როგორ გავალამაზოთ სახლი მინიმალური დანახარჯით - დიზაინერის რჩევები

ვინ არ ოცნებობს ლამაზ და კომფორტულ სახლზე, თუმცა ხშირად ფინანსური მდგომარება საშუალებას არ გვაძლევს საცხოვრებელი ფართი გავარემონტოთ.

როგორ გავალამაზოთ სახლი მინიმალური დანახარჯით და როგორ მოვახერხოთ, რომ პატარა ბინა ვრცელი გამოჩნდეს, ამაში დიზაინერი სოფო პაქსაშვილი დაგეხმარებათ.

მკითხველი ნანა:
შევიძინე მშენებარე ბინა, (58კვ) ძალიან მინდა ამ ბინაში სამზარეულო, მისაღები და ორი საძინებელი მქონდეს. რას მირჩევთ?
-ჩემი აზრით 58 კვადრატულში, შგიძლიათ სურვილისამებრ მოაწყოთ სამზარეულო, მისაღები და ორი საძინებელი. სახლის კომფიგურაცია თუ მოგვცემს საშუალებას შეიძლება სახლი გაიყოს ორ ზონად: დღის და ღამის ზონად. ღამის ზონაში განათავსებთ საძინებლებს, ხოლო დღის ზონაში მისაღებს და სამზარეულოს. რადგანაც ფართი არ გვაძლევს საშუალებას, ვფიქრობ რომ არ გამოვა იზოლირებული სამზარეულო. გირჩევდით, რომ გააერთიანოთ სამზარეულო და მისაღები. მხოლოდ დეკორაციულად გაყოთ ისენი ერთმანეთისაგან. შეიძლება მოხდეს ბარით ან დეკორატიული ტიხრით გამოყოფა. ასევე მნიშვნელობა მიაქციეთ ფანჯრების განლაგებას, რადგანაც საძინებელი უნდა იყოს ნათელი და მისი განიავება უნდა ხდებოდეს. საძინებლის უღიობოდ გაკეთებას არ გიჩევთ.

ნათია ანანიძე:
ვცხოვრობ ქლაქური ტიპის ბინაში (ერთი ოთახი, 18კვ). როგორ მოვაწყოთ ეს ოთახი, რომ სივრცე უფრო დიდი და კომფორტული გამოჩნდეს.
-18 კვ საერთო ოთახისთვის მიმაჩნია ნორმალურ ფართად. თუ შესაძლებელი იქნება იხმარეთ ღია ფერის ტონები - ჩალისფერი, ღიასტაფილოს ფერი, ღია ყავისფერი. დეკორაციულად იხმარეთ მხოლოდ მუქი ფერები, დეკორაციული შპალიერის სახით ან მუქი ავეჯი. თუ გააკეთებთ ღია ფერის ლამინირებულ იატაკს შეგიძლიათ იხმაროთ მუქი ფერის ავეჯი. კონტრასტში როდესაც მოდის იატაკი და ავეჯი ერთმანეთთან მიმზიდველი გამოდის. ასევე შეიძლება სარკის გამოყენება ინტერიერში. სარკეს აქვს ძალიან კარგი ფუნქცია. მისი ანარეკლი ადიდებს ოთახს და აქედან გამომდინარე მიმაჩნია, რომ თუ გამოიყენებთ სარკეს უფრო ლამაზი და მიმზიდველი გამოვა თქვენი ოთახი. კომფორტი კი ალბათ ავეჯის განლაგებაზე არის დამოკიდებული. დიდი მნიშვნელობა აქვს თუ რომელ კედელზე დაკიდებთ ტელევიზორს და როგორ შეუთავსებთ რბილ ავეჯს მას. ეცდეთ რომ დიდ კედელზე დადგათ სამეული და მის პირდაპი კომფორტულად განალაგოთ ტელევიზორის კუთხე. ასეთი სახით კომფორტს მიაღწევთ თქვენს კუთხეში.

ნონა წიკლაური:
მაქვს პატარა ზომის სამზარეულო, ვერ მომიფიქრებია როგორი ტიპის ავეჯი დავდგა, რომ სათავსოც საკმაოდ მქონდეს და დიდი ფართიც არ წამართვას. სამზარეულოში მინდა თანამედროვე დიზაინის შტრიხით კომფორტული გარემო შემექმნას, მოგეხსენებათ ქალისთვის რამდენად მნიშვნელოვანია სამზარეულოში პირობების შექმნა. რა რჩევას მომცემდით?
-სამზარეულოში ავეჯის დაგეგმარების დროს სტანდარტულ ავეჯს ვიყენებთ ხოლმე, მაგრამ თქვენ თუ შეკვეთას მისცემთ ავეჯის დამზადების დროს და დაამზადებთ თქვენი სურვილისამებრ, შეგვიძლია ეს სტანდარტები არ დავიცვათ და დავარღვიოთ. საერთოდ სამუშაო მაგიდის სიღრმე გამომდინარე ნიჟარიდან და გაზიდან კეთდება 60 სმ, მაგრამ ამ შემთხვევაში შეგვიძლია შევიძინოთ არასტანდარტული გაზი ან ნიჟარა, და 50 სმ-ზე დავიყვანოთ. ამით 10 სმ-ს მოვიგებთ და ფართი მეტი დაგვრჩება. ასევე გირჩევდით, რომ არ გამოიყენოთ ხის ტექსტურით კარადები, გააკეთეთ ბევრი ღია თარო, რაც უფრო კომფორტულს და მიმზიდველს გახდის სამზარეულოს. შეიძლება გამოვიყენოთ პრიალა ზედაპირის დამუშავებით

კარები და ამასთან ერთად არ იყოს ხის ფერის- ეს სიხალისეს შემოიტანს თქვენს ინტერიერში. დეკორაციულად გირჩევთ, რომ გამოიყენოთ კაფელი და მასში ჩანართები. ძალიან კარგი არჩევანი გვაქვს ქალაქში დეკორაციული კაფელების და შეგვიძლია პატარა მოზაიკები ან დეკორაციული კაფელები ჩავსვათ კედელზე და უფრო ლამაზი გამოჩნდება თქვენი სამზარეულო. თუ ფართი გაძლევთ საშუალებას შეიძლება კომფორტულ სამზარეულოში განათავსოთ კომფორტული მაგიდა და სკამები, სადაც შეიძლება რბილი ავეჯიც დაიდგეს და შეიძლება ტელევიზორის კუთხეც მოაწყოთ. გააჩნია რის საშუალებას მოგვცემს თქვენი სამზარეულოს ფართი.

ლია ძირკვაძე:
მაქვს 18 კვ. ოთახი სადაც მინდა მოვაწყო ორი საძინებელი, ერთი ბავშვებისათვის და ერთი უფროსებისათვის. როგორ მოვახერხებთ ამას?
-შეუძლებელი საერთოდ არაფერი არ არსებობს, აქედან გამომდინარე ეს მაინც თქვენი ფანჯრის ღიობზე არის დამოკიდებული. თუ ფანჯრის ღიობი გაძლევთ საშუალებას რომ გადაიტიხროს ორ სივრცეთ მაშინ შესაძლებელი იქნება ორი საძინებელი გაკეთდეს. როგორც წესი მინიმალური საძინებლის ზომა 8-10 კვ-ზე ნაკლები არ უნდა იყოს, მაგრამ თუ თქვენთან იქნება საშუალება რომ ფანჯრის ღიობი გაიტიხროს მაშინ შესაძლებელი იქნება პატარა საძინებელი თქვენ გქონდეთ და აჯობებს დიდი ფართი ბავშვებს დაუთმოთ. მე გირჩევდით, რომ რადგანაც ბავშვები უფრო დიდ დროს ატარებან საძინებელში არჩევანის საშუალება როცა გექნებათ ბავშვებს მეტი სივრცე დაუთმეთ. თუ ორი ბავშვი გყავთ მაშინ შეგიძლიათ ორსართულიანი საწოლის დადგმა, ხოლო თუ ერთი ბავშვი გყავთ საწოლი შგიძლიათ მაღალზე გააკეთოთ და ქვემოთ მოუწყოთ სათამაშო კუთხე ან სამეცადინო კუთხე. ამითი ფართს ძალიან კარგად დაზოგავთ. შეუძლია ბავშვს ზედა სართულზე კიბით ავიდეს და დაიძინოს, ხოლო ქვემოთ დაჯდეს და იმეცადინოს. გირჩევთ, რომ ფანჯარასთან ახლოს დადგათ, რადგან მეცადინეობის დროს სინათლე ადვილად მიეწოდებოდეს, როცა საწოლის ქვეშ არის სამეცადინო კუთხე გამოდის რომ ბნელი კუთხეა, ამიტომ იზრუნეთ ამაზე.

მაკა-მაკა:
ძალიან მიყვარს მუქი ფერები, მაქვს ერთი ოთახი გაერთიანებული სამზარეულო და მისაღები, დიდი ფანჯრებით და შუშის კარებით, რომელიც გადის აივანზე. როგორი კედლები, იატაკი და ავეჯი შევარჩიო, რომ მუქ ფერებშიც მქონდესგადაწყვეტილი ოტახის ინტერიერი და სივრცე არ დაიკარგოს.
-მე გირჩევთ, რომ დეტალებში ღია ფერებიც გამოყენოთ და არ იყოს სულ მუქი. შეიძლება საერთოდ შავი იატაკიც გაკეთდეს, თუ ამდენად გიყვართ მუქი ფერები, მაგრამ დეტალები- ბალიშის ტექსტურა, სურათის ჩარჩო იყოს სხვა ფერი. ამით გაახალისებთ თქვენს ინტერიერს. შეიძლება კედლებზე გაკეთდეს დეკორაციული თაროები მუყაო-თაბაშირისგან და შეიღებოს უფრო ღია ფერად, რადგანაც მუქ ფერს ახასიათებს ის რომ სივრცეს აპატარავებს. ყურადღება მიაქციეთ განათებასაც. წერტილოვან განათებას თუ იხმართ ჭერში შეიძლება სამეულის კუთხე ისე კარგად გაანათოთ, რომ მუქი ფერები საერთოდ აღარ გამოჩნდეს. მუქი კედელი თუ ლამაზად იქნება განათებული აუცილებლად მოგეწონებათ და ნამდვილად არ იქნება თქვენი ინტერიერი მუქ ფერებში და სივრცე ნამდვილად არ დაიკარგება.

ნათია:
მისაღები და სამზარეულო მაქვს გაერთიანებული, ბარის სტილით და კედლით გაყოფა არ მინდა, მაგრამ მინდა, რომ  სამზარეულო ორიგინალურად ყოფდეს მისაღებს. მირჩიეთ დიზაინი.
-როდესაც სამზარეულო და მისაღები ოთახი გამოყოფილია ბარით, ბარის დიზაინს ძალიან დიდი მნიშვნელობა ენიჭება. ბევრი საშუალება გვაქვს რომ ბარი სხვადასხვანაირი კონსტრუქციით სხვადასხვანაირ მასალაში იყოს გადაწყვეტილი. ბარს მეორადი ფუნქციაც შეიძლება ქონდეს და მასთან ერთად იყოს კარადები. სადაც სუვენირები, სასმელის ბოთლები და ჭიქები განლაგდება. თუ სამზარეულოს სივრცე ერთი საფეხურით მაღლა იქნება განთავსებული, ვფიქრობ უფრო ლამაზად გამოჩნდება თქვენი სამზარეულო და თქვენ როცა სამზარეულოში იქნებით უფრო ლამაზად გამოჩნდება საერთო ოთახის ხედი.შიგიძლიათ ამ საფეხურში განათება ჩაამაგროთ და როდესაც საერთო ოთახში ტელევიზორს უყურებთ მხოლოდ ეს ნათურა იმდენად კარგ სიმყუდროვეს შემოიტანს, რომ ძალიან გესიამოვნებათ. როდესაც სურვილი არ გაქვთ, რომ ბარით ან კედლით გამოყოთ სამზარეულო, მაშინ ან ავეჯით უნდა გადაიტიხროს ეს სივრცე, ან კომოდით, ან შეიძლება საფეხური გაკეთდეს. საფეხურის შედეგად მაღალ დონეზე იქნება სამზარეულო და დაბლა იქნება მისაღები ოთახი.

ქეთევანი:
რამდენად გამართლებულია სამზარეულოში შავი ფერის მეტლახი, ან თქვენ რომელ ფერს ანიჭებთ უპირატესობას, (წითელი აგურის იმიტაციის ფონზე).
-შავი ფერის მეტლახი მუქია თავისთავად და სივრცეს აპატარავებს, მაგრამ მოვლის თვალსაზრისით გირჩევთ, რომ არ იხმაროთ პრიალა ზედაპირის მეტლახი, იხმარეთ გლუვი არეკვლით, რადგანაც მასზე მტვერი და ლაქები ნაკლებად ემჩნევა. ფერიდან გამომდინარე წითელი აგურის იმიტაციას შავი ფერი მოუხდება, მაგრამ მუქი ყავისფერი, წაბლისფერი ძალიან მოუხდება, ასევე მოუხდება მუქი თამბაქოს ფერი.არჩევანის საშუალება ბევრია ქალაქის მაღაზიებში, მაინც დაათვალიერეთ და ნახეთ იქნებ თქვენს ინტერიერში სხვა მეტლახი უფრო მოგეწონოთ.

გია-თეკო:
როგორი ინტერიერი შეესაბამება საძინელებელს, მარტივი და კომფორტული რომ იყოს, მაგრამ მის მოსაწყობად მინიმალური დანახარჯი რომ გვქონდეს.
-თუ თქვენ გეხერხებათ თქვენით რაღაცეების კეთება ინტერიერში, შეგიძლიათ თქვენივე ძველი ავეჯი განაახლოთ, თუნდაც ფერი შეუცვალოთ. ძალიან მარტივად შგიძლიათ დაამზადოთ სანათი, ბევრი დეკორაციული ელემენტი შეიტანოთ, მარტივად შეგიძლიათ შეღებოთ კედლები და არ გააკრათ შპალერი, რაც ფასს გაგიზრდიდათ. თუ გექნებათ საშუალება წერტილოვანი განათება გააკეთოთ და შეკიდული ჭერი, ესეც ძალიან მოუხდება თქვენს საძინებელს. ძალიან არ გადატვირთოთ ოთახი და შეეცადეთ თქვენთვითონ გააკეთოთ რაღეცეები, ან განაახლოთ. ეს სიამოვნებასაც მოგანიჭებთ და თან თქვენს მიერ განახლებული ავეჯი ბევრად კარგად იქნება გაკეთებული.

მაია:
მაქვს მაღალჭერიანი ბინა, მინდა რომ წიგნის სათავსოები და დეკორაციების მქონდეს განთავსებული მაღალზე, რას მირჩევთ, როგორ დიზაინს შემირჩევთ? (ოთახი არის ძალიან ნათელი)
-ძალიან კარგი ოთახი გქონიათ. ნათელი და მაღალი ჭერის ოთახში ბევრი კარგი რაღაცეების გაკეთება შეიძლება. გირჩევთ, რომ ძალიან მარტივად დაამზადოთ მილკვადრატის კარკასი და შეკიდოთ ჭერთან, ისეთი სიმაღლის დონეზე, რომ თაროების მოწყობა შესაძლებელი გახდეს. ამ მილკვადრატის კონსტრუქციაზე შეიძლება ძალიან მარტივად ხის ფიცრებით მოეწყოს თარო და დაალაგოთ თქვენი წიგნები და საყვარელი ნივთები. მასზე შესაძლებელია განთავსდეს ჩამოსაშლელი კიბე ან თუ ინტერიერს მოუხდება სტატიური კიბეც. ასევე დიზაინში ტრანსფორმირებადი კიდეებიც არსებობს, ეს სილამაზეს შესძენს თქვენს ოთახს. შესაძლებელია ამ თაროებში განათების ელემენტებიც განათავსოთ. და ეს თაროები თაროს ფუნქციასაც შეასრულებს და განათების ობიექტიც იქნება. ძალიან სასიამოვნო ოთახი გამოგივათ.

იამზე:
ბინა, რომელიც შევიძინეთ, უცნაურია, იმ მხრივ, რომ სამზარეულოს ფანჯარა არ აქვს, გამწოვი არის მხოლოდ. ფართი 8კვ. როგორ მოვაწყო ისე, რომ კომფორტული გახდეს.
-როდესაც სამზარეულო ექცევა შუაში და ფანჯრის ღიობი არ გვაქვს, ძალიან დიდი ყურადღება მიაქციეთ მის ვენტილაციას, რომ მავნე ნივთიერებების გაწოვა მოხდეს ადვილად. ძალიან კარგად უნდა იზრუნოთ ამაზე, რომ რადგანაც ფანჯარა არ არის გამწოვი სისტემა ძალიან კარგად უნდა იყოს მოწყობილი. 8კვ სამზარეულოში შესაძლებლად მიმაჩნია პატარა ტრანსფორმირებადი მაგიდაც კი გქონდეთ. თუ გექნებათ სურვილი რომ არ გქონდეთ ღუმელი, მხოლოდ გაზის ზედაპირი შეიძლება გქონდეთ და ქვედა სივრცში კარადა შეგიძლიათ გააკეთოთ და სათავსოც გაგიჩნდებათ. რადგანაც პატარა სივრცეა ზედა თაროები ძალიან არ დახუროთ, შეგიძლიათ იხმაროთ მინა ან გახსნილი იყოს, რომ ავეჯმა არ დაამძიმოს ჩვენი პატარა სივრცე . აქედან გამომდინარე დიზაინი შესაძლებელია ლამაზი გამოვიდეს, თუ ვიხმართ ღია ფერის კარადებს, რომელიც შეიძლება იყოს არაგეომეტრიული ფორმებით ეს კარადები, რკალური ფორმები ან ის ფორმები თქვენ რომელიც გიყვართ.