ნინო თოლორდავა: "პირველ გადაცემაში ლარი კინგსა და ოპრა უინფრის მოვიწვევდი!"
ტელეკომპანია "მაესტროს" საინფორმაციო გამოშვების წამყვან ნინო თოლორდავას ოცნება ავუხდინეთ და გადაცემაში სტუმრად მსოფლიოში სახელგანთქმული ჟურნალისტები ლარი კინგი და ოპრა უინფრი "მივუყვანეთ"...
- რომ არა ჟურნალიტი, ვინ იქნებოდა პროფესიით ნინო თოლორდავა?
- ბავშვობაში მსახიობობა მსურდა, მაგრამ შემდეგ ჟურნალისტობა ვარჩიე. თუმცა ჟურნალისტი რომ არ ვიყო, დარწმუნებული ვარ, ფსიქოლოგი ვიქნებოდი. ძალიან მიყვარს ეს პროფესია. სხვათა შორის, მეგობრები მეუბნებიან, ჩვენი ფსიქოლოგი ხარო (იღიმის). ალბათ, შემიძლია სხვისი, თუნდაც მეგობრის პრობლემების მოსმენა და სხვა თუ არაფერი, მორალური დახმარება და მხარში ამოდგომა.
- წარმოიდგინეთ, გირეკავთ მსოფლიოში სახელგანთქმული ტელეწამყვანი ოპრა უინფრი და გთავაზობთ, ჩემი გადაცემა ამიერიდან შენ წაიყვანეო, როგორი რეაქცია გექნებათ?
- რაა? სიხარულით გავგიჟდები, ჭკუიდან გადავალ... ახლა ისე გამიხარდა, თითქოს ეს ამბავი ნამდვილად მომხდარიყო (იცინის). რა თქმა უნდა, დავთანხმდები და მის გადაცემას სიამოვნებით გავუძღვები. პირველ გადაცემაში კი ლარი კინგსა და თვითონ ოპრას მოვიწვევ. ვფიქრობ, არაჩვეულებრივი გადაცემა იქნება (იცინის). ვკითხავდი, როგორ მიაღწიეს ამხელა წარმატებას. 
- მაინც როგორ მიაღწიეს?
- პირველ რიგში, იღბალია საჭირო და საჭირო ადგილზე მოხვედრა. შეიძლება ყველა ადამიანი მოხვდეს ასეთ ადგილზე, მაგრამ ყურადღება არ მიაქციოს და შანსი ხელიდან გაუშვას. გარდა ამისა, ოპრა ძალიან შრომისმოყვარე და ძლიერი ქალია. მან უამრავი დაბრკოლება გადალახა და ბევრ რამეს გაუძლო. წარმოიდგინეთ, ჩვენს ტელევიზიებში რა ხდება და იქ რა იქნება! ოპრა არ გატყდა, ყველაფერს გაუძლო და საწადელსაც მიაღწია. ასევე უძლიერესი და სამაგალითო ტელეწამყვანია რუსეთში მოღვაწე ქართველი თინა კანდელაკი. წახვიდე ამხელა ქვეყანაში, იქ შენი სათქმელი თქვა და ერთ-ერთი პირველთაგანი იყო შენს სფეროში, ადვილი არ არის. თინაც ძლიერი, უნიჭიერესი და მიზანდასახული ქალია.
- სერენადა თუ უმღერიათ თქვენთვის?
- (იცინის) არაა. სხვათა შორის, არც ჩემს მეუღლეს უმღერია. ეს რა კარგი რამ მითხარით, ახლავე მივაწვდი ამ იდეას ჩემს მეუღლეს (იცინის).
- წარმოიდგინეთ გნიშნავენ "საზოგადოებრივი მაუწყებლის" გენერალურ დირექტორად...
- მიმაჩნია, რომ პური მეპურემ უნდა გამოაცხოს, ანუ, საზოგადოდ, ყველამ თავისი საქმე უნდა აკეთოს. ამიტომ უარს ვიტყოდი, რადგან ამისთვის მზად არ ვარ. არიან ადამიანები, რომლებიც ადვილად დაიკისრებენ ხოლმე საკუთარ თავზე ისეთ საქმეს, რომლის შესაბამისი არც გამოცდილება აქვთ და არც განათლება, ამიტომაცაა, რომ უამრავი საქმე ფუჭდება.
- მაინც რა არის ამ არხზე პირველ რიგში გასაკეთებელი?
- უამრავი რამ, მაგრამ რადგან "საზოგადოებრივი მაუწყებლიდან" წამოსული ვარ, ჩემი მხრიდან უხერხულია ამ არხზე საუბარი. თუმცა ვიტყვი, რომ პირველ რიგში, ბორდი უნდა შეიცვალოს, ტელეკომპანია უნდა დაკომპლექტდეს კვალიფიციური კადრებით, რომლებმაც იციან ტელევიზია და მერე ყველაფერს ეშველება.
- ნინო, თქვენ მუშაობდით "საზოგადოებრივ მაუწყებელზე", ახლა ტელეკომპანია "მაესტროზე" ხართ. რა განსხვავებაა ამ ორ არხს შორის?
- "მაესტრო" არის ტელეკომპანია, სადაც ყველა ადამიანს აქვს საკუთარი აზრის გამოხატვის საშუალება პირდაპირ ეთერში. სწორედ ეს განსხვავებაა "საზოგადოებრივი მაუწყებლისა" და "მაესტროს" მუშაობის სპეციფიკაში. აქ არ არსებობს დამალული თემები, დაუბალანსებელი ინფორმაცია და ყველა ჩვენგანი
ვაცნობიერებთ პასუხისმგებლობას.
- რისი გეშინიათ?
- (ფიქრობს) არაფრის... არც სიკვდილის, უფრო სწორად, ამაზე არ მიფიქრია.
- წარმოიდგინეთ, პირდაპირ ეთერში უძღვებით საინფორმაციო გამოშვებას და უცებ ეთერში შემოდის საკმაოდ შეზარხოშებული ვასიკო ოდიშვილი. როგორი რეაქცია გექნებათ?
- (იცინის) ვასიკოს გვერდით მოვისვამ და ვეტყვი, ერთად წავიყვანოთ გადაცემა-მეთქი. როგორი დუეტი ვიქნებით (იცინის)?!
- რას აჩუქებდით საქართველოს პრეზიდენტს?
- ვაი, რა უცნაური შეკითხვაა, საიდან მოიგონეთ (იცინის). მიხეილ სააკაშვილს ვაჩუქებდი საქართველოს რუკას, სადაც სამაჩაბლო და აფხაზეთი იქნება გამოსახული.
ფსიქოლოგის დასკვნა
მარიამ ღონღაძე, ფსიქოლოგი: - გაწონასწორებული პიროვნებაა... უყვარს ოჯახში და მეგობრების წრეში დასვენება. ყველასთან ვერ ურთიერთობს. რთულ ვითარებას ადვილად ართმევს თავს.
ესაუბრა ნინო მაისურაძე
