ბესო კალანდაძე: ჩემი ყოფილი ცოლი დღესაც კი შეურაცხმყოფელ მესიჯებს მწერს

გასული საუკუნის სამოცდაათიან წლებში ბევრი გოგონა აღტაცებული უსმენდა მომღერალ ბესო კალანდაძეს. მათ შორის იყო პლასტიკური ქირურგი ციცინო შურღაიაც. განსაკუთრებით "რა სცოდნია, ამ პატარა ნამის ღილებს" ჰქონია ამოჩემებული. რამდენიმე წლის წინ ბესიკ კალანდაძე და ციცინო შურღაია ერთმანეთს შეხვდნენ. გადაწყვიტეს, ოჯახი შეექმნათ. ყველაფერი კარგად იყო, სანამ ერთ მშვენიერ დღეს სახლიდან ბეჭდები არ დაიკარგა...

-  ბატონო ბესო, ყოფილ მეუღლესთან, ციცინო შურღაიასთან როგორი ურთ­იერთობა გაქვთ ამჟამად? როგორც ვიცი, თქვენი საქმე სასამართლოში განიხილება.
-  ოფიციალურად შეიძლება, ის ჩე­მი ცოლი იყო, მაგრამ მე მას ცოლად ვერ აღვიქვამ მისი საქციელის გა­მო. თუ შეურაცხადია, რასაც მე ვერ დავუმტკიცებ, მას ეპატიება ის საქციელი, რასაც სჩადიოდა და ამჟამადაც სჩადის.

-  რას გულისხმობთ?
-  არ მინდა ამ თემაზე საუბარი, მაგრამ რამდენი წელი გავიდა, რაც დავშორდით და დღესაც კი შეურაცხმყოფელ მესიჯებს მწერს. რამდენიმე დღის წინ იძულებული გავხდი, პოლიციაში განმეცხადებინა ეს ამბავი. იქნებ, პოლიციამ აიძულოს, შეწყვიტოს ჩემთვის მორალური ზიანის მოყენება. ის არა მარტო ქალისათვის, კაცისთვისაც კი მიუღებელი ლექსიკით მლანძღავს. ყველას ვთხოვ, იქნებ გამოუჩნდეს მას პატრონი და ფსიქიატრთან შეამოწმონ. გაარკვიონ, ჯანმრთელია თუ არა. თუ ჯანმრთელია, მაშინ კანონი სხვანაირად იმუშავებს მასზე და თუ არაა ჯანმრთელი, მაშინ სამკურნალოა და პირობას ვიძლევი, რომ მე თვითონვე გადავიხდი მკურნალობის ხარჯებს.

-  საინტერესოა, რას გწერთ ყოფილი მეუღლე?
-  ყოველდღე უცენზურო სიტყვების შემცველ მესიჯებს მიგზავნის. ბოლო ერთი წლის განმავლობაში რვაასამდე მესიჯი აქვს გამოგზავნილი.

-  შეურაცხმყოფელი სიტყვები რომ ჩამოვაშოროთ, რა შინაარსი დარჩება, ანუ რას ითხოვს თქვენგან?
-  უცენზურო სიტყვების ჩამოშორებით ვერაფერს გაარკვევთ. ეს მესიჯები მხოლოდ იმაზეა გათვლილი, რომ წყობიდან გამოგიყვანოს და მიუვარდე, დაარტყა და მის დონემდე დახვიდე. კიდევ ერთხელ ვიმეორებ, თუ არაა კარგად, სიამოვნებით დავფარავ მისი მკურნალობის ხარჯებს. ასეა თუ ისე, ამ ადამიანთან მე რაღაც მაკავშირებდა. თუ მას სამედიცინო ჩარევა სჭირდება, მაშინ იქით მოვუხდი ბოდიშს და ვეცდები, გამოჯანმრთელდეს. სასამართლო პროცესი კი საოცრად გაიწელა. უკვე ოთხი წელია, გრძელდება. ახლა საქმე უზენაეს სასამართლომდეა მისული. პირველმა ორმა ინსტანციამ ქალბატონი ციცინო შურღაია დაავალდებულა, რომ ჟურნალ "რეიტინგის" საშუალებით მომიხადოს ბოდიში და უარყოს ის ბრალდებები, რაც მან თქვენი ჟურნალით გაავრცელა. სასამართლომ დაამტკიცა, რომ ის ცილისმწამებელი და მატყუარაა. ამის შესახებ არსებობს ქალაქ თბილისის სააპელაციო სასამართლოს 2011 წლის 28 აპრილის დადგენილება. ეს დადგენილება კანონიერ ძალაში არ შესულა. ამიტომ თავს ვიკავებ ყოველგვარი კომენტარისგან. შეიძლება, უზენაესმა სასამართლომ სულ სხვა გადაწყვეტილება მიიღოს, თუმცა რაც არ გამიკეთებია, არ არსებობს, დამტკიცდეს. რასაც ქალბატონი ციცინო მაბრალებდა, არ მომხდარა და გამორიცხულია, ვინმემ დაადგინოს, რომ რამე მოვიპარე.

-  თქვენ ორჯერ გქონდათ ოჯახი. მეორე მეუღლესთან დაშორების შემდეგ პირველს დაუბრუნდით. ასე, როგორც წესი, იშვიათად ხდება ხოლმე.
-  არ მინდა, ძალიან პირად ამბებზე ვისაუბრო. ერთს გეტყვით ძალიან მოკლედ. ჩემს პირველ მეუღლეს რომ შევურიგდი, ამის კატალიზატორი თავად ქალბატონი ციცინო იყო. თუმცა ვიტყოდი,

რომ პირველ რიგში მე ჩემს შვილებს დავუბრუნდი. ჩემს პირველ მუღლესთან ურთიერთობა დალაგდა და ახლა ძალიან კარგად ვართ. ერთად ვზრდით შვილებს და ერთად ვცდილობთ, შვილები გზაზე დავაყენოთ. მე მოსკოვში ყოფნის დროსაც არ შემიწყვეტია შვილებზე ზრუნვა. პირველ მეუღლეს არ დავუბრუნდებოდი, ქალბატონი ციცინო ასე რომ არ მოქცეულიყო. ჩემი კი არა, მრავალნახული ადამიანის გონებაც ვერ გასწვდებოდა იმ ყველაფერს, რაც მე მან მომიგონა და დამაბრალა. ერთმანეთს რომ შევადარე ჩემი და მედეას დაშორება და ქალბატონ ციცინოსთან მომხდარი ამბავი, მივხვდი, რომ მეორე მეუღლესთან შედარებით პირველთან ბავშვურად ვიკამათე.

-  რას ნანობთ ყველაზე მეტად?
-  ვნანობ, რომ ციცინო შურღაიასთან რაიმე ურთიერთობა მქონდა.

-  მიუხედავად იმისა, რომ ეს ქალბატონი ერთ დროს გიყვარდათ?
-  რომ არ გამეცნო, ძალიან კარგი იქნებოდა. მას შეურაცხყოფას არ ვაყენებ. არ ვამბობ, რომ მე მასზე უკეთესი ვარ ან უარესი. უბრალოდ, ჩვენ სხვადასხვა პოლუსზე ვართ. აზროვნებით და ცხოვრებაზე შეხედულებითაც ძალიან განვსხვავდებით. ჩემთვის მიუღებელია, ე.წ. ელიტური საზოგადოება, რომელთანაც ის ტრიალებს და რომლითაც თავს იწონებს. შეიძლება, ისინი ცნობილები არიან, მაგრამ მათი ქცევის ნორმები ჩემთვის მიუღებელია, იმიტომ, რომ მათი ურთიერთობა მედროვეობაზეა აგებული. ჩვენ ერთმანეთს ვერ ავეწყობოდით, რადგან მისი წრე ჩემთვის მიუღებელია და პირიქით. ამიტომ მწყდება გული, რომ ერთმანეთს შევხვდით.

-  თქვენი მეუღლე მედეა რა აზრისაა ამ ყველაფერთან დაკავშირებით? არც ერთ მეუღლეს არ მოეწონება, რომ ქმარს ყოფილი მეუღლე დღეში რამდენიმე მესიჯს უგზავნიდეს.
-  რა თქმა უნდა, არ მოსწონს. ისიც ქალია და ბევრი რამ გადაიტანა. საბედნიეროდ, ის ბევრად გონიერი აღმოჩნდა. საღად შეაფასა სიტუაცია. რეალურად შეხედა რაღაცებს. როცა ადამიანები ურთიერთობენ, რაღაცებზე ხუჭავენ თვალებს.

-  თქვენი ყოფილი და ამჟამინდელი მეუღლეები ერთმანეთს შეხვედრიან?
-  არა.

-  არ იცნობენ ერთმანეთს?
-  არა, ჩემს მეუღლეს მასთან შეხვედრის არანაირი სურვილი არ გასჩენია. ნორმალურ ადამიანს ციცინო შურღაიასნაირ სკანდალურ პიროვნებასთან შეხვედრის სურვილი არც გაუჩნდება. ციცინო შურღაიას შეიძლება ჰქონდა მასთან შეხვედრის სურვილი, არა იმიტომ, რომ მედეა ძალიან მოსწონს (იცინის), ალბათ იმიტომ, რომ მისთვის შეურაცხყოფა მიეყენებინა და მდგომარეობიდან გამოეყვანა. რასაც მე მიკეთებს, იმავეს გაუკეთებდა მედეას. ეს მისი ცხოვრების სტილია.

-  ქალბატონი ციცინოს პირადი ცხოვრებით თუ დაინტერესდით მას შემდეგ, რაც დაშორდით?
-  მისი პირადი ცხოვრებით არ დავინტერესებულვარ. ამის არანაირი სურვილი არ გამჩენია. ოღონდ მე თავი დამანებოს და იყოს ჩემზე ფინანსურად ძლიერიც, ჯანმრთელიც და ათჯერ უფრო წარმატებული კარიერაში. ესაა ჩემი სურვილი. ღმერთმა კარგად ამყოფოს ისიც და მისი ოჯახიც. მას ჰყავს გოგონა, რომელიც საღად აზროვნებს და საკუთარი ოჯახი აქვს. მის ქალიშვილს კარგად ვიცნობ და მინდა, დედამისზე ბევრად უფრო ბედნიერი იყოს.

-  მამაკაცებს რა რჩევას მისცემდით, რომ სიყვარულმა და გრძნობამ მსგავს სკანდალში არ გახვიოს?
-  რჩევის მიცემა რთულია. ყველას ინდივიდუალური ცხოვრება აქვს. ალბათ ცხოვრებაში მთავარი ისაა, რომ გრძნობამ გონებას არ გაუსწროს წინ. როცა ადამიანს უყვარს, ძალიან კარგია, მაგრამ ჯობია, წინასწარ გააანალიზოს, ეს გრძნობა რას მოუტანს.

-  როგორ ფიქრობთ, არსებობს ოჯახის შენარჩუნების რეცეპტი?
-  ოჯახის შენარჩუნებას ქალიც და კაციც იმ შემთხვევაში უნდა ეცადოს, როცა მათ ჰყავთ მცირეწლოვანი ბავშვი. თუ ოჯახში ბავშვი არაა და ერთმანეთს ვერ უგებენ, მაშინ ორივემ თავისი გზა უნდა მოძებნოს.

-  როგორ ფიქრობთ, თქვენ და ქალბატონ ციცინოს ბავშვი რომ გყოლოდათ, თქვენ შორის ურთიერთობა ასე დაიძაბებოდა? ბავშვი ცოლ-ქმრის ურთიერთობას ცვ­ლის?
-  ვერ გეტყვით, მაგრამ ბავშვის არსებობა ყველაფერს ცვლის. მისი ინტერესები აუცილებლად უნდა გაითვალისწინო. იმას არ ვამბობ, რომ ბავშვის გამო ვიღაცას ნერვები უნდა შესწირო და თავი შეაკლა.

-  როდესაც ქალს დღეში ორჯერ უჩნდება მამაკაცისთვის წერილის მიწერის სურვილი, ეს ნიშნავს, რომ მასზე ფიქრობს. როგორ გგონიათ, შესაძლებელია, ქალბატონ ციცინოს დღესაც უყვარდეთ?
-  ქალის ფსიქოლოგია არ ვიცი, მაგრამ თუ ქალს კაცი უყვარს, მას წლების განმავლობაში შეურაცხმყოფელი მესიჯები არ უნდა მისწეროს. არ მეგულება ჩემ გვერდით ადამიანი, რომ ეს სიყვარულის გამოხატვად აღიქვას.

-  ეს მხოლოდ შურისძიებაა?
-  შურისძიება კიდევ სხვა რამეა. ესაა ბოღმით სავსე სულის მქონე ადამიანის საქციელი. როცა გიყვარს, ცდილობ, მას ლექსი დაუწერო. კაცები ასე ვიქცევით. ქალი ცდილობს, კაცს კარგი საჭმელი და გაუთოებული ტანსაცმელი დაახვედროს.

-  როგორც ვიცი, ორი შვილი გყავთ. ბავშვები რას ფიქრობენ ამ ყველაფერზე?
-  შვილებთან ამ თემაზე არ მისაუბრია. შეგნებული ბავშვები არიან. ქალბატონ ციცინოს ჯანსაღი ფსიქიკის ადამიანად არ მიიჩნევენ და ამიტომაც არ განიცდიან ამ ყველაფერს. ჩემი გოგონა სტუდენტია, დიპლომატიის ფაკულტეტზე სწავლობს და ამჟამად ჩინეთში იმყოფება კვალიფიკაციის ასამაღლებლად. დრო აღარ რჩება, რომ უაზრო ბაკქანალიას ყურადღება მიაქციოს. მას თავისი ცხოვრება აქვს და ასეც უნდა იყოს. ჩემი ვაჟიშვილი მე-12 კლასის მოსწავლეა.

-  არც ერთი არ მღერის?
-  ვაჟიშვილი "ქართული ხმების" უმცროს თაობაში მღეროდა. მერე რაგბიზე დადიოდა და ამ სპორტმა გაიტაცა.

-  როგორ ფიქრობთ, ფინანსებს გადამწყვეტი მნიშვნელობა აქვს ოჯახის შენარჩუნებისთვის?
-  მოსკოვში რომ ვცხოვრობდი, არც მე ვიყავი უმუშევარი და მით უფრო არც ციცინო. პრობლემა ჩვენს ოჯახში იმის გამო არ დაწყებულა, რომ ფული არ გვქონდა და მშივრები ვიყავით.

-  ამ შემთხვევაზე შეიძლება ითქვას, რომ მდიდრებიც ტირიან.
-  მდიდრად ჩემს თავს ნამდვილად არ ვთვლი. საშუალოზე უფრო დაბალ ფენას მივეკუთვნები.

-  ქალბატონი ციცინო კი მდიდარი ქალბატონია...
-  მას შეიძლება, ძალიან მდიდარი ჰგონია თავი, მაგრამ, ჩემი აზრით, ის საშუალო ფენას მიეკუთვნება. თუმცა არ ვიცი, ახლა როგორი მდგომარეობა აქვს. მე რომ გავშორდი, შეიძლება, ძალიან დიდ წარმატებას მიაღწია. როგორც თავად ამბობს, 2008 წლის საუკეთესო პლასტიკური ქირურგი გახდა რუსეთის ფედერაციაში და ეს კი მას შემდეგ მოხდა, რაც ჩვენ დავშორდით. როგორც ჩანს, მე მას ხელს ვუშლიდი წარმატების მიღწევაში.

-  წლების მერე პლასტიკური ოპერაციის გაკეთება რომ მოინდომოთ, ალბათ ქალბატონ ციცინოს არავითარ შემთხვევაში არ მიმართავთ.
-  გარწმუნებთ, არავითარ პლასტიკურ ოპერაციას არ გავიკეთებ. ამის არანაირი სურვილი არ მაქვს.

-  როცა მისი მეუღლე იყავით, არ შემოუთავაზებია პლასტიკური ოპერაციის გაკეთება?
-  ბევრჯერ შემოუთავაზებია.

-  უარი რატომ უთხარით?
-  მგონი, ძალიან დაბერებული და დაჭმუჭნილი არ ვარ. შვიდი წლის წინ უფრო ახალგაზრდა ვიყავი. ახლა არ მაქვს პლასტიკური ოპერაციის გაკეთების სურვილი და მით უფრო გასულ წლებში არ მოვინდომებდი. ვფიქრობ, თუ ადამიანი ავარიაში არ მოყვება, პლასტიკური ოპერაცია არ უნდა გაიკეთოს. ტკბილად დაბერებულ ადამიანზე ლამაზი ვერ იქნება ხელოვნურად გადატკეცილი უმოძრაო შუბლი.

-  ხომ არ ეწყინა, ოპერაციიის გაკეთებაზე უარი რომ უთხარით?
-  არა მგონია, სწყენოდა. რამდენჯერმე მითხ­რა, თვალის უპეების ოპერაციას გაგიკეთებ, მერე ასაკში თვალების გარშემო ნაოჭები აღარ გექნებაო. ეს პრობლემა ნამდვილად არ მაწუხებს და არც ოპერაციის გაკეთებას ვაპირებ.

მერი კობიაშვილი

ჟურნალი "რეიტინგი"