რუსკა მაყაშვილმა ცხვირის ოპერაცია გადაიფიქრა

ყველა ქალმა იცის, რომ თავის მოვლას გარკვეული თანხები სჭირდება, უმრავლესობას კი აქვს თავის პატარა საიდუმლო, როგორ მიიღოს სასურველი ეფექტი დიდი დანახარჯების გარეშე. სარვამარტოდ, როცა მშვენიერი სქესის ყველა წარმომადგენელს სურს, განსაკუთრებით მშვენიერი იყოს, ცნობილი ქალბატონები თავ–თავის "ქალურ ეშმაკობებს" "სარკეს" უზიარებენ.
მსახიობი ნანა შონია განსაკუთრებულ ძვირადღირებულ საშუალებებს არ იყენებს. მისი მთავარი "იარაღი" კარგი განწყობაა, ხოლო ლამაზი თმის საიდუმლო შინაურ რეცეპტშია.

ნანა შონია:
– კანის მოსავლელად მკვებავს ვიყენებ, მაკიაჟს ყოველთვის ვიშორებ და მის ქვეშ დამცავ ბაზას ვხმარობ. თმის მოვლისთვის მომწონს შინაური რეცეპტები. მაგალითად, ნიღაბს შემდეგნაირად ვამზადებ: ერთი კოვზი ყავა, ერთი კოვზი კონიაკი, ერთი კვერცხის გული და ერთი სუფრის კოვზი ზეითუნის ზეთი უნდა შევურიოთ და ეს ნარევი ერთი საათით გავიჩეროთ თმაზე. რაც შეეხება წონის კონტროლს, ამისთვის განტვირთვის დღეებს ვიწყობ. ვიღებ ისეთ საკვებს, რომელიც ცომეულს, ცხიმეულს და შაქარს არ შეიცავს. სახლიდან სუნამოს გარეშე არ გავდივარ.
...
ცნობილი იურისტი და პოლიტიკოსი ქალი, ეკა ბესელია, საკუთარ თავს არასდროს აძლევს უფლებას, რომ პრობლემები სახეზე დაეტყოს. თუ ტელეეთერში არ არის მიწვეული, მაკიაჟს თავად იკეთებს, რომელიც უმეტეს შემთხვევაში თვალის შავ ფანქარს, ტუშს და ტონალურს მოიცავს. ფორმის შესანარჩუნებლად დიეტის დაცვას ვერ ახერხებს, მაგრამ ცდილობს, პური ამოიღოს რაციონიდან და გვიან ღამით ჭამაზე უარი თქვას.
ეკა ბესელია:
– ძილის წინ მკვებავ, დამატენიანებელ კრემს ვისვამ. მაკიაჟს ყოველთვის სველი ხელსახოცით ვიშორებ და არა – საპნით და წყლით. მაკიაჟის ქვეშ დამცავ კრემს აუცილებლად ვიყენებ. კანისთვის არაჟნის და მაწვნის ნიღბები ადრე მიცდია. თმისთვის სპეციალურ შამპუნს და თვეში ერთხელ ნიღაბს ვიყენებ.
...
დილის ეთერის წამყვანი ნინო არაზაშვილი, რომელიც ყოველდღე დილაბნელზე იღვიძებს, მაინც ახერხებს, ყოველთვის მოწესრიგებულად გამოიყურებოდეს. მას კოსმეტიკური საშუალებები სახლშიც აქვს და სამსახურშიც. მაკიაჟს ყოველდღიურად არ იკეთებს, მაგრამ, როცა ამის საჭიროებაა, დამცავ ბაზას არ ივიწყებს. სახის კანის მოსავლელად ყველა საშუალება აქვს სახლში. ერთი პერიოდი შინაური რეცეპტებითაც იყო გატაცებული. ბუნებრივი საშუალებები თმაზეც გამოუცდია. ვარჯიში კი ნინო არაზაშვილისთვის ჯანსაღი ცხოვრების წესია.
ნინო არაზაშვილი:
– ყველაზე დიდ დროს სარკის წინ ბიჟუტერიის შერჩევას ვანდომებ. ძალიან ბევრი სამკაული მაქვს. სახის კანის მოსავლელად ბუნებრივ საშუალებებზე დამზადებულ ინგრედიენტებს ვანიჭებ უპირატესობას. კვირაში ორჯერ ვიყენებ სახის ამქერცლავს. ღამით ვისვამ კრემს და ქუთუთოების დამატენიანებელს. დილით სახეს თბილი და მერე ოდნავ ცივი წყლით ვიბან. კანისთვის კარგია ატმის და ნესვის ნიღაბი, აღიავებს. კიტრის ნაფცქვენებიც კარგია, მაგრამ არ ვიყენებ, რადგან ვფიქრობ, ბევრ ნიტრატს შეიცავს. სახის კანს უხდება ყინულის კუბიკის გადატარება.
თმისთვის არაჩვეულებრივია ეს ნიღაბი: კვერცხის გული უნდა ავთქვიფოთ ორ სუფრის კოვზ კონიაკთან ერთად და ნახევარი საათით გავიჩეროთ თმაზე. ერთი პერიოდი სინდი კროუფორდის ვარჯიშები მქონდა კასეტაზე ჩაწერილი და ვვარჯიშობდი. მერე მივხვდი, რომ იმ ვარჯიშების მწვრთნელის გარეშე გაკეთება არ შეიძლებოდა. ძალიან მომწონს სარბენი ბილიკი – ტრენაჟორი. არ ვჭამ პურს და წლებია შაქრიან ყავასა და ტკბილეულზე უარი ვთქვი.
...
მსახიობი რუსკა მაყაშვილი შინაურ რეცეპტებს კი ენდობა, მაგრამ მათ მოსამზადებლად დრო არასდროს აქვს. თავის გრძელ თმას ჩვეულებრივი შამპუნით და ნიღბით უვლის. მაკიაჟის გამოყენება რუსკას დიდად არ უყვარს. ერთი პერიოდი ცხვირის პლასტიკურ ოპერაციაზე ფიქრობდა, მაგრამ საბოლოოდ გადაიფიქრა.
რუსკა მაყაშვილი:
– ძილის წინ დამატენიანებელ კრემს ვისვამ. უფროსებისგან ვიცი, რომ კვერცხის გულით თმის დაბანა და მერე აბრეშუმით გამშრალება ძალიან კარგია. ტონალურს იშვიათად ვიყენებ. მიყვარს მუქი ტუჩსაცხი, მაგრამ მაშინ, როცა სახეზე არაფერი მისვია. პლასტიკური ოპერაციის გაკეთება გადავიფიქრე, რადგან მივხვდი, რომ ჩემი ცხვირი სახასიათოა და ოპერაციის მერე თავს კომფორტულად ვერ ვიგრძნობდი.
...
ანსამბლ "გვირილას" ხელმძღვანელ ერნა წიფურიას ქალის სილამაზის მთავარ საიდუმლოდ მისი კარგი ხასიათი მიაჩნია. წონას დიდ ყურადღებას აქცევს და ცდილობს, სწორად იკვებოს. კანის მოსავლელად სხვადასხვა საშუალებებთან ერთად ბუნებრივ ინგრედიენტებსაც იყენებს. ქალბატონი ერნა ზაფხულობით გარუჯვას არ ერიდება, მაგრამ ზომიერებას ამ შემთხვევაშიც იცავს. მისი კვების რაციონში ცოცხალ ხილს დიდი ადგილი უკავია. და ყველაზე მთავარი – ზეითუნის ზეთი, რომლის გარეშეც ქალბატონ ერნას არსებობა ვერ წარმოუდგენია.
ერნა წიფურია:
– ადამიანმა აუცილებლად უნდა მოუაროს თავს. ზედმეტი წონა საპატიებელი ნამდვილად არ არის. მე, პირადად, ზომიერად ვიკვებები და სტუმრად ყოფნისას თუ ზედმეტ საკვებს მივიღებ, შემდეგ განტვირთვის დღეს ვიწყობ. სახის კანის მოსავლელად ზეითუნის ზეთს ვიყენებ, რომელიც ძალიან მიყვარს. დილით, უზმოზე, ერთ სუფრის კოვზ ზეითუნის ზეთს ვიღებ. გარუჯვის დროსაც ზეითუნის ზეთს ვანიჭებ უპირატესობას. საერთოდ, ეს ბუნებრივი საშუალება ძალიან სასარგებლოა ყველაფრისთვის. ზეითუნის ზეთი ცივი ხარშვის წესით უნდა იყოს მომზადებული. ყველაზე კარგია ესპანური. ხილს ხშირად გეახლებით, ჯანმრთელობისთვის აუცილებელია. კარგია ხილის ნიღბებიც. სახის კანს კახური მარწყვი უხდება, კიტრის ნიღბებიც საუკეთესო საშუალებაა.
...
ფსიქოლოგი თეა გოგოტიშვილი გვირჩევს, სარკე რომ მტრად არ გვექცეს, ჯერ კარგი განწყობა შევიქმნათ და შემდეგ ვიზრუნოთ გარეგნობაზე. სულიერი და ფიზიკური ჰარმონიისთვის კი წონას უნდა მივაქციოთ ყურადღება. თავადაც მუდმივად აკონტროლებს წონას და ამ შემთხვევაში ოქროს წესს იცავს: სუფრიდან დანაყრებული არასდროს დგება. ვარჯიშს დიდ მნიშვნელობას ანიჭებს. ქალბატონი თეა შინაურ რეცეპტებს ენდობა და იყენებს კიდეც.
თეა გოგოტიშვილი:
– ქალმა მაკიაჟით ისეთი იერი უნდა მიიღოს, რომელიც გაუმჯობესებული ვარიანტი იქნება და არა – თვალშისაცემი. სახის კანს ზაფხულობით შინაური რეცეპტებით ვუვლი. კიტრის ნათალი ან არაჟანი კარგია კანისთვის. სახის საცხი ბუნებრივ ინგრედიენტებზე უნდა იყოს დამზადებული. 40 წლის მერე აუცილებელია თვალის გარშემო კრემი გამოვიყენოთ. წონის კორექციისთვის შიმშილობა დაუშვებელია. ჩემი ფორმულა წონის შენარჩუნებისთვის ასეთია: მიღებული კალორიები არ უნდა აღემატებოდეს მოძრაობით დამწვარ კალორიებს. განტვირთვის დღეებს ხშირად ვიწყობ.
მანანა ნოდია