ხალხის რჩეულ ვანო ფიფიას გამართულად სიარულის იმედი აქვს
15 წლის კარდენახელ მომღერალ ბიჭს, ვანო ფიფიას, რომელიც შარშან ხალხმა თავის რჩეულად დაასახელა ტელეპროექტ "ნიჭიერში", დიდი ხნის ოცნება აუსრულდა – ძალიან რთული ოპერაცია გაიკეთა და, საბედნიეროდ, წარმატებით, მაგრამ წინ კიდევ ბევრი პრობლემა აქვს დასაძლევი.
ვანო ცერებრალური დამბლით არის ავად და სიარული უჭირს. ოპერაცია, რომელიც ბანკმა დაუფინანსა, ერთი თვის წინ თბილისის ერთ–ერთ კლინიკაში გაიკეთა. მუცლის ღრუში სპეციალური აპარატი ჩაუდგეს, რომლის საშუალებითაც ძვლის ტვინს საჭირო მედიკამენტები მიეწოდება. ოპერაცია 20.000 დოლარი დაჯდა, აპარატი ყოველ 8 წელში ერთხელ უნდა შეიცვალოს, საჭირო მედიკამენტები კი წელიწადში 4.000 ლარზე მეტი ჯდება. სექტემბერში ბიჭს შეიძლება კიდევ ერთი ოპერაცია გაუკეთონ – მყესების დაგრძელებაა საჭირო, რომ გამართულად იაროს. სრულ გამოჯანმრთელებას დიდი დრო და ბევრი ფული სჭირდება. ოჯახი აპირებს, ხარჯების გასტუმრებაში ბათუმის ბინა გამოიყენოს, რომელიც პროექტში გამარჯვებულ ვანოს ჯილდოდ გადაეცა.
ვანოს ახლანდელ მდგომარეობასა და მომავლის გეგმებზე "სარკეს" თავად ბიჭუნა და მისი დედა, ნანა ვიბლიანი ესაუბრნენ.
ვანო: მუცლის მარცხენა მხარეს სპეციალური აპარატი ჩამიდგეს. ოპერაციას 2 საათის განმავლობაში მიკეთებდნენ. აპარატზე შეერთებულია ერთი მილი და კათეტერი, რომელიც ძვლის ტვინს კვებავს და აღდგენის საშუალებას აძლევს. ეს აპარატი 40 წელი უნდა მქონდეს ან მთელი ცხოვრება. ყოველი 8 წლის შემდეგ უნდა შეიცვალოს, მაგრამ შესაძლებელია, მე მხოლოდ პირველი 8 წელი დამჭირდეს, მეტი – არა. ეს ჩემს ორგანიზმსა და იმაზეა დამოკიდებული, ექიმების დავალებებს როგორ შევასრულებ.
– რა "დავალებები" მოგცეს ექიმებმა?
ვანო: მნიშვნელოვანი არაფერი, ჩემთვის ხტუნვა არ შეიძლება, ძირითადად უნდა ვივარჯიშო. ყველაფერი შემიძლია.
– ახლა რას აკეთებ, ოპერაციის შემდეგ რეაბილიტაციას როგორ გადიხარ?
ვანო: რითიც შემიძლია, დრო ისე გამყავს, ხან ბავშვებთან ერთად ვარ, ხან კომპიუტერით ვერთობი. ამ ოპერაციის გაკეთება ჩემი ოცნება იყო და, როგორც იქნა, ამიხდა. კარგად სიარულს შევძლებ და შესაბამისად უფრო თავდაჯერებულიც ვიქნები. ოპერაცია მთლიანად "საქართველოს ბანკმა" დაგვიფინანსა.
– როგორც ვიცი, სექტემბერშიც გჭირდება ოპერაცია.
ვანო: დიახ, მყესების დაგრძელება მჭირდება. იმ ოპერაციის შემდეგ უფრო გამართულად ვივლი. ახლა მყესები ჩაკეტილი მაქვს და სიარულისას ბოლომდე არ მიშვებს.
ნანა: ვანოს მუცელში აპარატი ჩაუდგეს. მისი საშუალებით წამალი ჯერ ძვლის ტვინს მიეწოდება, შემდეგ მთლიანად ფეხს. ეს წამალი 800 ევრო ღირს, ერთი წლის განმავლობაში 4.200 ლარი დაჯდება. 40 წლის განმავლობაში დასჭირდება. 8 წლის შემდეგ აპარატი შესაცვლელი იქნება და ის 15.000 ლარი ღირს.
– როგორ აპირებთ მედიკამენტების შეძენას?
ნანა: პირველი წამალი ბანკმა დაგვიფინანსა. მერე ბათუმის ბინით გადავიხდით, რომელიც ვანოს "ნიჭიერში" გამარჯვების შემდეგ გადასცეს. გვითხრეს, ზღვის სეზონზე 3 თვე გაგიქირავებთ და 4.000 დოლარს მოგცემთო. ჩვენ კი ფულს ბანკში ჩავდებთ და აპარატისა და წამლისთვის შევინახავთ. ვანომ რომ გაიმარჯვა, ის სახლი მშენებარე იყო, ახლა კი დაასრულეს.
– როგორია ვანოს ახლანდელი მდგომარეობა?
ნანა: დამაკმაყოფილებელია. ცოტა პრობლემები კიდევ აქვს, მაგრამ უკეთესადაა, გაიმართა, წამალი კარგად მოქმედებს. ახლახან იაშვილის კლინიკაში გვყავდა, გვითხრეს, სექტემბრის ბოლოს კიდევ ერთი ოპერაცია დასჭირდებაო. ახლა მასაჟები აქვს დანიშნული და აკვირდებიან, რა შედეგს მივიღებთ. ბარძაყის არეში მყესი აქვს დაჭიმული, რასაც რეაბილიტაცია სჭირდება. თუ მასაჟებით არ გამოსწორდა, ოპერაცია გარდაუვალი იქნება.
– ღმერთმა ნუ ქნას, მაგრამ რომ დასჭირდეს, ამის საშუალება გაქვთ თუ ისევ ვინმეს იმედზე ხართ?
ნანა: არა და არც ვიცით, როგორ გავუკეთებთ. ისე ვნერვიულობთ, ჭკუაზე არ ვართ. თანაც, ახლა ვანოს სპეციალური ფეხსაცმელი სჭირდება, რომელიც უნდა შევუკეროთ და 150 ლარი ღირს.
– ის აპარატი ვიზუალურად ჩანს?
ნანა: რა თქმა უნდა, ჩანს. მუცელზე ის ადგილი ნახევარლიტრიანი ქილის სიდიდეზე აქვს გამობერილი. მაისურს რომ ჩაიცვამს, ეტყობა. ეს დისკომფორტს არც დაწოლაში უქმნის, არც გადაბრუნებაში. ექიმთან ყოველ კვირა მიგვყავს და ყოველ მისვლაზე წამალს უმატებენ.
– მკურნალობის ეს მეთოდი სრულად გამოჯანმრთელების შანსს იძლევა?
ნანა: კი, ამ აპარატმა კარგი შედეგი მოგვცა. მარცხენა ფეხი გამხდარი ჰქონდა, ახლა კი მატება დაიწყო. თითებს ვერ ამოძრავებდა და აამოძრავა, მუხლს ვერ ხრიდა, ესეც შეძლო. ეს მისი ცხოვრების ოცნება იყო. შარშან, სანამ "ნიჭიერში" მოხვდებოდა, რაღაც ღონისძიებაზე იყო მიწვეული, სადაც გერმანელები იყვნენ სტუმრად. ბავშვებს სთხოვეს, ვისაც რა სურვილი ჰქონდა, ფურცელზე დაეწერათ და ყუთში ჩაედოთ. ზოგმა საზღვარგარეთ მოგზაურობა ჩაწერა, ზოგმა – სხვა რამე. ვანომ კი დაწერა, ჩემი ოცნებაა, ოპერაცია გამიკეთდეს და ჩემი მეგობრებივით თავისუფლად სიარული შევძლოო. ღმერთმა მისი თხოვნა შეისმინა.
ეკა ლემონჯავა
