მარიტა ჯანაშია: "ვერასოდეს ჩავიცვამ ლედი გაგას მსგავსად"
რუბრიკა "სტილის" სტუმარია კონკურს "ელიტ მოდელ ლუქ ჯორჯია 2009"-ის გამარჯვებული, მოდელი მარიტა ჯანაშია.
- მარიტა, ჩაცმის როგორ სტილს ამჯობინებთ?
- ყოველდღიურად უფრო თავისუფალი სტილის სამოსს ვიცვამ - ვსწავლობ, ძალიან დატვირთული ვარ და მირჩევნია, დღის განმავლობაში თავი მოხერხებულად ვიგრძნო. ადრე ბანკში ვმუშაობდი და სულ კლასიკურად მეცვა. არ დავდივარ სახელობით მაღაზიებში, მიმაჩნია, რომ არ არის აუცილებელი, განთქმული ბრენდის სამოსი გეცვას, მით უფრო - ყოველდღიურად. ისე კი, ძალიან მომწონს "დოლჩე და გაბანას" ახალი კოლექცია, ქართველი დიზაინერებიდან კი ავთანდილ ცქვიტინიძეს გამოვარჩევ.
- ქალების უმეტესობას შეუძლია საკუთარი ბიუჯეტი მხოლოდ ტანსაცმელში დახარჯოს...
- მე ერთხელ მოვიქეცი ასე და ძალიან ცუდად მახსენდება ის პერიოდი. დამოუკიდებელი ვარ, მშობლებს არ ვთხოვ ფულს, ამიტომ ვცდილობ, ჩემი შემოსავალი სწორად გავანაწილო, მთელ თვეს რომ მეყოს.
- ამბობენ, მოდელებს მწირი ანაზღაურების სანაცვლოდ უწევთ მუშაობაო, კმაყოფილი ხართ შემოსავლით?
- მოდელებს რეკლამებიდან უკეთესი შემოსავალი აქვთ, ვიდრე ჩვენებებიდან, მაგრამ ყოველთვის სიამოვნებით გამოვდივარ დიდ ჩვენებებზე და მოდის კვირეულზე. მოდის კვირეულები წლიდან წლამდე იხვეწება, მისი წყალობით მოდელებიც მეტად წარმოჩნდნენ საზოგადოებაში და ეს სფეროც გამოცოცხლდა. მარტში თბილისის მოდის კვირეული იწყება და მოუთმენლად ველოდები. დიდ პატივს ვცემ ყველა დამწყებ ახალგაზრდა დიზაინერს. ისინი ძალიან რთული ეკონომიკური პირობების მიუხედავად ახერხებენ ახალი კოლექციების შექმნას.
- პარფიუმერიული ბრენდებიდან რომელი მოგწონთ?
- ხარისხიანი პარფიუმერია ქალისთვის მნიშვნელოვანია. ჯობია, ძვირი გადაიხადო და ხარისხიანი ნაწარმი შეიძინო. ახლა "ივ როშეს" პროდუქციას ვხმარობ, ბუნებრივ კომპონენტებზეა დამზადებული და ძალიან მომწონს. ყოველდღიურად კი ვცდილობ მაკიაჟი არ გავიკეთო.
- გარეგნობაში კორექტივების შეტანის სურვილი თუ გაქვთ?
- ადრე უფრო მქონდა ამის სურვილი, ახლა ასე აღარ არის. ბოლო ხანს თმას ბუნებრივი ფერი დავუბრუნე, მინდა, ისევ გავიღიავო და ახალი ვარცხნილობა გავიკეთო, მაგრამ ვერ ვბედავ. მახსოვს, ერთხელ თმა ძალიან მოკლედ შევიჭერი, მეორე დღეს რომ გავიღვიძე, ვინანე და ახლაც ამიტომ ვიკავებ თავს. საღებავისგან თმა რამდენჯერმე ძალიან დამეწვა, ამიტომ თალგამის ზეთის ნიღბებს ვიკეთებ, რაც ძვირად ღირებულ პროცედურებზე ეფექტიანია.
- ვის მსგავსად ვერ ჩაიცვამ ვერასდროს?
- ვერასოდეს ჩავიცვამ ლედი გაგას მსგავსად. ჩემთვის ეს წარმოუდგენელია. მომწონს თაკო ჩხეიძის ჩაცმულობა, ის მუდამ გემოვნებით იმოსება.
- რომელი ფერის სამოსი მოგწონს?
- ძალიან მომწონს შავი ფერის სამოსი, ამის გამო ყველა მსაყვედურობს, მე კი მომწონს. ჩემმა მეგობარმა ჟოლოსფერი ჯემპრი მაჩუქა და, შეიძლება ითქვას, ის არის ერთი ნათელი წერტილი ჩემს გარდერობში (იცინის).
- რას ურჩევ ქართველ ქალებს?
- ქართველ ქალებს ვურჩევ, ხშირად გაიღიმონ.
თმის მოვლის რეცეპტი მარიტა ჯანაშიასგან: აფთიაქში შეიძინეთ თალგამის ზეთი. საღამოს წაისვით თმაზე და დილით ჩამოიბანეთ. ეს თმას ანიჭებს ბზინვარებას, აქრობს გაყოფილ ბოლოებს და აჩერებს თმის ცვენას.
ესაუბრა თამარ ბოჭორიშვილი
