რას სწერენ ნანუკა ჟორჟოლიანის შვილს ფეისბუქზე თანატოლები
15 წლის მარიამ გეგუჩაძე, დედამისის წყალობით, ეკრანზე მოხვდა და მისსავე ტოქ შოუში რუბრიკა მიჰყავს. ასეთ სამსახურზე ბევრი, გამოცდილი თუ არა, დამწყები ჟურნალისტი მაინც ოცნებობს, არათუ მისი თანატოლები, მაგრამ ყველას ხომ ვერ ეყოლება დედა ნანუკა ჟორჟოლიანი. ის, რომ დედის ტოქ შოუში მისმა გამოჩენამ ბევრი გააღიზიანა, თავად მარიამმაც იგრძნო, მაგრამ ისიც გააცნობიერა, რომ პოპულარობა მსხვერპლს მოითხოვს.
სულ ცოტა ხნის წინ მარიამისთვის ჟურნალისტობა არცთუ საინტერესო პროფესია იყო, მაგრამ ახლა არ გამორიცხავს, დედის კვალს გაჰყვეს. მე–10 კლასშია და ბევრი რეპეტიტორი ჰყავს სხვადასხვა საგანში, ბოლო დროს კი ამ ყველაფერს მეტყველების გაკვეთილებიც დაემატა, რადგან გამართულად საუბარი ეკრანზე აუცილებელია.
– მარიამ, როცა ეკრანზე გამოჩნდი, რა სირთულეების წინაშე დადექი, რა არ გამოგდიოდა, რისი გეშინოდა ყველაზე მეტად?
– პირველ ჩაწერაზე, ბავშვთა დღეს, 1 ივნისს, როცა ნანუკამ ექსპერიმენტი ჩაატარა, თუ რამდენად მოვახერხებდი გადაცემის წაყვანას, ორივემ ძალიან ვინერვიულეთ. ახალ სეზონზე ეს შეგრძნება მახსოვდა და მეგონა, არ გამომივიდოდა. სირთულეები შემხვდა მეტყველებასთან დაკავშირებით. ბოლოს მეტყველების მასწავლებელთან დავიწყე სიარული და ამ ნაკლს ნელ–ნელა გამოვასწორებ. კითხვებს წინასწარ ვწერ, გადაცემის ნახაზსაც მანამდე ვაკეთებ. რესპონდენტი თუ გაიხსნა და თავად შემოიტანს თემებს, მერე უკვე სპონტანურად მეც ვსვამ კითხვებს.
ყველაზე მეტად კი მაინც იმას განვიცდიდი, სხვა ბავშვები ამას როგორ აღიქვამდნენ. ვიცოდი, რომ ზოგი კრიტიკულად შეხედავდა. მეშინოდა, არ ეთქვათ, ამას დედამ გაუკეთა გადაცემაო. ცუდი ისაა, რომ ზოგი ვერ ხვდება, თუ ნანუკამ ეს რუბრიკა გამიკეთა, სწორედ მათთვის არის კარგი, რადგან ვცდილობ, ნიჭიერი ბავშვები მაქსიმალურად წარმოვაჩინო. ასეთი ადამიანების შესახებ იმდენი შეტყობინება მომდის ფეისბუქზე, რომ სამი წლის გადაცემები ჩაიწერება.
– თანატოლებისგან რა უფრო მეტი იგრძენი – მხარდაჭერა თუ კრიტიკა?
– ბევრი კარგი რამ მოვისმინე ჩემზე, რაც სტიმულს მაძლევს. რა თქმა უნდა, ცუდიც გავიგე, მაგალითად, ის, რომ ვითომ დედამ იმიტომ გამიკეთა ეს გადაცემა, რომ პოპულარული გამხადოს. პოპულარობაზე თუ ვილაპარაკებთ, ამ გადაცემამდე სერიალით "გოგონა გარეუბნიდან" ბევრად უფრო პოპულარული ვიყავი. ბოლოს გამოვიმუშავე ის აზრი, რომ რაც მეტს ლაპარაკობენ შენ შესახებ, თუნდაც ცუდს, ეს ნიშნავს იმას, რომ გიყურებენ.
– შენი სტუმრების არჩევა რის მიხედვით ხდება, დედა ერევა ამ საქმეში?
– თავიდან ნანუკა ერეოდა აქტიურად, ვინ უნდა შემერჩია, მაგრამ ამ ბოლო დროს უფრო მანდობს და თავად ვარჩევ სტუმრებს. ფეისბუქზე ჩემი რუბრიკის გვერდი მაქვს და იქ მწერენ, შემდეგ მათ საქმიანობას, პოტენციალს ვეცნობი და საბოლოოდ ვარჩევ რესპონდენტს.
– ეს პროცესი მოგწონს თუ დამღლელია?
– მომწონს და მსიამოვნებს. თან ვერთობი, რადგან ზოგი ისეთ რამეს მწერს, რომ არ შეიძლება, არ გაგეღიმოს. მაგალითად, მომწერეს, რომ ექსკლუზიურად ჩემთვის წაიყვანდნენ ჩემს გადაცემას. ამ დროს, ბუნებრივია, მიჩნდება კითხვა – მე რა გავაკეთო? ერთმა მომწერა, მარიამ, ძალიან ჰგავხარ დედას, პატარა ნანუკა ხარ და პატარა როსტო თუ დაგჭირდება, დამირეკეო.
– პატარა ნანუკას რატომ ხედავენ შენში, დედას ბაძავ?
– ვერ გეტყვით, რომ დედას ვბაძავ. არასდროს მიფიქრია, ნანუკას როგორც მიჰყავს გადაცემა, მეც ზუსტად ისე წავიყვანო, თუმცა ჩემსა და ნანუკას შორის მაინც ბევრ რამეში აღმომიჩენია მსგავსება. არ მინდა, ნანუკას ასლი ვიყო. ვთვლი, რომ რაშიც საჭიროა, უკვე ვგავარ.
– როცა ჩანაწერს უყურებ, მაშინ პოულობ ამ მსგავსებას?
– სხვათა შორის, ჩემს რუბრიკას ვერასდროს ვუყურებ. არ მომწონს ჩემი თავი, არც ის, როგორ ვლაპარაკობ. ვფიქრობ, ნეტა, თავიდან შემეძლოს გადაცემის ჩაწერა–მეთქი. იმდენად ვნერვიულობ, რომ საერთოდ აღარ ვუყურებ.
– ნანუკა ესწრება ხოლმე შენი რუბრიკის ჩაწერას?
– არ ესწრება, რადგან ძალიან ნერვიულობს. რამდენჯერმე მოვიდა და ყველაფერზე შენიშვნა მომცა, საბოლოოდ ვერც მე ჩავწერე რუბრიკა და ნანუკამაც ინერვიულა. იმის მერე აღარ ესწრება, რომ არ დაიძაბოს.
– კონკრეტულად რა შენიშნვებს გაძლევს ხოლმე დედა?
– ყველა კუთხით მაკრიტიკებს. ერთი პერიოდი აკვიატებული მქონდა ფრაზა: "იცი, რა მაინტერესებს?". ამას ყველა ჩაწერაზე ვიმეორებდი. ამაზე მუდმივად მაძლევდა შენიშვნას.
– ყველაზე მძაფრად რომელი გადაცემის ჩაწერა გახსოვს?
– ეს იყო გადაცემა ჯგუფ "უმა თურმანზე", რომელიც რუსულად უნდა წამეყვანა. ძალიან ვნერვიულობდი. "უმა თურმანი" ჩემი საყვარელი ჯგუფია, რომლის წევრებიც იმდენად გახსნილი აღმოჩნდნენ, რომ აქეთ მამშვიდებდნენ. საბოლოოდ ყველაფერმა კარგად ჩაიარა და ამიტომ ჩემთვის ყველაზე დასამახსოვრებელ გადაცემად იქცა.
– სულ ცოტა ხნის წინ კატეგორიულად ამბობდი, რომ ჟურნალისტობა არ გსურდა და არ გინდოდთ, ნანუკას მსგავსად გადაცემა წაგეყვანა. რა შეიცვალა ამ მოკლე პერიოდში?
– იმდენად ჩამოუყალიბებელი ვარ, თუ რა მინდა, რომ მეშინია, რამე ვთქვა. ყველაზე ძალიან მინდა, მსახიობი ვიყო, მაგრამ ეს ჩემზე არ არის დამოკიდებული.
– რატომ, დედას არ სურს, მსახიობი გახდე?
– არა, ნანუკა ყველანაირ თავისუფლებას მაძლევს. თუ მინდა, გამოვალ მსახიობი. ნიკა წულუკიძესთან ვაპირებ ლექციებზე სიარულს თეატრალურში და გადავწყვეტ, ნამდვილად მინდა თუ არა ეს პროფესია. არ მჯერა იმ ზღაპრების, რომ ვინმე მიპოვის, წამიყვანს ჰოლივუდში და ვარსკვლავად მაქცევს. მინდა, ცხოვრებაში წარმატებას მივაღწიო, კარგი კარიერა გავიკეთო, ოღონდ ის საქმე უნდა მსიამოვნებდეს. არ მინდა, ჩემი ცხოვრება მეუღლეზე ან დედაზე იყოს დამოკიდებული.
– დედამ იმიტომ ხომ არ ჩაგრთო თავის გადაცემაში, რომ მას სურს, ჟურნალისტი გამოხვიდე?
– დიახ, ნანუკას უნდა ამ პროფესიით დამაინტერესოს. გადაცემიდან გადაცემამდე კიდევ უფრო სხვანაირი ვხდები და ეს სამყარო უფრო მეტად მაინტერესებს.
მანანა ნოდია
