შენობები, რომლებიც თბილისმა ვერ მოიხდინა
გემოვნებაზე არ დაობენ. შესაბამისად, თბილისში ბოლო წლებში აგებული შენობები ზოგს მოსწონს, ზოგს - არა. თუმცა, პროფესიონალების სიტყვას სხვა დატვირთვა აქვს. მათი აზრით, შენობა ტანსაცმელივითაა - შესაძლოა, ძალიან კარგი იყოს, მაგრამ ქალაქმა ვერ მოიხდინოს. რეიტინგი იმ შენობებისა, რომლებიც თბილისმა ვერ მოიხდინა, ოთხ ცნობილ ქართველ არქიტექტორს ერთმანეთისგან დამოუკიდებლად შევადგენინეთ. ხმები ასე გადანაწილდა.
მშვიდობის ხიდი
"რა საჭიროა ხიდი, რომელიც თავის ფუნქციას ვერ ასრულებს. ის ძველი თბილისის ისტორიულ ზონას არ უხდება, რელიეფიდან ამოვარდნილია. მხოლოდ ფოტოების გადასაღებად დაიხარჯა მილიონები? ხიდის კიბეები არანაირ ნორმაში არ ჯდება".
ფეხით მოსიარულეთა ხიდი მდინარე მტკვარზე, თბილისში, მეტეხისა და ბარათაშვილის ხიდებს შორის ერთმანეთთან აკავშირებს ერეკლე II-ის ქუჩასა (მიმდებარე სანაპიროსთან ერთად) და რიყეს. ხიდი აიგო პრეზიდენტ მიხეილ სააკაშვილის ინიციატივით და თბილისის მერიის დაკვეთით 2009-2010 წლებში. ოფიციალურად გაიხსნა 2010 წლის 6 მაისს. ხიდის არქიტექტორია იტალიელი მიკელე დე ლუკი.
რიყის მუსიკალური თეატრი და საგამოფენო დარბაზი
"ამ შენობამ არა მარტო რიყე მოსპო, არამედ მთელი განშლა. ბარათაშვილის ხიდიდან ულამაზესი სურათი იშლებოდა, ეკლესიებით, ფერდობზე შეფენილი სახლებით. ორი გაუგებარი მილი დაიდგა. ეს მილები, შესაძლოა, მაღალი დონის არქიტექტურაა, მაგრამ საერთოდ კონტექსტიდანაა ამოვარდნილი. ქალაქის არქიტექტურის საბჭო უნდა გათავისუფლდეს ზეგავლენისგან. მხოლოდ ამის შემდეგ მივიღებთ დედაქალაქის სახეს. საქართველო დაემსგავსა საცდელ პოლიგონს, სადაც ვისაც რა სურს, იმას აშენებს".
რიყეზე მშენებლობა მიმდინარეობს იტალიელი არქიტექტორ მასიმილიანო ფუქსასის პროექტის მიხედვით.
იუსტიციის სახლი
"არქიტექტურული ნაგებობა გაუგებარი გადახურვით, ასევე შეუსაბამოა გარემოსთან, კლიმატსა და ეროვნულ ფასეულობებთან. შესაძლოა, ეს შენობა მათ სამშობლოში არც დაედგათ (იგულისხმება შენობის უცხოელი ავტორი) გაუმართლებელია ორ-სამსართულიან განაშენიანებაში უზარმაზარი შენობა-ნაგებობები, ძველი თბილისის ისტორიული ზონის ასე გადატვირთვა.
თბილისის იუსტიციის სახლის პროექტი ცნობილ იტალიელ არქიტექტორს მასიმილიანო ფუქსასს ეკუთვნის. შენობა ოთხსართულიანია და მისი საერთო ფართობი 27 ათას კვადრატულ მეტრს შეადგენს. მხოლოდ მომსახურების დარბაზი 7.000 კვადრატული მეტრია და 300 ოპერატორზეა გათვლილი. გაიხსნა 2012 წლის 21 სექტემბერს.
შსს-ს შენობა
"შსს-ს შენობა რკინიგზის სადგურს უფრო ჩამოჰგავს, ვიდრე პოლიციის შენობას. გასაგებია, რომ მინას ბოლო დროს აქტიურად იყენებენ, მაგრამ ასეთი შენობების მოვლა-პატრონობაც ძვირი ჯდება. ...სათამაშო ნაგებობას წააგავს და არც მაღალ არქიტექტურულ ნიმუშად მიმაჩნია".
გაიხსნა 2009 წლის 31 მარტს. არქიტექტორია იტალიელი მიკელე დე ლუკი. ოთხსართულიანი შენობა საერთო ჯამში 49.652 კვადრატულ მეტრს იკავებს.
ბიზნესცენტრი
"ვიდრე ძველ თბილისში უზარმაზარი და უშნო შენობები გამოჩნდებოდა, გაჩნდა ბიძინა ივანიშვილის ბიზნესცენტრი. თავისი მასშტაბურობით ისიც არ უხდება ისტორიული ზონის განაშენიანებას. მთავარია, ადგილმდებარეობის შერჩევა, ეს ძალიან ფაქიზი თემაა და როდესაც რამის აშენება გვსურს, აუცილებელია ჩვენი კულტურის გათვალისწინება".
ბიზნესცენტრი ცნობილი იაპონელი არქიტექტორის შინ ტაკამაცუს დაპროექტებულია და მისი საერთო ფართობი 10 000 კვმ-ია.
მომდევნო ადგილები ასე განაწილდა: ესტაკადა გმირთა მოედანზე, "ბუდა-ბარი", კაზინო "შანგრილა", საბაგირო რიყეზე, შავი სახლი ჭავჭავაძის გამზირზე. პრეზიდენტის სასახლე, საცხოვრებელი სახლი პირველი გიმნაზიის უკან.
ლამუნა ირემაშვილი
ყოველკვირეული გაზეთი "ყველა სიახლე"
