გაუპატიურების საწინააღმდეგო საცვალი შექმნეს

ინდოელმა სტუდენტებმა ქალის სპეციალური ქვედა საცვლები შექმნეს, რომელიც ქალბატონებს გაუპატიურებისგან დაიცავს.

როგორც ბრიტანული გამოცემა express.co.uk წერს, საინჟინრო ფაკულტეტის სტუდენტების მიერ შექმნილი ქვედა საცვალი, რომელსაც SHE (Society Harnessing Equipment) ჰქვია, ქალბატონებს დაეხმარება თავდამსხმელის გაუვნებელყოფაში და პოლიციის გამოძახებაში.

პროექტის ერთ-ერთი ავტორის განცხადებით, ინოვაციური საცვალი აღჭურვილია GPS და GSM მოწყობილობით, ასევე ელექტროშოკის გამომწვევი სენსორებით, რომელსაც 3 800 კილოვატი დენის გატარება შეუძლია. GPS მოწყობილობა კი მსხვერპლის ადგილმდებარეობის შესახებ ინფორმაციას გადასცემს.

"ადამიანი, რომელიც ქალბატონს შეაწუხებს, მაშინვე მიიღებს ელექტროშოკს. საცვალი აღჭურვილია გლობალური ადგილმდებარეობის განმსაზღვრელი სისტემით (GPS) და ფიჭური სტრუქტურის მქონე მობილური სატელეფონო სისტემით (GSM), ასევე სენსორებით, რომლებიც ელექტროშოკს გამოიწვევს და განგაშის სიგნალით, რომელიც მსხვერპლის მშობლებსა და პოლიციას გაეგზავნება. ელექტროშოკი 82 დარტყმას მიაყენებს თავდამსხმელს, რაც საბოლოოდ ქალბატონს მისცემს შესაძლებლობას, გათავისუფლდეს მისგან", - აღნიშნავს ინოვაციური საცვლის ერთ-ერთი გამომგონებელი მანიშა მოჰანი.

საინჟინრო ფაკულტეტის სტუდენტებმა, რომელთაგან ორი ქალბატონია, ინოვაციური გამოგონებისთვის 2013 წლის ტექნოლოგიურ კონკურსზე მთავარი პრიზი აიღეს და მალე მათი პროდუქტი ინდოეთის მაღაზიის დახლებზეც გამოჩნდება.

ინდოეთში საჯარო ადგილებში გაუპატიურების შემთხვევები ბოლო ხანებში საგრძნობლად გაიზარდა. გასული წლის დეკემბერში 23 წლის გოგონას ავტობუსში გაუპატიურებამ ათასობით ინდოელი გამოიყვანა ქუჩაში. ისინი ხელისუფლებისგან გაუპატიურების შესახებ კანონის გამკაცრებას და დამნაშავეთა მკაცრად დასჯას მოითხოვდნენ. აქციების შედეგად ინდოეთის პრეზიდენტმა დამნაშავეების სიკვდილით დასჯაც დაუშვა.

თუმცა, ამის მიუხედავად, საჯარო ადგილებში გაუპატიურებები კვლავ გრძელდება. გასულ თვეს ინდოელმა თავდამსხმელებმა უცხოელი ტურისტებიც გააუპატიურეს. ამ ინციდენტების შემდეგ ინდოეთში ტურისტთა რიცხვი 35%-ით შემცირდა.

მომზადებულია express.co.uk-ის მიხედვით.