როგორ იქცა ხონელი ნიკა კაკაბაძე ბიძინა ივანიშვილად

ნიკა კაკაბაძე ახალგამოჩეკილი პაროდისტია, მაგრამ მაყურებელი მის გამოჩენას უკვე დიდი ინტერესით ელოდება მას შემდეგ, რაც საქართველოს პრემიერმინისტრ ბიძინა ივანიშვილის პაროდია იხილა მისი შესრულებით.
22 წლის იუმორისტი ხონიდან გახლავთ. თბილისში სასწავლებლად ჩამოვიდა. ივანე ჯავახიშვილის სახელობის სახელმწიფო უნივერსიტეტის იურიდიული ფაკულტეტის მეოთხე კურსის სტუდენტია. თბილისში მეგობართან ერთად ნაქირავებ ბინაში ცხოვრობს. თუ როგორ აღმოჩნდა ხონელი ბიჭი ტელევიზიაში, ამას თავად გვიამბობს.
– ნიკა, ბიძინა ივანიშვილის პაროდიამ უკვე მოგიტანათ პოპულარობა, თუმცა თავად თქვენზე არაფერი ვიცით. გვიამბეთ, სანამ ტელეეკრანზე გამოჩნდებოდით, რას აკეთებდით.
– იმერეთიდან, ხონის რაიონ სოფელ კუხიდან ვარ. სოფელში დედა, მამა, და და ბებია–ბაბუა მყავს. მამაჩემი, ოთარ კაკაბაძე, კერძო კომპანიაში ელექტრიკოსად მუშაობს, დედა დიასახლისია. ჩემი და კი წელს აბარებს უნივერსიტეტში, ჟურნალისტობა უნდა. ოჯახი, ასე თუ ისე, ჩემით კმაყოფილია. ჩემს საქმიანობას გაგებით ეკიდებიან, რასაც ბებიაზე ვერ ვიტყვით, ეკრანზე ჩემს გამოჩენას დიდი სიხარულით არ შეხვედრია. ამ საკითხთან სხვა დამოკიდებულება აქვს, ჩემი იურისტობა კი ძალიან უნდა.
რაც "კომედი შოუში" გამოვჩნდი, მას შემდეგ დასავლეთში არ ვყოფილვარ. იქაური ხალხის აზრი, როგორ მიმიღეს, ძალიან მაინტერესებს. სხვათა შორის, ჩემმა ოჯახმა არც ის იცოდა, რომ "კომედი შოუსგან" შემოთავაზება მქონდა და მათთვის ეკრანზე ჩემი გამოჩენა მოულოდნელი იყო. სარეკლამო რგოლში თავიდან ვერ მიცნეს და მერე მირეკავდნენ, თვალი ხომ არ გვატყუებსო. თბილისში სასწავლებლად ჩამოვედი. მეგობართან ერთად ნაქირავებ ბინაში ვცხოვრობ. იურიდიული ფაკულტეტის მეოთხე კურსის სტუდენტი ვარ.
– პაროდიის ნიჭი როდის აღმოაჩინეთ საკუთარ თავში?
– ჩემში პაროდიის ნიჭი სკოლის პერიოდში აღმოვაჩინე. მიხეილ სააკაშვილის – არა, მაგრამ მამუკა ლომაშვილის პაროდიას ვაკეთებდი, თუ როგორ ბაძავდა მიხეილ სააკაშვილს, ანუ პაროდიის პაროდიას ვაკეთებდი. მერე თსუ–ის "კავეენ"–ში ვმონაწილეობდი. ჩვენს გუნდს "გედევან ფოფხაძის ექვსეული" ერქვა. გასულ წელს თსუ–ის ფესტივალზე შიდა ჩემპიონატი მოვიგეთ. ედუარდ შევარდნაძის და ირაკლი ოქრუაშვილის პაროდიაც კარგად გამომდიოდა.
– "კომედი შოუს" ჯგუფი თქვენით როდის დაინტერესდა?
– ბიძინა ივანიშვილის პაროდია პირველად გასული წლის სექტემბერში "კავეენ"–ზე გავაკეთე. "კომედი შოუ" ჩემით მაშინ დაინტერესდა. შემოთავაზება უცებ – არა, მაგრამ მეორე კონცერტის შემდეგ მივიღე. ტელევიზიაში ძალიან კარგი გარემო დამხვდა, ყველამ მეგობრულად მიმიღო.
– პრემიერმინისტრის პაროდიის გაკეთება რატომ გადაწყვიტეთ?
– ძალიან დამაინტერესა მისმა საუბრის მანერამ, მიმიკებმა, სიცილმა, ჟესტიკულაციამ. ამ ადამიანს თავისებური იუმორი აქვს.
– მის იუმორს კარგად უგებთ?
– ვცდილობ, გავუგო. მისი ანეკდოტებიდან ყველაზე მეტად "შედი, ქალო, ბუტკაში" მომეწონა. ამ ანეკდოტს იუმორის მხრივ ვერ გავუგე, მაგრამ, როგორც პაროდისტი, მაინც გაგებით მოვეკიდე. ბიძინა ივანიშვილი ჩემთვის მხოლოდ პაროდიის მხრივ არის საინტერესო, რადგან მე აპოლიტიკური ადამიანი ვარ.
– მის გამოსვლებს ალბათ აქტიურად ადევნებთ თვალს, სწავლობთ მანერებს, საუბრის სტილს.
– რა თქმა უნდა. როგორც ყველა პოლიტიკოსს, ბატონ ბიძინასაც ახასიათებს ისეთი ფრაზების თქმა, რასაც დიდ ყურადღებას ვაქცევ. "ჩაკითხვა", "ჩაძიება" მის ლექსიკონში ხშირია. მაინტერესებს, ბატონი ბიძინა ახალს რას იტყვის, რას გააკეთებს.

– ალბათ ისიც გაინტერესებთ, რეალურ ცხოვრებაში როგორია. მასთან შეხვედრა არ გსურთ?
– ვერ გეტყვით, რომ მისი ნახვა სიგიჟემდე მინდა, თუმცა საინტერესო ნამდვილად იქნებოდა. ყველას აქვს სურვილი, დიდ ადამიანს, პოლიტიკოსს შეხვდეს, მით უმეტეს, საქართველოს პრემიერმინისტრს.
– როგორ ფიქრობთ, ბიძინა ივანიშვილს თქვენს პაროდიაზე რა რეაქცია ექნება?
– ჩვენი საქმე იუმორია და ეს საქმე, წესით და რიგით, ყველასთვის მისაღები უნდა იყოს. ვფიქრობ, ჩემი პაროდია მისთვის მიუღებელი არ იქნება. ყველაფერს იუმორით ვუყურებ და არა – პოლიტიკური კუთხით.
– ხალხისგან ყურადღებას უკვე გრძნობთ?
– მაინცდამაინც ჯერ ვერ მცნობენ, რადგან სულ რამდენიმე გადაცემაში გამოვჩნდი.
– სხვა პოლიტიკოსების და ცნობილი პირების პაროდიაზეც მუშაობთ?
– შინაგან საქმეთა მინისტრის, ირაკლი ღარიბაშვილის პაროდიას ვაკეთებ, მუშაობის პროცესში ვარ. სხვათა შორის, ეს "კომედი შოუს" ბიჭებმა არ იციან და პირველად თქვენგან გაიგებენ. რომ დავამუშავებ, მათ მერე ვაჩვენებ.
– როგორია დამუშავების პროცესი?
– ამ დროს, სასურველია, მარტო ვიყო, რადგან მეგობრები არაფერს დამაცლიან. ვერ გეტყვით, რომ ამ საქმეს დიდ დროს ვუთმობ. სახლში ნახევარ საათს ვმეცადინეობ ხოლმე.
– ამ დროს საკუთარ თავზე არ გეცინებათ?
– ეგ თავიდან დამემართა. ბატონი ბიძინას პაროდიას ვამუშავებდი და მეგობარმა მითხრა, სარკეში ჩაიხედეო. ჩემი თავი რომ დავინახე, გამეცინა. სარკიდან ბიძინა მიყურებდა. სხვათა შორის, სარკესთან მუშაობა ბევრი პაროდისტისთვის გამოსავალია, მაგრამ მე ვეცადე და არ გამომივიდა. როცა თავს სხვა ადამიანის ადგილას წარმოვიდგენ, პაროდიის გაკეთება უფრო მიადვილდება.
– პრემიერმინისტრის პაროდიაზე ბევრი იწვალეთ?
– არა, ვცადე და ეგრევე გამომივიდა. რა თქმა უნდა, თანდათან ვხვეწ. საზოგადოების რეაქციიდან ვხვდები, რომ სრულყოფილად ჯერ ვერ გავაკეთე.
– რას გეუბნებიან, რა არ მოსწონთ?
– ჩემი პაროდიის ვიდეო სადაც დევს, იქ არაერთი კომენტარია, ზოგი – დადებითი და ზოგი – უარყოფითი. მწერენ, შენს ხმას მეტი დამუშავება სჭირდებაო და ამას მეც კარგად ვხვდები. ისიც უნდა ვთქვა, რომ აბსოლუტურად ნეიტრალურ იუმორს ვაკეთებ და მხოლოდ იმას ვამბობ, რასაც ბატონი პრემიერი ლაპარაკობს.
– როგორ დაახასაითებდით საკუთარ თავს, რა თვისებებს გაუსვამდით ხაზს?
– ბავშვობაშიც წყნარი ვიყავი და ახლაც ძალიან მშვიდი ვარ. სხვათა შორის, სკოლაშიც შეძლებისდაგვარად კარგად ვსწავლობდი და უნივერსიტეტშიც 70%–იან დაფინანსებაში მოვხვდი. ხმაურიანი გარემო არ მიყვარს. თავისუფალ დროს კინოში მივდივარ ან მეგობრებთან ერთად ვერთობი. თუ გართობით და დროსტარებით ძალიან დავიღლები, მაშინ წიგნის კითხვას ვიწყებ.
– შეყვარებული ან საცოლე თუ გყავთ?
– არა, ამ ეტაპზე თავისუფალი ვარ. სერიოზულად ორჯერ მიყვარდა და ყველაფერი დასრულდა, რაც მხოლოდ ჩემი ბრალი არ ყოფილა. ამ თემაზე საუბარი არ მინდა.

– როგორი გოგონები მოგწონთ?
– ისეთივე უბრალო, როგორიც მე ვარ, ოღონდ ჩემსავით წყნარი – არა. ვინმემ ხომ უნდა ილაპარაკოს? "ფეისბუქზე" ალბათ გოგოები ვერ მცნობენ და არც არავინ მწერს.
ჯერჯერობით დაოჯახებას არ ვაპირებ, მაგრამ რა ვიცი... სიტუაციას გააჩნია. ჩემს ცხოვრებაში განსაკუთებული გოგო ჯერ არ გამოჩენილა. ამ ეტაპზე ჩემთვის მთავარი სწავლა და მსახიობობაა.
– სამომავლო გეგმებიც გაგვიმხილეთ, უნივერსიტეტის დამთავრების შემდეგ რას აპირებთ.
– ჯარში არ ვყოფილვარ, მაგრამ აუცილებლად წავალ. მინდა, "კომედი შოუში" წარმატებას მივაღწიო, თუ, რა თქმა უნდა, პრემიერმინისტრიც ხელს შემიწყობს.
– სხვა რითი ხართ გატაცებული?
– არქეოლოგიით. ჩემს სოფელში ბევრი საინტერესო ადგილია და მინდა, როგორც არქეოლოგმა, მათ შესწავლაში მონაწილეობა მივიღო. არქეოლოგია ჩემი გატაცებაა. კიდევ, ისტორიული გადაცემების მომზადება მინდა.
სოფიო ბოჭორიძე