როგორ მოვიშოროთ მამაკაცი 10 დღეში

ქალბატონების კვალდაკვალ, ჯერი მამაკაცურ ნაკლოვანებებზეც მიდგა, ამიტომ მოდით დღეს იმაზე ვისაუბროთ თუ როგორ და რა მეთოდებით უნდა ვებრძოლოთ „ყოფილებს“ და აბეზარ თაყვანისმცემლებს, იმ შემთხვევაში თუკი მათი ზოდიაქოს ნიშანი ზუსტად ვიცით..




ვერძი
თუ ვერძის თავიდან მოშორება გინდათ, ურთიერთობაში ინიციატივა საკუთარ თავზე აიღეთ. იქეთ ურეკეთ, მოიკითხეთ, დაპატიჟეთ სადმე, შეახსენეთ რომ სამსახურში არ დააგვიანდეს, ახალი პროექტი დროზე დაასრულოს, საეჭვო ტიპებთან არ იმეგობროს და ა,შ ყოველივე ამას ვერძის მხრიდან ჯერ გულწრფელი გაოცება, შემდეგ კი აშკარა და ხმაურიანი პროტესტი მოჰყვება, რომლის შემდეგაც თქვენ მას სავარაუდოდ ვეღარასოდეს ნახავთ.


კურო
როგორ მოვიშოროთ კურო, ეს საკითხი საკმაოდ რთული და ძნელად გადასაჭრელია. ეს იმიტომ რომ თუკი კურო ერთხელ მოიშინაურეთ, მისგან თავის დაღწევა იგივეა, რაც ბეტონის კედლის პინცეტით ნგრევის მცდელობა. თუმცა თუ მან მაინც ძალიან მოგაბეზრათ თავი, ყველაზე ნაცადი ხერხი მისი თავიდან მოსაშორებლად ის იქნება, რომ რამოდენიმე დღის მანძილზე მშიერი დატოვოთ, ან აიძულოთ თქვენთან ერთად ფაფებით და ბოსტნეულის სალათით იკვებოს -მიზეზად კი შეგიძლიათ დიეტის დაწყება დაასახელოთ.



ტყუპები
ტყუპების თავიდან მოცილებაზე მეტად, მათი ხანგრძლივად ერთ ადგილზე გაჩერებაა რთული. თუმცა თუ მაინც ისე მოხდა, რომ თაყვანისმცემელი ტყუპი საკუთარი ხმაურიანი ხასიათით და გაუთავებელი ლაქლაქით ქრონიკულად გღლით, შეეცადეთ რამოდენიმე დღის მანძილზე, მაქსიმალურად სიტყვაძუნწი გახდეთ (თუნდაც საამისოდ პირის ამოკერვა დაგჭირდეთ), მობილური ტელეფონი ყველაზე კულიმინაციურ მომენტში, შუა საუბრისას გაუთიშოთ. როცა იგი მისი აზრით ჩაბჟრებამდე სასაცილო ანეგდოტს ყვება, მრავალმნიშვნელოვანი სახით აღნიშნოთ „და რა არის აქ სასაცილო“.. მერწმუნეთ რამოდენიმე დღის დაკვირვების შემდეგ, შეფიქრიანებული ტყუპი სხვა, უფრო კომუნიკაბელური ქალბატონისკენ გადაინაცვლებს.

კირჩხიბი
საქმე ისაა, რომ კირჩხიბის თავიდან მოცილებაზე არა ერთი და ორი ქალი ოცნებობს, თუმცა ოცნებობს ამაოდ.. პრობლემა იმაშია, რომ როცა თქვენ ამ ერთი შეხედვით მოსიყვარულე, მზრუნველ და ერთგულზე ერთგულ ინდივიდს თქვენ ცხოვრებაში უშვებთ, არც კი დაფიქრდებით ალბათ იმაზე, რომ მას შეუძლია სამომავლოდ საკუთარი მზუნველობის და სიყვარულის მეტასტაზები, აფსოლუტურად აუტანლად და შემაწუხებლად გაუშვას თქვენს ცხოვრებაში, ამიტომ კირჩხიბთან საბრძოლველად ზომები მანამ უნდა მიიღოთ, სანამ პროცესი ჯერ კიდევ პირველ სტადიას არ გასცილებია. საამისოდ ხშირად აკრიტიკეთ მისი ოჯახის წევრები (განსაკუთრებით დედა), დაუდევრად მოექეცით მისთვის საყვარელ, საგვარეულო რელიქვიებს , ურიგო არ იქნება მტვერის გაწმენდისას შემთხვევით შემოგატყდეთ რომელიმე მათგანი. უმისამართოთ ხარჯეთ მისი ფული.. მერწმუნეთ ყოველივე ამის შემდეგ, თქვენი საქციელით დაპანიკებული კირჩხიბი, თავს სასწრაფოდ უშველის გაქცევით ან ვისკის ბოთლით.



ლომი
ნებისმიერი ქალი, რომელიც აპირებს საკუთარი ცხოვრება ლომს დაუკავშიროს, უნდა იყოს მზად იმისთვის, რომ მას ბედი „ოქროს გალიაში“ ცხოვრების პერსპექტივას უმზადებს. აქედან გამომდინარე, თუკი თქვენ ცხონებული მატა ხარის ან კლარა ცეტკინის ტიპის ქალბატონებს განეკუთვნებით, ლომის მხრიდან დიქტატურა ძალიან მალე ამოგივათ ყელში და შესაბამისად გაგიჩნდებათ სურვილი, მისი მეფური კლანჭებიდან რაც შეიძლება მალე გაითავისუფლოთ თავი. საამისოდ კი, აუცილებლად უნდა მოიკრიბოთ სითამამე და ცხოველთა მეფე სახალხოდ, პატივსაცემი სტუმრების ან ბიზნეს პარტნიორების საზოგადოებაში მასხრად აიგდოთ, ან გულუბრყვილოდ მოუყვეთ ყველას, თუ როგორ მღერის ხოლმე დილაობით შხაპის ქვეშ იგი სიმღერას „თან წაიღე“. მერწმუნეთ ყოველივე ამის შემდეგ, შეურაცყოფილი ლომი სამუდამოდ გაწყვეტს არათუ თქვენთან ურთიერთობას, თქვენი არსებობის შესახებ ფიქრსაც კი.

ქალწული
კაცმა რომ თქვას ფაქტი იმისა, რომ ქალწულის თავიდან მოშორება მოისურვოს ქალმა, ნამდვილად არ იწვევს ჩემში გაოცებას. ეს იმიტომ რომ იშვიათად მოიძებნება ისეთი მყარი ფსიქიკის მქონე მანდილოსანი, რომელიც ქალწულის მხრიდან წამოსულ გაუთავებელ შენიშვნებს და ჭკუის სწავლებებს ხანგრძლივი დროით აიტანს. ამიტომ თუკი თქვენ ამ „კაცი-წესდების“ თავიდან მოშორება გაქვთ განზრახული, მიმართეთ უმარტივეს მეთოდს.. რამოდენიმე დღის მანძილზე არ დარეცხოთ ჭურჭელი, არ დაუუთოვოთ ტანსაცმელი, არ დაივარცხნოთ თმები და ყოველ საღამოს, სამსახურიდან დაბრუნებულს სახლში „მინი-დისკოთეკა“ დაახვედრეთ, თავისი ლუდის სმით და ხმაურიანი ხორხოცით. მერწმუნეთ, ყოველივე ამის შემდეგ, ერთ მშვენიერ დილას, თქვენი ქალწული გულმოდგინედ, ფერისა და ფაქტურის მიხედვით ჩაალაგებს თავის ნივთებს ჩემოდანში და თქვენგან უკანმოუხედავად მოქუსლავს.

სასწორი
მამაკაცი სასწორი ალბათ ერთადერთია ზოდიაქოს სხვა ნიშნის ქვეშ დაბადებულ ძლიერი სქესის წარმომადგენელთა შორის, ვისი თავიდან მოშორებაც ნებისმიერი ქალისთვის იოლზე-იოლი საქმეა. სასწორი ვერ იტანს უხეშობას - შეგიძლიათ ქუჩური ჟარგონით დაუწყოთ მას საუბარი ვითომც და ხუმრობით, წყობიდან გამოყავს ვულგარულობას - აქტიურად გამოიყენეთ მკვეთრი ფერის, წითელი პომადა და აჟურული კოლგოტები, ყველაფერი ეს კი მოდის უკანასკნელ „კივილს“ დააბრალეთ. ბოლო ხმაზე ამუშავეთ ტელევიზორი - იმ მიზეზით, რომ ბევრი საქმე გაქვთ და გვერდით ოთახში, პარალულურად უნდა აუთაოთ მაშინ როცა ტელევიზიით თქვენი საყვარელი სერიალი იწყება. მერწმუნეთ ყოველივე ამის შემდეგ, თქვენი მოულოდნელი ქაჯობით გაოგნებული სასწორი, მომხიბვლელი ღიმილით დაგემშვიდობებათ ხვალამდე (მას ხომ უხეშობა არ შეუძლია) - ანუ სამუდამოდ.



მორიელი
სამართლიანობა მოითხოვს ვაღიაროთ, რომ ალბათ ყველაზე რთული ამ ქვეყნად მორიელი მამაკაცის თავიდან მოშორებაა. აქედან გამომდინარე, ნებისმიერი ქალს, რომელიც ბავშვობაში „კარიბის ზღვის მეკობრეების“ ყურებისას გმირობის ჩადენაზე და ხიფათიან თავგადასავლებზე ოცნებობდა, სწორედ მორიელთან ეძლევა შანსი, საკუთარი ბავშვობის ოცნება, სრული ექშენით განახორციელოს. ეს იმიტომ, რომ თავად იდეას მასთან დაშორების შესახებ, მორიელი მამაკაცის მხრიდან თქვენი მისამართით გამოცხადებული სამკვდრო-სასიცოცხლო ომი მოჰყვება შედეგად. საიმისოდ რომ მისი თავიდან მოცილება, როგორმე უმტკივნეულოდ შესძლოთ აუცილებელია იმის ილუზია შეუქმნათ, რომ ეს თქვენ კი არა მან მიგატოვათ და ამის გამო ქრონიკული დეპრესიის ზღვარზე იმყოფებით. მართალია წასვლის შემთხვევაშიც კი, იგი არაერთგზის მობრუნდება უკან, სიტუაციის დასაზვერად - ვაი და მსხვერპლი მალე დადგეს ფეხზე, თუმცა ცდუნება იმისა, რომ ახალი, ჯერაც ჯანზე მყოფი და დაუგესლავი საკბილო მონახოს ძალზე დიდი იქნება. ამიტომ  შეგიძლიათ მშვიდად იყოთ, იგი თქვენთან აღარ დაბრუნდება.

მშვილდოსანი
ხშირ შემთხვევაში, პრობლემა იმაში კი არ არის როგორ მოვიცილოთ თავიდან მშვილდოსანი, პრობლემა ის უფროა როგორ ვაიძულოთ იგი რომ ჩვენთან დარჩეს. საქმე ისაა, რომ მშვილდოსნები იდეალისტები არიან, შესაბამისად მათთვის ბუნებრივი მდგომარეობაა მთელი ცხოვრება „ქრონიკულად შეყვარებულის“ როლი. თუმცა როლში შესვლის მსურველების რიცხვი რომ ასტრონომიულად დიდია, ეს თავად მშვილდოსანს დიდად არ ანაღვლებს. თუკი მაინც გინდათ ეს თავქარიანი, არაპროგნოზირებადი კაცი სამუდამოდ მოიშოროთ თავიდან, დააკისრეთ მას სხვადასხვა სახის პასუხისმგებლობები, დაავალეთ კომუნალური გადასახადების გადახდა, ბუღალტრული აღრიცხვის წარმოება, სახლის გარემონტება და ა.შ დამიჯერეთ სულ ცოტა ხანში, იგი ყოველგვარი გაფრთხილების გარეშე მიგიტოვებთ ნახევრად შეღებილ კედლებს და უკვალოდ გაუჩინარდება.


თხის რქა
თხის რქები კონსერვატორები, მეწვრილმანეები და საშინლად ჯიუტი  მამრები არიან. ამიტომ თავად ფაქტი, რომ იგი თქვენით სერიოზულად დაინტერესდა უკვე ნათლად მეტყველებს თქვენი უნიკალურობის შესახებ, მაგრამ თუკი თავი დაუსრულებელი ჭკუის სწავლებით და ეთიკის მორალ-კოდექსების შეხსენებით მაინც მოგაბეზრათ, მეეჭვება მისგან თავის დახსნა მალე შესძლოთ. საქმე ისაა, რომ თხის რქის სიჯიუტე, საყვარელი ქალის „არდათმობის“ საკითხშიც წარმატებით ვლინდება. ამიტომ საიმისოდ, რომ მისგან დროზე გათავისუფლდეთ, აუცილებელია მასხრად აიგდოთ მისი კარიერული მიღწევები, ირონიით ესაუბროთ მის მრავალრიცხოვან ნათესაობას, ხშირად შეიმოსოთ ავანგარდულ-პანკურ სტილში და ერთი ყურიდან მეორეში შეუშვათ და გაატაროთ, თხის რქის კატეგორიული მოთხოვნა მოიქცეთ ნორმალური ადამიანივით.




მერწყული
საქმე ისაა, რომ ბედისწერის თუ პლანეტა ურანის უკუღმართობით (რომელიც ერთერთი ყველაზე „ხულიგანი“ პლანეტაა მთელ გალაქტიკაში), მერწყულისგან თავის დაღწევის გზები, ერთობ უცნაური და არაპროგნოზირებადია. მაგრამ, თუკი თქვენ მისი თქვენს საბალახოზე დაბმა მოახერხეთ, ეს უკვე ნიშნავს იმას, რომ რაღაც დოზით მაინც შეგიძლიათ მისი თავქარიანი ხასიათის გაგება. თუმცა პრობლემა იმაშია, რომ რაც სხვა მამაკაცს თქვენგან თავქუდმოგლეჯილი გაქცევას აიძულებს, მერწყულს რომელიც თავის მხრივ, ყველაფერი არაორდინალურის მიმართ სიმპათიით იმსჭვალება, შეიძლება პირიქით მოეწონოს კიდეც ეს. მოდი და ასეთ კაცს გაექეცი როგორმე. აქედან გამომდინარე, ისღა დაგრჩენიათ სხვადასხვა სახის ექსპერიმენტები ატაროთ მისგან თავის დასაღწევად. რომელიმე ხომ მაინც გაამართლებს.

თევზები
თევზები რბილი, მეოცნებე, მოსიყვარულე და საშინლად უნიათო კაცები არიან. აქედან გამომდინარე, ქალს რომელსაც ერთ მშვენიერ დღეს ყელში ამოუვა მისი გამუდმებული დაპირებები და ფერად-ფერადი ზღაპრების სერია ციკლიდან „ყველაფერი კარგად იქნება“, რა გასაკვირია რომ თევზისგან სამუდამოდ თავის დაღწევა მოუნდეს? საქმე იმაშია, რომ სურვილი ერთია, მისი განხორციელების საშუალება კი მეორე.. ალბათ ყველაზე გულქვა, სასტიკი და უგრძნობი უნდა იყოს ქალი, რომელიც დაშორების მცდელობის შემდეგ, თევზების ქრონიკულ დეპრესიას და სუიციდის მსუბუქ იმიტაციას, გულგრილად შეხვდება და დახმარების ხელს არ გაუწვდის ამ უკანასნკელს. ჰოდა, ღირს კი მისი მიტოვება? ის ხომ უთქვენოდ დაიკარგება!

წყარო