სალომე გომელაური: "მამაკაცმა უნდა იცოდეს, სად რა ჩაიცვას!"
რუბრიკა "სტილის" სტუმარია ახალგაზრდა დიზაინერი სალომე გომელაური. სალომეს მიერ შექმნილი მინანქრის აქსესუარები და სამოსი საზღვარგარეთ წარმატებით იყიდება.
- ბავშვობიდან რატომღაც სულ კოსტიუმებს ვხატავდი, არაერთი პერსონალური გამოფენა გამიმართავს, რამდენიმე წლის წინ კი პირველი კოლექცია შევქმენი და თბილისის მოდის კვირეულში ვმონაწილეობდი. ძალიან მომეწონა მუშაობის პროცესი და გამოცდილებაც შევიძინე. სამოსის პარალელურად ვქმნი მინანქრის აქსესუარებს, რომელიც წარმატებით იყიდება საქართველოშიც და საზღვარგარეთაც. ძირითადად, შვეიცარიის წარმომადგენლებთან ვთანამშრომლობ,
- დამწყებ დიზაინერებს ხშირად აკრიტიკებენ, თქვენ როგორ შეაფასებთ კოლეგების საქმიანობას?
- მე დიზაინერი ვარ, შეფასება კი მოდის კრიტიკოსის საქმეა. მიმაჩნია, რომ დიზაინერთა ძალიან კარგი თაობა მოდის, ისინი დაუღალავად შრომობენ და ცდილობენ, სიახლე შესთავაზონ საზოგადოებას.
- თქვენს შექმნილ სამოსსა და აქსესუარებს თვითონვე თუ ატარებთ?
- როგორ არა, მაგრამ მხოლოდ ჩემს შექმნილს არ ვიცვამ. მომწონს "დისქუაერდისა" და "დოლჩე და გაბანას" ნაწარმი, მათი სამოსი ყოველდღიურად შეგიძლია ჩაიცვა... უფრო კლასიკური და თანამედროვე სტილის შეხამებას ვცდილობ. მომწონს ძველი დეტალებით გაფორმებული სამოსი. თუ სამოსს თვალი დავადგი, დაუფიქრებლად ვყიდულობ, მაგრამ ფულის უაზროდ ხარჯვა არ მიყვარს.
- წვეულებაზე წასვლის წინ დიდხანს ფიქრობთ, რა ჩაიცვათ?
- როცა დრო არ მაქვს, სწრაფად ვირჩევ სამოსს, თუმცა შემდეგ კმაყოფილი ვარ არჩევანით. 21-ე საუკუნეში შარვლის ჩაცმა ყველგან შეგიძლია, მაგრამ მე კაბა უფრო მომწონს, აგრეთვე, მაღალქუსლიანი ფეხსაცმელი. მიმაჩნია, რომ ქალის სიარულს უფრო დახვეწილსა და მოხდენილს ხდის. 
- ალბათ, განსაკუთრებით გიყვართ აქსესუარები...
- ნამდვილად ასეა. მიყვარს სამაჯურები, ყელსაბამები, თავსაბურავები, საყურეები... აქსესუარები საჭიროა. თუმცა, ზომიერების დაცვა აუცილებელია.
- როგორი ფერის სამოსი მოგწონთ?
- პასტელის ფერები მიყვარს, განსაკუთრებით - წითელი. ამბობენ, წითელი წარმატების ფერიაო, რასაც ვეთანხმები.
- ვის მიიჩნევთ საქართველოში გემოვნებიან ადამიანად?
- ბევრი გემოვნებიანი ადამიანი ცხოვრობს საქართველოში, განსაკუთრებით მომწონს მაკა ასათიანი.
- სარკესთან დგომისას გარეგნობაში
რამის შეცვლის სურვილი თუ გიჩნდებათ?
- არასდროს მქონია გარეგნობაში ცვლილების შეტანის სურვილი. ადამიანმა პლასტიკურ ქირურგიას მაშინ უნდა მიმართოს, როცა სჭირდება. ცხვირის ოპერაცია იქნება, ტუჩისა თუ წარბის, ზომიერება აუცილებელია. გადაჭარბებული არაფერი ვარგა. 
- რომელი პარფიუმერიული ბრენდის ნაწარმი მოგწონთ?
- პარფიუმერია ხარისხიანი უნდა იყოს. მე "შისეიდოსა" და "ივ სენ ლორანის" პროდუქციას გამოვარჩევდი.
- ფორმას როგორ ინარჩუნებთ?
- სულ დატვირთული ვარ, გამუდმებით ვმუშაობ. ამიტომ ფორმის შესანარჩუნებლად დიეტა და ვარჯიში არ მჭირდება, ბუნებრივადაც ასეთი აღნაგობა მაქვს.
- როგორ უნდა ეცვას მამაკაცს, რომ მოგეწონოთ?
- აუცილებელია, მამაკაცს გემოვნებით ეცვას, იცოდეს, სად რა ჩაიცვას. ბოლო ხანს ქართველი მამაკაცები უფრო მეტ ყურადღებას აქცევენ გარეგნობას და ეს მომწონს. წელს მამაკაცებისთვისაც მოდურია აქსესუარები, ვმუშაობ კაცის ტანსაცმლის კოლექციაზე, რომელიც მინანქრის აქსესუარებით იქნება გაფორმებული. იმედი მაქვს, ქართველი მამაკაცები ადვილად შეეჩვევიან ამ სიახლეს.
- რას ურჩევთ ქართველ მანდილოსნებს?
- სახელგანთქმულ მსახიობ ოდრი ჰეპბერნს აქვს ნათქვამი: ქალი ლამაზი მაშინ არის, როცა ბედნიერიაო. ბედნიერებას კი ვერ იყიდი. შესაძლოა, იაფფასიანი სამოსი გეცვას, მაგრამ სახეზე თუ ღიმილი გაქვს, ყველაზე ლამაზი მაშინ ხარ!
ესაუბრა თამარ ბოჭორიშვილი
ყოველკვირეული გაზეთი "ყველა სიახლე"
