რაში ეჯიბრება ნათია დუმბაძე მეუღლეს
მომღერალი ნათია დუმბაძე და მისი მეუღლე - ბაჩო ბატატუნაშვილი ხუთი წლის ვაჟს - დუდუს ზრდიან. გარდა იმისა, რომ მღერის, ნათიამ ბიზნესსაქმიანობაც წამოიწყო. მომღერალი შვილზე, ოჯახურ ცხოვრებაზე, საკუთარ პრობლემებსა და კარიერულ სიახლეებზე გვესაუბრება.
- მეუღლე საერთო მეგობრისგან გავიცანი. ერთმანეთი მაშინვე მოგვეწონა და შეყვარებულობის პერიოდიც დაიწყო. ბაჩოს ექვსი თვის განმავლობაში ვხვდებოდი, მერე კი დაქორწინება გადავწყვიტეთ. მოკლედ, შეიძლება ითქვას: თვალის გახელა ვერ მოვასწარი, რომ უკვე ქორწილი მქონდა. მაშინ 19 წლის ვიყავი, ჩემი მეუღლე კი 24-ის გახლდათ. ალბათ, ასე სწრაფად იმიტომ დავოჯახდით, რომ დიდი სიყვარული გვაკავშირებდა.
- ხშირია შემთხვევა, როცა ოჯახის შექმნის შემდეგ, წყვილი გარკვეულ სირთულეებს აწყდება. თქვენ რა სირთულეების დაძლევა მოგიხდათ?
- თავიდან, მთელი წლის განმავლობაში იდეალური ურთიერთობა გვქონდა, შემდეგ კი ცოტა არ იყოს, დავიძაბეთ, რადგან ბაჩომ მუშაობა ისეთ ადგილას დაიწყო, სადაც ლამის, მთელი დღის გატარება უწევდა. მაშინ პატარა ვიყავი, თან - ორსულადაც გახლდით და ვბრაზობდი, დღის განმავლობაში ქმარი გვერდით რომ არ მყავდა, ახლა კი ამ ყველაფერზე მეცინება. საბედნიეროდ, რთული პერიოდი გადავლახეთ. შვიდი წელია, ერთად ვართ და ნამდვილად, იდეალური ურთიერთობა გვაქვს.
- შვილის ნაადრევად გათხოვებას შენი მშობლები როგორ შეეგუვნენ?
- დედაჩემი ნერვიულობდა... ზოგადად, მშობლები ყველა ჩემს გადაწყვეტილებას პატივს სცემენ. ერთი სასაცილო ამბავი გამახსენდა: ქორწილამდე ერთი თვე იყო დარჩენილი. დიდი ბლოკნოტით დავდიოდი და რაღაც საქმეებს ვაგვარებდი. ყოველ საღამოს, როცა შინ დაღლილი მივდიოდი, დედა მეუბნებოდა: გათხოვება ხომ არ გადაიფიქრეო?.. მამა ამ ამბავს ჩვეულებრივად შეხვდა, მას ბაჩო ძალიან შეუყვარდა. 
- როგორც აღნიშნე, უკვე 7 წელია, გათხოვილი ხარ. საინტერესოა, დაოჯახების შემდეგ რა შეიცვალა შენსა და ბაჩოს ურთიერთობაში?
- შეყვარებულობის პერიოდს მართლაც, არაფერი შეედრება. მართალია, ჩვენი ურთიერთობა აღარ არის ისეთი, როგორიც შეყვარებულობის დროს იყო, მაგრამ ბაჩო სიურპრიზებით დღემდე მანებივრებს, მე კი ვცდილობ, ამ საქმეში ვაჯობო (იღიმის).
- დედამთილ-მამამთილთან როგორი ურთიერთობა გაქვს?
- ისინი არაჩვეულებრივი ადამიანები არიან და ჩვენ ყველანი ერთად, დიდ სახლში ვცხოვრობთ. ჩემი დღის რეჟიმიდან გამომდინარე, ხშირად შინ გვიან ვბრუნდები და დედამთილი ყველაფერში ხელს მიწყობს; ბავშვის გაზრდაშიც თავიდანვე ჩაერთო... საერთოდ, გაბრაზება, წყენის გულში ჩადება არ მჩვევია, ეს კი ადამიანებთან ურთიერთობაში ძალიან მეხმარება.
- კაცების უმეტესობას მეუღლე მხოლოდ სამზარეულოში წარმოუდგენია, აქტიური ცოლი სულაც არ ხიბლავს. შენს შემთხვევაში მგონი, პირიქით უფროა...
- ნამდვილად ასეა! "ჯეოსტარში" მონაწილეობა ყოველთვის მინდოდა, მაგრამ როდესაც კონკურსი პირველად გამოცხადდა, ორსულად ვიყავი, მეორედ - ბავშვი იყო პატარა და პროექტში მონაწილეობა ამიტომ ვერ გავრისკე; ვიდრე კასტინგს კიდევ გამოაცხადებდნენ, მეუღლის სურვილით, ვოკალის პედაგოგთან მოვემზადე, ამ კონკურსზე ღირსეულად რომ წარვმდგარიყავი. მოკლედ, ბაჩო ყველაფერში ხელს მიწყობდა, გვერდით მედგა და მგულშემატკივრობდა... ეჭვიანობის მომენტები რა თქმა უნდა, იყო, მაგრამ მცირე დოზით. ქმარი დღესაც მეუბნება, - საშუალება რომ მქონდეს, ყველაფერს გავაკეთებდი საიმისოდ, რომ მუსიკალურ სფეროში უფრო მეტისთვის მიგეღწიაო.
- რა შეიცვალა შენს ცხოვრებაში მას შემდეგ, რაც დედა გახდი?
- ერთ რაღაცაში გამოგიტყდებით: დუდუ რაც უფრო იზრდება, მით უფრო მეტად მიმძაფრდება მისდამი სიყვარული. ამას იმასაც ვაბრალებ, რომ ოცი წლისამ გავაჩინე - მაშინ თავადაც ბავშვი ვიყავი, ბევრ რამეს ვერ ვაცნობიერებდი. ვერ აღვწერ იმ სიყვარულს, რასაც შვილის მიმართ განვიცდი. როდესაც მე და ბაჩოს პრობლემა გვაქვს, ვამბობთ, რომ შვილის გამო ყველაფერს უნდა გავუძლოთ.
- დუდუ რამდენი წლის არის?
- ხუთი წლის არის და უკვე ბაღში დადის, სექტემბრიდან კი სკოლაში მივიყვანთ. 
- დუდუს მოვლაში მეუღლე თუ გეხმარება?
- იმ პერიოდში, როცა ბავშვი გავაჩინე, ბაჩოს დატვირთული დღის რეჟიმი ჰქონდა და ღამე კარგად რომ არ გამოეძინა, ვეღარ იმუშავებდა. ახლა უფრო მეტადაა ჩართული შვილის აღზრდაში, ვიდრე წლების წინ იყო.
- დუდუს სახელი ვინ შეურჩია?
- მე და ბაჩო ერთმანეთს მოფერებით "დუს" ვეძახდით და შვილი რომ გაგვიჩნდა, ვთქვით: მოდი, პატარას დუდუ დავარქვათო (იღიმის).
- მეორე ბავშვის გაჩენას არ აპირებთ?
- როგორ არა! ძალიან მინდა, გოგონა მყავდეს. ზოგადად კი, სამი შვილის ყოლის სურვილი მაქვს... დუდუ კარგად მღერის. ცოტა ხნის წინ ჩვენ დუეტი ჩავწერეთ და კლიპიც გადავიღეთ. მიუხედავად ამისა, ნამდვილად არ მინდა, ჩემი შვილი მომღერალი გახდეს. უბრალოდ, იმის სურვილი მაქვს, რომ სიმღერა იცოდეს, წარმატებას კი სპორტში მიაღწიოს.
- შემოქმედებითი კუთხით შენკენ რა სიახლეებია?
- "ჯეოსტარმა" ძალიან ბევრი რამ შეცვალა ჩემს ცხოვრებაში: ხშირად მეძახიან სხვადასხვა კონცერტში მონაწილეობის მისაღებად, ვმღერი კორპორატიულ საღამოებზეც. დეკემბერში, ანკარის საკონსულომ მე და თიკა მახალდიანი ერთ-ერთ თურქულ გადაცემაში მიგვიწვია, სადაც საქართველოს სახელით წარმატებულად გამოვედით. ეს გადაცემა შობას, თურქეთის ყველაზე ცნობილ არხზე გავიდა.
ახალი სიმღერაც ჩავწერე, რომელიც ლილიკო ნემსაძემ დაწერა. ამ სიმღერას პირველად 18 აპრილს, ლილიკოს საღამოზე შევასრულებ.
ძალიან მინდა კლიპის გადაღებაც, მაგრამ ამ ეტაპზე, ამას ვერ მოვახერხებ... და კიდევ, ვინაიდან საქართველოში მუსიკით თავის რჩენა შეუძლებელია, ბიზნესი წამოვიწყე - სოლარიუმი გავხსენი...
ჟანა გოგინაშვილი
ჟურნალი ”გზა”
