"სეიშენის" ოთხეული სამეულად იქცა

ჯგუფ "სეიშენში" ოთხიდან სამი წევრი დარჩა. ჯიმი ფხაკაძემ არამხოლოდ ჯგუფი, სცენაც მიატოვა, თანაც, როგორც ამბობს, სამუდამოდ. მართალია, ძალიან გაუჭირდა გადაწყვეტილების მიღება, მაგრამ საბოლოოდ მეგობრებს მაინც გამოემშვიდობა.
ჯგუფის თაყვანისმცმელთა და ახლობელთა წრეში ჯიმის წასვლის შესახებ სხვადასხვა ხმა გავრცელდა. ზოგი ამბობს, რომ მას დანარჩენ წევრებთან დაპირისპირება მოუვიდა, ზოგმა კის ის თქვა, სასულიერო ცხოვრებას იწყებს და მონასტერში მიდისო. საბოლოოდ სინამდვილეს ნათელი ისევ ჯიმიმ მოჰფინა და განაცხადა, რომ ბიზნესის სფეროში მიდის, ხმა კი მისი სასულიერო პირად აღკვეცის შესახებ იმის გამო გავრცელდა, რომ ის სასულიერო სემინარიაში სწავლობს.
– "სეიშენის" ბიჭებთან არავითარი პრობლემა არ მქონია. ჩემი პირადი გადაწყვეტილება იყო, რომ არამხოლოდ ჯგუფი, სცენა მიმეტოვებინა. კონკრეტული მიზეზი არ არსებობს, რისთვისაც ასე მოვიქეცი. ამჟამად ოჯახში ვარ და ჩემს ცოლ–შვილს ვემსახურები. პატარა ბიზნესიც მაქვს. კონკრეტულად, სადისტრიბუციო კომპანიის დირექტორი ვარ ყავის განყოფილებაში. ამ მცირე ბიზნესსაც ყურადღება და დრო სჭირდება. ბიჭებს ძალიან კარგი რაღაცეები გვაქვს დაგეგმილი, "სეიშენის" შიდა სამზარეულოში მეგობრულად ახლაც ვიღებ მონაწილეობას და რაღაც–რაღაცეებს ერთად ვწყვეტთ. ჩვენს მეგობრობაში ბზარი არ გაჩენილა. დარწმუნებული ვარ, რომ სამნი დარჩებიან. ვფიქრობ, ჩემს ადგილს ვერავინ დაიკავებს. მათ ასე ვიცნობ და ალბათ ასეც იქნება, – ამბობს "სარკესთან" ჯიმი ფხაკაძე.
"სეიშენის" ერთ–ერთი წევრი, ლევან წვერავა ასე არ ფიქრობს. ის არ გამორიცხავს, რომ მეოთხე წევრი მაინც აიყვანონ. საერთოდ კი, როგორც ჩანს, მეგობრის ამ გადაწყვეტილებამ ყველა ძალიან დააბნია.
– ჯიმის გადაწყვეტილებამ ნამდვილად გული დაგვწყვიტა. 16 წელია ერთად მოვდივართ, ერთი ოჯახის წევრები ვართ. ჯგუფში დიდი გარდატეხა მოხდა, მაგრამ ვფიქრობ, რომ ამან ცუდად არ უნდა იმოქმედოს და დაშლის საფრთხე არ უნდა გაჩნდეს. ჯერჯერობით სამნი ვიქნებით, მაგრამ არ არის გამორიცხული, მეოთხე წევრიც მოვძებნოთ. დიდი გეგმები გვაქვს. სირთულე კი ის არის, რომ მთელი ჩვენი პროგრამა თავიდან ბოლომდე გადასაკეთებელია, მაგრამ ჩვენ ამას შევძლებთ, – გვითხრა ლევან წვერავამ.
ქეთი დინოშვილი