რომელი ნაკვთის კორექტირება სურთ ქართველ ქალებს ყველაზე ხშირად

პლასტიკური ქირურგიის სიახლეებზე პლასტიკური ქირურგი გუგა კუზანოვი გვესაუბრება:

- ამიერკავკასიასა და საქართველოში ყველაზე ხშირად ცხვირის კორექციისთვის მოგვმართავენ. ხშირად მოდიან ქალბატონები კონტურული პლასტიკისთვის - წვრილი ნაოჭებისა და მომჩვარული ლოყების კორექციისთვის. ეს კეთდება არაოპერაციული გზით, ინიექციებით.

- უფრო ხშირად რა ასაკის ქალბატონები მოდიან?
- 35 წელს გადაცილებულები. საერთოდ, სახის დაბერებას მრავალი ფაქტორი განაპირობებს. პირველ რიგში - თამბაქოს მოხმარება. რაც უფრო მეტს ეწევა ქალი, მით ადრე ეწყება კანის დაბერება. სახის კანზე უარყოფითად მოქმედებს სტრესები, უძილობა, ულტრაიისფერი სხივები, დაბინძურებული გარემო და სხვა.

- შესაძლოა, კონტურული პლასტიკის შემდეგ სახის კანზე უარესი შედეგი მივიღოთ, ვიდრე ამ პროცედურამდე გვქონდა?
- ეს გამორიცხულია. კონტურული პლასტიკის შემდეგ ქალი გაცილებით უკეთესად გამოიყურება. მომდევნო პროცედურა რომც არ ჩაიტაროს, ეფექტი უკეთესი იქნება, ვიდრე კონტურულ კორექციამდე იყო. განმეორებადი კორექცია კი ინდივიდუალურია - ზოგს ეს 6 თვის შემდეგ სჭირდება, ზოგს - 8 თვის ან წელიწადის შემდეგ. მაგრამ, როგორც გითხარით, თუ კორექცია კარგად გაკეთდა და განმეორებითი პროცედურის საშუალება ქალს აღარ აქვს, კანი არ გაუუარესდება.

- რა ხდება ამ მხრივ ლიპოსაქციის შემდეგ?
- ეს უკვე ადამიანზეა დამოკიდებული. თუ წონა საკმაოდ მოიმატა, ბუნებრივია, შედეგს ვერ შეინარჩუნებს და კვლავ კორექცია დასჭირდება, მაგრამ თუ ადამიანი ჯანსაღ ცხოვრებას ეწევა და წონას აკონტროლებს, შედეგი მყარი და ხანგრძლივია.

- ახალშობილებში ხშირია ანომალიები, მაგალითად, მგლის ხახა, კურდღლის ტუჩი. როგორ ხდება ამ ანომალიების კორექცია?
- ჩვენ ასეთ ოპერაციებს 5-6 წლის ბავშვებს ვუკეთებთ, მაგრამ ბავშვი იზრდება, სახის ნაკვთები ეცვლება და ხშირად ეს ქსოვილი ჩვეულებრივი, ჯანმრთელი ქსოვილივით არ ვითარდება, ამიტომ კორექცია შესაძლოა კიდევ დასჭირდეს.

- მამაკაცები თუ მოგმართავენ?
- ქალებზე იშვიათად, მაგრამ არიან ისეთები, რომლებიც ცხვირის კორექციასაც იკეთებენ და ნაოჭებსაც ისწორებენ.

- ბევრს მიაჩნია, რომ ბუნებამ რაც მისცა ადამიანს, ხელი არ უნდა ახლოს.
- თუ ბუნებამ მოგვცა მგლის ხახა ან კურდღლის ტუჩი, უნდა დავიტოვოთ? ნაოჭიც ერთგვარი პათოლოგიაა. ანდა, თუ ადამიანს დიდი ცხვირი აქვს და ეს მასზე ფსიქოლოგიურად მოქმედებს, არ უნდა გამოისწოროს ნაკლი? მთავარია, ადამიანს არ ავნო; თუ რაიმე ნაკლს გამოუსწორებ და ამით ფსიქოლოგიურ წნეხს მოუხსნი, ცუდი რატომ არის? უამრავია შემთხვევა, როდესაც ადამიანს ულამაზო ცხვირი ჰქონია და ამის გამო ფსიქოლოგიურად ისე ყოფილა დათრგუნული, სხვაზე აღარაფერზე შეძლებია ფიქრი და სიცოცხლის ხალისიც კი არ ჰქონია, მაგრამ როგორც კი ეს ნაკლი გამოუსწორებია, სხვანაირი გამხდარა, ხალისიც დაბრუნებია. ამგვარი ფსიქოლოგიური მდგომარეობა ჯანმრთელობაზეც უარყოფითად მოქმედებს. მაგრამ ზოგ ადამიანს აქვს აკვიატება - დარწმუნებულია, რომ ცუდი ცხვირი აქვს და გამუდმებით მის გასწორებაზე ფიქრობს. ამ შემთხვევაში ფსიქოლოგს სიტყვითაც შეუძლია კომპლექსის მოხსნა.

- ხშირად გაგიბრუნებიათ ასეთი ადამიანები უკან?
- ზოგჯერ ხედავ, რომ ცხვირს არაფერი სჭირს გამოსასწორებელი და ქირურგიული ჩარევა ზედმეტია; თანაც არავინ იცის, მოუხდება მას სხვანაირი ცხვირი თუ არა, იქნებ აღარც მოეწონოს. ასეთ შემთხვევაში უნდა ეცადო, პაციენტს

ეს ახირება გადააფიქრებინო.

- რას ურჩევდით ქალბატონებს?
- პირველ რიგში, მოუარონ თავს. სხვა არავინ იზრუნებს თქვენზე, თუ ეს თვითონ არ გააკეთეთ. დღეს უამრავი საშუალება არსებობს იმისთვის, რომ ქალი უკეთ გამოიყურებოდეს. ამას არც დიდი თანხები სჭირდება და არც დრო. სპორტი, განსაკუთრებით ცურვა და სახის კანის სწორი მოვლა ქალისთვის უმნიშვნელოვანესია.

ლიკა კერატიშვილი