ლიკა ყაზბეგის საქორწინო სუფრა პატიმრებმა გაშალეს

სამოდელო სააგენტოს ხელმძღვანელმა ლიკა ყაზბეგმა, რომელიც ორიგინალური დეფილეების გამართვითაა ცნობილი, საკუთარი ქორწილი კიდევ უფრო ორიგინალურად გადაიხადა – ვალენტინობის დღეს და ციხეში. 14 თებერვალს ქორწილი რუსთავის სასჯელაღსრულების დეპარტამენტის მე–16 დაწესებულებაში შედგა. ლიკას რჩეული ამჟამად პატიმრობაში მყოფი გიორგი ჯელაძეა, მეტსახელად ჩუქჩა. ხელისმომკიდეებს და სამოქალაქო რეესტრის თანამშრომლებს ციხეში მოუხდათ მისვლა. ნეფის მხრიდან მოწმე საპატიმროს უფროსი გელა ტყემალაძე გახლდათ, პატარძლისა კი – სასჯელაღსრულების მინისტრის მრჩეველი ლალი მოროშკინა და ჟურნალისტი გიორგი ბერიძე. ახალგათხოვილმა ლიკამ ორი დღე ქმართან საპატიმროში გაატარა.
გიორგი ჯელაძეს გეოლოგიური აქვს დამთავრებული. თუ რის გამო დააპატიმრეს, ამის შესახებ ლიკა არ საუბრობს. არც ის გაგვიმხილა, რამდენი წელი აქვს მისჯილი ან ციხეში რამდენი გაატარა. ამბობს, რომ მისი საქმე სტრასბურგშია გაგზავნილი და იმედი აქვს, რომ სასამართლო მისი ქმრის სასარგებლოდ მიიღებს გადაწყვეტილებას.
ორივესთვის ეს მეორე ქორწინებაა. გიორგის შვილი ჰყავს პირველი ქორწინებიდან, 8 წლის გოგონა – ანა–მარია, რომელსაც ლიკა პოდიუმზე გაყვანას უპირებს.
– გიორგი წლების წინ გავიცანი. მერე მან ციხეში ლალი მოროშკინას ჩემი ტელეფონის ნომერი სთხოვა. მე და ლალი ვმეგობრობთ. მან ჩემი ნებართვით გიორგის ტელეფონის ნომერი მისცა. ვაპირებდი, მაქსიმუმი სამჯერ მელაპარაკა მასთან, მაგრამ ეს ყველაფერი სერიოზულ რომანში გადაიზარდა. ჩვენი შეხედულებები ერთმანეთს აბსოლუტურად დაემთხვა. საათობით ვლაპარაკობდით. მერე მითხრა, გული მიგრძნობს, ჩემი ცოლი გახდებიო. თავად დაგეგმა ჩემი ცოლად მოყვანა და მომიყვანა კიდეც, – გვიამბობს ლიკა, – მრავალი წლის მერე, რასაც გაცნობა ჰქვია, ჩემი ქმარი ციხეში, ქორწილში გავიცანი. ეს ამბავი მინისტრმაც გაიგო, ციხის დირექტორმაც და ყველას ძალიან გაუხარდა. სამი დღე გვაჩუქეს ციხეში. გიორგისთან ორი დღე გავატარე საპატიმროში. ის ცარიელი სიყვარულია. ისეთი თვისებები დავინახე მასში, უკვე დეფიციტი რომაა. დარწმუნებული ვარ, ყველაფერი საუკეთესოდ იქნება. მას გულმა უგრძნო, რომ მისი ცოლი გავხდებოდი, მე კი გული მიგრძნობს, რომ კარგი ქმარი იქნება და მასთან ბედნიერი ვიქნები.
ხელისმოწერისთვის ციხის დირექტორის ოთახი გამოიყენეს, რომელიც ლალი მოროშკინამ საგულდაგულოდ მორთო. პატარძალს საქორწინო კაბა ეცვა, სიძემ კი ჩვეულებრივი, ყოველდღიური სამოსი არჩია.
– ციხეში არის სასტუმრო ტიპის კოტეჯები, რომლებსაც ოჯახები შეხვედრებისთვის იყენებენ. ამ კოტეჯში რომ შევედი, კედლებზე გულები იყო გაკრული, რომლებიც გიორგის მეგობარ პატიმრებს გაუკეთებიათ. იქ გვქონდა პატარა სუფრა. მეჯვარეები და ათამდე პატიმარი, გიორგის მეგობრები ისხდნენ. შოკირებული ვაკვირდებოდი, როგორ შლიდნენ სუფრას მისი მეგობრები. ძალიან საყვარლები იყვნენ. სიტყვები არ მყოფნის, რომ სრულად გამოვთქვა ეს შეგრძნებები! ჯვარი არ დაგვიწერია, თუმცა საპატრიარქოდან იყო ორი მღვდელი, რომელთაც დაგვლოცეს. როცა გიორგის გაათავისუფლებენ, ჯვარს მერე დავიწერთ. ეს ყველაფერი ძალიან ემოციური იყო. პატარძალი ვიყავი, მაგრამ ციხეში შესვლისას მაინც გამჩხრიკეს. ეს ჩემთვის ყველაზე საინტერესო და კარგი თავგადასავალი აღმოჩნდა, – თავისი ემოციები გაგვიზიარა ლიკამ.
მანანა ნოდია