებს სისხლის წნევას და აუმჯობესებს სისხლის მიმოქცევას.

გაითვალისწინეთ, ეს პუნქტი ითვალისწინებს არა მკერდისმიერ, არამედ მუცლისმიერ ღრმა სუნთქვას.

ამ ვარჯიშის შესრულება სამუშაო მაგიდასთანაც შეიძლება: დაჯექით გამართულად, ერთი ხე­ლი მუცელზე დაიდეთ, ცხვირით ღრმად ჩაისუნთქეთ და მკვეთრად ამოისუნთქეთ პირით. ამ დროს ხელით ოდნავ უბიძგეთ მუცელს. გულმკერდი უმოძრაოდ უნდა იყოს. ამოსუნთქვისას ტუჩებს მილისებური მდგომარეობა უნდა ჰქონდეს.

თუ საჭესთან ძილი მოგერიათ, მანქანა აუცილებლად გააჩერეთ. ზედმეტია იმაზე ლაპარაკი, რაოდენ სახიფათოა მთვლემარე მდგომარეობაში საჭესთან ჯდომა. თუ წინ გრძელი გზა გიდევთ, შეეცადეთ, ყოველ ორ საათში მანქანა გააჩეროთ და სუფთა ჰაერზე გაიარ-გამოიაროთ.

დალიეთ წყალი

გაუწყლოება დაღლილობისა და მოთენთილობის შეგრძნებას იწვევს. დალიეთ სათანადო რაოდენობის წყალი და მიირთვით ხილ-ბოსტნეული.

ჟურნალი ”რეიტინგი”