თავს უშველეთ!...გაიქეციეთ დედამიწიდან
თანამედროვეობის გენიალური ადამიანების ათეულში შესული ბრიტანელი ასტროფიზიკოსის, სთივენ ჰოკინგის აზრით, კაცობრიობა ათასი წელიც ვერ იცოცხლებს, თუ ვერ იპოვის ახალ საცხოვრებელ ადგილს, "ჩვენი სუსტი პლანეტის" გარეთ. 71 წლის მეცნიერი მოუწოდებს ადამიანებს, უფრო კარგად შეუდგნენ კოსმოსის შეცნობას, სწორედ კაცობრიობის რასის გადასარჩენად.
თავისი აზრი ჰოკინგმა ლოს-ანჯელესის ერთ-ერთ სამედიცინო ცენტრში ჩატარებული ლექციის დროს გამოთქვა. ამ ინფორმაციას CBS და Associated Press ავრცელებენ. "მთავარია გავიგოთ როგორ ფუნქციონირებს სამყარო და მის გაკონტროლებას შევძლებთ", განაცხადა ასტროფიზიკოსმა და რჩევებიც მისცა: "ფეხქვეშ ყურების ნაცვლად დააკვირდით ვარსკვლაებს, იყავით ცნობისმოყვარეები", "რაც არ უნდა რთული იყოს ცხოვრება, ყოველთვის გამოჩნდება საქმე, რომლის გაკეთებასაც შეძლებ".
როგორც CNET გვატყობინებს, ჰოკინგმა ადრეც გამოთქვა აზრი კაცობრიობისთვის ახალი საცხოვრებელი სახლის პოვნის შესახებ. მსგავსი აზრი მან 2006 წელსაც გამოთქვა, ხოლო 2011 წელს განაცხადა, რომ " ჩვენი გრძელვადიანი სიცოცხლის გაგრძელების ერთადერთი შანსია არ დავიმალოთ პლანეტა დედამიწაზე, პირიქით გავიდეთ კოსმოსში და ავითვისოთ ის". ამავდროულად ჰოკინგს სჯერა, რომ სამყაროს ბევრ ნაწილში არსებობს ბიოლოგიური სიცოცხლე, მაგრამ სახიფათოა მათთან კავშირის დამყარება. "შესაძლებელია არსებობდეს ცოცხალი არსებების ისეთი ფორმებიც, რომლებსაც გააჩნიათ აზროვნების უნარი და საშიშროებას წარმოადგენენ ჩვენთვის. მე არ გამოვრიცხავ, რომ ჩვენი პლანეტა დაიპყრონ და გაანადგურონ უცხოპლანეტელებმა", განაცხადა ჰოკინგმა 2010 წელს თავის ერთ-ერთი პოპულარული სატელევიზიო გადაცემის ეთერში.
ჩვენი დროის ერთ-ერთ გენიას, სთივენ ჰოკინგს, 50 წლის წინ ცენტრალური ნერვული სისტემის დეგენერაციული დაავადება, სკლეროზის დიაგნოზი დაუდგინეს. მაშინ ის ჯერ კიდევ კემბრიჯში სწავლობდა. ლოს-ანჯელესის სამედიცნო ცენტრის უფროსმა განაცხადა, რომ ვერ ხსნის ჰოკინგის სიცოცხლის ხანგრძლივობას, რადგან ამ დაავადების მქონე ადამიანები მაქსიმუმ ათი წელი ცხოვრობენ, ხოლო ბრიტანელი მეცნიერი უკვე 50 წელია ამ დიაგნოზით ცხოვრობს.
ყველაფრის მიუხედავად ჰოკინგი ყველა მხრივ აქტიური რჩება და არც კი ეტყობა დაავადების კვალი. 2009 წელს აშშ-ს პრეზიდენტმა, ბარაკ ობამამ ბრიტანელ მეცნიერს ქვეყნის ყველაზე საპატიო, პრეზიდენტის სახელობის "თავისუფლების" მედალი გადასცა.
