ჯაბა კილაძე 5 წლის წინანდელ სიყვარულს ვერ ივიწყებს

მსახიობი ჯაბა კილაძე 4–5 წლის წინ თავდავიწყებით იყო შეყვარებული. იმ სიყვარულმა დიდი ემოცია დაუტოვა, მის ცხოვრებას ლამაზი კვალი დააჩნია. დაიჯერა, რომ დიდი სიყვარული შეიძლება ადამიანს მხოლოდ ერთხელ ეწვიოს. მანამდეც უყვარდა და ოჯახიც შექმნა, მაგრამ ქორწინება უიღბლო აღმოჩნდა. მომღერალ თამთა ჭელიძესთან შვილი, ლიზა, აკავშირებს, რომელიც ახლა 7 წლის არის.
– ჯაბა, ერთი პერიოდი აქტიურად ჭორაობდნენ თქვენს სასიყვარულო გატაცებებზე. ახლა რა ხდება თქვენს ცხოვრებაში?
– ისეთი არაფერი. ჰორიზონტზე შეიძლება ბევრი ვინმე ჩანს, მაგრამ ამ ეტაპზე სერიოზული ურთიერთობა არავისთან მაქვს. გრძნობის მოსვლა ხომ შეკვეთით არ ხდება, ალბათ უნდა შემხვდეს ისეთი ადამიანი, ვისთან ყოფნაც მომინდება, ჯერჯერობით კი ასეთი არავინ ჩანს.
– ოჯახის დანგრევის შემდეგ თქვენს ცხოვრებაში ისეთი არავინ ყოფილა, ვისზეც სერიოზულად იფიქრებდით?
– კი. სახელს და გვარს არც აქვს მნიშვნელობა და არც გეტყვით. იმ ადამიანთან საკმაოდ სერიოზული ურთიერთობა მქონდა და არ ვიცი, ისეთი ძლიერი სიყვარული კიდევ მეწვევა თუ არა.
– რა დაგიტოვათ ამ სიყვარულმა?
– შთაბეჭდილებები. შეიძლება სასაცილოდ გამომივიდეს, მაგრამ იმ ადამიანთან ურთიერთობა აბსოლუტური სულიერი ჰარმონია იყო. ყველაზე მთავარი, რაც შეიძლება ქალმა მამაკაცს მისცეს, ის მქონდა და ალბათ ამიტომაც მიყვარდა. შეყვარებული ჯაბას ნახვა ძალიან რთულია. ის ერთადერთი ადამიანი იყო, ვისთანაც 100 %–ით გახსნილი ვიყავი. ისეთი ჯაბა დღევანდელი ჯაბასგან აბსოლუტურად განსხვავებულია. მას შემდეგ 4–5 წელი გავიდა და მასზე დღესაც რომ ასე ვფიქრობ, ხვდებით ალბათ, რამხელა კვალი დატოვა ჩემს ცხოვრებაში. არაფრის დაკონკრეტებას ვაპირებ. უბრალოდ კიდევ ერთხელ ვიტყვი, რომ ჩემს ცხოვრებაში მართლაც იყო ქალი, რომელიც ძალიან მიყვარდა, მასაც ვუყვარდი და ასეთი ურთიერთობა მას შემდეგ არავისთან მქონია.
– რატომ დასრულდა ეს ურთიერთობა?
– რა ვიცი... ყველაფერი ხდება ცხოვრებაში... დეტალებს არსებითი მნიშვნელობა არ აქვს. ფაქტია, რომ ჩემს ცხოვრებაში ძალიან მაგარი რაღაც მოხდა, რაც არ ვიცი, კიდევ თუ განმეორდება. შეიძლება ბოლოს ისიც ვთქვა, რომ ცხოვრებაში სიყვარული ერთხელ მოდის–მეთქი.
– ეს თქვენს ცხოვრებაში მეორე სიყვარული იყო...
– როგორც მივხვდი, ცხოვრების ყველა ეტაპს სიყვარულისადმი განსხვავებული დამოკიდებულება აქვს. პატარა ასაკში სიყვარული ცოტა სხვანაირად გესმის, რაღაცეებს ვერ ხვდები. მერე და მერე კი ეს გრძნობა შენში სხვანაირად შემოდის, რაც უფრო მეტი გამოცდილება გაქვს, სიყვარულსაც სხვანაირად ხედავ და ურთიერთობებსაც სხვანაირად ხსნი და შიფრავ. პატარა ასაკში ბევრი რამ სხვანაირად ხდება.
– ოჯახიც ხომ სიყვარულით შექმენით?
– რა თქმა უნდა, მიყვარდა. პირველ და მეორე სიყვარულს შორის არც პარალელის გავლება მინდა და არც ამ გრძნობების დანომრვა. ურთიერთობებს და გრძნობებს ნუმერაცია არ უხდება. ნებისმიერი ადამიანი ინდივიდია და სიყვარულისადმი დამოკიდებულებაც განსხვავებულია. როგორ შეიძლება გრძნობები ერთმანეთს შევადარო? ძალიან დიდი ხანია, რაც მეუღლეს გავშორდი, მას შემდეგ ჩემს ცხოვრებაში უამრავი რამ მოხდა და იმ პერიოდზე ნუ ვისაუბრებთ.
– ქალისთვის სიურპრიზების კეთება თუ გჩვევიათ?
– პირდაპირ გეტყვით, როცა ჩემი კოლეგების ინტერვიუებს ვკითხულობ, ამწეკრანით ავედი და იქიდან პარაშუტით გადმოვხტიო, საშინლად არ მომწონს. იმან იმიტომ გააკეთა ეს ყველაფერი, რომ შემდეგ მასზე ილაპარაკონ. საერთოდ თუ რამეს ვაკეთებ, საკუთარი თავის და იმ ადამიანის სიამოვნების გამო და არა იმიტომ, რომ საზოგადოებას მოვუყვე, ბეტმენის ფორმაში როგორი გმირობა ჩავიდინე.
– ახლა როგორი ქალები მოგწონთ?
– ზუსტად ვერ გეტყვით. ქალი შეიძლება ძალიან ბევრი კრიტერიუმით განვსაზღვრო ან სულაც ერთმა მარტივმა, ელემენტარულმა რაღაცამ ჩემზე ძალიან იმოქმედოს. ძალიან მიყვარს გოგო, რომელსაც ემოციის გამოხატვა შეუძლია. თავისთავად ფიზიკურ მონაცემებსაც დიდი მნიშვნელობა აქვს, თუმცა არ არის აუცილებელი, გარკვეულ სტანდარტებს აკმაყოფილებდეს, 175 სანტიმეტრი იყოს და მოდელის პარამეტრები ჰქონდეს. ქალს შიგნით, სულში რაღაც უნდა გააჩნდეს. არსებობს რაღაც ქალური, რაც ყველაზე მეტად მიზიდავს. ქალს რომ დაინახავ, ვნება და ემოცია უნდა იგრძნო.
– ეს რითი გამოიხატება?
– კონკრეტულად ვერ გეტყვით, ყოველ შემთხვევაში, ეს ჩაცმის სტილით არ გამოიხატება, შიგნიდან მოდის.
– როგორი ჩაცმული ქალისკენ შეიძლება თვალი გაგექცეთ?
– თუ ქალი კარგია, როგორც უნდა ეცვას, თვალი მაინც გაგეპარება. მთავარია, სხვას არ მიჰბაძო. თბილისში უკვე სნობიზმია, ერთი ჩაიცვამს რაღაცას და მერე ყველას ის აცვია. ბოლო პერიოდში მოდაში ყელიანი კეტასი თუ ბოტასი შემოვიდა და თან შიგნიდან ქუსლიც აქვს. უამრავ გოგოს და ჩემს არაერთ მეგობარსაც აცვია, თუმცა მე რატომღაც არ მომწონს. შინაგანად როგორიც ხარ, ტანსაცმელიც ისე უნდა მოირგო და ძალიან მაგარი მერე იქნები.
– ქალის ჩაცმულობა მის შინაგან სამყაროზე წარმოდგენას გიქმნით?
– ჩაცმაც და ჟესტიკულაციაც ბევრის მთქმელია. ერთი სიტყვით, მთლიანობაში აბსოლუტურად ყველაფერს ვაქცევ ყურადღებას. არ ვიცი, რატომ, მაგრამ ყველაფერს ვაკვირდები, თითის მოძრაობასაც კი, თუ მწეველია, სიგარეტს როგორ ეწევა, საჭმელს როგორ მიირთმევს. სურნელი, ლაპარაკის მანერა, გამოხედვა... ყველაფერი მნიშვნელოვანია ჩემთვის და, რაც ყველაზე მთავარია, ყურადღებას ვაქცევ, რომ თავს რამდენად უვლის. თავის მოვლაში სოლარიუმში სიარულს არ ვგულისხმობ. სიმართლე გითხრათ, არც მაკიაჟზე ვაკეთებ დიდ აქცენტს. როცა ქალი სულ მაკიაჟით დადის, ცოტა მღლის კიდეც. ჩემს აურასთან ახლოს უფრო თავისუფალი სტილის გოგო დგას. ქალთან, რომელიც გამუდმებით ქუსლიან ფეხსაცმელსა და მაკიაჟს ატარებს, ვერ ვიხსნები. ასეთთან ურთიერთობის აწყობა ალბათ ცოტა გამიჭირდება.
– გარეგნულ მხარესთან ერთად ინტელექტი რამდენად მნიშვნელოვანია თქვენთვის?
– არსებობენ ქალები, რომლებიც შეიძლება წარმატებულები არიან, მაგრამ ეტყობათ, რომ ინტელექტი არ აქვთ და ამის გამო ის რაღაც ზღვარს ვერასდროს სცდება. შეიძლება პოპულარულიც იყოს, მილიონებიც ჰქონდეს, მასზე კაცები გიჟდებოდნენ, მაგრამ ინტელექტის არქონის გამო ერთ ადგილას იყოს გაჩერებული. როცა ქალს და ზოგადად ადამიანს, ინტელექტი გააჩნია, სხვანაირი ხედვა, საუბარი და საქციელი აქვს. თავის ცხოვრებასაც სხვანაირად გეგმავს. შეიძლება წყვილს კარგი სექსი ჰქონდეს, მაგრამ რაღაცაზე ხომ უნდა ილაპარაკონ? ამ დროს ქალი ფუტლიარი არ უნდა იყოს.
– ჭკვიანი ქალის თანადგომა არასდროს დაგჭირვებიათ?
– ამ ბოლო დროს მეგობრობა და ურთიერთობა ძლიერ ქალებთან უფრო მომწონს, ვისაც ცხოვრების პოტენციალი გააჩნიათ. მოკლედ რომ გითხრათ, საქმიანი ქალები მომწონს, ოღონდ ისეთები, ვინც თავიანთი საქმე კარგად იციან. საბედნიეროდ, ბევრ გოგოს ვიცნობ, ვინც თავიანთ საქმეში ძალიან მაგრები არიან. გენდერულ თანასწორობას რომ გაიძახიან, ეს რას ნიშნავს? გენდერული თანასწორობა ზუსტად ის არის, როცა ქალს შეუძლია თავისით აკეთოს ყველაფერი. წარმატებული ცოლი რომ გყავს, მაგაზე მაგარი რა არის? როცა ორივეს თავის საქმე აქვს, პრობლემებიც ნაკლებია. შეიძლება წყვილს იმდენი საქმე ჰქონდეს, ერთმანეთიც და შვილებიც ფეხებზე ეკიდოთ. ეს ძალიან რთული შემთხვევაა, მაგრამ, როცა ქალს ამის დაბალანსება შეუძლია, უკვე ყველაფერს ააწყობს. ქალი მამაკაცის ცხოვრებაში ძალიან დიდ როლს თამაშობს. სიტყვა "მეორე ნახევარი" შეიძლება ვიღაცას ეგოიმებოდეს, მაგრამ მე ასე არ ვფიქრობ. რამდენადაც კარგი ცოლი გყავს, შენც იმდენად კარგად ხარ.
– ქორწინებამდე ერთად ცხოვრებაზე რა აზრის ხართ?
– არსებობს ოჯახები, რომლებიც ტრადიციას პატივს სცემენ და ეს მათთვის მიუღებელია. არც რელიგიის თვალსაზრისით არის გამართლებული, მაგრამ ახლა სხვა პერიოდში ვცხოვრობთ. ჩაკეტილი სივრციდან გამოვედით, რაც კარგია, მაგრამ ამას ბევრი უარყოფითი მხარეც აქვს. ზოგმა გოგომ ისე აიშვა და გადაირია, რომ... ქართველები თუ ამას გააკეთებდნენ, საერთოდ ვერ წარმოგვედგინა. ისე, შედეგებზე რომ ვისაუბროთ, ოჯახის დანგრევის ერთ–ერთი მიზეზი სწორედ ის გახლავთ, შეყვარებულობის პერიოდში წყვილი ერთმანეთის გაცნობას ბოლომდე ვერ ახერხებს. ინტიმური კავშირი ძალიან ბევრ პრობლემასთანაა დაკავშირებული, რასაც ქორწინებამდე ვერანაირად ივარაუდებ და, სამწუხაროდ, ამის გამო ოჯახები ინგრევა. ევროპაში წყვილი ერთად რაღაც პერიოდს ატარებს და დაქორწინებასაც ამის შემდეგ წყვეტენ. ამიტომაც არის, რომ ისინი უფრო სტაბილურ ოჯახებს ქმნიან. ჩემ გარშემო თითქმის ყოველი მესამე წყვილი ერთმანეთს შორდება. წლების შემდეგ ჩემს შვილს ვერაფერს ვაიძულებ, შეიძლება უბრალოდ მივუთითო, რა არის სწორი და რა – არასწორი. რა დროშიც ცხოვრობ, იმ დროს რეალურად უნდა შეხედო. ნებისმიერი ფილმი, გადაცემა თუ სერიალი, ქალისა და მამაკაცის ინტიმურ ურთიერთობაზეა აგებული და, როგორ გინდა, ბავშვს დააჯერო, რომ ასე არ უნდა იყოს?
– ხშირი ურთიერთობა გაქვთ თქვენს 7 წლის გოგონა ლიზასთან?
– ლიზა უკვე 7 წლისაა და ყოველი კვირის ბოლოს ჩემთან არის. ლიზას დედამისი მართლა არაჩვეულებრივად ზრდის. სულ ვცდილობდი, მასთან, როგორც პატარასთან, ისე არასდროს მესაუბრა. ახლაც, როგორც თანატოლს, ყველაფერს ისე ვუხსნი. ძალიან დამჯერი ბავშვია, ყველაფერს მიყვება.
სოფიო ბოჭორიძე