ვის ჰბაძავენ ჩაცმულობაში ცნობილი ქართველები

მსოფლიოს წამყვანი დიზაინერები სულ უფრო გვაოცებენ თავიანთი ფანტაზიით. ექსტრავაგანტური სამოსის გარდა, ისინი თანამედროვე თავსაბურავებსაც ქმნიან. ამ საქმით ძირითადად ქუდებისა და აქსესუარების დიზაინერები არიან დაკავებული. ასევე მოდის ისეთი კანონმდებლები, როგორებიც არიან ბალენსიაგა, ალექსანდრე მაკქვინი, ივ სენ ლორანი და სხვები.

სხვადახვა ხილის იმიტაციის თავზე დამაგრება აქტუალური მას შემდეგ გახდა, რაც მოდის ცნობილი მიმდევარი ანა დელო რუსო მოდის კვირეულზე სწორედ ასეთი აქსესუარით გამოჩნდა.

ალუბლის, ნესვის, საზამთროს, ანანასის, სოკოს, ბროწეულის, ლიმონის მსგავსი, ასევე მინიატურული ნავის, ყვავილების და უსაზღვრო ფანტაზიით გაკეთებული სხვა აქსესუარების თავზე დამაგრება ქართველმა მოდის მიმდევრებმაც მალე აიტაცეს. ანა დელო რუსოს ასეთ ორიგინალურ ქუდებს იტალიელი დიზაინერი ალან ჯორნო უმზადებს. სწორედ ის იგონებს და ქმნის ხილის ფორმის ქუდებს. მისი მაღაზია მილანში მდებარეობს, სადაც ჯორნოს ნამუშევრებს მისი შემოქმედების სხვა თაყვანისმცემლებიც იძენენ.

როგორც თავად ანა დელო რუსო ამბობს, მას მოდის კულტად აღიქვამენ, თუმცა თავად მოდის მსხვერპლად უფრო მი­იჩნევს თავს. "მოდის მცველი ვარ, ეს არის ჩემი მისია", - ხშირად ამბობს ანა. ხილის ფორმის თავსაბურავები მას განსაკუთრებულად უყვარს. გასულ წელს დელო რუსომ აქსესუარები "ეიჩ ენდ ემისთვის" თვითონვე შექმნა. სამკაულების გარდა, მან ჩიტის ფორმის თავსაბურავიც გამოიგონა. ფრინველის ბუმბულის მსგავსი მასალისგან დამზადებული აქსესუარი პირველად თავად მოირგო, რის შემდეგაც მისი სტილის მიმდევრებმაც აიტაცეს.

თუმცა ასეთი თავსაბურავები იმდენად არაორდინარულია, რომ მოდის მიმდევართა მცირე ნაწილი თუ "გაბედავს" მსგავსი აქსესუარებით საზოგადოების თავშეყრის ადგილას გამოჩენას.

სწორედ ასეთი გადაწყვეტილებები ხიბლავს, არანაირ სიახლეს და თამამ ნაბიჯებს არ ერიდება მსოფლიო მოდის სივრცეში ერთ-ერთი ყველაზე გავლენიანი იტალიელი ქალბატონი ანა დელო რუსო. ის "ვოგის" იაპონური გამოცემის მთავარი რედაქტორი და არტდირექტორია. სწორედ მას ეკუთვნის ათი წესი გარდერობისა და ჩაცმის შესახებ, ასევე აქსესუარების გამოყენების, მოდის კვირეულზე მოქცევის, მოდასა და სტილზე, ასევე რჩევები, როგორ უნდა ეცვათ მათ, ვინც მოდის ჩვენებაზე წინა რიგში ზის. წესები საშობაო წვეულებისთვის, დასვენებისთვის და ბევრი სხვა. "ეიჩ ენდ ემისთვის" ანა დელო რუსომ შექმნა სათვალე, რომელზეც ბრჭყვიალა თვლებით ნიანგებია გამოსახული. მას ეკუთვნის ასევე სუნამო "მე ვარ ანა დელო რუსო" და ამ ინიციალებისგან თავსაბურავიც მოირგო. გამოუშვა მაისურები, რომლებსაც მისი სახელისა და გვარის პირველი ასოები ეწერა და რომლებიც ზუსტად ერთ დღეში გაიყიდა. მოკლედ, მასზე გიჟდება ყველა, ვისაც მოდა უყვარს. ის ოცნებობდა, მსოფლიოში ყველაზე ცნობილი ბლოგერი გამხდარიყო, ახლა კი უნდა, ლედი გაგაზე მეტი ფანი ჰყავდეს.

ანა დელო რუსოს მილანში ორი ბინა ქვს, აქედან ერთი მთლიანად გარდერობია და იქ მხოლოდ ტანსაცმელს ინახავს. როგორც ამბობენ, მას დაახლოებით 7 ათასი წყვილი ფეხსაცმელი აქვს. როგორც თავად ამბობს, ბოიფრენდი ჰყავს, მაგრამ მასთან არ ცხოვრობს, რადგან ტანსაცმლის სიმრავლის გამო სახლში ადგილი არ აქვს. მისივე თქმით, ამავე მიზეზით გაშორდა პირველ მეუღლეს. ყოფილი მეუღლისა და მისი ტანსაცმლისთვის ადგილი ანას ბინასა და გარდერობში ვერ მოიძებნა. ის ტანისამოსს, ფეხსაცმელს და აქსესუარებს 20 წელია

აგროვებს და მისი კოლექცია მოდის ისტორიის ნამდვილი არქივია. როგორც თავად ამბობს, ყველაფერი მოწესრიგებულად, ბიბლიოთეკაში განლაგებული წიგნების მსგავსად აქვს განთავსებული. მისი სამოსი საერთო ჯამში ასობით ათასი დოლარის ღირებულებისაა.

"მე ვარ ჟურნალისტი და კარგი ფასდაკლებები მაქვს", - ამბობს ანა. ის არ იკეთებს მაკიაჟს და ერთ სამოსს მეორედ არ იცვამს. როდესაც დიზაინერები მას ჩვენებაზე იწვევენ, მათი კოლექციიდან საუკეთესო და გამორჩეული კოსტიუმით მიდის, რომელიც საზოგადოებამ პირველად ჩვენებაზე უნდა ნახოს. მას ყველაფერი პოდიუმზე ჩვენებამდე აცვია, რაც ცნობილი დიზაინერების პრესტიჟს კიდევ უფრო მაღლა სწევს. ოცი წლის განმავლობაში არ გამოუტოვებია არც ერთი მოდის კვირეული და ჩვენება. ანას დამწყები და არცთუ ისე ცნობილი დიზაინერების მომავალი წარმატების გადაწყვეტაც შეუძლია და თუ რომელიმე დიზაინერის სამოსში გამოეწყობა ან წვეულებაზე წაიყვანს, მას შემდგომი პოპულარობა გარანტირებული აქვს. ანას "მოდის მანიაკიც" შეარქვეს.

დელო რუსოს, მსოფლიოში ცნობილი და ნაკლებად ცნობილი მოდის მიმდევრების გარდა, პოპულარული ქართველი გოგონებიც ჰბაძავენ. რა თქმა უნდა, ისინი, ვინც მოდას მისდევს, ფინანსური შესაძლებლობა აქვს, სხვადასხვა ქვეყანაში დაფრინავს და ძვირად ღირებულ სამოსსა და თავსაბურავებს იძენს. მათ შორის არიან მომღერალი ქეთა თოფურია, ყოფილი მოდელი და ამჟამად დიზაინერი ანუკი არეშიძე, ანუკის მეგობარი და ფეხბურთელ ალექსანდრე ამისულაშვილის მეუღლე ნინი ზარქუა. დელო რუსოს მსგავსად, ხილის მსგავსი თავსაბურავები მათაც მოირგეს, თავიანთი ფანტაზიით სხვა პროდუქტის აქსესუარებიც დაიმატეს, ანას მიერ გამოგონებული ჩიტის მსგავსი ქუდიც შეიძინეს და დაიფარეს.

ზაზა გიგაური
ჟურნალი "რეიტინგი"