ნინო მუმლაძე - "დეკოლტემაც გარკვეული როლი ითამაშა ჩემს დასაქმებაში"

"ჩემი ცოლის დაქალების" ახალი სეზონი ახალი გმირების გამოჩენით დაიწყო. ნინო გაჩეჩილაძე ლელა მებურიშვილმა ჩაანაცვლა, დიმა ტატიშვილი სერიალში აღარ ჩანს. სამაგიეროდ, თინიკოს ახალი თაყვანისმცემელი გამოუჩნდა თემიკო ჭიჭინაძის გმირის სახით. ერთგული და ოჯახის ბურჯი დათო კი სცენარისტებს ცდუნებისკენ მიჰყავთ. მუდამ მოღიმარი, სანდომიანი და დეკოლტეიანი კბილის ექიმის, ნათიას როლს ნინო მუმლაძე ასრულებს. საქმე კი იქით მიდის, რომ ნათიასა და დათოს შორის ფლირტი გაჩაღდება.

ლევან ყოჩიაშვილსა და ნინო მუმლაძეს "რუსთავი 2"-ში, გადასაღებ პავილიონში ვესტუმრეთ.

- ნინო, როგორ შეგარჩიეს "ჩემი ცოლის დაქალებში"?
- ახალი სეზონიდან სერიალის გადახალისება გადაწყდა, შემოიყვანეს ახალი გმირები. ვინც თვალყურს ადევნებს ამ სერიალს, შეამჩნევდით, რომ ჩემ გარდა სხვა ახალი გმირებიც დაემატა. როგორც გავიგე, უნდოდათ ახალი გმირი, რომელიც იქნებოდა თბილი, ხალისიანი, ღიმილიანი...

- მაცდურიც...
- ჰო, პატარა დეტალით მაცდურიც (იღიმება). როგორც კი მოიფიქრეს გმირი, დამიკავშირდნენ მე, ასე მითხრეს პროდიუსერებმა. ანუ ამ როლზე კასტინგი არ ყოფილა.

- მიუხედავად იმისა, რომ მთელი ცხოვრება ებრძვი წონას, მე ვფიქრობ, სწორედ წონამ გიხსნა უმუშევრობისგან, ყოველ შემთხვევაში, წელს ზემოთ მაინც.
- (იცინის) მაგას წონა არ ჰქვია, ჩემო კარგო, ეგ ღვთით ბოძებული საჩუქარია, რომელიც რაც უნდა დავიკლო, მაინც რჩება გემრიელ ფორმაზე. საერთოდ, ღიმილს უფრო მიანიჭეს უპირატესობა, თუმცა არც იმას დავმალავ, რომ დეკოლტემაც გარკვეული როლი ითამაშა ჩემს დასაქმებაში ამ სერიალში.

- ლევან, მართლა გეშინია კბილის ექიმის?
- არ დავმალავ და კბილის ექიმის მართლაც მთელი ცხოვრება მეშინოდა. მაშინ არ იყო ამდენი კეთილგონივრული საშუალება...

ნინო:
- მაგრამ თანამედროვე მედიცინის წყალობით, კბილის ექიმის შიში წარსულს ჩაჰბარდა.

ლევანი:
- ექვსი თვის წინ გავბედე და წავედი კბილის ექიმთან, შიში წარსულს ჩავაბარე. ნათიას მსგავსი ექიმი რომ იყოს ყველა, არც არავის შეეშინდებოდა. ხომ ნახეთ, 17 წლის მერე ექიმთან არ ყოფილა ჩემი გმირი და როგორ მოათვინიერა.

- ლევან, სცენარისტები მგონი რაღაც ცუდს გიპირებენ. ამ მეოჯახე დათოს ოჯახს ანგრევინებენ?
- ვერ გეტყვით, არ ვიცი. თუმცა რაღაც ხომ უნდა მომხდარიყო, ზედმეტად ერთნაირი ვიყავი.

- ზედმეტად კარგი ქმარი იყავი?

ნინო:
- როგორც სცენარისტებმა აგვიხსნეს, სტაბილურობა მოსაზებრებელი გახდა. აბსოლუტურად ვეთანხმები მათ. ცხოვრებაშიც ასე ხდება. როცა ყველაფერი თუნდაც კარგად არის, მაგრამ ერთფეროვნად, მოსაბეზრებელი ხდება. მერე შენდაუნებურად თუ შენი სურვილით, რაღაც იცვლება. მაინცდამაინც რადიკალური ცვლილება არ არის საჭირო, მაგრამ იდეალურობაც კი მოსაბეზრებელი რომ ხდება, ამაზე შევთანხმდეთ. ზოგჯერ პატარა სანერვიულო ამბავი იმის სტიმული ხდება, რომ შენი ცხოვრება უკეთესობისკენ წაიყვანო.

- ნინო, უყურებდი სერიალს?
- კი, როგორ არა.

- რას იტყვი ლევანის პერსონაჟზე, როგორც ქმარზე?
- სწორედ ამას ვამბობდი, ზედმეტად იდეალური ქმარი იყო.

- სამსახურში რომ არ უშვებდა ცოლს?

ლევანი:
- ხომ გავუშვი. თვითონ მოვარდა გაგიჟებული უკან, არ ვარ ჯერ მზადო, ხომ აღიარა?!

ნინო:
- არსებობენ ქალები, რომლებიც ადვილად უთავსებენ ერთმანეთს საოჯახო საქმეებსა და კარიერას. ანის პერსონაჟი, როგორც ვხვდები, ამ ქალთა კატეგორიას არ მიეკუთვნება.

- ნინო, დათოს დედის მეგობრის ძმისშვილს თამაშობ სერიალში, ეს უხერხულობას არ ქმნის თქვენს ურთიერთობაში?
- არანაირი ურთიერთობა არ გვაქვს ჯერ და ასე ნუ გვაწვებით რა, ძალიან გთხოვთ (იცინიან), მიუხედავად იმისა, რომ ჯერ ჩვენ შორის არაფერი ხდება, უკვე კრიტიკის ქარცეცხლში გაგვატარეს. სოციალურ ქსელში წერენ, რომ კერპად ჰყავდათ დათოს პერსონაჟი და თურმე ჩვენ კერპს ვანგრევთ. ბევრი ვიცინე ერთ კომენტარზე ჩემი ფოტოს ქვეშ - "შეიძლება, სულაც არ უყვარს ამ ქალს ფეხბურთი, მაგრამ იცის, როგორ შეაბას კაციო".

- ისე, როგორ ფიქრობ, დათოსნაირი კაცის "შებმა" ადვილია?
- ვაიმე, არასდროს მიცდია ცოლიანი კაცის შებმა და არ ვიცი, დედას ვფიცავარ, არასოდეს მიცდია (იცინის).

- ლევან, როგორ გგონია, რას გიპირებენ სცენარისტები, საით მიდის თქვენი ურთიერთობა?
- მართლა არ ვიცი. სავარაუდოდ მეხუთე სერია საკვანძო იქნება. ჯერ არ არის სცენარი დაწერილი და არც ჩვენ ვიცით, რა მოხდება. ჯერჯერობით მხოლოდ მსუბუქი ინტერესი გაჩნდა. სიმართლე გითხრათ, შევეჩვიე კიდეც ერთგული ქმრის სტატუსს და მომწონდა ეს როლი. ახლა უკვე შეიცვალა დათოს ქცევები, პიჯაკს ითხოვს, ვითომ შეხვედრა აქვს, აფორიაქებულია.

- მეუღლე თუ გრძნობს საფრთხეს?

ლევანი:
- ვერა, საწყალი, ვერ გრძნობს. ისე, კი მეცოდება ანი, ვერც წარმოიდგენთ, როგორ მეცოდება.

- ნინო, ცხოვრებაში თუ გიფიქრია სტ­ომატოლოგობაზე?
- სხვათა შორის, ეს სცენა კლინიკაში გადავიღეთ. ნამდვილი სტომატოლოგები ძალიან დამეხმარნენ. მასწავლიდნენ, რა როგორ უნდა გამეკეთებინა. ისე, ბავშვობიდან ვამბობდი, რომ ნებისმიერ პროფესიას დავეუფლებოდი, გარდა ექიმობისა.

- ლევან, როგორი ღიმილი აქვს ნათიას?
- არაჩვეულებრივი. თან ზემოდან მიღიმის. მაგ ღიმილმა დამღუპა (იცინის). ისე, სულ მიმართლებს ქალ პარტნიორებში. ნინოც არაჩვეულებრივი მსახიობი და პარტნიორია.

- ლევან, შენი ნამდვილი მეუღლე როგორ შეხვდა ნინოს გამოჩენას?
- რა გითხრათ...

- ვიცი, რომ ანიზე არ ეჭვიანობდა, იქიდან გამომდინარე, რომ კარგად იცნობდნენ ერთმანეთს.

ნინო:
- მეც გამაცნობს ალბათ (იცინიან).

- ნახა მეუღლემ სერიალი?

ლევანი:
- ნახავდა... არ არის აქ და.

- სად არის, ხომ მშვიდობაა?
- თავის მშობლებთან არის. რომ ჩამოვა, გამიზიარებს ალბათ შთაბეჭდილებებს.

ნინო:
- ლევანზე მინდა, ერთი-ორი საქებარი სიტყვა ვთქვა,

როგორც მსახიობზე, პატარა დეტალშიც შეუძლია ისე გამოხატოს ხასიათი, რომ აღფრთოვანებული ვრჩები. ჩემი როლი მავიწყდება ზოგჯერ, მაყურებელი ვხდები, გულწრფელად მეცინება მის მიგნებებზე, იმდენად კარგად მუშაობს როლზე.

- ნინო, შენი გმირივით ეული ხარ ისევ, თუ გამოჩნდა ვინმე საინტერესო შენს ცხოვრებაში?
- შეიძლება, ეს შეკითხვა გამოვტოვოთ?

- არა.
- მაშინ ასე გიპასუხებ. ჯერ თვითონაც არ ვიცი. არსებობს ადამიანი, რომელიც ჩვენგან დამოუკიდებელი მიზეზების გამო საქართველოში არ არის. აქედან გამომდინარე, არ ვიცი, როგორ განვითარდება მოვლენები. სერიოზული სიტუაცია რომ გვქონოდა, ან ის იქნებოდა ახლა აქ, ან მე - იქ. იყო სიმპათიები, ამას ვერ უარვყოფ, ვერც იმას ვიტყვი, რომ ცუდად დავშორდით ერთმანეთს, ამიტომ მიჭირს ამ კითხვაზე პასუხის გაცემა.

ნინო მჭედლიშვილი
ჟურნალი "რეიტინგი"