ეკა კვალიაშვილი - სიგოიმის დიდი ზეიმი იყო საქართველოში

მომღერალი ეკა კვალიაშვილი ქართულ-რუსული საერთაშორისო თანამშრომლობის ცენტრის - "გროსის" პრეზენტაციაზე გამოჩნდა, მისი გოგონა კი - "საქართველოს ვარსკვლავის" კასტინგზე, სადაც ნიჭიერად შესრულებული სიმღერით ჟიურის წევრებიც მოხიბლა და ტელემაყურებლებიც. სამაგიეროდ, საზოგადოების ნაწილი "გროსის" პრეზენტაციაზე ეკას (ასევე, სხვა ქართველი მომღერლების) მისვლასთან დაკავშირებულ საქციელს არ მოუხიბლავს. ეკა კვალიაშვილთან საუბარი სამშობლოში მისი დაბრუნების მიზეზის გარკვევით დავიწყეთ:

- ამბობდით, რომ საქართველოში მაშინ დაბრუნდებოდით, როცა ჩვენს ქვეყანაში ღირსება და დაფასება დაბრუნდებოდა...

- ზუსტად მაგ დროს დავბრუნდი. აგვისტოს შუა რიცხვებში, ბათუმში ჩავფრინდი. ბათუმიდან წამოსულს გზაში მეგობრები - ზაზა მამალაძე და მერაბ თავაძე. შემხვდნენ, რომლებიც ქვეყანაში კონცერტების გამართვას აპირებდნენ. მონაწილეობა შემომთავაზეს. რა თქმა უნდა, დავთანხმდი. მას შემდეგ საქართველოში ვარ.

- ეკა, საქართველოში თქვენი დაბრუნება ხელისუფლების ცვლილებას უკავშიერდება?

- ზუსტად ასეა. მართალია, საქართველოში მანამდე ჩამოვედი, მაგრამ ეს პროცესი უკვე დაწყებული იყო: ჩვენს ქვეყანაში მიმდინარე მოვლენებს ინტერნეტით თვალ-ყურს ვადევნებდი. ზუსტად მაშინ დავბრუნდი, როცა ჩვენს ქვეყანას ღირსება დაუბრუნდა.

- ქართულ-რუსული საერთაშორისო თანამშრომლობის ცენტრის - "გროსის" შექმნის შესახებ რას ფიქრობთ?

- "გროსის" მიმართულებას 100%-ით ვეთანხმები. სხვადასხვა ქვეყნის ხალხს შორის კეთილგანწყობილების მომხრე ყოველთვის ვიყავი, რადგან აგრესია აგრესიასვე წარმოშობს. თან, ყველაზე ახლობელი მაინც მეზობელი ქვეყანაა. მის კულტურას, მენტალიტეტს კარგად ვიცნობ. ჩემთვის მისაღებია, რომ რუსეთთან კარგი, მჭიდრო კულტურული ურთიერთობა გვქონდეს. როცა რუსულ ტელეგადაცემაში - "ცხოვრება მშვენიერია" სტუმრად გახლდით (ჩემთან ერთად იყვნენ: სოსო პავლიაშვილი, რამაზ ჭიაურელი, სოფო შევარდნაძე...), თავად წამყვანი ამბობდა, - ასეთი გადაცემა ჯერ არ მქონიაო! ხალხი ტიროდა. ეს ის ხალხი გახლდათ, ვინც ვიღაც პოლიტიკოსების გადაწყვეტილებას არ ეთანხმება, ვისაც ომი არ უნდა... რუსეთში მხოლოდ კეთილგანწყობით, პატივისცემითა და სიყვარულით მეპყრობოდნენ. იმ პერიოდში, თავს მომღერლად და ვარსკვლავად იქ უფრო მაგრძნობინებდნენ, ვიდრე - ჩემს ქვეყანაში. საქართველოში სამარცხვინო სიტუაცია იყო. სხვებზე არ ვილაპარაკებ, მაგრამ მე "დაბლოკილი" ვიყავი. შინიდან გასასვლელი ფულიც კი არ მქონდა. არადა, სახლში შვილი მყავდა, რომელსაც უამრავი რამ სჭირდებოდა. ისეთ რაღაცებს მიკეთებდნენ, რომ საარსებო საშუალება სრულიად მომისპეს. მხოლოდ რუსეთში კი არა, ევროპის ნებისმიერ ქვეყანაში, ამერიკიდან ჩასული ვარსკვლავის დონეზე მხვდებოდნენ, საქართველოში ჩამოსულს კი საოცარი მარაზმი მხვდებოდა: ქალაქი ქალაქს არ ჰგავდა (ჯერჯერობით, ახლაც არ ჰგავს). იმ თაობას ვეკუთვნი, რომელსაც კარგი, "გემრიელი" თბილისი და თბილისელები ახსოვს. მაშინ ვირტუალური კი არა, ადამიანური ენერგეტიკის გაცვლით დამყარებული ლამაზი ურთიერთობები არსებობდა.

- ვირტუალური ურთოერთობების დამკვიდრებაც მთავრობის ბრალია?

- არა, ზოგადად, თბილისზე ვსაუბრობ, თორემ გასული 9 წლის განმავლობაში, მთავრობას იმდენი ცოდვა აქვს ჩადენილი, საინტერესოა, თავად თუ ხვდებიან, რა დააშავეს? წესით, ახლა მუხლებზე დაჩოქილები ღმერთს პატიებას უნდა სთხოვდნენ, მაგრამ ეჭვი მეპარება, რომ მათი აზროვნება ამ დონემდე მივიდეს. მათ მიმართ არავითარი აგრესია არ მაქვს. უბრალოდ, მებრალებიან...

- ხშირად აღნიშნავდით, - არც ერთი პოლიტიკური პარტიისთვის მიმღერია და არც ვიმღერებო. ამ მხრივ, აზრი ხომ არ შეგიცვლიათ?

- არა. ერთადერთი, ჯემალ სეფიაშვილის სიმღერა - "ჩვენ დავბრუნდებით" შევასრულე, რომელიც საქართველოში დაბრუნების მოსურნე ემიგრანტებს მიეძღვნა. "ვიღაც" რომ ვყოფილიყავი, ხომ შემეძლო, "ჩემი გმირი გიწოდეს" მსგავსი სიმღერა მემღერა? მაგრამ ადამიანისგან კერპის შექმნა არ შემიძლია: მართლმადიდებელი ვარ და არა - კერპთაყვანისმცემელი. ვინც უფალს ემიჯნება და საკუთარი თავი ღმერთი ჰგონია, ისინი ნორმალური ადამიანებისგან იზოლირებული უნდა იყვნენ, რომ რამე ბოროტება არ ჩაიდინონ.

- თქვენი გოგონა - ნუკა გვალია "საქართველოს ვარსკვლავის" ახალ სეზონში გამოჩნდა. ჟიურის წევრებს შორის ქალბატონი მარინა ბერიძე რომ ყოფილიყო, ნუკას პროექტში მონაწილეობის უფლებას მაინც მისცემდით?

- არავითარ შემთხვევაში. ნამდვილად არ მინდოდა, რომ ჩემს შვილს ბოროტ ხალხთან ეთანამშრომლა. იმის ბედნიერებას ვერავის მივანიჭებდი, რომ რადგან დედას ვერ მოერივნენ, ჩემთვის სამაგიერო შვილის მეშვეობით გადაეხადათ.

- თქვენი და ქალბატონი მარინას დაპირისპირების მერე ამბობდნენ, - მძიმე ხასიათის გამო, ეკასთან თანამშრომლობას თავს არიდებენო. იქნებ, თქვენი "დაბლოკვის" მიზეზი ესეც იყო?

- ჩემი ხასიათის სიმძიმესა და სიმსუბუქეზე მსჯელობისგან ყველას თავშეკავებას ვთხოვ, რადგან მძიმე ხასიათი კი არ მაქვს, ძლიერი ქალი ვარ! ჩემს ადგილზე, იმ 9 წლის განმავლობაში ბევრი "გატყდებოდა"... მანამდე ე. წ. კოლეგებიც იყვნენ ჩემ წინააღმდეგ განწყობილნი. თითოეული მათი ნაბიჯი ვიცი, თუ სად თხზავდნენ ჭორებს ჩემი ამბიციურობისა და აგრესიულობის შესახებ - "ციხე შიგნიდან ტყდებაო"... ცინიზმს და ბოროტ განწყობილებას ვერ ვიტან. მდაბიურ საქციელს ყველა შეეშვას. პირადად მე, იმაზე სიტყვას არ "გავსვრი", რაც ჩემს ღირსებაზე დაბლა დგას. ადამიანების გარკვეული ნაწილი (მათ შორის - თქვენ მიერ ზემოთხსენებული ქალბატონი) ჩემს ღირსებაზე იმდენად დაბლა დგას, რომ საუბარიც არ მინდა.

- ნუკა "გოლდენ ტალანტშიც" მონაწილეობდა. მაშინ ბატონმა დავით ოქიტაშვილმა თქვა, რომ ეკას ბავშვი სცენაზე ასე მოუმზადებელი არ უნდა გამოეშვაო...

- ეგ "იუმორისტული ნარკვევი" მეც წავიკითხე, ასევე - მარინა ბერიძის "ნარკვევიც": როგორც მომღერალი, ეკა კვალიაშვილი ვერ შედგაო... "გოლდენ ტალანტზე" ნუკამ ურთულესი სიმღერა საოცრად შეასრულა. ყველა გაკვირვებული იყო. ამას იმიტომ არ ვამბობ, რომ ჩემი შვილია. ვისაც აინტერეებს, შეუძლია, მისი გამოსვლა "იუთუბზე" ნახოს. იმ კონკურსზე ნუკამ ყველაზე მაგრად იმღერა.

- სალომე ქათამაძეზე კარგად იმღერა, რომელმაც "გოლდენ ტალანტშიც" გაიმარჯვა, "ახალ ხმაშიც" და ახლა იურმალას მუსიკალურ ფესტივალზე საქართველოს სახელით მიემგზავრება?

- კი, რატომაც არა? უბრალოდ, სალომე თავის "მანერაში" ძალიან კარგად მღერის. ნიჭიერი გოგონაა, ღმეთმა ხელი მოუმართოს. ეს ბავშვი ძალიან მიყვარს, მაგრამ მას და ნუკას ერთმანეთს ნუ შევადარებთ - სხვადასხვა კატეგორიის მომღერლები არიან... "გოლდენ ტალანტის" ჟიურის ერთ-ერთ წევრ გოგოს უთქვამს, - სცენაზე ესა და ეს კონკურსანტი რომ გამოვა, "10-აინი" აუწიეთო. 1 ბათუმელი ქალი დაინტერესდა, - თუ ნამღერი არ მოვისმინე, როგორ შევაფასოო? ჟიურის ჩემ მიერ ნახსენებმა წევრმა კი პასუხად ქმრის გვარი გამოიყენა, - მე ესა და ეს ვარო. მის ვინაობას შეგნებულად არ ვასახელებ... მოგეხსენებათ, ქართულ-სომხური მუსიკალური პროექტი ხორციელდებოდა. თურმე მონაწილეებს შორის ნუკაც ჩაუსვამთ, შემდეგ კი სიიდან ამოიღეს - ეს კვალიაშვილის შვილია და მაინც "ამოაგდებენო"... მოკლედ ვიტყვი, სიგოიმის დიდი ზეიმი იყო! საქართველოში კომპლექსიანი, ჩამოუყალიბებელი, გაბოროტებული ხალხით დაკომპლექტებული მთავრობა გვყავდა. 35 წელია, სცენაზე ვდგავარ და ჩემი საქმის სწორად, პროფესიონალურად კეთება ვიცი. მინდა, რომ საქმე ჩვენი ქვეყნის მთავრობამაც ასე სწორად და პროფესიონალურად აკეთოს.

- ეკა, წინა მთავრობის პერიოდში, თქვენი ძმა პატიმარი იყო. მასზე რაიმე სახის ზეწოლა ხომ არ ხორციელდებოდა?

- ჩუმად ამიტომაც ვიყავი, ჩემი ძმისთვის რამე არ დაეშავებინათ, თორემ განა სიტყვების მარაგი არ მაქვს? ამ მხრივ, ჭკვიანი გოგო გახლდით.

- რუსეთში თქვენი ყოფნის პერიოდში, საქართველოში გავრცელდა ინფორმაცია, რომ იქაური საიტის ჟურნალისტის კითხვაზე, - თუ რატომ ღალატობთ სამშობლოს და ქმრებს ასე ხშირად, გიპასუხიათ, - კი არ ვღალატობ, ვიცვლიო. საქართველოში იმედს გამოთქვამდნენ, რომ "გამოცვლაში" მხოლოდ ქმრები იგულისხმეთ...

- საქართველოში ან ასე სურდათ, რომ "გადაეთარგმნათ", ან - ძალიან გაუნათლებლები არიან: მსგავსი კონტექსტი არც ჟურნალისტის კითხვაში ყოფილა და არც - ჩემს პასუხში. სამშობლო კი არა, ქვეყანა, გარემო, სიტუაცია ვიგულისხმეთ. იმ წუთში, საქართველო "ჩემი გარემო" ნამდვილად არ ყოფილა. თავს არავის ვაცოდებ - ამისგან ღმერთმა დამიფაროს, მაგრამ წარმოდგენაც კი არ აქვთ, მაშინ რა პირობებში ვიყავი...

- დაბოლოს, ამჟამად, თქვენს პირად ცხოვრებაში რა ხდება?

- ერთხელ მკითხეს, - შეგხედავს დამიანი, მაგარი ქალი ხარ და არ არსებობს, რომ პირადი ცხოვრება არ გქონდესო. არადა, არსებობს. დღეს მინდა, რომ პირადი ცხოვრება არ მქონდეს. პრინციპული ადამიანი ვარ, გრძნობების კონტროლიც ვიცი, მაგრამ თუ გამოჩნდება კაცი, რომელიც ჩემს სიყვარულს დაიმსახურებს, საწინაღმდეგო არაფერი მაქვს. გოიმებს ვერ ვიტან. საკუთარი თავი ყველას "სვეტსკი" ჰგონია, მაგრამ ვარჩევ, გოიმი ვინ არის და ვინ - არა.

ეთო ყორღანაშვილი