დედამთილმა ყალბი ბეჭდები ოქროდ შემომასაღა

სამი წელია, რაც გათხოვილი ვარ და, სამწუხაროდ, დედამთილისთვის სანატრელი რძალი არ ვყოფილვარ. ყველაფრის მიუხედავად, ვითომ საკუთარ თავს გადააბიჯა და ოქროთი ამავსო.
სიმართლე რომ გითხრათ, იმდენად მეშინოდა, მისი ნაჩუქარი სამკაულები არ დამკარგვოდა, რომ არც გამიკეთებია. არც თავად უკითხავს, რატომ არ ვიკეთებდი მის საჩუქრებს. მხოლოდ მეუღლის ნაყიდი საქორწინო რგოლი და დედის ნაჩუქარი ბეჭდები მეკეთა.

სამი თვის წინ მეუღლეს მძიმე ავარია მოუხდა. საბედნიეროდ, გადარჩა, მაგრამ დაზარალებულისთვის მანქანის შეკეთება მოუწია. უცბად სამი ათას ლარს სად ვიშოვიდით და გადავწყვიტე, მეუღლისთვის სიურპრიზი მომეწყო და დედამთილის საჩუქრები ლომბარდში მიმეტანა.

გზად წარმოვიდგინე, რა ბედნიერი იქნებოდა, როცა უკან ფულით დავბრუნდებოდი. მეგობრების რჩევით, საუკეთესო ლომბარდი ავარჩიე და ამაყად მივედი. სამწუხაროდ, რამდენიმე წუთში უკვე ცრემლები ყელში მებჯინებოდა. აღმოჩნდა, რომ დედამთილის ნაჩუქარი ოქროებიდან ყველა ყალბი იყო.

შინ გამწარებული დავბრუნდი. არავისთვის მითქვამს, რა შემემთხვა, მაგრამ დღემდე არ მესმის, როგორ მომექცა ასე დამცინავად. რამდენიმე დღის წინ ვეღარ მოვითმინე და ვუთხარი, ძალიან მომწონს თქვენი ნაჩუქარი ოქროს სამკაულები, მაგრამ არ ვიკეთებ, ჩემს მომავალ რძლებს ვუნახავ-მეთქი.

სახე შეეშალა, მგონი, მიხვდა, რომ ტყუილში გამოვიჭირე. ყოველ შემთხვევაში, ფაქტია, რომ იმის შემდეგ ჩემთან მარტო დარჩენას ერიდება. 

ჟურნალი "რეიტინგი"