დღეში სამი ფინჯანი ყავა ქალის მკერდის ზომას ამცირებს

მკერდის ზომა – ყველა ქალისთვის მნიშვნელოვანი საკითხია. რას აღარ ვაკეთებთ იმისათვის, რომ სხეულის ამ ნაწილის ზომა და ფორმა შევიცვალოთ – დაწყებული დამღლელი ვარჯიშებით, პლასტიკური ოპერაციებით დამთავრებული... და აი, გაჩნდა სერიოზული მიზეზი ნერვიულობისთვის: მზაკვარ ყავას, თურმე, შეუძლია, მკერდის ზომა შეამციროს.

შვედ მეცნიერებს რომ კვლევის შედეგების ზუსტი ციფრები არ წარმოედგინათ, ალბათ, სანერვიულო არაფერი იქნებოდა, მაგრამ როცა გეუბნებიან, რომ დღეში სამი ფინჯანი ყავა მკერდის გარშემოწერილობის 18%-ს გაკარგვინებს, მოსვენებას კარგავ!

კვლევაში 300 ქალი მონაწილეობდა. მათ ნაწილს დღის რაციონში ყავა ჰქონდა შეტანილი, ნაწილი კი – უარს ამბობდა ამ სასმელზე. შედეგად გაირკვა, რომ მათ, ვინც დღეში სამ ფინჯანზე მეტ ყავას იღებდა, მკერდის საწყისი მოცულობიდან 18% დაკარგეს. მეცნიერები ამაში ადანაშაულებენ განსაკუთრებულ გენს, რომელსაც მუტაცია შეუძლია. ის მხოლოდ ქალების 50%-ში გვხვდება.

შესაძლებელია თუ არა, რომ მკერდი საერთოდ გაქრეს და რამდენად სწრაფად მიმდინარეობს მისი მოცულობის შემცირების პროცესი, მეცნიერებმა არ დააკონკრეტეს. ამიტომაც ისღა დაგვრჩენია, ვიმკითხაოთ... ოღონდ ყავაზე არა.