მაშო მელქაძე: "საკმაოდ ლამაზი მუცელი მაქვს..."

ახალგაზრდა მსახიობი, მაშო მელქაძე სერიალში - "ჩემი ცოლის დაქალები" ქარაფშუტა ნინის როლს ასრულებს. მიუხედავად იმისა, რომ ხშირად ოფისში არაფერს აკეთებს, ნინი მაინც "ვიპ" თანამშრომლად მიიჩნევა: გავლენიანი მამიკოს წყალობით, სამსახურიდან გათავისუფლების საფრთხე არ ემუქრება... სერიალის ახალ სეზონში მაშოს გმირი დიდი მუცლით გამოჩნდა და ტელემაყურებლების ყურადღებაც უფრო მეტად მიიქცია...

- მაშო, სინამდვილეშიც ორსულად ხარ?
- კი, ორსულად ვარ.

- ანუ სცენარი შენს ორსულობას "მოარგეს".
- ასეა.

- როდის დაოჯახდი?
- ზაფხულში.

- სერიალის გასული სეზონის პერიოდში მითხარი, რომ შეყვარებული არ იყავი.
- ჩემი სიყვარულის ამბავი არ დამიმალავს. შეყვარებულები მხოლოდ 5 თვე ვიყავით, მალე დავოჯახდით.

- სერიალში დიდი მუცლით გამოჩნდი თუ არა, სოციალურ ქსელში დაწერეს, - ბალიში წესიერად მაინც ჩაედოო.
- ეს კომენტარი მეც ვნახე. მგონი, საკმაოდ ლამაზი მუცელი მაქვს და უნდა მიმხვდარიყვნენ, რომ ბალიში არ მიდევს, რეალურადაც ორსულად ვარ...

- ბევრი იმასაც აღნიშნავს, რომ როლს კარგად ასრულებ. მგონი, ორსულს უფრო მეტი თაყვანისმცემელი გაგიჩნდა.
- ალბათ, იმიტომ, რომ ვრცელი, ემოციური და საინტერესო ტექსტი

მომცეს... ხალხს სიახლე უყვარს და აჟიოტაჟიც ამან გამოიწვია.

- ალბათ, სერიალის შემოქმედებითი გუნდისთვის ახლა რეალურადაც "ვიპ" თანამშრომელი ხარ და ორსულს განსაკუთრებული ყურადღებით გექცევიან. ასეა?
- რა თქმა უნდა, თანამშრომლები ძალიან მიფრთხილდებიან.

- როგორი ორსულობა გაქვს?
- მშვენიერი... თეატრში ისეთი როლები მქონდა, რომ ჩემი მდგომარეობის გამო, სცენაზე ვეღარ ვთამაშობ. ჰოდა, ძალიან მიხარია, რომ სერიალში ვარ დაკავებული და შინ არ ვზივარ.

- ხასიათი ხომ არ შეგეცვალა?
- არა, უბრალოდ, უფრო მეტად სენტიმენტალური გავხდი.

- განსაკუთრებული სურვილები არ გიჩნდება?
- ერთხელ ხურმის ჩირი მომინდა და მეუღლემ მომიტანა (იცინის).

- რამდენი თვის ორსული ხარ?
- 7-ის ვხდები.

- ბავშვის სქესი უკვე იცი?
- ვიცი, მაგრამ არ გეტყვით (იცინის)... სხვათა შორის, ჩემს პატარას მუსიკას ვასმენინებ, მე და ჩემი მეუღლე ველაპარაკებით კიდეც. მოკლედ, ბავშვს, უკვე როგორც პიროვნებას, ისე ვექცევი.

ეთო ყორღანაშვილი
ჟურნალი ”გზა”