რატომ გაუშვეს ”ჩემი ცოლის დაქალებიდან” ნინო გაჩეჩილაძე
მსახიობი ნინო გაჩეჩილაძე სერიალიდან "ჩემი ცოლის დაქალები" დაითხოვეს. ასე სერიალის სცენარისტი ქეთი დევდარიანი ამბობს. თავად ნინო კი აცხადებს, რომ თავისი ნებით წამოვიდა, რადგან უნდა, მთლიანად თეატრზე გადაერთოს. დაუდასტურებელი ხმებით, ამ ცვლილების მიზეზი ისაა, რომ ანაზღაურებაზე ვერ შეთანხმდნენ – ნინომ ჰონორარის გაზრდა მოითხოვა, სერიალის ხელმძღვანელობამ კი უარი უთხრა. მსახიობის "ფეისბუქის" გვერდზე უამრავი წერილია, სადაც ნინოს სთხოვენ, რომ სერიალი არ დატოვოს, თუმცა საქმე ასე მარტივად არ არის. ყველაფერი გადაწყვეტილია. გაჩეჩილაძეს მსახიობი ლელა მებურიშვილი ჩაანაცვლებს. მას იმედი აქვს, რომ მის კატოსაც მაყურებელი კარგად მიიღებს. სახეშეცვლილი სერიალის მესამე სეზონი 9 მარტს გავიდა ეთერში. "ჩემი ცოლის დაქალების" პერიპეტიებზე "სარკე" ნინო გაჩეჩილაძეს, ლელა მებურიშვილს და სცენარისტ ქეთი დევდარიანს ესაუბრა.
– ნინო, რატომ წამოხვედით სერიალიდან, რომელმაც პოპულარობა მოგიტანათ?
– მოგეხსენებათ, რომ მარჯანიშვილის თეატრის მსახიობი ვარ. თეატრში ცოტა ხნის წინ ახალ სპექტაკლზე დავიწყეთ მუშაობა, რაც ჩემგან დიდ დროს და ენერგიას მოითხოვს. ორივე საქმის ერთდროულად კეთება კი ძალიან ძნელია. ამიტომ გადავწყვიტე, ეს პერიოდი თეატრს დავუთმო და სერიალის მაყურებელს თავი აღარ მოვაბეზრო.
– ადრე ხომ ასწრებდით თეატრსა და სერიალში ერთდროულად მუშაობას, ახლა რა გიშლით ხელს?
– ადრე თეატრში რეპეტიციები არ მქონდა და სერიალში ყოფნას ამიტომ ვასწრებდი. მხოლოდ სპექტაკლის დროს მიწევდა თეატრში მისვლა. ახლა სიტუაცია შეიცვალა და არჩევანი ჩემთვის უპირატეს საქმიანობაზე გავაკეთე.
– ამბობენ, რომ რეჟისორთან ჰონორარზე ვერ შეთანხმდით. მართალია?
– რეჟისორისგან უარი არ მიმიღია, ჰონორარის საკითხი მას არ ეხება, ეს პროდიუსერების და ფინანსური დირექტორების საქმეა.
– როგორ წარმოგიდგენიათ ამ სერიალის გარეშე ცხოვრება? ალბათ იოლი არ იქნება მასთან შელევა.
– ჩემი ცხოვრება არც ამ სერიალით დაწყებულა და არც დამთავრდება. უკვე 10 წელია თეატრში ვმუშაობ, ასე რომ, ამ პერიოდს ჩემს საყვარელ საქმეს დავუთმობ. ახლა ძალიან საინტერესო მასალებზე მიწევს მუშაობა. გიზო ჟორდანია დგამს ლევ ტოლსტოის "ჰაჯი მურატს", რომლის პრემიერაც აპრილშია დაგეგმილი.
– როგორ გამოემშვიდობეთ შემოქმედებით გუნდს?
– შემოქმედებით გუნდს არ გამოვემშვიდობე, რადგან ჩვენ სამუდამოდ არ დავშორებივართ ერთმანეთს, ეს დროებითია. მინდა, დიდი მადლობა გადავუხადო "ფორმულა კრეატივს" და ყველა იმ ადამიანს, ვინც ჩემთან ერთად ამ პროექტზე იმუშავა. იმედი მაქვს, რომ ჩვენი ურთიერთობა მომავალშიც გაგრძელდება. ჩემს კოლეგებს კი ახალ სეზონში წარმატებებს ვუსურვებ.
– ესე იგი კონფლიქტი არავისთან მოგსვლიათ?
– არანაირი კონფლიქტი არ ყოფილა. მე ისევ ისე მიყვარს ის ხალხი, როგორც აქამდე. ჩვენ მომავალშიც ვაპირებთ თანამშრომლობას.
– სერიალში გატარებულ დროს როგორ შეაფასებთ?
– ძალიან კარგად მახსენდება. ჩემს ცხოვრებაში ეს ალბათ ყველაზე ლამაზი პერიოდი იყო, მაგრამ ყველაფერს აქვს დასაწყისი და დასასრული. ასე რომ, ამაში გასაკვირი არაფერია.
– კატოს როლზე რომელი მსახიობი წარმოგიდგენიათ?
– სიმართლე გითხრათ, კატოს როლში სხვას ვერავის ვხედავ, რადგან ის ჩემი შექმნილია. ჩემი პერსონაჟის შექმნაში მთელი სული და გული ჩავდე. სხვამ რაც უნდა საინტერესოდ ითამაშოს, ის სხვა იქნება და არა – კატო. მაყურებელს არ უყვარს, როცა სერიალში მსახიობებს ცვლიან ხოლმე, ამას მტკივნეულად განიცდიან. სოციალურ ქსელში ბევრი მწერს, რომ ჩემი წამოსვლის გამო ძალიან დასწყდათ გული.
...
სერიალის სცენარისტ ქეთი დევდარიანისგან ამ თემასთან დაკავშირებით უფრო პირდაპირი, კონკრეტული და განსხვავებული პასუხები მივიღეთ.
– ქალბატონო ქეთი, რა მოხდა, რატომ დატოვა მსახიობმა ნინო გაჩეჩილაძემ სერიალი?
– ნინო გაჩეჩილაძესთან ვერ შევთანხმდით იმ პრიორიტეტებზე, რაც სერიალს აქვს.
– ჰონორარზე იყო საუბარი?
– ფილმის "ჩემი ცოლის დაქალის ქორწილის" გადაღების დღეს მოითხოვა მომატებული ჰონორარი, ეს არის ჩვეულებრივი საბოტაჟი.
– დააკონკრეტეთ, თუ შეიძლება.
– ასე დაკონკრეტება ყოველთვის არასწორად იბეჭდება ხოლმე, ამიტომ სიტყვასიტყვით ასე დაწერეთ: დაისაჯა და სერიალიდან წავიდა არა იმის გამო, რომ ჰონორარი მოითხოვა, არამედ იმიტომ, რომ მოაწყო საბოტაჟი! თვითონაც რომ ვერ ხვდება, რატომ გავუშვით, ეს კიდევ ერთი მიზეზია. ჰონორარი, რაც მოითხოვა, ჩვენ გადავუხადეთ.
– აბა, რატომ მოხდა ეს გაუგებრობა, თუ ჰონორარი მიიღო?
– იცით, რა, თქვენ რომ ყოველდღე მოსთხოვოთ თქვენს უფროსს ხელფასის მომატება, სამსახურიდან ხომ დაგითხოვენ? რა თქმა უნდა, დაგითხოვენ და ამაზეა საუბარი. საბოტაჟია, როცა შეთანხმებას არღვევ და ითხოვ იმაზე მეტს, ვიდრე შეთანხმება იყო.
– როცა პოპულარული მთავარი გმირის შემსრულებელი მსახიობი მოულოდნელად იცვლება, ამით სერიალი რეიტინგს არ კარგავს?
– სერიალის რეიტინგი კატოზე არ იყო მიბმული, ეს არ არის სერიალი კატოზე, არამედ სამ მეგობარზე. კატოს პერსონაჟი სერიალიდან არ გადის, უბრალოდ ნინო გაჩეჩილაძის ნაცვლად სხვა მსახიობი ითამაშებს.
რა თქმა უნდა, ნინოს წასვლა სერიალისთვის ცუდია, მაგრამ ჩვენ ვეცდებით, რომ საბოლოოდ პროდუქტზე არ აისახოს. სერიალების ისტორიაში ამაზე უფრო ტრაგიკული შემთხვევები მომხდარა. სერიალიდან ასევე წავიდა ოპერატორი, რომელმაც იგივე გააკეთა. მისი მიბაძვით შეიძლებოდა ეს კიდევ ბევრს გაეკეთებინა. სერიალი მიბმულია კოლექტიურ პასუხისმგებლობაზე, თანამშრომლობაზე და როდესაც ერთი რგოლი იქცევა უპასუხისმგებლოდ, ამას ადეკვატური რეაქცია მოჰყვება. აქ არანაირ ჰონორარზე არ არის საუბარი, არამედ – პრინციპზე.
– გამოდის, რომ თავისი ნებით არ წასულა და მისი პრინციპულობის გამო დაითხოვეთ?
– არა, უბრალოდ ჩვენ ვერ შევთანხმდით. მას აქვს თავისი პრინციპები, ჩვენ – ჩვენი. ასევეა კონტრაქტშიც. ასე რომ, ჩვენი არც მსოფლმხედველობა დაემთხვა ერთმანეთს და არც სამსახურთან დამოკიდებულება. ამიტომ ჩვენ მას დავემშვიდობეთ.
– კონტრაქტი ვისი ინიციატივით დაირღვა?
– ფილმის გადაღებისას სიტყვიერი შეთანხმება გვქონდა. ერთ–ერთ არხზე სიუჟეტი ვნახე, სადაც ამბობდა, რომ ჰონორარის გამო დავითხოვეთ, რაც არ არის სიმართლე. ჰონორარის გამო კი არ დავითხოვეთ, არამედ იმიტომ, რომ ვერ ხვდება, რის გამო გავუშვით. კატოს როლს ლელა მებურიშვილი ითამაშებს. მესამე სეზონი 9 მარტიდან დაიწყება.
– ლელა რა პრინციპით შეარჩიეთ?
– კასტინგში მიიღო მონაწილეობა. მაყურებელმა არ ინერვიულოს, ლელა ძალიან კარგი მსახიობი, ლამაზი გოგოა და გპირდებით, რომ მალე მას შეიყვარებთ.
– ნინო გაჩეჩილაძემ "სარკესთან" აღნიშნა, რომ სერიალის ჯგუფთან კონფლიქტი არ მოსვლია. უსიამოვნო საუბარი მართლაც არ გქონიათ?
– კონფლიქტი მართლაც არ ყოფილა. ჩვეულებრივად მოვიდა, დაელაპარაკა ჩვენი პროდიუსერი ირაკლი საღინაძე და ვერ შევთანხმდით იმაზე, რომ გადაღების დღეს მან არ უნდა მოითხოვოს მომატებული ჰონორარი. სიუჟეტში, რომელიც ვახსენე, ნინომ ისიც თქვა, 3000 ლარის გამო რატომ გამომიშვესო. აქ ლაპარაკი არ არის 3000 ლარზე, ეს არის პრინციპი. ნინოს ჩვენ ეს თანხა გადავუხადეთ. მას გვინეტ პელტროუს ჰონორარი არ მოუთხოვია, რომ ვერ გადაგვეხადა. მოკლედ, ჩვენ ვერ შევთანხმდით.
ჩვენს სერიალზე 120 ადამიანი მუშაობს. ყველამ ყოველდღე რაღაცის მომატება რომ მოითხოვოს, თანამშრომლობა შეუძლებელი გახდება. თავიდანვე თუ თანხმდები იმ პირობებზე, მუშაობა უნდა გააგრძელო. მერე შეიძლება სხვა პირობები წამოაყენო, მაგრამ არა – გადაღების დღეს, მაშინ, როცა ყველაფერი გარკვეული და დალაგებულია.
...
მსახიობ ლელა მებურიშვილს არ აქვს ილუზია, რომ მაყურებელი მას პირველივე კადრიდან "ხელგაშლილი" მიიღებს, თუმცა დარწმუნებულია, რომ მისი კატოც თანდათან პოპულარული გახდება.
– ლელა, როგორ ფიქრობთ, "ახალ კატოს" როგორ შეეგუება მაყურებელი?
– დარწმუნებული ვარ, რომ გაუჭირდება, რადგან ნინოს თამაშს იყვნენ შეჩვეული. დროთა განმავლობაში ალბათ შემეგუებიან. მთავარია, საზოგადოებას, როგორც ლელა მებურიშვილი, ისე ვუყვარვარ. იმედია, სერიალშიც მოეწონებათ ჩემი თამაში.
– ნინო გაჩეჩილაძეს კატოს როლზე სხვა მსახიობი ვერ წარმოუდგენია.
– კატოს როლი თავიდანვე რომ მე მქონოდა, აბსოლუტურად სხვანაირად გავაკეთებდი. აქედან გამომდინარე, ახლა კატო სულ სხვანაირი იქნება, არ ვაპირებ, იგივენაირად ვითამაშო.
– თქვენ და ნინოს ერთმანეთთან როგორი ურთიერთობა გაქვთ?
– ერთმანეთთან ძალიან მეგობრული და კარგი ურთიერთობა გვაქვს, ერთ თეატრში ვთამაშობთ, ერთ სპექტაკლში პარტნიორებიც ვართ. სანამ კატოს როლზე დავთანხმდებოდი, მანამდე ამ თემაზე ვისაუბრეთ.
– მან რა გითხრათ?
– მირჩია, დათანხმდიო.
ლანა კიკნაძე
