როგორ ეგუება სოფო ბედიას მეუღლე ცოლის თამამ ჩაცმულობას
მომღერალი სოფო ბედია თავის მოვლას ბევრ დროს უთმობს. ის არც თამამ ჩაცმულობას ერიდება, რადგან ფიქრობს, რომ მოხდილი სამოსი სცენას უხდება. ცნობისათვის, სოფოს შემოქმედებაში სიახლეა: მან რამდენიმე სიმღერა ჩაწერა, რომელსაც მსმენელი ტელევიზიითა და რადიოთი მალე მოუსმენს.
- როგორ ფიქრობ, რა ქმნის ადამიანის იმიჯს?
- გემოვნება და ამავდროულად, კარგი მატერიალური მდგომარეობა. თუმცა, ფულს გადამწყვეტი მნიშვნელობა, რა თქმა უნდა, არ აქვს: თუ ადამიანს ძალიან კარგი, დახვეწილი გემოვნება აქვს, ის მცირე შემოსავლითაც მოახერხებს განსხვავებულად და გემოვნებიანად ჩაცმას. საერთოდ, ქალი მოვლილი უნდა იყოს. ნებისმიერი ჩვენგანი საკუთარ თავზე მაქსიმალურად უნდა ზრუნავდეს.
- შენ როგორ უვლი საკუთარ თავს?
- იმდენად კარგი სახის კანი მაქვს, რომ გაწმენდას არ საჭიროებს. თუმცა, ვინაიდან მაკიაჟის გაკეთება ხშირად მიწევს, კანი კვებას მაინც მოითხოვს და ამიტომაც ვცდილობ, კარგი ხარისხის კრემი, კანის გამწმენდი საშუალება გამოვიყენო.
- მაკიაჟის გაკეთება რა ასაკიდან დაიწყე?
- სკოლის პერიოდიდან. მახსოვს, დამრიგებელი დაფასთან გამიყვანდა და მეუბნებოდა ხოლმე: ჩემო კარგო, ისედაც ლამაზი ხარ და იქნებ მაკიაჟი აღარ წაისვაო. თანხმობის ნიშნად, - დატუშულ წამწამებს დავაფახურებდი ხოლმე. მერე მის ნათქვამს ერთი დღე ვითვალისწინებდი, მეორე დღეს კი ტუშს ისევ ვისვამდი (იცინის). მას შემდეგ, რაც პოპულარული გავხდი, უფრო მეტად დავიწყე თავის მოვლა, რადგან ხშირად მიწევს სცენაზე დგომა, ხალხთან, მსმენელთან შეხვედრა, ეს კი იმის სტიმულს მაძლევს, რომ სულ ფორმაში ვიყო და მგონი, გამომდის კიდეც. 
- ახლა მაკიაჟს სილამაზის სალონში იკეთებ?
- ეს ის სფეროა, რომელშიც ჩარევის უფლებას არავის ვაძლევ - მაკიაჟს ყოველთვის თავად ვიკეთებ. სხვათა შორის, ცნობილი ვიზაჟისტებისგანაც ბევრჯერ მიმიღია კომპლიმენტი. მათ უთქვამთ, რომ მაკიაჟს პროფესიონალურ დონეზე ვიკეთებ.
- მაკიაჟის გაკეთებას ბევრ დროს უთმობ?
- ამ საქმეში ხელი ისე მაქვს გაწაფული, რომ ბევრი დრო ნამდვილად აღარ მჭირდება - 15 წუთში ვარცხნილობაც და მაკიაჟიც გაკეთებული მაქვს. მოგეხსენებათ, ყოფილი მოცეკვავე ვარ, ცეკვის კურსებზე კი მაკიაჟის გაკეთებასაც გვასწავლიდნენ.
- თმას ხშირად იღებავ?
- თმაზე ექსპერიმენტების ჩატარება არასდროს მიცდია. ადრე კონიაკისფრად მქონდა შეღებილი, მაგრამ ბოლო ორი წელია, რაც თმა გავიღიავე. შავი თმა არასოდეს მქონია და ვფიქრობ, არც მომიხდება. ვარცხნილობას ძირითადად, სალონში ვიკეთებ, მაგრამ როცა საამისოდ დრო არ მაქვს, სახლის პირობებშიც ვახერხებ თმის მოწესრიგებას.
- ჩაცმის როგორ სტილს ანიჭებ უპირატესობას?
- ჩემი აღნაგობიდან გამომდინარე, უფრო მეტად, კლასიკური სტილის სამოსს ვიცვამ. ასეთი სტილი ჩემს ქალურ ფორმებს კარგად აჩენს.
- სამოსს მაღაზიაში ყიდულობ თუ იკერავ?
- მაღაზიაშიც მიყიდია, მაგრამ უმეტეს შემთხვევაში, ვიკერავ.
- სამოსის შერჩევისას მის ხარისხს აქცევ ყურადღებას თუ ფასს?
- შეიძლება, არ იყოს ძალიან ძვირად ღირებული და ბრენდული კაბა, მაგრამ მომეწონოს და ვიყიდო. უკვე ვიცი, სად იყიდება ისეთი სამოსი, რომელიც მომეწონება. ტანისამოსის ხარისხს ცხადია, დიდი მნიშვნელობა აქვს, მაგრამ მოგეხსენებათ, ამა თუ იმ ცნობილი ბრენდის სამოსის შეძენა ძვირად ღირებული სიამოვნებაა, მე კი კარგად ჩაცმა მიყვარს, მაგრამ არც ისე ძალიან, რომ ვთქვათ, კაბაში უზარმაზარი თანხა გადავიხადო და ამით ოჯახს ან ბავშვს მოვაკლო რაიმე. მირჩევნია, კარგი ქსოვილი ვიყიდო და სამოსი შევიკერო.
- სამოსის ფერს რამდენად ანიჭებ მნიშვნელობას?
- ზამთარში მუქ ფერებში გადაწყვეტილი სამოსი უფრო მეტად მომწონს, ზაფხულში კი ფერად ტანსაცმელს ვანიჭებ უპირატესობას. ვფიქრობ, ღია ფერის მაისურები და კაბები გარუჯულ სხეულს ძალიან უხდება.
- რას არ ჩაიცვამ არასდროს?
- სპორტული ტანსაცმელი არ მიყვარს. ცოტა ხნის წინ რაღაც სიუჟეტს იღებდნენ და მითხრეს, რომ სპორტულად ჩაცმული მივსულიყავი, მე კი ბრჭყვიალა "ბუგებით", დახვეული თმითა და მაკიაჟით გამოვცხადდი. რომ დამინახეს, გაეცინათ: მოკლედ, შენ სულ ფორმაში ხარო (იცინის). რა ვქნა, ბოტასს ვერ ჩავიცვამ. მიყვარს მაღალქუსლიანი ფეხსაცმელი და მასში თავს კომფორტულად ვგრძნობ.
- მეუღლე თუ დაგყვება მაღაზიებში სამოსის ასარჩევად?
- არა, არასოდეს მომყვება. ფულს მაძლევს და საყიდლებზე მარტო მიშვებს. მეუბნება, - შენი ნერვები არ მაქვსო.
- ჩაცმულობასთან დაკავშირებით, შენიშვნებს თუ გაძლევს?
- ხანდახან მიყვარს თამამი სტილის ტანისამოსის მორგება, მაგრამ ვინაიდან მეუღლეც ჩემი პროფესიისაა, ამ ყველაფერს გაგებით ეკიდება. მისგან ამ მხრივ, შენიშვნა არ მიმიღია. იცის, რომ სცენას სითამამე უხდება.
- წონას აკონტროლებ?
- ვცდილობ, 6 საათის შემდეგ ტკბილეული, ცომეული არ ვჭამო. სულ დიეტაზე ვარ და სასწორთან "ვდაქალობ". რომ გითხრათ, - წონაში საგრძნობლად დაკლებაზე ვოცნებობ-მეთქი, მოგატყუებთ. ჩემი სხეულის ფორმები მეც მომწონს და ჩემს ქმარსაც. საკუთარი გარეგნობით კმაყოფილი ვარ.
- აქსესუარები თუ გიყვარს?
- აქსესუარი ჩემი სუსტი წერტილია. მიყვარს საყურეები და ბეჭდები. ავანგარდული აქსესუარები მომწონს და მათ ტანისამოსს ვუხამებ ხოლმე. საყურეებისა და ბეჭდების კოლექცია მაქვს. თითოეულ მათგანს ძალიან ვუფრთხილდები... სათვალეც არაორდინარული მიყვარს. თითქმის ყველა ფერის, ფორმის სათვალე მაქვს. ერთადერთი, რეიბანი ვერ მოვიხდინე.
- ფულს დაუნანებლად რაში დახარჯავდი?
- ტანსაცმელი და აქსესუარები ჩემი სუსტი წერტილია და მათში ფული არასოდეს მენანება. თუ ცუდ ხასიათზე ვარ, შოპინგი განწყობილების ამაღლებაში მეხმარება (იღიმის).
- სოლარიუმში დადიხარ?
- თეთრი კანი მაქვს და ამიტომაც, ზამთარში ტონალურ კრემს ვიყენებ, ზაფხულში კი მზის სხივებით მირჩევნია ნამზეურის მიღება. მიუხედავად იმისა, რომ "ზაგარი" ძალიან მომწონს, სოლარიუმში არ დავდივარ. სხვათა შორის, არც სიგარეტს ვეწევი. ვიცი, რომ სოლარიუმი და სიგარეტი კანის, ჯანმრთელობის მტერია.
მარეხ ჭონიშვილი
ჟურნალი ”გზა”
