კარგი ცოლის დაუწერელი წესები

წლებთან ერთად ყველაფერი იცვლება – შეხედულებები, წესები, მიზნები, ურთიერთობის ფორმები. ყავლი ყველაფერს გასდის.

ის, რაც ადრე ნორმად და წესად მიიჩნეოდა, დღეს, ხშირ შემთხვევაში, ღიმილს გვგვრის და გვაფიქრებს ადამიანურ ურთიერთობათა სისწორესა თუ სიმახინჯეზე, რა იყო უწინ და რა არის ახლა, რას გადავურჩით და რა დავკარგეთ.

ცოლქმრული და ოჯახური ურთიერთობები ყოველთვის და ყველა დროში ერთ-ერთი ყველაზე აქტუალური და საჭირბოროტო თემა იყო. ეს დღესაც გვაღელვებს და ალბათ, ასე იქნება ყოველთვის. როგორ შევქმნათ ოჯახი, როგორ შევინარჩუნოთ იგი, როგორ გავახაროთ მეუღლე – ეს ის საკითხებია, რაც ჩვენ, ქალბატონებს, განსაკუთრებულად გვაინტერესებს.

მოდური ჟურნალები და ინტერნეტსაიტები კი გულუხვად გვამარაგებენ სხვადასხვა საჭირო ინფორმაციით. ჩვენი საქმეა, გავითვალისწინებთ რჩევებს თუ არა, მაგრამ ერთი კი ფაქტია, რომ ჭკუის დამრიგებელი მართლაც ბევრი გვყავს. ჭკუას ადრეც არიგებდნენ ქალებს, ხოლო თუ როგორ, ამას ახლავე შეიტყობთ:

1955 წლის 13 მაისს ამერიკულმა გაზეთმა Housekeeping Monthly-მ დაბეჭდა განმგმირავი მანიფესტი ცოლებისათვის– The good wife guide, რომელიც მსოფლიოს ყველა ქალსა და მეუღლეს მორჩილებისა და ,,სამზარეულოს რელიგიის" გაზიარებისაკენ მოუწოდებდა.

როგორ ვასიამოვნოთ შინ დაბრუნებულ მეუღლეს, როგორ შევუქმნათ მაქსიმალური კომფორტი და მივანიჭოთ სიამოვნება – ეს ის ძირითადი საკითხებია, რომელთა გადაჭრის ხერხებსაც სტატია დებულებათა სახით აყალიბებს:

• სადილი მზად უნდა იყოს. კარგმა მეუღლემ და დიასახლისმა ამაზე წინასწარვე უნდა იზრუნოს (შესაძლოა, სადილამდე ერთი ღამით ადრეც), რათა მეუღლის დაბრუნებისათვის გემრიელი და მრავალფეროვანი კერძები მზად იყოს. მამაკაცთა უმრავლესობა შინ მშიერი ბრუნდება, საყვარელი კერძის დროულად მომზადება კი ნათლად მიუთითებს იმაზე, თუ როგორ ზრუნავს ქალი საყვარელ მეუღლეზე.

• მოემზადე მის დასახვედრად. დაისვენე 15 წუთი, რათა მისი მოსვლისთვის კარგად გამოიყურებოდე. შეისწორე მაკიაჟი და ვარცხნილობა. გახსოვდეს, რომ რამდენიმე წუთის წინ მას მძიმე სამუშაო და გადაღლილი ხალხი ეხვია თავს.

• იყავი მხიარული და მისით დაინტერესებული. მძიმე დღის შემდეგ მას აუცილებლად ესაჭიროება გამხნევება. ქმრის გამხნევება კი ერთ-ერთი უპირველესი მოვალეობაა.

• მიალაგე სახლი. მეუღლის სახლში დაბრუნებამდე კიდევ ერთხელ მოათვალიერე და საჭიროების შემთხვევაში, მიალაგე სახლი: მოაგროვე ბავშვის სახელმძღვანელოები, დაალაგე სათამაშოები, ფურცლები და ა.შ. ბოლოს კი, სასადილო მაგიდაზე ახალი და სუფთა სუფრა გადააფარე.

• გაათბე ოჯახური კერა. წლის ცივ თვეებში აუცილებლად და დროულად უნდა დაანთო ბუხარი თუ სხვა გამათბობელი საშუალება, რათა საყვარელი მეუღლე გაციებისაგან დაიცვა. ის აუცილებლად იგრძნობს ოჯახში არსებულ სიმყუდროვესა და სიმშვიდეს. მისთვის შექმნილი კომფორტი კი შენც მოგანიჭებს სიამოვნებასა და კმაყოფილებას.

• მოამზადე ბავშვები. მამის დაბრუნებამდე დაბანე ბავშვებს ხელ-პირი, დავარცხნე, საჭიროების შემთხვევაში, ტანსაცმელიც გამოუცვალე. დაე, მეუღლემ იგრძნოს მათი მონაწილეობაც მამიკოზე ზრუნვაში. მეუღლე უნდა დაიცვა ნებისმიერი ზედმეტი ხმაურისაგან. ასე რომ, შეეცადე, ბავშვებიც დაარწმუნო იმაში, რომ არ იხმაურონ და ჩუმად ითამაშონ. ასევე, სასურველია, თუკი ამ დროს არ ამუშავებ სარეცხ მანქანას, საშრობსა და მტვერსასრუტს.

• იყავი ბედნიერი მეუღლის ხილვით. შინ დაბრუნებულს ღიმილით მიეგებე და დაანახვე, რომ შენი უპირველესი სურვილი მისი გაბედნიერებაა.

• მოუსმინე მას. შენ შეიძლება უამრავი რამ გქონდეს მეუღლისათვის სათქმელი, მაგრამ ეს სულაც არაა კარგი აზრი. დააცადე, სანამ თავად იტყვის სათქმელს, რადგან მისი თემები გაცილებით უფრო სერიოზული და საინტერესოა.

• საღამო მეუღლეს ეკუთვნის. ნუ ეწუწუნები იმაზე, თუკი ის შინ გვიან დაბრუნდება, წავა მეგობრებთან სადილზე ანდა სხვა გასართობ ადგილას შენს გარეშე. შეეცადე გაიგო, რომ მეუღლე დაძაბულობისა და წნეხის სამყაროში ცხოვრობს. ამიტომაც შინ დაბრუნებულს განტვირთვა ესაჭიროება და არა გაკიცხვა.

• უპირველესი მიზანი: აქციე სახლი სიმშვიდისა და სიმყუდროვის კერად, სადაც შენი მეუღლე სხეულსა და სულს დაასვენებს.

• ნუ დახვდები მეუღლეს წუწუნითა და პრობლემებით. ნუ იწუწუნებ იმაზე, თუკი გვიან ან საერთოდ არ დაბრუნდა, ეს ხომ წვრილმანია იმასთან შედარებით, რაც მან დღის განმავლობაში გადაიტანა.

• შეუქმენი კომფორტი. სახლში დაბრუნებული დასვი მოსახერხებელ სავარძელში ან მოუმზადე ცხელი აბაზანა. წინასწარ მოამზადე გამაგრილებელი ან ცხელი სასმელები. ესაუბრე მშვიდი და სასიამოვნო ხმით.

• ნუ მოითხოვ ახსნა-განმარტებებს. არასდროს დააყენო მეუღლის გულწრფელობა და სამართლიანობა ეჭვქვეშ. გახსოვდეს – ის ოჯახის უფროსია, რომელიც ყოველთვის მოქმედებს სწორად და სამართლიანად. შენ კი არ გაქვს ახსნა-განმარტებების მოთხოვნის უფლება.

• კარგმა ცოლმა ყოველთვის იცის თავისი ადგილი!

ია ბერიაშვილი
ჟურნალი "და ქალი"