რა ეფექტის მოხდენა შეუძლია თმაზე ვაშლის ძმარსა და ბურღულეულს?

დამეთანხმებით, რომ ლამაზი და ჯანმრთელი თმის ქონა მართლაც სასიამოვნოა. იმისათვის, რომ თმა ჯანმრთელი იყოს, საფუძვლიანი მოვლა ესაჭიროება.

თმის სწორად დაბანა მისი მოვლის საკითხში ერთ-ერთი უმთავრესი ფაქტორია. მანამ, სანამ გადაწყვეტთ, რომელ შამპუნს გამოიყენებთ, უნდა გაარკვიოთ თმის ტიპი.

ნორმალური ტიპის თმა, როგორც წესი, ჯანმრთელად გამოიყურება, ბზინავს და მოქნილია. ასეთ თმას არ სჭირდება განსაკუთრებული მოვლა. ის ადვილად ივარცხნება და დიდხანს ინარჩუნებს ფორმას.

ცხიმიანი თმა არასასიამოვნოდ პრიალებს, არ აქვს მოცულობა, ძნელად ექვემდებარება ვარცხნილობას და დაბანიდან სულ მცირე ხანში კარგავს ჯანსაღ იერს.

მშრალი თმა მტვრევადია და მისი ბოლოები გაყოფილი. ამ ტიპის თმას არ აქვს ბუნებრივი ელვარება. ის ძნელად ივარცხნება, რადგან ადვილად იბურდება.

თმის მდგომარეობა გარკვეულწილად კვებაზეა დამოკიდებული. თუ ცხიმიანი თმა გაქვთ, შეეცადეთ ნაკლებად მიირთვათ თეთრი პური, ცხარე სანელებლები და ცხოველური ცხიმები. თუ თქვენი თმა მშრალი და მტვრევადია, ჩართეთ თქვენს რაციონში ღვიძლი, ბურღულეული, ნაღების კარაქი, ხილი და ბოსტნეული.

• შამპუნის შერჩევისას მხოლოდ თმის ტიპის გათვალისწინება არ კმარა. მაგალითად, თუ თმა მშრალია, თავის კანი კი ცხიმიანი, უპირატესობა ცხიმიანი თმისთვის განკუთვნილ შამპუნს მიანიჭეთ.

• იმ შემთხვევაში, თუ თავს ყოველდღიურად იბანთ, შეარჩიეთ შამპუნი ნიშნით - ხშირი გამოყენებისათვის. ასეთ შამპუნებს სპეციალური შემადგენლობა აქვს და ნაზად ზრუნავს თმის სტრუქტურის გაუმჯობესებაზე.

• დაზიანებული თმა რბილი, მკვებავი შამპუნით დაიბანეთ.
ისინი შეიცავს დამატენიანებელ და თმის გამაძლიერებელ კომპონენტებს.

• თმიდან სტატიკური ელექტროობის მოსახსნელად გამოიყენეთ კონდიციონერი.

• ყურადღება მიაქციეთ დაზიანებულ თმას. გამოიყენეთ შამპუნი მშრალი და დაზიანებული თმისათვის. კვირაში ორჯერ უმკურნალეთ აღმდგენი საშუალებებითა და ნიღბებით.

• შეეცადეთ, არ გამოიყენოთ ფენი. ვარცხნილობის გაკეთების დროს ნუ გამოიყენებთ სპირტის შემცველ ლაქს და მუსს.

• გახუნებულ თმაზე გადაივლეთ ვაშლის ძმარი, გვირილის, ჭინჭრის ან კრაზანას ნახარში. თმა ბზინვარებას და ჯანსაღ იერს დაიბრუნებს.

• სასურველია, ცალკე შამპუნი იქონიოთ და ცალკე კონდიციონერი. შამპუნ-კონდიციონერი ნაკლებეფექტურია.

• არ არის რეკომენდებული თმის ზედმეტად ცხელი ან ზედმეტად გრილი წყლით დაბანა. წყლის ტემპერატურა ოდნავ უნდა აღემატებოდეს ადამიანის სხეულის ტემპერატურას.

• დაბანამდე თმა აუცილებლად დაივარცხნეთ. ერთი მხრივ, მასაჟს გაიკეთებთ, მეორე მხრივ, ადვილად მოაშორებთ კანს მკვდარ უჯრედებს, რაც იმას ნიშნავს, რომ თმა მეტხანს შეინარჩუნებს სისუფთავეს.

• თმის დაბანის პროცესში გაიკეთეთ მასაჟი, რომელიც გააძლიერებს სისხლის მიმოქცევას და ასტიმულირებს თმის ჯანმრთელ ზრდას. დაიმასაჟეთ თითების ბალიშებით თავის კანი წინა ნაწილიდან კეფის მიმართულებით 5-15 წუთის განმავლობაში. თუ თქვენი თმა გამოფიტულია და გცვივათ, ეს მასაჟი აუცილებელიც კია. გარდა ამისა, სპეციალური ნიღბებიც უნდა გამოიყენოთ.

• დაბანისას შეეცადეთ, თმა არ დაგებურდოთ. შედეგად, მას ადვილად დაივარცხნით, თან თმის მოწყვეტის (მოგლეჯვის) შანსიც მინიმალური იქნება.

• ფენის ხშირი გამოყენება აშრობს თმას და მტვრევადს ხდის მას. ამიტომ გაზაფხული-ზაფხულის პერიოდში მაინც თავი შეიკავეთ მისი გამოყენებისგან და თმა ოთახის ტემპერატურაზე გაიშრეთ.

ნუ დატოვებთ თმას "უყურადღებოდ", თმის მოვლა სილამაზის და ჯანმრთელობის საწინდარია!