სერბი გოგონა ყველაფერს უკუღმა ხედავს

სერბეთში მცხოვრები 28 წლის გოგონა ბოჯანა დანილოვიჩი იშვიათი დაავადებით იტანჯება. გოგონა ტექსტს და ზოგადად ყველაფერს უკუღმა, ზემოდან ქვემოთ ხედავს. მისი დაავადებით გაოცებულნი არიან, როგორც ექიმები, ასევე მეცნიერები.

ქირურგების თქმით, დანილოვიჩს ძალიან იშვიათი ტვინის დაავადება აწუხებს, რომელიც ცნობილია "სივრცეში ორიენტაციის ფენომენის" (spatial orientation phenomenon) სახელწოდებით. მარტივად რომ ვთქვათ, გოგონა ყველაფერს ხედავს, მაგრამ დაავადების გამო, სივრცეში ფიგურები და ნივთები მის აღქმაში ფორმას იცვლის.

ბოჯანას ამის გამო პრობლემები ბავშვობიდანვე ექმნებოდა. დედამისი იხსენებს, რომ როდესაც ქალიშვილმა ბავშვობაში ცოცვა ისწავლა, სხვა ბავშვებისგან განსხვავებით, დედისკენ არ მიფოფხავდა, უკან ბრუნდებოდა და მშობლებს ზურგს აქცევდა. ქალბატონმა სამსახურიც კი მიატოვა, რომ შვილის დახმარებოდა. გოგონა იხსენებს, რომ დედა ყოველ წამს ახსენებდა, რომ გზას არასწორად ხედავდა. პრობლემებმა თავი სკოლაშიც იჩინა. წერა-კითხვის შესწავლა ბავშვებს ისედაც უჭირთ, მისთვის კი ნამდვილი საშინელება იყო. ის რვეულს ამოაყირავებდა და სიტყვებს უკუღმა წერდა. ტექსტის წერას მარჯვენა კუთხიდან იწყებდა და მარცხნივ ამთავრებდა.

დანილოვიჩმა თანამშრომლების გაოცებაც შეძლო, როდესაც სამუშაო მაგიდა თავდაყირა დააყენა - მისი კომპიუტერის მონიტორი და კლავიატურა ამოყირავებულია, რადგანაც სხვა შემთხვევაში გოგონა ვერ მუშაობს, სიტყვებს ვერ არჩევს. ბოჯანას სახლში ცალკე ტელევიზორი აქვს, რომელიც ასევე ამოყირავებულია. ის ამბობს, რომ ყველაზე მეტად პარკში წიგნის კითხვა უყვარს, მაგრამ ამას ვერ ახერხებს,

რადგანაც ყველა გამვლელი დასცინის, ან უთითებენ, რომ არასწორად კითხულობს.

დანილოვიჩით ჯერ კიდევ რამდენიმე წლის წინ დაინტერესდნენ ამერიკელი მეცნიერები და მისი დაავადების გამოკვლევას უამრავი ექსპერიმენტი მიუძღვნეს. ქირურგების თქმით, ახალგაზრდა ქალბატონის ტვინი ჯანმრთელია, მაგრამ ადამიანებისგან განსხვავებით ობიექტებს განსხვავებულად ხედავს.

მომზადებულია odditycentral.com-ის მიხედვით.