მოკლევადიანი საქორწინო კონტრაქტი ქმრებისათვის

იდეალური მეუღლე – მითი თუ რეალობა? სრულყოფილება ყველა ასპექტში, არსებობს კი ის რეალურად, თუ მშვენიერი სქესის წარმომადგენლებს მხოლოდ ოცნებაღა დაგვრჩენია?

მზრუნველი და მოსიყვარულე მეუღლე ყველა ქალის ოცნებაა, განსაკუთრებით კი მაშინ, როდესაც ჩვენი "საინტერესო მდგომარეობა" უბრალოდ გვაიძულებს მოვითხოვოთ მათგან შეუძლებელი და ვაკეთებინოთ ის, რაც აქამდე არასდროს გამოსდიოდათ.

წარმოგიდგენთ მოკლევადიან საქორწინო კონტრაქტს, რომელიც ამერიკელმა მწერალმა, კურტ ვონეგუტმა გააფორმა თავის მეუღლე ჯეინთან. კონტრაქტი/ხელშეკრულება მეუღლის ორსულობისა და ბავშვის დაბადების პირველ თვეებზე ვცელდებოდა.

მე, კურტ ვონეგუტ უმცროსი, ვფიცავ, რომ ვიქნები ერთგული ქვემოაღნიშნული ვალდებულებებისა და კეთილსინდისიერად შევასრულებ მათ იმ შემთხვევაში, თუკი მეუღლე დამპირდება, რომ არ იბუზღუნებს, არ მიყვირებს და არ შემაწუხებს. სანაცვლოდ, ვდებ პირობას, რომ მოვრეცხავ იატაკს სამზარეულოსა და აბაზანაში კვირაში ერთხელ, ჩემთვის მოსახერხებელ დღეს და სასურველ საათზე. მეტიც, ამას გავაკეთებ ხარისხიანად და აკურატულად, რაც ჩემი მეუღლის თვალსაზრისით, გულისხმობს: შეძრომას აბაზანის, უნიტაზისა და ნიჟარის ქვეშ, თვალისათვის ნაკლებადხილულ კუთხეებში, ასევე, ავწევ და ადგილს შევუცვლი ოთახში არსებულ ყველა საგანს, რათა იატაკი მოიწმინდოს მათ ქვეშაც და არა მხოლოდ გარშემო.

ამასთან, დალაგების პროცესში თავს შევიკავებ და არ წარმოვთქვამ ისეთ სიტყვებს, როგორებიცაა: "ნეხვი", :ჭირსაც წაუღია!" და ასე შემდეგ. ზემოაღნიშნული პირობის დარღვევის შემთხვევაში, ჩემს მეუღლეს ენიჭება კანონიერი უფლება მებუზღუნოს, მიყვიროს და მთათხოს მანამ, სანამ არ მოვრეცხავ იატაკს, დამოუკიდებლად იმისაგან, მცალია თუ არა.
ამასთან, ვფიცავ, რომ უზრუნველვყოფ შემდეგ არაარსებით პირობებსაც:

1. ჩამოვკიდებ ჩემს ტანსაცმელს და დავაწყობ ფეხსაცმელს კარადაში, როდესაც მათ არ მოვიხმარ.

2. ქუჩიდან სახლში შემოსვლისას რეგულარულად გავიწმენდ ფეხსაცმელს ფეხის ტილოზე და არასდროს გავიტან ნაგავს სახლის ფოსტლებით, რითაც თავიდან ავიცილებ ოჯახში სიბინძურის შემოტანას.

3. ყოველთვის გადავყრი გამოუსადეგარ და ნახმარ ნივთებს, როგორებიცაა: ასანთის ცარიელი კოლოფი, სიგარეტის კოლოფი, კარდონები და ა.შ. ნაგვის ურნაში და არ დავტოვებ მათ მაგიდასა თუ იატაკზე.

4. პირის გაპარსვის შემდეგ, ერთად მოვაგროვებ ჩემს საპარს მოწყობილობებს და შევინახავ უკან კარადაში.

5. იმ შემთხვევაში, თუკი ვიქნები მიზეზი აბაზანის წყალგამწოვის გარშემო ჟანგის გაჩენისა, მას უმალ გავხეხავ და მოვაშორებ სპეციალური ჯაგრისისა და საწმენდი საშუალება "სვიფტის" საშუალებით და არა ჩემი აბაზანის ღრუბლით, როგორც ამას აქამდე ვაკეთებდი.

6. იმ შემთხვევაში, თუკი ჩემმა მეუღლემ დაიწყო ნახმარი თეთრეული შეგროვება, ჩაალაგა სპეციალურ ჩანთაში და დადო შემოსასვლელი ოთახის გამოსაჩენ ადგილას, სამი დღის განმავლობაში, ვალდებული ვარ წავიღო აღნიშნული თეთრეული ქიმწმენდაში და წაღებიდან 2 კვირის განმავლობაში, დავაბრუნო იქიდან სუფთა მდგომარეობაში.

7. სიგარეტის მოწევის შემთხვევაში, ყველანაირად ვეცდები არ დავდო საფერფლე ისეთ ადგილებში, როგორებიცაა: სკამისა თუ მაგიდის კუთხეში დაწყობილი წიგნები, სკამის სახელურები და საკუთარი მუხლები.

8. არ დავაწყობ სიგარეტს და არ ჩავაფერფლებ ქაღალდის დასაწყობ ტყავის წითელ ურნასა და მარკებისათვის განკუთვნილ პატარა ურნაში, რომელიც საყვარელმა მეუღლემ საკუთარი ხელით გააკეთა და მომიძღვნა 1945 წელს საშობაო საჩუქრად, რამეთუ აღნიშნული ქმედებები მნიშვნელოვნად ამცირებს მათ ესთეტიკურ და პრაქტიკულ ღირებულებას.

9. იმ შემთხვევაში, თუკი მეუღლე ჩემგან მოითხოვს რამეს, ვალდებული ვარ კეთილსინდისიერად შევასრულო მისი "თხოვნა" ბრძანებიდან 3 დღის განმავლობაში, რის შემდეგაც, მისგან მივიღებ მხოლოდ "მადლობას". ხოლო თუ დათქმულ დროში არ შევასრულებ დაკისრებულ საქმეს, მეუღლეს ენიჭება სრული თავისუფლება მებუზღუნოს, მიყვიროს და მთათხოს მანამ, სანამ ბოლოს და ბოლოს არ მივიყვან საქმეს ბოლომდე.

10. ზემოაღნიშნული 3 დღიანი ვადის გამონაკლის შემთხვევას წარმოადგენს ნაგვის გატანა, რომელიც, ყველას კარგად მოეხსენება, რომ ამდენ ხანს ვერ მოიცდის. ნაგავს გავიტან 3 საათის განმავლობაში მას შემდეგ, რაც მეუღლე მიმითითებს ამის შესახებ. თუმცა, გაცილებით უფრო სასიამოვნო იქნება, თუკი სახლიდან გასატანი ნაგვის არსებობას თავად შევამჩნევ და შესაბამისად, მეუღლის დავალების გარეშე გავაკეთებ ამას.

11. მხარეებს გვესმის, რომ იმ შემთხვევაში, თუკი ჩემს ვალდებულებებს ვცნობ ძალზე არარეალურად და მამაკაცის უფლებების ზედმეტად შემზღუდველად, არ დავაკლებ ცდას და წარვუდგენ საკუთარ მოსაზრებებსა და შეთავაზებებს მეუღლეს, რათა სადავო საკითხები იქნეს განხილული ცივილურად და ადამიანურად, ნაცვლად იმისა, რომ უბრალოდ შევწყვიტო ამის კეთება.

12. აღნიშნული კონტრაქტი რჩება ძალაში მანამ, სანამ ბავშვის დაბადების შემდეგ (ექიმის დასკვნის საფძველზე, ცხადია), ჩემი მეუღლე სრულად არ აღიდგენს ძალასა და უნარებს, რათა გამოავლინოს მეტი ენთუზიაზმი ზემოაღნიშნული სამუშაობის დამოუკიდებლად შესასრულებლად.

25 აპრილი 1946 წელი


ია ბერიაშვილი

ჟურნალი "... და ქალი"