ქმარმა მიცვალებულისთვის ნაყიდი ყვავილები მაჩუქა

სამი წელია, რაც მე და თენგო ცოლ-ქმარი ვართ. მისგან ერთი ყვავილი არ მახსოვს საჩუქრად. ამბობს, რომ არ უყვარს ყვავილების ჩუქება, არადა, მე ბავშვობიდან მიყვარს.

დედაჩემი დაცინვით დიდ ფლორისტსაც მეძახის ხოლმე. მოკლედ, ბევრი რომ აღარ გავაგრძელო, ერთ დღეს მეუღლე დიდი წითელი ვარდებით მომადგა. გაოცებისგან შოკში ჩავვარდი, მაგრამ თან ძალიან გამიხარდა. თენგომ მითხრა, ხომ ხედავ, როგორ მიყვარხარ, ამხელა მსხვერპლზე წავედი და მთელი ქალაქი ყვავილებით ხელში გამოვიარეო.

ამ ამბიდან სამი თვე გავიდა და ყვავილები აღარ მოურთმევია. ერთი კვირის წინ სტუმრად მეგობრები მოიყვანა. მართალია, იმ დღეს ცუდად ვიყავი, მაგრამ არ დავიზარე და მართლა ძალიან კარგი სუფრა გავუშალე.

მე ბავშვთან ერთად მეორე ოთახში წამოვწექი და მათი საუბრის ხმა სუსტად მესმოდა. რამდენიმე სადღეგრძელოს შემდეგ ერთ-ერთმა რაღაც ამბის მოყოლა დაიწყო, მალე წითელი ვარდებიც ახსენა. მალე გავარკვიე, რომ თურმე ჩემი ქმრის მიერ მორთმეული ვარდები რეალურად თანამშრომლის ბებიის პანაშვიდზე წასასვლელად იყიდეს, მაგრამ მიცვალებული სოფელში დახვდათ გადასვენებული და ყვავილები ჩემმა მეუღლემ წამოიღო, რომ "გავეხარებინე".

იმ ღამეს მეუღლისთვის ხმა არ გამიცია, გაბრაზების მიზეზი მხოლოდ მეორე დღეს გავუმხილე და ყველაფერი გადათქვა, ვითომ მომეჩვენა. არადა, ასეთი შეურაცხყოფილი ცხოვრებაში არ ვყოფილვარ.