ეკო ფანგანი ნამზეურით გაჩენილ ნაოჭს ბოტოქსით ებრძვის

ბომონდური წვეულებების სახე, მოდელი ეკო ფანგანი, მოუწესრიგებელი თითქმის არასდროს არის. მალაიზიაში, რეალურ შოუ "უკანასკნელ გმირშიც" კი, სადაც თავის მოვლის არანაირი საშუალება არ ჰქონდა, გამოსავალი მაინც მოძებნა და მანიკიურს ჩვეულებრივი დანით იკეთებდა. ასეთი გამოცდილების მიღების შემდეგ უკვე თამამად აცხადებს, რომ თავის მოვლისთვის მთავარი მართლაც მონდომებაა და არა – ბევრი ფული. თუმცა ძვირადღირებული პროცედურა მაინც სჭირდება, იმ შეცდომის გამოსასწორებლად, რომელიც თავის დროზე ბავშვური სიჯიუტის გამო დაუშვა.
– ეკო, თავის მოწესრიგება, მოვლა, მაკიაჟი რა ასაკიდან გახდა თქვენთვის საინტერესო და აქტუალური? მას შემდეგ ხომ არა, რაც პოპულარული სახე გახდით?
– არანაირად! ბავშვობიდან ასეთი ვარ, თავის მოვლა მიყვარს და ეს სიამოვნებას მანიჭებს, თუმცა პატარაობაში დედის მაღალქუსლიანი ფეხსაცმელებით არ დავდიოდი და კოსმეტიკას არ ვუფუჭებდი. 16 წლიდან ნელ–ნელა დავიწყე გაპრანჭვა და იმის მერე სულ ასე ვარ. თავს არასოდეს ვაძლევდი უფლებას, მოუწესრიგებელი ვყოფილიყავი. მიყვარს, როცა სულ ფორმაში ვარ.
– გარეგნობაში რა არის თქვენთვის მთავარი დეტალი, რაც თავდაჯერებულობას განიჭებთ?
– ალბათ იმ შემთხვევაში არ ვიქნები თავდაჯერებული, თუ თმა მოვლილი არ მექნება. მოუწესრიგებელი თმით ვერ ვივლი. ეს ჩემთვის პრიორიტეტულია.
– რაიმე პროცედურებს იყენებთ თმისთვის?
– ძალიან იშვიათად დავდივარ სალონში. ვარცხნილობას თვითონ ვიკეთებ, რადგან ეს პროცესი მიყვარს. თმას ხარისხიანი შამპუნით და ბალზამით ვიბან. ძალიან იშვიათად გვირილის ნაყენს ვივლებ, რადგან კარგია, თმას აჯანსაღებს და აღიავებს.
– როგორ ფიქრობთ, რა ასაკიდან უნდა დაიწყოს ქალმა კანის მოვლა?
– მე ვიტყოდი, რომ ბავშვობიდან. საკუთარი გამოცდილებით ვამბობ, რომ კანთან ხუმრობა არ შეიძლება. ბავშვობაში ძალიან მიყვარდა გარუჯვა და მზეზე ვიწვებოდი. არ მჯეროდა, როცა მეუბნებოდნენ, ეს კანს აფუჭებსო. არადა ამ დროს კანი შრება და მზისგან ნაოჭებიც ჩნდება.
– როგორ გამოასწორეთ ნამზეურის უარყოფითი შედეგები?
– ჯერჯერობით ამ მხრივ საოცრებებს არ ვაკეთებ. ალბათ ასაკის მატებასთან ერთად უფრო აქტიურად მოვუვლი. ვცდილობ, კანი არ გამომიშრეს და სულ დატენიანებული მქონდეს. მაკიაჟით არასოდეს ვიძინებ. კომბინირებული კანი მაქვს – გამომშრალი და ცხიმიანი ერთად. ეს იმას ნიშნავს, რომ კანში წყალი ნაკლებია, რაც გარუჯვის სიყვარულმა დამმართა. ასეთი კანის მოვლა საკმაოდ რთულია. ამ დროს ბევრი წყალი უნდა მიიღო.
– გყავთ კოსმეტოლოგი, ვის რჩევებსაც ითვალისწინებთ?
– კი, მყავს. გარუჯვას მიშლის და მუდმივად კანის დატენიანებას მთხოვს. სახის კრემსაც ის მირჩევს.
– ბოტოქსზე ჯერ უარს ამბობთ?
– არა, ბოტოქსით წარბებშუა მზისგან დატოვებული ნაოჭი მოვიშორე და მას პერიოდულად ვიკეთებ.
– თქვენი მსხვილი ტუჩები ბუნებრივია?
– კი, ჩემია, გაკეთებული არ მაქვს. სხვათა შორის, ამას ხშირად მეკითხებიან. პლასტიკური ქირურგია მომწონს, ვისაც გარეგნობის გაუმჯობესება სჭირდება, ეს კარგი საშუალებაა, თუმცა ზედმეტად რომ მიმართავენ ამ ხერხს, რა თქმა უნდა, ცუდ შედეგსაც იღებენ.
– როგორ მაკიაჟს იკეთებთ?
– ჩემს მაკიაჟში ყოველთვის შედის ტუში, რადგან ღია ფერის წამწამები მაქვს. მაკიაჟის გაკეთება თავად შემიძლია, ტელეეთერისთვისაც კი შემიღებავს თვალები ჩემით. ყველაფერი შემიძლია. წარბის თუ პედიკიურ–მანიკიურის გაკეთება ჩემთვის პრობლემას არ წარმოადგენს.
– როცა მალაიზიაში ველურ პირობებში იყავით, როგორც რეალური შოუს მონაწილე, მაშინაც ყოველთვის ფიქრობდით თავის მოწესრიგებაზე თუ ეს ნაკლებად მნიშვნელოვანი იყო?
– თავის მოვლა იქ ძალიან რთული იყო. თავიდან ვერ მივხვდი, რა უნდა მექნა. ფრჩხილების ნუნებს დანით ვიჭრიდი, არანაირი საშუალება არ გვქონდა, მაგრამ საოცარი ის იყო, რომ ასეთ პირობებში თმა გვიბზინავდა და კარგი ხარისხის გახდა. ალბათ იმიტომ, რომ იქ სუფთა გარემოა, მანქანების გამონაბოლქვი არ არის, გემები არ დაცურავენ, თვითმფრინავები არ დაფრინავენ და ა.შ.
– ეთანხმებით აზრს, რომ კარგი, მოწესრიგებული გარეგნობა კარგი ფინანსების შედეგია?
– თავის მოვლას დიდი ფინანსები არ სჭირდება. რა თქმა უნდა, კარგია, თუ ბევრი ფული გაქვს, მაგრამ მთავარი მაინც სურვილი და მონდომებაა და არა – ფინანსები.
– გიცდიათ სახლის პირობებში გარეგნობაზე ზრუნვა?
– ეს ბევრ დროს მოითხოვს და ამიტომ გვეზარება ყველას, თორემ ძალიან კარგია, როცა თავს ბუნებრივი საშუალებებით უვლიან. მახსოვს, ჩემი მეზობელი ქალი იჯდა ხოლმე ეზოში და კანზე კიტრის ნაფცქვენები ელაგა. ვიცი, რომ კანისთვის კარგია კვერცხის ცილის ან არაჟნის ნიღაბი.
– რა დრო გჭირდებათ სარკის წინ?
– ათ წუთშიც მოვმზადებულვარ და სარკის წინ საათებიც გამიტარებია. თუ რამეზე ვფიქრობ, ასეთ დროს სარკეში ყურება და საკუთარ თავთან ლაპარაკი მიყვარს.
– სხეული ძალიან კარგ ფორმაში გაქვთ, ალბათ ვარჯიშის დამსახურებაა.
– არასდროს მქონია ზედმეტი წონა, ეს პრობლემა არ მაქვს, შესაბამისად დიეტა არასოდეს დამიცავს. თქვენ წარმოიდგინეთ, არც მივარჯიშია. ღმერთს მადლობას ვეუბნები ამის გამო, რადგან გურმანი ვარ და ძალიან გემრიელად ვიკვებები. შემიძლია ღამის საათებში ვისადილო და მერე კარაქიანი პური დავაყოლო.
– რა წესებს იცავთ იმისთვის, რომ კარგად გამოიყურებოდეთ?
– არ ვეწევი, რადგან უბრალოდ ვერ ვიტან. ძალიან მიყვარს გაზიანი სასმელები, მაგრამ ვიცი, რომ ჯანმრთელობისთვის სახიფათოა და არასოდეს ვსვამ. ერთი პერიოდი დღეში სამ ლიტრ წყალს ვსვამდი, რაც ნამდვილად არ არის კარგი. ახლა უფრო ნაკლებს ვსვამ. დაძინების წინ კარგი არ არის ბევრი წყლის მიღება, რადგან სხეულს ასივებს.
მანანა ნოდია