"და ქალმა" საზოგადოებას პროექტის "ეძიე ქალი" მორიგი გმირი წარუდგინა
1 596 ნახვა
ჟურნალმა "და ქალმა" კაფე "როტონდაში" საზოგადოებას პროექტის - "ეძიე ქალი"
მორიგი გმირი წარუდგინა. ამჯერად ჟურნალის რჩეული "კრეატიული ღია
ბარათების" ავტორი მაკო ჯაოშვილი გახდა.
"მაკო ძალიან საინტერესო
პიროვნებაა. ის ამზადებს ლექსად მიძღვნილ ორიგინალურ და ძალიან ლამაზ ღია
ბარათებს. ეს ძალიან ნოსტალგიური თემაა, რადგან ღია ბარათები თითქმის
მივიწყებას მიეცა. დღეს გზავნილები და მისალოცები მხოლოდ ელექტრონული სახით
არის", - განაცხადა ჟურნალ "და ქალის" დამფუძნებელმა, მარიკა დარჩიამ.
ახალგაზრდა
ხელოვანმა ლექსების წერა ბავშვობიდან დაიწყო, ხოლო მათი ღია ბარათებზე
დატანის იდეა რამდენიმე წლის წინ გაუჩნდა. სულ 50-მდე სახეობის ბარათი
აქვს შექმნილი და როგორც თავად ამბობს, თითოეულ მათგანს თავისი კონკრეტული
ადრესატი ჰყავს.
"დღევანდელი დღე, რა თქმა უნდა, ჩემთვის ძალიან
მნიშვნელოვანია, რადგან შემიძლია ფართო საზოგადოებამდე მივიტანო ჩემი გულის
ნაწილი, ჩემი ნაფიქრალი, ის პოეტური განწყობის ფრაგმენტები, რომლებმაც
ცოტა ორიგინალური ფორმით შემაქმნევინა ეს ღია ბარათები", - აღნიშნა მაკო
ჯაოშვილმა.
მაკო თავის კრეატიულ ღია ბარათებს, ძირითადად, საახლობლო წრეში და სხვადასხვა მიღებებზე არიგებს.
"იმედი
მაქვს, რომ ჩემი ბარათები, რომლებიც ამ ჟურნალში იქნება წარმოდგენილი
გააღვიძებს მკითხველში იმ თბილ ურთიერთობებსა და დამოკიდებულებას, რამაც მე
თავის დროზე გადამაწყვეტინა ასეთი სახით გადმომეცა ჩემი გულის ნადები", -
განაცხადა ხელოვანმა.
შეხვედრა სასიამოვნოდ თბილ გარემოში
წარიმართა. მაკომ დაწვრილებით გაიხსენა ლექსებისა და ბარათების შექმნის
ისტორია. მოგვიანებით თითოეულმა სტუმარმა ერთი ბარათი აირჩია და მისთვის
"მიძღვნილი“ ლექსი ხმამაღლა წაიკითხა. შეხვედრის ბოლოს "ეძიე ქალის" სხვა
გმირების მსგავსად, ჟურნალის ალბომში მაკო ჯაოშვილმაც დატოვა თავისი ხელის
ანაბეჭდი, რომელიც სტუმრებმა თავიანთი ხელმოწერებით დაადასტურეს.
ჟურნალი"და
ქალი" პროექტის "ეძიე ქალი" ფარგლებში ეძებს ადამიანებს, რომლებიც
საინტერესო და შემოქმედებით საქმიანობას ეწევიან. განსაკუთრებული ნიჭით
დაჯილდოებულ ქალბატონებთან მსგავსი შეხვედრები ყოველ თვე ეწყობა.
ლიკა მოსიაშვილი
