რა პროფესიისაა ანი ტყებუჩავას შეყვარებული?

აღმაშენებელზე, ერთ-ერთ მყუდრო კაფეში დავთქვით შეხვედრა, ანი ტყებუჩავა თავის დაქალთან მაშიკოსთან ერთად მოვიდა: "გოგონა ცნობისმოყვარე მზერითა და თბილი ღიმილით", ასეთი იყო მაშიკოზე ჩემი პირველი შთაბეჭდილება, მაგრამ რა მნიშვნელობა აქვს მე რას ვფიქრობ, მთავარია მკითხველი დავაინტერესო.

საუბრის თემა დაქალები და მეგობრობაა, თუმცა არ დაგიმალავთ და ცოტ-ცოტა პირადი ცხოვრება და "ჩემი ცოლის დაქალების" კულუარული ამბებიც მაინტერესებს.
რა აკავშირებს სერიალს ჟურნალ "...და ქალთან"

- ანი, როგორ ფიქრობ, გათხოვების შემდეგ, შენ უახლოეს მეგობრებთან შეძლებ ისეთივე ახლო ურთიერთობის შენარჩუნებას, როგორიც სერიალში შენ გმირს აქვს?

- აუცილებლად, ამის გარეშე ვერც წარმომიდგენია. ვერ ავიტან გვერდით ისეთ ადამიანს ვინც ჩემ მეგობრებს ვერ შეეგუება. ჩვენს უახლოეს მეგობართან დიტო ცინცაძესთან და მის მეუღლესთან ფაქტობრივად ერთი ოჯახივით ვცხოვრობთ, დილის ხუთ საათზეც კი ავსულვართ და კარტოფილი შეგვიწვავს.

- დიდი ხნის მეგობრები ხართ შენ და მაშიკო? საერთოდ მოდი გაგვაცანი შენი უახლოესი მეგობრები, რას წარმოადგენენ, ვინ არიან და რამ განაპირობა, რომ თქვენი მეგობრობა შედგა.

- სანამ მაგაზე გიპასუხებ, სხვათა შორის უნდა გითხრა, რომ თავიდან, თუ არ ვცდები, სერიალისთვის "...და ქალი" უნდა დაერქმიათ, მაგრამ აღმოჩნდა, რომ ამ სახელწოდების ჟურნალი არსებობდა და ამიტომაც "ჩემი ცოლის დაქალები" დაარქვეს. ახლა კი რაც შეეხება მაშიკოს და ჩემს მეგობრებს, აუუ... სიმართლე, რომ გითხრა არც კი მახსოვს როგორ გავიცანი და რამდენი ხანია ერთად ვართ. საუბარში მაშიკო ჩაგვერთო:

- სამაგიეროდ მე ზუსტად მახსოვს 1999 წელი იყო.

- მართლა? მართლა არ მახსოვდა, საეთოდ მაშიკოს ყველაფერი ახსოვს, ყველაფრის ორგანიზება შეუძლია, და ჩემი მარტო მეგობარი კი არა სტიმულის მომცემი და გარკვეულ წილად იმიჯმეიკერიც არის, ყველაფერს ვეკითხებით ერთმანეთს, დაწყებული "გლობალური" პრობლემებით, საცვლებით დამთავრებული, ეს არის ადამიანი, რომელსაც ბრმად ვენდობი ნებისმიერ საკითხში.

სწორედ მისი დამსახურებაა, რომ პროექტ "დასში" მოვხვდი, მე ისეთი ზარმაცი ვარ რომ... მან დამაძალა, მან შემავსებინა განაცხადი და ყველანაირად დამეხმარა, რისთვისაც დიდი მადლობა.

- კარგი. რადგან მასეა, მაშინ მაშიკოს მინდა ვკითხო: როგორი ბიჭი წარმოგიდგენია ანის გვერდით, როგორი ბიჭები მოსწონს თვითონ და ამ საკითხთან დაკავშირებით რამდენად გულწრფელები ხართ ერთმანეთთან?

გოგონებმა ერთმანეთს გადახედეს და ისე გაეღიმათ რომ მივხვდი "რაღაცაში" რომ იყო საქმე, მაგრამ "ეს" საკითხი ასე ვთქვათ ცოტა ხნით გადავდე. მაშიკოს დიდხანს არ უფიქრია:

- ნინა არასოდეს აფასებს მხოლოდ გარეგნობით, მის გვერდით აუცილებლად უნდა იყოს ჭკვიანი, თბილი, გონიერი ადამიანი, რომელსაც ძალიან ეყვარება მისი მეგობრები, რომელსაც ეყვარება ის და მასთან თავს კომფორტულად იგრძნობს, ასე არაა?

- ნამდვილად, ასეააა.

- ანუუუ შეგვიძლია ვთქვათ, რომ ასეთი ადამიანი უკვე არსებობს? ორივეს გაეცინა.

ანის სიყვარული და ოცნებები ქორწილზე

- ნამდვილად არ ვარ ის ტიპი, რომ რაიმე დავმალო და მივჩქმალო, მე შეყვარებული ვარ, ერთ ძალიან კარგ ადამიანზე.

- მაინც ვინ არის, რით მოგხიბლა რა გააკეთა ასეთი?

- ოო, ცოტა რთულია ამის თქმა, ერთმანეთს დიდი ხანია ვიცნობთ, მაგრამ ჩვენი ურთიერთობა ზაფხულის მერე სხვა ფაზაში გადავიდა, პირველ რიგში ნიჭიერებით, გონიერებით, უბრალოებით მომხიბლა. მოკლედ, ყველაფრით, მასთან თავს ბედნიერად ვგრძნობ!

- რა პროფესიისაა?

- რეჟისორია, ოღონდ სახელს ჯერ ვერ გეტყვით, არ მინდა დისკომფორტი შევუქმნა.

- მეგობრებმა როგორ მოიწონეს?

მაშიკო:

- სხვათა შორის ძალიან მოგვეწონა; მოხდა ისე რომ ყველა ერთად ვიყავით, პირველივე წუთიდან თავისი სითბოთი და უშუალობით მოგვხიბლა, ძალიან დადებითად განვეწყვეთ.

ანი:

- ჩუმად მეუბნებოდნენ "კარგი ბიჭია, კარგი"!

- როგორ ქორწილზე ოცნებობ, ამასთან დაკავშირებით არაფერი დაგიგეგმავთ?

- ჯერ ამაზე ალბათ ადრეა საუბარი, მაგრამ ასე წარმოდგენით და ოცნებით რა თქმა უნდა კი. არ მინდა გრანდიოზული ქორწილი, ტრადიციული და მამაპაპური, მგონია რომ ბევრი სიყალბე და დადგმული სცენაა, თანაც ფილმის გადაღებებისას იმდენ ხანს მომიწია ქორწილში ყოფნა, რომ არასოდეს აღარ მომინდება ქართული ტრადიციული ქორწილი (იცინის), ალბათ უფრო სადა უბრალო, მხოლოდ ძალიან ახლობელ ადამიანებთან ერთად, აუცილებლად დავიწერთ ჯვარს.

თანაც იქვე მეზობლად ცხოვრობს და შორს წასვლაც აღარ დამჭირდება. მინდა რომ ჩემ ქორწილს ახალგაზრდული "ტუსოვკის" სახე ჰქონდეს.

მთვრალი ვარსკვლავი

- ანი, შენ სხვა მეგობრებზე რას გვეტყვი, რა თავგადასავლები გადაგხდენიათ ერთად? მაგალითად, ერთად თუ დამთვრალხართ და მერე?...

- უუუფ... კი კაცო დავმთვრალვართ და თანაც როგორ. მაგალითად, მაშიკო საერთოდ არ სვამდა ჩვენთან ერთად, საუბარში მაშიკო ჩაგვერთო:

- მოიცა მაგას მე მოვყვები:

- მოკლედ მოხდა ისე, რომ ამათთან ერთად დალეული არ მქონდა, ერთხელაც როგორც იქნა ერთად წავედით დასასვენებლად და თავი ანის სოფელში ამოვყავით, დიდიხნის ძებნის შემდეგ, როგორც იქნა მივაგენით არაყს, რომელიც სულაც არ აღმოჩნდა ის არაყი, რომლის შესახებაც ანის მამამ მიგვითითა, არამედ სპირტი იყო, თანაც საშინელიიი... ამ არყით ისე დავთვერით ვერ აგიღწერთ, მთელი ღამე გავიძახოდი მთვრალი ვარსკვლავი ვარ-მეთქი.

- ანის როგორი სიმთვრალე აქვს?

- ჩვეულებრივი. არ ვამტვრევ, არ ვჩხუბობ, სულ ვიცინი.

- თქვენი დანარჩენი მეგობრებიც ვარსკვლავებად იქცევიან ხოლმე სიმთვრალეში?

- აბა, ყველა ვარსკვლავები ვართ, ჩემი უახლოესი მეგობრებიდან მინდა გამოვყო დიტო, ირაკლი, რომელიც სამწუხაროდ ჩვენს გვერდით აღარაა, ნინო და თამუნა, რომლებიც ძალიან მიყვარს, ასევე ჩემი სტუდენტობის მეგობრები ნესი და გიორგი, რომლებიც ბევრი სირთულის გადალახვაში დამეხმარნენ.

შემიძლია ვთქვა რომ ჩვენი სამეგობრო ერთი დიდი ოჯახია, დიტო სანამ ცოლს მოიყვანდა მე და მაშიკო კარგი მულებივით ვჭორავდით მომავალ სარძლოს. ბედნიერი ვარ ასეთი ადამიანი რომ არის, მოკლედ გამოგვადგა. შესანიშნავი ადამიანია ირაკლის მეუღლეც, ისიც ჩვენი უსაყვარლესი მეგობარია.

დიტო ერთი შეხედვით ძალიან სერიოზული ტიპის შთაბეჭდილებას ტოვებს, სახეზე "შრამი" აქვს და უხდება, ბევრ გოგონას მოსწონდა და ეჭვიანობდნენ კიდეც ჩვენზე. მაგრამ ამ სერიოზულობის მიღმა ერთი საყვარელი და მხიარული ბიჭი იმალება, რომელზეც ყველა ვგიჟდებით. "დასში" ფინალში რომ გავედით, უცებ მესმის ვიღაც ჩემ სახელს ბოლო ხმაზე ყვირის, გავიხედე და ვხედავ დიტოს, რომელსაც ჩემი ნომერი უკავია და სასწაულებს აკეთებს. ძალიან ბედნიერი ვარ, ეს ადამიანები რომ მყვანან გვერდით.

"ჩემი ცოლის დაქალები"და "ნინას ბაღი"

- ანი, ბუნებრივია რომ სერიალის მსახიობებთანაც მეგობრობ, როგორი გარემოა და რამდენად მეგობრული?

- საერთოდ, ხშირად ამბობენ ხოლმე რომ ამ სფეროში დიდი კონკურენციაა, ყველას ერთმანეთის შურს, ყველა ერთმანეთს ფეხს უდებს. საბედნიეროდ მე ჯერ არ მქონია ასეთ ხალხთან ურთიერთობა, ძალიან კარგად ვგრძნობ თავს და მართლა უზომოდ მეგობრული გარემოა.

-  შენ განსაკუთრებული სიყვარულით სარგებლობ პატარა მაყურებლებში.

- ეს ძალიან მახარებს, უზომოდ მიყვარს ბავშვები და სკოლებში არსებულ დრამატულ წრეებთანაც მიწევს მუშაობა, იმდენად მსიამოვნებს მათთან ურთიერთობა, რომ როგორც კი თავისუფალ დროს გამოვნახავ ჩემი მეგობრის ბავშვებთან გავრბივარ, ხუმრობით მირჩევენ, რომ საბავშვო ბაღი - "ნინას ბაღი" გავხსნა.

- სერიალის მსახიობების გარდა სხვა ცნობად სახეებთან თუ მეგობრობ?

- ძალიან მიყვარს და ყოველთვის ვითვალისწინებ ნანუკა ხუსკივაძის რჩევებს, ის არა მხოლოდ დიდი მსახობია, არამედ დიდი ადამიანიცაა, ბედნიერი ვარ მისი გაცნობის და მასთან მუშაობის საშუალება რომ მომეცა.

- დასასრულ, ყველაზე მეტად ამ ეტაპზე რას ისურვებდი?

- იმედი მაქვს, რომ თეატრში ისევ შევძლებ მუშაობას. თეატრი ჩემი ოცნებაა!

ინგა თარაშვილი
ჟურნალი ”და ქალი”