დაპირისპირების ახალი ფაზა - რატომ ემალება ფარულავა ნაზღაიძეს
გიორგი ნაზღაიძემ თავისივე რადიოგადაცემაში ია ფარულავას მისთვის მიყენებული შეურაცხყოფისთვის სასამართლოში უჩივლა, თუმცა მოქმედი კანონის თანახმად, საქმეს წარმოებაში ვერ მიიღებენ, თუკი ფარულავას პირადად არ გადასცემენ სარჩელს. გიორგი ნაზღაიძე ამბობს, რომ ია ფარულავა სასამართლოს აღმასრულებელს ემალება, მისამართიც კი გამოიცვალა, რომ სარჩელი არ მიიღოს. მოდელი და წამყვანი თავად დაგვიკავშირდა, რომ საქმის დეტალები მოეყოლა.
- პრობლემა ისაა, რომ ია ფარულავა, რომელსაც თავი მართალი ჰგონია, უხეშად რომ ვთქვა, არ უნდა იმალებოდეს. შეიძლება თქვას, მე არ ვიმალები, ტელევიზიაში ვარო, მაგრამ სასამართლო სარჩელს ვერ უტოვებს. ძველ მისამართზე აღარ ცხოვრობს, "იმედში" არ იტოვებენ სარჩელს. ჩიხში ვარ მოქცეული, კანონის მიხედვით, იას ხელიდან ხელში უნდა გადასცეს სარჩელი სასამართლოს მიერ გამოყოფილმა პირმა, მაგრამ ეს ვერ ხერხდება. წინააღმდეგ შემთხვევაში საქმის წარმოება ვერ დაიწყება. ია ფარულავას მისამართი "გრიფით საიდუმლო" გახდა, რადგან ვერაფრით ვერ მივაკვლიე. მეგობრების მეგობრების საშუალებით ვკითხულობ და ამბობენ, ვიცით, რომ გიორგი ნაზღაიძეს უნდა და ვერ მოგცემთ მისამართსო. ეს ინტერვიუც იმის საშუალებაა ჩემთვის, რომ როცა ია წაიკითხავს, გამოვა და იტყვის, არ ვიმალები და გავამჟღავნებ მისამართსო. როცა მართალი ხარ, მგონი, არ უნდა დამალო შენი მისამართი.
- სხვა არანაირი გზა არ გაქვს დარჩენილი?
- თუკი ის არ მიიღებს სარჩელს, მხოლოდ ერთი რამ დამრჩება - გამოვიდე პრესით და მის შეურაცხმყოფელ ნათქვამს საზოგადოების წინაშე იმავეთი ვუპასუხო.
- შევახსენოთ მკითხველს, საიდან დაიწყო ეს ამბავი...
- გადაცემაში "ცოტა ყავა და ბევრი ჭორი" ია ფარულავას დავუკავშირდით, მან მითხრა, რომ ცხოვრებაში რაღაცას არაწესიერი გზებით მივაღწიე. ბევრად უფრო შეურაცხმყოფელი ფრაზა თქვა, მაგრამ ამას აღარ გავიმეორებ. ყველამ იცის ეს. მე ვითხოვდი, რომ აეხსნა, რას გულისხმობდა ამაში და დაემტკიცებინა ეს სასამართლოში, სადაც შევიტანე კიდეც სარჩელი. მე როგორ მივაღწიე წარმატებას, ეს ყველამ იცის, იამ როგორ მიაღწია, ეს გასარკვევია.
- რატომ, ეჭვი გეპარება?
- მე ჭორებზე გადაცემა მიმყავს და ბევრი რამ მსმენია. რამდენი ხალხი ლაპარაკობს ამის შესახებ. ჭორი ჭორია, მაგრამ საფუძვლის გარეშე არ ვრცელდება. მე არ ვლაპარაკობ გამწარებული ასაკიანი ქალის სახელით, რომელიც ბებიად მეკუთვნის. ამხელა ქალი კბენს ახალგაზრდას, რომელიც შვილიშვილად ეკუთვნის. მან თავისი კარიერა უკვე დაამთავრა, მაგრამ ყველამ კარგად ვიცით ფილმები, რომლებშიც გაიხადა. მისი შიშველი სხეული რამდენად ლამაზია, ეს სხვა თემაა და ბევრისთვის მიუღებელია. გარდა ამისა, პირველად რომ გაიხადა კინოში და ამით რომ ამაყობს, ეს, ჩემი აზრით, სამარცხვინოა. მე ხომ არ ვითვლი, ვინ ვისთან რამდენჯერ იწვა და რით მიაღწია წარმატებას. ფაქტი ასეთია, არის ფილმი, რომელშიც მან გაიხადა, თავი დაიმკვიდრა და ამით მოვიდა საზოგადოებაში. სხვა რითი დაიმკვიდრა? ჟანა დ,არკის როლი არ შეუსრულებია (იცინის). მე პირადად მრცხვენია, რომ მისნაირი ადამიანები ტელეეთერში სხედან და ხალხს ჭკუას არიგებენ.
- ისე, არა მგონია, სამარცხვინო იყოს ის, რომ მსახიობმა ფილმში გაიხადა.
- მხოლოდ ამაზე არ არის ლაპარაკი. ტელეწამყვანმა, ჟურნალისტმა და მსახიობმა
ქალმა არ იცის, სად როგორ უნდა მოიქცეს და ვის როგორ მიმართოს. მგონი, ეს არის სამარცხვინო. შენ მოგეწონება, რომ ადამიანი, რომელიც ასეთი ლექსიკით მეტყველებს, გამოდიოდეს გადაცემის ეთერში და სხვებს რჩევებს აძლევდეს?!.. უძაღლო ქვეყანაში კატებს აყეფებდნენო, ნათქვამია...
- ია ფარულავა ამ საკითხზე კომენტარისგან თავს იკავებს, თუმცა ცნობილია, რომ ფიქრობს, შენ მისი სახელის გამოყენებით პიარს იკეთებ.
- თუკი მე პიარს ვიკეთებ, რატომ ვიბრძვი იმისთვის, რომ სასამართლო ჩატარდეს?!..
- არ იღებს ფარულავა შენს სარჩელს და მაინც ვერ გაიმართება სასამართლო.
- რატომ არ უნდა მიიღო, როდესაც მართალი ხარ? უნდა მიხვიდე სასამართლოში და ხალხს ლაპარაკის საფუძველი არ უნდა მისცე. ადვოკატებთან კონსულტაცია გავიარე და აუცილებლად მოვიგებ ამ საქმეს. მან მე ცილი დამწამა და მორალური შეურაცხყოფა მომაყენა. მას თავისი ნათქვამის დასამტკიცებლად არანაირი არგუმენტი არ მოუყვანია და არც ფაქტები ჰქონია, რომ მე არაწესიერი გზებით მივაღწიე წარმატებას. ციხეში არ გაუშვებენ, მაგრამ ბოდიშის მოხდა მოუწევს. ამას კანონი არეგულირებს. თუკი რაიმე შეცდომა დამიშვია, ბოდიში მომიხდია. ადამიანებმა უნდა ვისწავლოთ ბოდიშის მოხდა, ვიცოდეთ, სად რა უნდა ვთქვათ და ნევროზს არ უნდა ავყვეთ.
- ია ფარულავას რაში სჭირდებოდა შენთან დაპირისპირება?
- რატომ, გიორგი ნაზღაიძესთან დაპირისპირება იდეალური პიარია. თუკი მე არავინ ვარ, არც არავინ შემეხება. რადგან გეხებიან, ე.ი. რაღაცას წარმოადგენ. მე იმანაც გამაღიზიანა, როდესაც "დღის შოუში" ნუკი კოშკელიშვილი ჰყავდათ, ია ფარულავამ ვერ მოითმინა და აქ გამოჩნდა მისი დაბალი ინტელექტი და აზროვნება, ნუკის ჰკითხა, არ გრცხვენია, გიორგი ნაზღაიძესთან ერთად რომ მიგყავს გადაცემაო. ნუკიმ, რა თქმა უნდა, უპასუხა, რომ არ რცხვენია. თუკი არ გაინტერესებს გიორგი ნაზღაიძე, რატომ ახსენებ მის სახელსა და გვარს? მით უმეტეს, ნაზღაიძე არ არის პატარა და ადვილად გამოსათქმელი გვარი. მე მაინტერესებს ია ფარულავა ზუსტად იმიტომ, რომ მას უნდა შევხვდე სასამართლოში და მოვიგო პროცესი, რომელიც, ცხადია, რომ ისედაც მოგებული მაქვს. ფაქტი ისაა, რომ ამისთვის ბოლომდე ვიბრძვი და პიარისთვის არაფერი გამიკეთებია. ისედაც არ მაკლია პიარი, თუმცა სასამართლო რომ მოვიგო, ესეც კარგი პიარი იქნება. ეს ჭკუის სასწავლებელი იქნება არა მარტო ამ ასაკიანი ქალბატონისთვის, არამედ მათთვის, ვისაც სხვებისთვის შეურაცხყოფის მიყენება მოუნდება.
- მას შემდეგ იას სადმე თუ შეხვედრიხარ?
- ერთი სასტუმროს ფოიეში, კაფეში. ყველამ იცის, რომ ფეთქებადი ხასიათის ადამიანი ვარ. მეგობართან ერთად შევედი, რომ დამინახა, სახეზე ფერი დაკარგა, მაგრამ მე არ ვარ იმ დონის ადამიანი, რომ მასთან მივსულიყავი და შეურაცხყოფა მიმეყენებინა.
- თავად რომ გადასცე სარჩელი, არ შეიძლება?
- არა, სარჩელი სასამართლოს თანამშრომლისგან უნდა მიიღოს.
- ახლობლები არ გირჩევენ, რომ თავი დაანებო ამ დაპირისპირებას?
- ბევრმა ადამიანმა მითხრა, არ გიღირს მასთან ბრძოლაო, მაგრამ ცხოვრებაში უკან არ დამიხევია. რაც მოსახდენია, მოხდეს, ერთხელ თუ დახრი თავს, უარესს გააკეთებენ. იყო პატარა მუქარებიც, გიორგი ნაზღაიძემ თავი დაანებოს ამ ამბავსო, მაგრამ მგონია, რომ ქვის ხანაში არ ვცხოვრობთ. დროა, ხანში შესული ხალხი პენსიაზე გავიდეს და ასპარეზი ახალგაზრდებს დაგვითმონ. ნუ გვიშლიან ხელს და ნუ გვიდგებიან წინ!..
- ბევრმა შეიძლება იფიქროს, ქალს რომ ასაკიანს უწოდებ, ესეც არ არის ლამაზი მამაკაცის მხრიდან.
- ბებერს ხომ არ ვეძახი? ეს შეურაცხყოფა იქნებოდა. ჩემთვის ია ფარულავა არის ბოტოქსით გამოტენილი მოხუცი ქალი და ასე აღვიქვამ მას. ამბობენ, რომ ბევრი ბოტოქსი აქვს გაკეთებული.
- და ამაში ცუდი რა არის?
- არაფერი, უბრალოდ, ბოტოქსის გარეშე მისი ასაკი უფრო კარგად გამოჩნდებოდა.
- შენ ამბობ, რომ ია ფარულავა არ უნდა იჯდეს ტელეეთერში, თუმცა პოპულარულ ტელეწამყვანად მიიჩნევა.
- ჩემთვის მიუღებელია ქალი, რომელიც ღია ეთერში საჯდომს მიუშვერს თანაწამყვანს. შესაძლოა, ვიღაცას მოსწონს, მაგრამ ჩემთვის მიუღებელია. არაადეკვატურად იქცევა.
- ახლა რომ შეხვდე, არ ჰკითხავ, რატომ არ იბარებს სარჩელს?
- არა მგონია, რადგან არაადეკვატურად შეიძლება მოიქცეს, მოვიდეს და თავში ჩამარტყას რამე. არ მინდა, სახე დამიმახინჯდეს. აქ ჩანს ჩემი მამაკაცურობა, რომ თავს შევიკავებ მასთან მისვლისგან. არ ვიცი, აქ როგორი კანონებია, მაგრამ შეიძლება, ადამიანს მიაყენო შეურაცხყოფა და მერე სხვა მისამართზე გადახვიდე, რომ სასამართლომ ვერ გიპოვოს.
გარდა ამისა, მინდა ვთქვა, რომ სხვადასხვა ტელევიზიას მივეცი კომენტარები და ეს სიუჟეტები დაიბლოკა. მე ია ფარულავასნაირი კონტაქტები არ მაქვს, რომ ვიღაცები დავბლოკო. ამიხსნეს შემდეგნაირად, მეორე მხარემ თუკი კომენტარი არ გააკეთა, სიუჟეტს ვერ გავუშვებთო, მაგრამ ამ ზღაპრების არ მჯერა. თან რადიოჩანაწერიც წარვუდგინე, სადაც შეურაცხყოფა მომაყენა. მტკიცებულება არსებობს.
- მახსოვს, ფულსაც ითხოვდი.
- ლარს. საზოგადოებას ეგონა, რომ მე ამით გამდიდრებას ვაპირებდი, მაგრამ როცა ადამიანს არ აქვს ფული, ვერც წაართმევ. მას თანავუგრძნობ იმის გამო, რომ აღარ აქვს ფინანსები. ამბობენ, იბრძოდა იმისთვის, რომ "დღის შოუში" დაბრუნებულიყო და შემოსავალი ჰქონოდა. ეს გავითვალისწინე და ლარი დავაწესე, ასევე უნდა მომიბოდიშოს. იმ ლარიანს კი ჩარჩოში ჩავსვამ და კედელზე ჩამოვიკიდებ.
- ძალიან ძვირფასი ყოფილა შენთვის ია ფარულავა.
- მას რომ გამოვგლეჯ ლარიანს, ეს ხომ ძალიან ბევრს ნიშნავს (იცინის)?!..
ია ფარულავა ამ თემაზე კომენტარს არ აკეთებს, თუკი ტელეწამყვანს მოესურვება ინტერვიუ ამ თემაზე, მზად ვართ, მას "რეიტინგის" ფურცლები დავუთმოთ.
ნინო მურღულია
ჟურნალი "რეიტინგი"
