თეა დანელიას გათხოვება შვილმა ურჩია

ჯგუფ "ბანდეროლის" სოლისტი, 31 წლის თეა დანელია, რამდენიმე თვის წინ გათხოვდა. ეს მისთვის მეორე ქორწინებაა და მისი რჩეული 36 წლის რატი ბუაძე გახლავთ, პროფესიით ოპერატორი, ტელეკომპანია "იმედში" მუშაობს. სწორედ იქ გაიცნეს ერთმანეთი თეამ და რატიმ და მათი სამსახურებრივი რომანი ოჯახურ ცხოვრებაში გადაიზარდა. თეას ამ გადაწყვეტილების მიღება უჭირდა, მაგრამ ამაში მისი 9 წლის ვაჟი, ზუკა სიამაშვილი დაეხმარა. შვილი რატისაც ჰყავს პირველი ქორწინებიდან – 12 წლის ბიჭი იკუნა.
თეა დანელია გვიამბობს:
– ერთმანეთს მას შემდეგ ვიცნობთ, რაც "ბანდეროლი" და "ღამის შოუს სტუდია" ვთანამშრომლობთ. რატი "ნანუკას შოუს" გადაცემის ოპერატორად მუშაობდა. მალე დავმეგობრდით, მაგრამ ვერ გეტყვით, რომ ერთმანეთი დანახვისთანავე შეგვიყვარდა. ეს ალბათ ასაკის გამოც მოხდა, წლები რომ გემატება, უფრო დინჯი და დაფიქრებული ხდები. ძალიან ვაწვალებდი. კი მინდოდა მასთან ყოფნა, მაგრამ ვერ ვხვდებოდი, რამდენად ვიყავი მზად, კიდევ ერთხელ გადამედგა ეს ნაბიჯი და ოჯახი შემექმნა. რატი ზედმეტად მომთმენი აღმოჩნდა და ბოლოს დამითანხმა. ჩემმა შვილმა, ზუკამაც დიდი როლი ითამაშა. ის თავიდანვე იცნობდა რატის და ერთმანეთს კარგად გაუგეს. ეს ჩემთვის ძალიან მნიშვნელოვანი იყო. როცა ზუკას დაველაპარაკე და ვკითხე, რა აზრის იყო, მიპასუხა, რომ ამაზე ბევრი ფიქრი საჭირო არ იყო.
– თეა ძალიან თბილი ადამიანია. კარგად შევეწყვეთ ერთმანეთს. უყვარს თავისი საქმე და მას მეც პატივს ვცემ. ჩემთვის ეს ადამიანი ყველაფერია. ვიცი, მისგან ყოველთვის სრული მხარდაჭერა მექნება, – ამბობს რატი.