რის გამო სწყდება გული სალომე გოგიაშვილს

ტელეწამყვანი სალომე გოგიაშვილი ჯერ "იმედის დილიდან" დაითხოვეს, შემდეგ რადიო "აფხაზეთის ხმაშიც" დაუხურეს გადაცემა. "ციხეში გადაღებული შემაძრწუნებელი კადრების გავრცელების შემდეგ, საკუთარ აზრს ყველგან ვაფიქსირებდი. ვიცოდი, ამას სამსახურიდან ჩემი გათავისუფლება მოჰყვებოდა, მაგრამ უკან არ დამიხევია; არც ერთი სამსახური არ მიღირს იმად, რომ ასეთ რაღაცებზე თვალი დავხუჭო", - გვითხრა სალომემ.

ცოტა ხნის წინ, ლეონიდ აგუტინისა და ანჟელიკა ვარუმის კონცერტზე დასასწრები ბილეთების შოვნით აღფრთოვანებულმა სალომემ "ფეისბუკის" საკუთარ გვერდზე დაწერა, - რა ცოტა მყოფნის ბედნიერებისთვისო და "აფხაზეთის ხმის" საინფორმაციო სამსახურის უფროსის - ლაშა ბერულავას (რომელსაც თურმე სალომე არც იცნობდა) "საკბილოც" გახდა...

- სოციალური ქსელის აქტიური მომხმარებელი ხარ. ამას წინათ დაწერე, - გოიმურ სტატუსებს ვერ ვიტანო...
- ჩემი სტატუსი ბავშვობის მეგობარ გოგონას დავუწერე. ვხუმრობდით, რაც ბოროტად გამოიყენეს...

- აგუტინისა და ვარუმის კონცერტზე მართლა იყავი?
- თითქმის ნახევარი ბავშვობა მოსკოვში გავატარე. იქ ვცხოვრობდი, ვსწავლობდი და ცხადია, ძალიან ბევრი რუსი მეგობარი მყავს. ჩემი ნათლულიც მოსკოვში ცხოვრობს. ამ ქალაქის მიმართ ნოსტალგიური გრძნობა მაქვს. აგუტინიც და ვარუმიც დიდი ხანია, მიყვარს. ყველა ჩემმა მეგობარმა იცის, რომ ამ მომღერლებზე ვგიჟდები! გაჰიტებამდე, რადიოში მათი სიმღერა მე მივიტანე და ნიკუშა ხაჩიძეს ვუთხარი, - ნახე, რა მაგარი სიმღერა ჩაწერეს-მეთქი. სამწუხაროდ, გვიან შევიტყვე, რომ თბილისში მათი კონცერტი იმართებოდა და "მეორედ მოსვლა" ავტეხე: კონცერტზე რომ არ წავიდე, საცოდაობა იქნება-მეთქი!.. საღამოს მეუღლემ ბილეთები მომიტანა, მე კი მისმა სიურპრიზმა ისე გამახარა, რომ ბილეთებს ფოტო გადავუღე და მოსკოვში მყოფ ჩემს მეგობარს "ფეისბუკის" "კედელზე" დავუდე. თან, მივაწერე: ბედნიერებისთვის რა ცოტა მყოფნის, გიჟივით ვარ-მეთქი. რატომღაც, ეს ამბავი ვიღაცებმა ცუდად გამოიყენეს...

- აგვისტოს ომის მერე, აგუტინის პლაკატი ცნობილი სერიალის - "შუა ქალაქში" პოპულარულმა პერსონაჟმა, ქეთევანმაც კი ჩამოხსნა...
- რა სისულელეა! ყველას თავისი შეხედულება აქვს. მე თუ მომწონს და მიყვარს, იმ ადამიანის პლაკატს არაფრის გამო არ ჩამოვხსნი. ზოგადად, ყველაფრის პოლიტიზება მარაზმად მიმაჩნია. პოლიტიკასთან აგუტინი და ვარუმი რა შუაში არიან? ჩვენ მიმართ რუსეთის ხელისუფლება შეიძლება, ცუდად არის განწყობილი, მაგრამ რუსეთის მოქალაქეთა უმეტესობა საქართველოზე "აფრენს"! მხოლოდ მდაბიო ხალხი თუ იტყვის, - რადგან პუტინს მიშა არ უყვარს, რუსეთი უნდა შევიზიზღოთო. რაც მიყვარს, ბოლომდე მიყვარს!

- აგუტინისა და ვარუმის გარდა, რომელ შემსრულებლებს უსმენ? რომელი მუსიკალური ჟანრი მოგწონს?
- ისეთი სიმღერები მომწონს, რაზეც შეიძლება იცეკვო და დრო კარგად გაატარო. სოული მიყვარს. ახლა ერიკ ბენეს კონცერტზე დასწრებაზე ვოცნებობ. მეუღლე შემპირდა, რომ აუცილებლად წამიყვანს. მიყვარს უიტნი ჰიუსტონი, მაიკლ ჯეკსონი, ბარი უაითი, ქეიტ ჯარეტი, იან გარბარეკის კომპოზიციები... კლასიკური მუსიკა მომწონს, მაგრამ სიტუაციასაც ხომ გააჩნია: მანქანაში კლასიკას ვერ მოვუსმენ...

- წიგნების კითხვა თუ გიყვარს?
- არ მოგატყუებ, კითხვას ბავშვობაში უფრო მეტად ვახერხებდი. ახლა საამისო დრო არ მაქვს, მთელი დღე "გადარბენაზე" ვარ და წამოწოლისა და წიგნის კითხვისთვის დრო არ მრჩება...

- კინოთეატრებს თუ სტუმრობ?
- სიამოვნებით. ახლა "კომას" ნახვა გვინდოდა, მაგრამ გვითხრეს, - მძიმე საყურებელიაო და არ წავედით; ცხოვრება ისედაც პრობლემატურია და "მძიმე" ფილმები ჩემზე უარყოფითად მოქმედებს, ამიტომ მათ ნახვას თავს ვარიდებ... მელოდრამა მიყვარს. "ბოევიკებს" ვერ ვიტან, ჩემი ქმარი კი ფილმებში იარაღის ტრიალზე გიჟდება! და ამის გამო სულ ვჩხუბობთ.

- ანუ ფილმებს ერთად არ უყურებთ?
- არა! როგორც კი ჩემი შერჩეული ფილმი იწყება, მეუღლე მაშინვე იძინებს. ახლახან "უდაბნოს ყვავილი" ვნახე, რომელიც რეალური ამბის მიხედვით არის გადაღებული. "ხელშეუხებელნი" სიგიჟემდე მომწონს, არაჩვეულებრივი ფილმია! სამჯერ ვნახე...

- თეატრში დადიხარ?
- თეატრში სიარული უფრო ნაკლებად მიყვარს, ვიდრე - კინოში, მაგრამ ჩემი უახლოესი მეგობარი, ჯაბა კილაძე ლამის ყოველი სპექტაკლის წინ მირეკავს: სალომე, სალაროში ბილეთი გელოდება და მოდიო. ჯაბა "თავისუფალ თეატრში" თამაშობს. იქ კი მოგეხსენებათ, 1000-კაციანი დარბაზი არ არის და რომ არ მივიდე, ამას აუცილებლად შეამჩნევს (იღიმის). სხვათა შორის, სპექტაკლში თამაშზე მეც ვოცნებობ. მიუხედავად იმისა, რომ კინოსკენ უფრო მეტად "ვიხრები", საკუთარი თავი სცენაზე მაინტერესებს...

- რომელიმე ფილმში გითამაშია?
- ერეკლე ბადურაშვილის ფილმში - "კიდევ ერთი ქართული ისტორია" უმნიშვნელო, ეპიზოდური როლი შევასრულე.

- შენთვის სამაგალითო მსახიობი ვინ არის?
- ჯულია რობერტსზე ვგიჟდები. მამაკაცი მსახიობებიდან ჯეკ ნიკოლსონი ისე მომწონს, რომ "ტვინი მეკეტება"! ამას წინათ, ერთ საღამოზე გახლდით, სადაც ძველი თაობის ბევრი ქართველი მსახიობი მოვიდა. ისინი ნიჭითა და შემოქმედებით ჯეკ ნიკოლსონს არაფრით ჩამოუვარდებიან, მაგრამ მისგან განსხვავებით, რთულ პირობებში უწევთ ცხოვრება; ბიძინა რომ არ ჰყავდეთ, არ ვიცი, რითი იცხოვრებდნენ. მათ გამო, გული დამწყდა. ქართველებმა, უპირველეს ყოვლისა, ჩვენი ნიჭიერი ხალხის დაფასება უნდა ვისწავლოთ; მსოფლიო ვარსკვლავების ჩამოყვანას ჯობია, ჩვენს ხალხს მოვუაროთ!..

- ქართულ ტელეგადაცემებს როგორ შეაფასებ? შენი აზრით, ყველაზე ხარისხიანი და გემოვნებიანი გადაცემა რომელია?
- ჩვენი რეალობა ასეთია: მეტ-ნაკლებად ხარისხიან გადაცემას "ვაკეთებთ", თუმცა "რუსთავი 2" უფრო მაღალ ხარისხს რომ "დებს", ვიდრე - "იმედი", ეს უდავოა... ალბათ, როცა ხედავ, რომ არც პროდიუსერია მონდომებული, არც გადაცემის შესაბამისი ინტერიერი გაქვს, არც - ხელფასი, შენც "ეშვები"... ზოგადად, მიმაჩნია, რომ დილის გადაცემის წამყვანს დანარჩენებზე მაღალი ხელფასი უნდა ჰქონდეს, რადგან პირდაპირ ეთერში დილით მუშაობა რთულია.

- ხელფასთან დაკავშირებით უკმაყოფილება ხომ არ გამოგითქვამს? სამსახურიდან შენი გათავისუფლების რეალური მიზეზი ეს ხომ არ იყო?
- არა, ხელფაზე პრეტენზია არასოდეს გამომითქვამს. ახლობლები სულ ამის გამო მეჩხუბებიან, - რატომ გერიდება? მუშაობ და ის უნდა მოითხოვო, რაც გეკუთვნისო! ფინანსურ საკითხებზე ლაპარაკს ყოველთვის თავს ვარიდებ. ასეთ დროს ვხვდები, პროდიუსერის ყოლა რა მაგარია!

- სალომე, ბრენდულ სამოსს ირჩევ?
- სამოსი შეიძლება, ბაზრობაზეც შევიძინო. ეს ჩემთვის პრობლემა არ არის. მთავარია, მომეწონოს, მოვირგო და მასში თავი კომფორტულად ვიგრძნო... კარგია, როცა ხარისხიანი ტანსაცმელი გაცვია, მაგრამ ხშირად ამის საშუალება არ მაქვს; ამის გამო დეპრესიაში არასდროს ჩავვარდნილვარ.

- მეუღლის სამოსის შერჩევაზე თუ ზრუნავ?
- მას ძალიან კარგი გემოვნება აქვს. დილით სადმე წასვლას რომ აპირებს, რჩევას მეკითხება, მაგრამ ტანსაცმელს დამოუკიდებლად ყიდულობს - ზუსტად იცის, რა უნდა. სამოსის შერჩევაში თავად მეხმარება.

- სახლში, ინტერიერის დიზაინზე დამოუკიდებლად ზრუნავ?
- ამ შემთხვევაში მირჩევნია, რჩევისთვის გამოცდილ დიზაინერს მივმართო...

- როგორი კერძები მოგწონს? მათი მომზადება თავად თუ იცი?
- მხოლოდ ნამცხვრის გამოცხობა არ ვიცი, თორემ გემრიელ კერძებს ვამზადებ. ძირითადად, ევროპულ სამზარეულოს "ვაწვები". ჩემს მეუღლეს ზღვის პროდუქტებისგან მომზადებული საჭმელი უყვარს, მე კი ცხვრის ხორცისა და რძის გარდა, ყველაფერს გემრიელად მივირთმევ.

- სალომე, საკუთარ თავს გემოვნებიან ადამიანად მიიჩნევ?
- რთული კითხვაა. ამაზე დადებითი პასუხი რომ გაგცე, ძალიან ამბიციური ნათქვამი გამომივა. თუმცა, ვერც იმას ვიტყვი, რომ უგემოვნო ვარ...

ეთო ყორღანაშვილი
ჟურნალი ”გზა”