რუსა მორჩილაძე - ”იმდენად კარგი გამოსვლა ჰქონდა სალომეს კიევში, ჟიური აღფრთოვანებას ვერ მალავდა”

კიევში იურმალას მუსიკალურ კონკურს "ახალი ტალღის"  შესარჩევ კონკურსზე სალომე ქათამაძემ გუშინ ფურორი მოახდინა. შესაბამისად, მუსიკალურ ფესტივალზე საქართველოს სახელით სალომე ქათამაძე წარდგება.

სალომე ქათამაძე და ქართული დელეგაცია კიევიდან თბილისში რამდენიმე წუთის წინ დაბრუნდა. როგორც "ამბები.გე"-სთან საუბრისას ტელეკომპანია "იმედის" მუსიკალურმა პროდიუსერმა რუსა მორჩილაძემ განაცხადა, სალომეს გამოსვლამ ჟიურის აღფრთოვანება დაიმსახურა.

"იმდენად საოცარი და კარგი გამოსვლა ჰქონდა სალომეს კიევში, რომ ჟიური აღფრთოვანებას ვერ მალავდა. კონკურსის შემდეგ ანი ლორაკი სალომეს შეხვდა. ლორაკმა სითბო და ემოციები ვერ დამალა სალომეს მიმართ. სალომეს მიმართ ოვაციებს არც სხვა კონკურსანტები, მათი მშობლები და ახლობლები მალავდნენ. ეს დიდი სტიმულია იურმალაში გამგზავრებამდე", - განაცხადა რუსა მორჩილაძემ.

რუსა მორჩილაძის თქმით, იურმალაში გამგზავრებამდე ორ თვეზე მეტია დარჩენილი. ეს პერიოდი რეპეტიციების, რეპერტუარის და სასცენო ტანსაცმლის შერჩევას მოხმარდება.

მორჩილაძის განცხადებით, სალომე ქათამაძე იურმალას "ახალი ტალღა 2013"-ზე ეროვნული სიმღერით, მსოფლიო ჰიტით და სპეციალურად ამ კონკურსისთვის შექმნილი სიმღერით წარდგება.

თუ ვის სიმღერას შეასრულებს სალომე ქათამაძე, რამდენიმე დღეში გახდება ცნობილი.

სალომესთან ერთად იურმალაში, ტელეკომპანია "იმედის" ხელმძღვანელობა, არხის მუსიკალური პროდიუსერი რუსა მორჩილაძე, მომღერალი სოფო ხალვაში, "ახალი ტალღის" შიდა შესარჩევი კონკურსის საორგანიზაციო ჯგუფის წევრები: მათ შორის დათო ოქიტაშვილი და მაკა საჯაია გაემგზავრებიან.

კიევში სალომესთან ერთად ნინი ცნობილაძეც იმყოფებოდა, რომლის მუსიკალური მონაცემები კომპოზიტორ იგორ კრუტოის დაფუძნებული კომპანია "არსის" წარმომადგენლებსა და ტელეკომომპანია "იმედის" წარმომადგენლებს მოეწონათ. ჟიურის წევრები მას სხვა მუსიკალურ პროექტებში მონაწილეობას დაპირდნენ.

იურმალას "ახალი ტალღა" 23 ივლისს დაიწყება.

გიორგი ბერიძე